سائنس اور ٹیکنالوجی اور ارضیاتی سائنس کے مرکزی وزیر مملکت (آزادانہ چارج) اور وزیر اعظم کے دفتر،عملہ، عوامی شکایات، پنشن، جوہری توانائی اور خلا کے وزیر مملکت ڈاکٹر جتیندر سنگھ نے آج انکشاف کیا کہ ای ایس ٹی آئی سی-2026 (ابھرتا ہوا سائنس ، ٹیکنالوجی اور اختراعی کنکلیو) 27-29 اکتوبر 2026 تک بھارت منڈپم میں منعقد ہوگا، جس کا افتتاح وزیر اعظم جناب نریندر مودی کریں گے اور ممتاز اساتذہ میں تین نوبل انعام یافتہ پروفیسر جوآخم فرینک ، سر رچرڈ جے رابرٹس اور پروفیسر کوستیا نووسویلوف شامل ہوں گے۔

ای ایس ٹی آئی سی-2026 کی نقاب کشائی    کی تقریب سے خطاب کرتے ہوئے، ڈاکٹر جتیندر سنگھ نے کہا کہ سائنس اور ٹیکنالوجی کے بے مثال رفتار سے تیار ہونے کے ساتھ ، ماحولیاتی نظام کو سائنسی صلاحیتوں کے ساتھ ساتھ انتظام ، مواصلات اور دیگر شعبوں سے مہارت حاصل کرنی چاہیے۔

ڈاکٹر جتیندر سنگھ نے کہا کہ ای ایس ٹی آئی سی کا تصور پچھلے سال سائنس اور ٹیکنالوجی کے ماحولیاتی نظام کے متعدد اجزاء کو ایک مشترکہ پلیٹ فارم پر لانے کے لیے ایک نئے نقطہ نظر کے حصے کے طور پر کیا گیا تھا، انہوں نے کہا کہ کانکلیو سائنس اور ٹیکنالوجی کے لیے ایک زیادہ مربوط ماحولیاتی نظام بنانے کے مقصد سے محققین، اختراع کاروں، اسٹارٹ اپس ، کاروباریوں ، صنعت اور پالیسی سازوں کے درمیان قریبی بات چیت کا موقع فراہم کرتا ہے۔

وزیر موصوف نے کہا کہ اب وقت آگیا ہے کہ ادارہ جاتی خامیوں کو توڑا جائے اور سائنسی تحقیق ، اسٹارٹ اپس ، صنعت ، بازاروں اور معاشرے کے درمیان مضبوط روابط پیدا کیے جائیں، تاکہ اختراع کو تیز کیا جا سکے اور ہندوستان کی سائنسی صلاحیتوں کو وسیع تر اقتصادی اور سماجی اثرات میں تبدیل کیا جا سکے۔

ڈاکٹر جتیندر سنگھ نے کہا کہ ای ایس ٹی آئی سی-2026 کا موضوع: ’’تخلیقی ذہن ، سائنس کو متحرک کرنا ، ٹیکنالوجیز کو بااختیار بنانا‘‘ ، سائنسی اختراع میں تخلیقی صلاحیتوں اور تخیل کی اہمیت کو ظاہر کرتا ہے۔ ڈاکٹر سنگھ نے کہا کہ تخلیقی صلاحیتوں اور تخیل سے اختراعی صلاحیتوں کو تقویت ملتی ہے، جبکہ خیالات کو بامعنی نتائج میں تبدیل کرنے کے لیے ایک فعال ماحولیاتی نظام ضروری ہے۔

ہندوستان کی اسٹارٹ اپ ترقی کا حوالہ دیتے ہوئے ڈاکٹر جتیندر سنگھ نے کہا کہ 2014 میں ملک میں تقریباً 350 سے 400 اسٹارٹ اَپ تھے، جبکہ اب یہ تعداد 2.3 لاکھ سے تجاوز کر گئی ہے، جس سے ہندوستان دنیا کا تیسرا سب سے بڑا اسٹارٹ اپ ماحولیاتی نظام بن گیا ہے۔ انہوں نے کہا کہ 50-60 فیصد سے زیادہ اسٹارٹ اَپس اب چھوٹے شہروں سے آ رہے ہیں نہ کہ بڑے شہروں سے، جو ملک بھر میں صنعت کاری اور اختراع کی وسیع تر رسائی کی عکاسی کرتا ہے۔ انہوں نے کہا کہ اس طرح کے ابھرتے ہوئے اسٹارٹ اپس ماہرین ، کاروباریوں ، کاروباری رہنماؤں اور بازاروں تک زیادہ رسائی کے مستحق ہیں۔

وزیر موصوف نے کہا کہ ای ایس ٹی آئی سی کے مستقبل کے ایڈیشن مینجمنٹ اور مواصلاتی اداروں کو مزید وسیع پیمانے پر لا سکتے ہیں۔ انتظامی مہارت اسٹارٹ اَپس اور ممکنہ کاروباریوں کو بازار تک رسائی کے لیے حکمت عملی تیار کرنے میں مدد کر سکتی ہے، جبکہ مواصلاتی مہارت سائنسی کامیابیوں کو نوجوانوں اور معاشرے کے وسیع تر طبقات تک ان کی سمجھ میں آنے والی زبان اور ذرائع کے ذریعے پہنچانے میں مدد کر سکتی ہے۔

