ڈی پی ورلڈ کی کمپنی ڈرائی ڈاکس ورلڈ اور کوچین شپ یارڈ لمیٹڈ نے آج انٹرنیشنل شپ ریپئر فیسلٹی، کوچین کو چلانے اور وسعت دینے کے لیے مشترکہ منصوبے کے معاہدے پر دستخط کرنے کا اعلان کیا۔

اس معاہدے پر ڈرائی ڈاکس ورلڈ کے چیف ایگزیکٹو آفیسر کیپٹن رادو انتولووِک، پی ایچ ڈی، اور کوچین شپ یارڈ لمیٹڈ کے چیئرمین اور منیجنگ ڈائریکٹر جناب جوز وی جے نے نئی دہلی میں منعقدہ برکس سربراہی اجلاس 2026 کے موقع پر دستخط کیے۔ اس موقع پر بندرگاہوں، جہاز رانی اور آبی گزرگاہوں کے مرکزی وزیر سربانند سونووال اور متحدہ عرب امارات کے ایڈوانسڈ سائنس اینڈ ٹیکنالوجی کے اسسٹنٹ وزیر خارجہ عزت مآب عمران شرف الہاشمی بھی موجود تھے۔

یہ معاہدہ اس مفاہمت کی یادداشت (ایم او یو) کی بنیاد پر کیا گیا ہے جس پر ڈرائی ڈاکس ورلڈ اور سی ایس ایل نے انڈیا میری ٹائم ویک 2025 کے دوران دستخط کیے تھے۔ اس کے تحت دونوں اداروں نے جہازوں کی مرمت اور متعلقہ بحری خدمات کے شعبے میں تعاون کے مواقع تلاش کرنے پر اتفاق کیا تھا۔ اب دونوں کمپنیوں نے 50:50 مشترکہ منصوبے کے ذریعے اس تعاون کو باقاعدہ شکل دے دی ہے، جو بھارت کے جہاز مرمت کے شعبے میں اپنی نوعیت کی پہلی سرکاری و نجی شراکت داری کے قیام کی علامت ہے۔

اس انتظام کے تحت مشترکہ منصوبہ کوچین میں انٹرنیشنل شپ ریپئر فیسلٹی کو چلائے گا، اسے مستحکم کرے گا اور وسعت دے گا، جس سے مزید گنجائش پیدا ہوگی تاکہ زیادہ اقسام کے جہازوں کی خدمات انجام دی جا سکیں اور بھارتی، علاقائی اور بین الاقوامی صارفین کی بڑھتی ہوئی ضروریات پوری کی جا سکیں۔

توقع ہے کہ یہ شراکت داری کوچین کی بحری خدمات کے مرکز کے طور پر حیثیت کو مزید مستحکم کرے گی، جبکہ کیرالہ میں جہازوں کی مرمت، انجینئرنگ، فیبریکیشن اور متعلقہ بحری خدمات کے شعبوں میں نئے مواقع پیدا ہوں گے۔

بندرگاہوں، جہاز رانی اور آبی گزرگاہوں کے مرکزی وزیر سربانند سونووال نے کہا: ”کوچین شپ یارڈ اور ڈرائی ڈاکس ورلڈ کے درمیان یہ شراکت داری بھارت کے جہاز مرمت کے ماحولیاتی نظام کو مستحکم کرنے کی جانب ایک اہم سنگ میل ہے اور بھارت اور متحدہ عرب امارات کے درمیان دیرینہ بحری تعلقات کی عکاسی کرتی ہے، جو صدیوں سے تجارت، کاروبار اور عوامی سطح کے روابط کے ذریعے فروغ پاتے رہے ہیں۔ وزیر اعظم نریندر مودی اور عزت مآب شیخ محمد بن زاید آل نہیان کا مشترکہ وژن اور عزم اس تعلق کو تزویراتی اور اقتصادی شعبوں میں نئی رفتار دے رہا ہے۔ بھارت کی بڑھتی ہوئی جہاز سازی اور جہاز مرمت کی صلاحیتوں کو متحدہ عرب امارات کی عالمی بحری مہارت کے ساتھ یکجا کرکے یہ مشترکہ منصوبہ نئی گنجائش، ہنرمندی اور اقتصادی مواقع پیدا کرے گا، جبکہ کوچین کو بحری خدمات کے مرکز کے طور پر مزید مستحکم کرے گا۔ وزیر اعظم نریندر مودی کی متحرک قیادت میں بھارت دنیا کی سرکردہ بحری اقوام میں شامل ہونے کی سمت مضبوطی سے گامزن ہے اور یہ شراکت داری میری ٹائم امرت کال وژن 2047 کے تحت اس عزائم کو عملی جامہ پہنانے کی جانب ایک اور قدم ہے۔“

