ಭಾರತ ಸರ್ಕಾರದ, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಅಡಿಯಲ್ಲಿರುವ ಸ್ವಾಯತ್ತ ಸಂಸ್ಥೆಯಾದ ಭಾರತೀಯ ಫಾರ್ಮಾಕೋಪಿಯಾ ಕಮಿಷನ್ (IPC), 2026ರ ಸೆಪ್ಟೆಂಬರ್ 10-11 ರಂದು ಬೆಂಗಳೂರಿನ 'ಸೆಂಟರ್ ಫಾರ್ ಸೆಲ್ಯುಲಾರ್ ಅಂಡ್ ಮೋಲಿಕ್ಯುಲರ್ ಪ್ಲಾಟ್‌ಫಾರ್ಮ್ಸ್' (C-CAMP) ನಲ್ಲಿ "ಬಯೋಸಿಮಿಲರ್‌ಗಳ ಗುಣಮಟ್ಟ ಮತ್ತು ಸುರಕ್ಷತೆ: ಭಾರತದ ಬೈಯೋಫಾರ್ಮಾ 'ಶಕ್ತಿ' ದೃಷ್ಟಿಕೋನಕ್ಕೆ ಬಲ" ಎಂಬ ವಿಷಯದ ಮೇಲೆ ಎರಡು ದಿನಗಳ ರಾಷ್ಟ್ರೀಯ ಸಮ್ಮೇಳನವನ್ನು ಆಯೋಜಿಸಿತ್ತು. ಈ ಸಮ್ಮೇಳನದಲ್ಲಿ ನಿಯಂತ್ರಣ ಪ್ರಾಧಿಕಾರಗಳು, ಉದ್ಯಮ, ಶೈಕ್ಷಣಿಕ ಕ್ಷೇತ್ರ, ಸಂಶೋಧನಾ ಸಂಸ್ಥೆಗಳು ಮತ್ತು ಇತರ ಪಾಲುದಾರ ತಂಡಗಳಿಂದ 160 ಪ್ರತಿನಿಧಿಗಳು ಭಾಗವಹಿಸಿದ್ದರು.

ಈ ಸಮ್ಮೇಳನವನ್ನು ಐಪಿಸಿ (IPC) ಸಂಸ್ಥೆಯು 'ಇಂಡಿಯನ್ ಡ್ರಗ್ ಮ್ಯಾನುಫ್ಯಾಕ್ಚರರ್ಸ್ ಅಸೋಸಿಯೇಷನ್' (IDMA) ಸಹಯೋಗದೊಂದಿಗೆ ಆಯೋಜಿಸಿತ್ತು. 'ಬಯೋಟೆಕ್ನಾಲಜಿ ಇಂಡಸ್ಟ್ರಿ ರಿಸರ್ಚ್ ಅಸಿಸ್ಟೆನ್ಸ್ ಕೌನ್ಸಿಲ್' (BIRAC) ಮತ್ತು 'ಸೆಂಟರ್ ಫಾರ್ ಸೆಲ್ಯುಲಾರ್ ಅಂಡ್ ಮೋಲಿಕ್ಯುಲರ್ ಪ್ಲಾಟ್‌ಫಾರ್ಮ್ಸ್' (C-CAMP) ಜ್ಞಾನ ಪಾಲುದಾರರಾಗಿ ಹಾಗೂ 'ಕರ್ನಾಟಕ ಡ್ರಗ್ಸ್ ಅಂಡ್ ಫಾರ್ಮಾಸ್ಯುಟಿಕಲ್ಸ್ ಮ್ಯಾನುಫ್ಯಾಕ್ಚರರ್ಸ್ ಅಸೋಸಿಯೇಷನ್' (KDPMA) ಸಹವರ್ತಿ ಪಾಲುದಾರರಾಗಿ ಕಾರ್ಯನಿರ್ವಹಿಸಿದವು. ನಾವೀನ್ಯತೆ, ಸ್ವಾವಲಂಬನೆ, ಗುಣಮಟ್ಟ ಮತ್ತು ಜಾಗತಿಕ ಸ್ಪರ್ಧಾತ್ಮಕತೆಯ ಮೂಲಕ ಭಾರತದ ಜೈವಿಕ-ಫಾರ್ಮಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವ ಭಾರತ ಸರ್ಕಾರದ ಬೈಯೋಫಾರ್ಮಾ 'ಶಕ್ತಿ' (SHAKTI) ದೃಷ್ಟಿಕೋನಕ್ಕೆ ಈ ಸಮ್ಮೇಳನವು ಅನುಗುಣವಾಗಿದೆ.