ڈاکٹر جتیندر سنگھ نے کہا کہ اس طرح کے فعال ماحولیاتی نظام کی تشکیل کے لیے حکومت کی کوششوں میں نیشنل ریسرچ فاؤنڈیشن اور ایک لاکھ کروڑ روپے کے ریسرچ ، ڈیولپمنٹ اینڈ انوویشن (آر ڈی آئی) فنڈ جیسے اقدامات شامل ہیں۔ انہوں نے کہا کہ مختلف وزارتوں اور اسٹیک ہولڈرز کی ہم آہنگی تحقیق اور اختراع سے لے کر ٹیکنالوجی کی ترقی ، انٹرپرینیورشپ اور مارکیٹ ایپلی کیشنز تک کے سفر کو مضبوط کرنے میں مدد کر سکتی ہے۔

وزیر موصوف نے سائنس اور ٹیکنالوجی کے اُبھرتے ہوئے شعبوں میں ہندوستان کی حالیہ کامیابیوں کا بھی حوالہ دیا ، جن میں ڈیپ اوشین مشن اور نیلی معیشت پر ملک کی بڑھتی ہوئی توجہ شامل ہے۔ ہندوستان کے پہلے مقامی تحقیقی جہاز کے آغاز کا حوالہ دیتے ہوئے انہوں نے کہا کہ ہندوستان اب نیلی معیشت کی طرف سے پیش کردہ مواقع کو تلاش کرنے کے لیے بڑے پیمانے پر آگے بڑھ رہا ہے۔ انہوں نے خلا اور بائیوٹیکنالوجی میں کامیابیوں کو ہندوستان کی بڑھتی ہوئی سائنسی صلاحیتوں کی مثالوں کے طور پر بھی پیش کیا۔

تین روزہ کانکلیو سے آگے تسلسل کی اپیل کرتے ہوئے ڈاکٹر سنگھ نے سائنسی ایڈوائزری اور آرگنائزنگ ٹیموں سے کہا کہ وہ ای ایس ٹی آئی سی کے مباحثوں اور سیکھنے کی بنیاد پر قلیل مدتی اور طویل مدتی سنگ میل کے ساتھ ایک روڈ میپ تیار کریں۔ انہوں نے کہا کہ ایک ایڈیشن کا تجربہ دوسرے ایڈیشن میں شامل ہونا چاہیے اور بین وزارتی کوششیں جاری رہنی چاہئیں، تاکہ کانکلیو ایک الگ سالانہ تقریب نہ بن جائے۔

ڈاکٹر جتیندر سنگھ نے اسٹارٹ اَپ رجسٹریشن، پیٹنٹ اور دیگر اختراعی عمل سے متعلق طریقہ کار کے بارے میں نوجوان اختراع کاروں میں زیادہ سے زیادہ بیداری پیدا کرنے پر بھی زور دیا ۔ انہوں نے کہا کہ بہت سے ممکنہ کاروباری افراد کے پاس خیالات اور صلاحیتیں ہو سکتی ہیں لیکن وہ اپنی اختراعات کو آگے لے جانے کے لیے درکار طریقہ کار سے ناواقف رہتے ہیں  اور اس طرح کی معلومات تک آسان رسائی اس صلاحیت کو کھولنے میں مدد کر سکتی ہے۔

ٹیکنالوجی کے تیزی سے بدلتے ہوئے منظر نامے، خاص طور پر مصنوعی ذہانت کے بارے میں بات کرتے ہوئے، وزیر موصوف نے کہا کہ ٹیکنالوجی تیزی سے نوجوانوں کے لیے ٹیکنالوجی کے ذریعے پیدا کیے گئے مواقع تلاش کرنے کے بجائے نئے امکانات پیدا کرنے کے لیے ایک سہولت کار بن رہی ہے۔ انہوں نے کہا کہ ای ایس ٹی آئی سی کو معاشرے کی ہر نسل اور طبقے، خاص طور پر نوجوانوں کے لیے دلچسپی کا باعث بننا چاہیے۔

نقاب کشائی کے  پروگرام میں حکومت ہند کے پرنسپل سائنسی مشیر پروفیسر اجے کے سود، محکمہ سائنسی اور صنعتی تحقیق (ڈی ایس آئی آر) کے سکریٹری اور سی ایس آئی آر کے ڈائریکٹر جنرل ڈاکٹر این کلائیسلوی، محکمہ بائیوٹیکنالوجی کے سکریٹری ڈاکٹر راجیش ایس گوکھلے، الیکٹرانکس اور اطلاعاتی ٹیکنالوجی کی وزارت کے سکریٹری جناب ایس کرشنن اور پرنسپل سائنسی مشیر کے دفتر کے سائنسی سکریٹری ڈاکٹر پرویندر مینی کے علاوہ سینئر عہدیداروں اور شریک وزارتوں اور محکموں کے نمائندوں نے شرکت کی۔