متحدہ عرب امارات کے ایڈوانسڈ سائنس اینڈ ٹیکنالوجی کے اسسٹنٹ وزیر خارجہ عزت مآب عمران شرف الہاشمی نے کہا: ”متحدہ عرب امارات اور بھارت کے درمیان باہمی اعتماد، اقتصادی تعاون اور ترقی کے نئے راستے پیدا کرنے کے مشترکہ عزم پر مبنی دیرینہ تعلقات ہیں۔ ڈرائی ڈاکس ورلڈ اور کوچین شپ یارڈ کے درمیان مشترکہ منصوبہ اس بات کی ایک مضبوط مثال ہے کہ یہ شراکت داری کس طرح ٹھوس صنعتی نتائج میں تبدیل ہو سکتی ہے۔ اس کے ذریعے ایک دوسرے کی تکمیل کرنے والی مہارتوں کو یکجا کرکے بھارت کی بحری صلاحیتوں کو مستحکم کیا جا رہا ہے۔ بھارت کی بڑھتی ہوئی بحری استعداد کو متحدہ عرب امارات کے عالمی تجربے کے ساتھ ملا کر اس طرح کا تعاون زیادہ مؤثر جہاز مرمت خدمات، مضبوط بحری رابطے اور دونوں ممالک کے درمیان تجارت و کاروبار کی مسلسل ترقی میں معاون ثابت ہو سکتا ہے۔“

بندرگاہوں، جہاز رانی اور آبی گزرگاہوں کی وزارت کے سکریٹری وجے کمار نے کہا: ”یہ مشترکہ منصوبہ صرف کوچی تک محدود نہیں رہے گا۔ یہ ایک ایسا قابل تقلید ماڈل ہے جسے بھارت کی وسیع ساحلی پٹی کے دیگر حصوں میں بھی وسعت دی جا سکتی ہے، جس سے جہازوں کی مرمت اور تبدیلی کے شعبے میں اعلیٰ معیار کے مراکز قائم ہوں گے۔ بھارت کے تزویراتی محل وقوع اور عالمی تجارتی راستوں سے قربت سے فائدہ اٹھاتے ہوئے یہ مشترکہ منصوبہ غیر ملکی سرمایہ کاری کو راغب کرے گا، زرمبادلہ پیدا کرے گا اور ہزاروں ہنرمند روزگار کے مواقع پیدا کرے گا۔ یہ میری ٹائم امرت کال وژن 2047 سے بھی ہم آہنگ ہوگا اور بھارت کو جہاز سازی اور جہاز مرمت کے شعبے میں عالمی طاقت کے طور پر قائم کرنے میں مدد دے گا۔ اس مشترکہ منصوبے کے معاہدے پر دستخط محض ایک کاروباری معاہدہ نہیں بلکہ عزم کا اظہار ہے۔ یہ اس امر کا اشارہ ہے کہ بھارت عالمی سطح پر مقابلہ کرنے، عالمی معیار کی بحری خدمات فراہم کرنے اور ایسی شراکت داریاں قائم کرنے کے لیے تیار ہے جو اس کی معیشت اور تزویراتی صلاحیتوں کو مستحکم کریں گی۔“