ಈ ಸಮ್ಮೇಳನದಲ್ಲಿ ಫಾರ್ಮಾಕೋಪಿಯಲ್ ಮಾನದಂಡಗಳು, ನಿರ್ಣಾಯಕ ಗುಣಮಟ್ಟದ ಲಕ್ಷಣಗಳು, ವಿಶ್ಲೇಷಣಾತ್ಮಕ ಗುಣಲಕ್ಷಣಗಳು, ಹೋಲಿಕೆ ಮೌಲ್ಯಮಾಪನ, ಇಮ್ಯುನೊಜೆನಿಸಿಟಿ, ಫಾರ್ಮಾಕೋವಿಜಿಲೆನ್ಸ್ ಮತ್ತು ವಿಕಸನಗೊಳ್ಳುತ್ತಿರುವ ನಿಯಂತ್ರಣ ನಿರೀಕ್ಷೆಗಳಿಗೆ ಒತ್ತು ನೀಡುವ ಮೂಲಕ ಬಯೋಸಿಮಿಲರ್‌ಗಳ ಅಭಿವೃದ್ಧಿ, ಮೌಲ್ಯಮಾಪನ ಮತ್ತು ಸುರಕ್ಷತೆಗೆ ಸಂಬಂಧಿಸಿದ ಪ್ರಮುಖ ವೈಜ್ಞಾನಿಕ ಮತ್ತು ನಿಯಂತ್ರಕ ಮುಂತಾದ ಸವಾಲುಗಳ ಬಗ್ಗೆ  ಚರ್ಚಿಸಲಾಯಿತು.

ಬಯೋಅಸ್ಸೇಗಳಿಗಾಗಿ (bioassays) 'ಎನೋಕ್ಸಪಾರಿನ್ ಸೋಡಿಯಂ'ನ (Enoxaparin Sodium) ಭಾರತೀಯ ಫಾರ್ಮಾಕೋಪಿಯಾ ಉಲ್ಲೇಖಿತ ವಸ್ತುವನ್ನು (IPRS) ಬಿಡುಗಡೆ ಮಾಡಿದ್ದು ಈ ಸಮ್ಮೇಳನದ ಪ್ರಮುಖ ಮುಖ್ಯಾಂಶವಾಗಿತ್ತು. ಎನೋಕ್ಸಪಾರಿನ್ ಸೋಡಿಯಂ ಎಂಬುದು ಕಡಿಮೆ-ಅಣು-ತೂಕದ ಹೆಪಾರಿನ್ ಮತ್ತು ಹೆಪ್ಪುರೋಧಕವಾಗಿದ್ದು (anticoagulant), ಥ್ರೊಂಬೋಎಂಬೊಲಿಕ್ ಅಸ್ವಸ್ಥತೆಗಳ ತಡೆಗಟ್ಟುವಿಕೆ ಮತ್ತು ಚಿಕಿತ್ಸೆಯಲ್ಲಿ ವ್ಯಾಪಕವಾಗಿ ಬಳಸಲಾಗುತ್ತದೆ. ಬಯೋಅಸ್ಸೇ ಪರೀಕ್ಷೆಗೆ ಈ ಐಪಿಆರ್‌ಎಸ್ (IPRS) ದೃಢೀಕೃತ ಉಲ್ಲೇಖಿತ ವಸ್ತುವಾಗಿ ಕಾರ್ಯನಿರ್ವಹಿಸಲಿದ್ದು, ಅದರ ಜೈವಿಕ ಚಟುವಟಿಕೆಯ ನಿಖರ, ಸತತ ಮತ್ತು ಹೋಲಿಸಬಹುದಾದ ಮೌಲ್ಯಮಾಪನವನ್ನು ಬೆಂಬಲಿಸುತ್ತದೆ. ಐಪಿಆರ್‌ಎಸ್‌ನ ಈ ಬಿಡುಗಡೆಯು ಎನೋಕ್ಸಪಾರಿನ್ ಸೋಡಿಯಂನ ಬಯೋಅಸ್ಸೇ-ಸಂಬಂಧಿತ ಪರೀಕ್ಷೆಗಾಗಿ ದೃಢೀಕೃತ ಫಾರ್ಮಾಕೋಪಿಯಲ್ ಉಲ್ಲೇಖಿತ ವಸ್ತುಗಳ ಲಭ್ಯತೆಯನ್ನು ಬಲಪಡಿಸುವಲ್ಲಿ ಪ್ರಮುಖ ಪ್ರಗತಿಯನ್ನು ಸೂಚಿಸುತ್ತದೆ, ಜೊತೆಗೆ ಭಾರತದ ಸ್ವದೇಶಿ ಔಷಧೀಯ ಗುಣಮಟ್ಟದ ಮೂಲಸೌಕರ್ಯವನ್ನು ಬಲಪಡಿಸುವ ಮೂಲಕ 'ಸ್ವಾವಲಂಬಿ ಭಾರತ' ದೃಷ್ಟಿಕೋನಕ್ಕೆ ಕೊಡುಗೆ ನೀಡುತ್ತದೆ.