حکومت ہند کے پرنسپل سائنسی مشیر پروفیسر اجے کے سود نے کہا کہ ای ایس ٹی آئی سی-2026 اپنے افتتاحی ایڈیشن کی کامیابی پر مبنی ہے، جس نے 13 وزارتوں، سرکردہ اداروں ، صنعتی شراکت داروں اور 5000 سے زیادہ مندوبین کو اکٹھا کیا۔ انہوں نے کہا کہ کانکلیو ایک مکمل حکومت کے نقطہ نظر کی علامت ہے اور نوجوان اختراع کاروں ، پالیسی سازوں ، اداروں اور صنعت کو ایک مشترکہ قومی وژن کے ارد گرد اکٹھا کرتا ہے ، جس میں 12 موضوعاتی شعبے ہیں جو ہندوستان کے لیے ابھرتے ہوئے اہم مواقع کا احاطہ کرتے ہیں۔

ڈاکٹر این کلائیسلوی ، سکریٹری ، ڈی ایس آئی آر اور ڈائریکٹر جنرل ، سی ایس آئی آر نے کہا کہ سی ایس آئی آر نے ای ایس ٹی آئی سی-2026 کے انعقاد کی ذمہ داری سنبھالی ہے، جس میں سی ایس آئی آر-این آئی آئی ایس ٹی، ترواننت پورم نوڈل لیبارٹری کے طور پر اور 13 وزارتوں نے اس پہل کے لیے ہاتھ ملایا ہے۔ انہوں نے کہا کہ کانکلیو سائنس، ٹیکنالوجی اور اختراعی ماحولیاتی نظام میں ہم آہنگی کو مضبوط کرے گا اور 2047 تک وکست بھارت کی تعمیر کے قومی مقصد کے حصول میں کردار ادا کرے گا۔

حکومت ہند کے پرنسپل سائنسی مشیر کے دفتر کی رہنمائی میں سی ایس آئی آر کے زیر اہتمام ای ایس ٹی آئی سی-2026، جس میں سی ایس آئی آر-این آئی آئی ایس ٹی آرگنائزنگ پارٹنر ہے، نوبل انعام یافتگان اور عالمی سائنسی رہنماؤں، ڈیپ ٹیک اسٹارٹ اَپس، خواتین کاروباریوں، نوجوان سائنسدانوں اور محققین ، صنعت کے رہنماؤں، پالیسی سازوں اور تعلیمی اداروں ، پی ایس یوز اور آر اینڈ ڈی اداروں کے نمائندوں کو یکجا کرے گا۔

تین روزہ کانکلیو میں جامع تبادلہ خیال ، 12 موضوعاتی تکنیکی سیشن ، پینل مباحثے ، سائنس اور ٹیکنالوجی کے قائدین اور ڈیپ ٹیک اسٹارٹ اَپس کی پریزنٹیشنز ، نمائشیں ، پوسٹر پریزنٹیشنز اور بی 2 بی/بی 2 جی کنیکٹ میٹنگز شامل ہوں موضوعاتی شعبے اُبھرتے ہوئے شعبوں  پر محیط  ہوں گے، جن میں جدید مینوفیکچرنگ، توانائی کی ٹیکنالوجیز ، مصنوعی حیاتیات، سمندری ٹیکنالوجیز ، کوانٹم کمیونیکیشن ، سیمی کنڈکٹرز، ایگری ٹیک، جنریٹو اور خود مختار اے آئی ، روبوٹکس ، جدید صحت کی دیکھ بھال ، عمیق ٹیکنالوجیز اور خلائی سائنس شامل ہیں۔

تین نوبل انعام یافتہ: پروفیسر جوآخم فرینک ، سر رچرڈ جے رابرٹس اور پروفیسر کوستیا نووسویلوف، ای ایس ٹی آئی سی-2026 میں حصہ لینے والی ممتاز سائنسی شخصیات میں شامل ہیں۔ کانکلیو میں ٹیکنالوجی پر مبنی ایک نمائش کا بھی اہتمام کیا جائے گا، جس میں ہندوستان کے اُبھرتے ہوئے اسٹارٹ اَپ اور ڈیپ ٹیک ماحولیاتی نظام کی نمائش کی جائے گی، جو دوسرے دن سے عوام کے لیے کھلا رہے گا۔

ای ایس ٹی آئی سی-2026 بھارت منڈپم ، نئی دہلی میں 27 سے 29 اکتوبر 2026 تک منعقد ہوگا۔ عزت مآب وزیر اعظم 27 اکتوبر 2026 کو نئی دہلی کے بھارت منڈپم میں ای ایس ٹی آئی سی-2026 کا افتتاح کریں گے۔ رجسٹریشن کا عمل شروع ہو چکا ہے   اور یہ 15 ستمبر 2026 کو بند ہو جائے گا۔

*******

 (ش ح۔ع و۔ ن ع)

U- 3274