ڈرائی ڈاکس ورلڈ کے چیف ایگزیکٹو آفیسر کیپٹن رادو انتولووِک، پی ایچ ڈی نے کہا: ”کوچین شپ یارڈ کے ساتھ یہ شراکت داری بھارت کی جہاز مرمت کی صنعت کے لیے ایک اہم سنگ میل ہے اور گزشتہ سال ہونے والی ہماری مفاہمت کی یادداشت کی مضبوط بنیاد پر قائم ہے۔ کوچین شپ یارڈ کی مقامی مہارت اور ہنرمند افرادی قوت کو ڈرائی ڈاکس ورلڈ کی عالمی صلاحیتوں اور ٹیکنالوجی کے ساتھ یکجا کرکے ہم عالمی معیار کی جہاز مرمت کی خدمات فراہم کرنے کا نظام تشکیل دے رہے ہیں۔ ہمارا عزم صرف ایک سہولت تک محدود نہیں ہے، بلکہ ہم پورے بھارت میں جہاز مرمت اور فیبریکیشن کی صلاحیتوں کو وسعت دینے کے مواقع دیکھ رہے ہیں۔“

کوچین شپ یارڈ لمیٹڈ کے چیئرمین اور منیجنگ ڈائریکٹر جوز وی جے نے کہا: ”ڈرائی ڈاکس ورلڈ دبئی کے ساتھ یہ مشترکہ منصوبہ بھارت کے عالمی جہاز مرمت مرکز بننے کے سفر میں ایک فیصلہ کن لمحہ ہے۔ سی ایس ایل کے گہرے ملکی تجربے کو ڈی ڈی ڈبلیو کی عالمی معیار کی مہارت کے ساتھ یکجا کرکے ہم محض کاروبار کو وسعت نہیں دے رہے بلکہ عالمی بہترین طریقہ ہائے کار کو اپنا رہے ہیں، کام کی تکمیل کے دورانیے کو کم کر رہے ہیں اور معیار و سلامتی کے لیے نئے معیارات قائم کر رہے ہیں۔ کوچی میں واقع انٹرنیشنل شپ ریپئر فیسلٹی کے مرکز میں قائم یہ شراکت داری ایک فعال مرمتی کلسٹر کے قیام کو فروغ دے گی، بین الاقوامی بحری بیڑوں کو راغب کرے گی، اعلیٰ مہارت کے حامل روزگار پیدا کرے گی اور میری ٹائم انڈیا 2030 اور امرت کال 2047 کے وژن کو آگے بڑھائے گی۔“

یہ شراکت داری سی ایس ایل کی جہاز سازی اور مرمت کی مستحکم صلاحیتوں، انجینئرنگ کی مہارت اور ہنرمند افرادی قوت کو ڈرائی ڈاکس ورلڈ کے اعلیٰ درجے کے بحری جہازوں کی مرمت و دیکھ بھال، بڑی تبدیلیوں اور آف شور انجینئرنگ، پروکیورمنٹ اینڈ کنسٹرکشن کے شعبوں میں عالمی تجربے کے ساتھ یکجا کرتی ہے۔ اہم بین الاقوامی بحری راستوں کے ساتھ تزویراتی طور پر واقع اس سہولت میں جدید ترین شپ لفٹ نظام اور جدید ڈاکنگ سہولیات موجود ہیں، جو مختلف اقسام کے جہازوں کی خدمات انجام دینے کی صلاحیت رکھتی ہیں۔

ڈرائی ڈاکس ورلڈ اور کوچین شپ یارڈ لمیٹڈ دونوں کے پاس مشترکہ منصوبے میں 50 فیصد، 50 فیصد حصص ہوں گے، جبکہ ابتدائی سرمایہ دونوں فریقوں کی جانب سے ایکویٹی شراکت کے ذریعے فراہم کیا جائے گا۔

 

********

 

ش ح۔ ف ش ع

                                                                                                                                       U: 3335 

(ریلیز آئی ڈی: 2309351) وزیٹر کاؤنٹر : 6