ಉದ್ಘಾಟನಾ ಸಮಾರಂಭದಲ್ಲಿ ಐಪಿಸಿ, ಎಸ್‌ಎಲ್‌ಎ-ಕರ್ನಾಟಕ, ಎನ್‌ಐಬಿ, ಐಡಿಎಮ್‌ಎ, ಸಿ-ಕ್ಯಾಂಪ್ ಮತ್ತು ಬಿಐಆರ್‌ಎಸಿ ಸಂಸ್ಥೆಗಳ ಪ್ರತಿಷ್ಠಿತ ಪ್ರತಿನಿಧಿಗಳು ಮಾತನಾಡಿದರು, ಅವರು ಬಯೋಸಿಮಿಲರ್‌ಗಳಲ್ಲಿ ಗುಣಮಟ್ಟ, ಸುರಕ್ಷತೆ ಮತ್ತು ನಿಯಂತ್ರಕ ವಿಶ್ವಾಸವನ್ನು ಬಲಪಡಿಸುವ ಮಹತ್ವವನ್ನು ಒತ್ತಿಹೇಳಿದರು. ದೃಢವಾದ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕ ಜೈವಿಕ-ಔಷಧೀಯ ವಲಯದ ಅಭಿವೃದ್ಧಿಯನ್ನು ಬೆಂಬಲಿಸಲು ನಿಯಂತ್ರಣ ಪ್ರಾಧಿಕಾರಗಳು, ಫಾರ್ಮಾಕೋಪಿಯಲ್ ಸಂಸ್ಥೆಗಳು, ಉದ್ಯಮ, ಶೈಕ್ಷಣಿಕ ಕ್ಷೇತ್ರ ಮತ್ತು ಸಂಶೋಧನಾ ಸಂಸ್ಥೆಗಳ ನಡುವೆ ನಿರಂತರ ಸಹಕಾರದ ಅಗತ್ಯವನ್ನು ಈ ಅಧಿವೇಶನವು ಎತ್ತಿ ತೋರಿಸಿದೆ.

ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಐಪಿಸಿಯ ಕಾರ್ಯದರ್ಶಿ ಹಾಗೂ ವೈಜ್ಞಾನಿಕ ನಿರ್ದೇಶಕರಾದ ಡಾ. ವಿ. ಕಲೈಸೆಲ್ವನ್ ಅವರು, ಬಯೋಸಿಮಿಲರ್‌ಗಳ ಗುಣಮಟ್ಟ ಮತ್ತು ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಫಾರ್ಮಾಕೋಪಿಯಲ್ ಮಾನದಂಡಗಳನ್ನು ಬಲಪಡಿಸುವುದು, ವಿಶ್ವಾಸಾರ್ಹ ವಿಶ್ಲೇಷಣಾತ್ಮಕ ಮೌಲ್ಯಮಾಪನ, ಸುರಕ್ಷತಾ ಮೇಲ್ವಿಚಾರಣೆ ಮತ್ತು ನಿಯಂತ್ರಕ ಸಹಕಾರದ ಮಹತ್ವವನ್ನು ಹೈಲೈಟ್ ಮಾಡಿದರು. ವಿಕಸನಗೊಳ್ಳುತ್ತಿರುವ ನಿಯಂತ್ರಕ ನಿರೀಕ್ಷೆಗಳೊಂದಿಗೆ ಭಾರತೀಯ ಪದ್ಧತಿಗಳನ್ನು ಸರಿಹೊಂದಿಸುವ, ಜೈವಿಕ-ಔಷಧೀಯ ನಾವೀನ್ಯತೆಯನ್ನು ಬೆಂಬಲಿಸುವ ಮತ್ತು 'ವಿಕಸಿತ ಭಾರತ'ದ ಆಶಯಕ್ಕೆ ಕೊಡುಗೆ ನೀಡುವ ಅಗತ್ಯವನ್ನು ಅವರು ಒತ್ತಿಹೇಳಿದರು.

ತಾಂತ್ರಿಕ ಸಭೆಗಳಲ್ಲಿ ಐಪಿಸಿ, ಎಸ್‌ಎಲ್‌ಎ, ಡಬ್ಲ್ಯೂಎಚ್‌ಒ (WHO), ಯುಎಸ್‌ಪಿ (USP), ಎನ್‌ಐಬಿ, ಐಡಿಎಮ್‌ಎ, ಬಿಐಆರ್‌ಎಸಿ, ಸಿ-ಕ್ಯಾಂಪ್ ಮತ್ತು ಪ್ರಮುಖ ಜೈವಿಕ-ಔಷಧೀಯ ಸಂಸ್ಥೆಗಳ ತಜ್ಞರು ಭಾಗವಹಿಸಿ, ಫಾರ್ಮಾಕೋಪಿಯಲ್ ಮಾನದಂಡ-ನಿರ್ಧಾರ, ನಿಯಂತ್ರಕ ವಿಜ್ಞಾನ, ವಿಶ್ಲೇಷಣಾತ್ಮಕ ಅಭಿವೃದ್ಧಿ, ಸುರಕ್ಷತಾ ಮೇಲ್ವಿಚಾರಣೆ ಮತ್ತು ಜೈವಿಕ ಉತ್ಪನ್ನಗಳಲ್ಲಿನ ನಾವೀನ್ಯತೆಯನ್ನು ಒಳಗೊಂಡಂತೆ ವಿವಿಧ ವಿಷಯಗಳ ಕುರಿತು ತಮ್ಮ ದೃಷ್ಟಿಕೋನಗಳನ್ನು ಹಂಚಿಕೊಂಡರು.

ಸಮ್ಮೇಳನದ ಮೊದಲ ದಿನದಂದು ಆಯೋಜಿಸಲಾಗಿದ್ದ ವಿಶೇಷ ಸಮಿತಿಯ ಚರ್ಚೆಯಲ್ಲಿ, ನಿಯಂತ್ರಣ ಪ್ರಾಧಿಕಾರಗಳು, ಜೈವಿಕ-ಔಷಧೀಯ ಉದ್ಯಮ ಮತ್ತು ಶೈಕ್ಷಣಿಕ ಕ್ಷೇತ್ರದ ಹಿರಿಯ ತಜ್ಞರು ಒಂದೆಡೆ ಸೇರಿ ಭಾರತದ ಬಯೋಸಿಮಿಲರ್ ಪರಿಸರ ವ್ಯವಸ್ಥೆಯನ್ನು ಬಲಪಡಿಸಲು ಅಗತ್ಯವಿರುವ ಕ್ರಮಗಳನ್ನು ಪರಿಶೀಲಿಸಿದರು. ಈ ಚರ್ಚೆಯು ಗುಣಮಟ್ಟದ ಭರವಸೆ, ವಿಶ್ಲೇಷಣಾತ್ಮಕ ಮತ್ತು ನಿಯಂತ್ರಕ ಸಾಮರ್ಥ್ಯಗಳು, ವೈಜ್ಞಾನಿಕ ಸಾಮರ್ಥ್ಯವನ್ನು ಹೆಚ್ಚಿಸುವುದು ಮತ್ತು ವಿಕಸನಗೊಳ್ಳುತ್ತಿರುವ ರಾಷ್ಟ್ರೀಯ ಹಾಗೂ ಜಾಗತಿಕ ನಿಯಂತ್ರಕ ನಿರೀಕ್ಷೆಗಳಿಗೆ ಅನುಗುಣವಾಗಿ ಹೊಂದಿಕೊಳ್ಳುವುದರ ಮೇಲೆ ಗಮನ ಹರಿಸಿತು. ಸಮ್ಮೇಳನದಲ್ಲಿ ಪೋಸ್ಟರ್ ಪ್ರದರ್ಶನಗಳೂ ನಡೆದವು, ಇದರಲ್ಲಿ ಸಂಶೋಧಕರು ಮತ್ತು ಉದ್ಯಮದ ವೃತ್ತಿಪರರು ತಮ್ಮ ವೈಜ್ಞಾನಿಕ ಕಾರ್ಯಗಳನ್ನು ಪ್ರಸ್ತುತಪಡಿಸಿದರು ಮತ್ತು ಬಯೋಸಿಮಿಲರ್‌ಗಳ ಕುರಿತು ತಮ್ಮ ಒಳನೋಟಗಳನ್ನು ಹಂಚಿಕೊಂಡರು.

'ವಿಕಸಿತ ಭಾರತ'ದ ಆಶಯದ ಅನ್ವೇಷಣೆಯಲ್ಲಿ, ಈ ಸಮ್ಮೇಳನವು ಸಾಮರಸ್ಯದ ಮಾನದಂಡಗಳನ್ನು ಮುನ್ನಡೆಸಲು ಮತ್ತು ಜೈವಿಕ-ಔಷಧೀಯ ವಲಯದಲ್ಲಿ ಗುಣಮಟ್ಟ, ಸುರಕ್ಷತೆ, ನಾವೀನ್ಯತೆ ಹಾಗೂ ನಿಯಂತ್ರಕ ಶ್ರೇಷ್ಠತೆಯನ್ನು ಬಲಪಡಿಸಲು ಶ್ರಮಿಸುತ್ತದೆ. ವೈಜ್ಞಾನಿಕ ಚರ್ಚೆಗಳೊಂದಿಗೆ ಬಯೋಅಸ್ಸೇಗಳಿಗಾಗಿ ಎನೋಕ್ಸಪಾರಿನ್ ಸೋಡಿಯಂನ ಐಪಿಆರ್‌ಎಸ್ ಬಿಡುಗಡೆಯು, ಭಾರತದ ಔಷಧೀಯ ಮತ್ತು ಜೈವಿಕ-ಔಷಧೀಯ ಗುಣಮಟ್ಟದ ಮೂಲಸೌಕರ್ಯವನ್ನು ಬಲಪಡಿಸಲು ಹಾಗೂ ನಾವೀನ್ಯತೆಯನ್ನು ಬೆಂಬಲಿಸಲು ಮತ್ತು ನಿಯಂತ್ರಕ ವಿಶ್ವಾಸವನ್ನು ಹೆಚ್ಚಿಸಲು ನಿಯಂತ್ರಕರು, ಉದ್ಯಮ, ಶೈಕ್ಷಣಿಕ ಕ್ಷೇತ್ರ ಮತ್ತು ಸಂಶೋಧನಾ ಸಂಸ್ಥೆಗಳ ನಡುವೆ ಸಹಕಾರವನ್ನು ಬೆಳೆಸಲು ಐಪಿಸಿಯ ನಿರಂತರ ಬದ್ಧತೆಯನ್ನು ಎತ್ತಿಹಿಡಿಯುತ್ತದೆ.

 

*****

(ಪ್ರಕಟಣೆ ಐ.ಡಿ.: 2309217) ವಿಸಿಟರ್ ಕೌಂಟರ್ : 28