مرکزی وزارتِ سماجی انصاف و تفویضِ اختیار کا مقصد اس ماہ کے آخر تک منعقد ہونے والے نشہ آور اشیا کے استعمال کے خلاف قومی اجتماعی عہد میں فزیکل  اور آن لائن شرکت کے ذریعے 10 کروڑ سے زائد شہریوں کو شامل کرنا ہے۔ یہ قومی عہد نشہ مکت بھارت ابھیان (این ایم بی اے)  چھٹی  سالگرہ کے موقع پر لیا جائے گا۔

جاری تیاریوں کے ایک حصے کے طور پر، وزارت میں منشیات کی روک تھام کے جوائنٹ سکریٹری ڈاکٹر سندیپ ریواجی راٹھوڑ کی زیرِ صدارت آج قومی دارالحکومت میں منعقدہ تیسری اعلیٰ سطحی رابطہ میٹنگ میں 10 کروڑ سے زائد شہریوں کی  فزیکل  اور آن لائن شرکت کے ذریعے ملک گیر عہد کو یقینی بنانے کے منصوبے اور جامع حکمتِ عملی پر تبادلۂ خیال کیا گیا۔ یہ اقدام عزت مآب وزیر اعظم جناب نریندر مودی کی جانب سے بیان کردہ نشہ مکت بھارت ابھیان کے مقاصد کے عین مطابق ہے۔

ڈاکٹر راٹھوڑ نے شرکا کو ’پوری حکومت‘ اور ’پورا معاشرہ‘ کے نقطۂ نظر کو اپنانے کی اہمیت سے آگاہ کیا، تاکہ تمام متعلقہ فریقوں کو اس مقصد کے لیے متحرک کیا جا سکے کہ عام لوگوں کو نشہ آور اشیا کے استعمال سے پیدا ہونے والے ان خطرات اور چیلنجوں کے بارے میں حساس اور باخبر بنایا جائے، جو ملک بھر میں معاشرے کے مختلف طبقات کو بری طرح متاثر کر رہے ہیں۔

اجلاس میں وزارت کے ڈائریکٹر، ڈی او ایس جے ای (ڈی پی) جناب آستک کمار پانڈے، انڈر سکریٹری جناب ارون کمار کرن کے علاوہ وزارت کے دیگر افسران نے بھی شرکت کی۔

مختلف وزارتوں اور محکموں کے اعلیٰ نمائندوں نے اجلاس میں شرکت کی، جس میں جامع عمل درآمد کی حکمتِ عملی کے لیے جاری کام کا جائزہ لیا گیا۔ ملک گیر عہد کے لیے افسران، اہلکاروں، طلبہ، والدین، رضاکاروں اور دیگر متعلقہ فریقوں کو متحرک کرنے میں متعلقہ وزارتوں اور محکموں کے کردار پر تبادلۂ خیال کیا گیا اور اس کا جائزہ لیا گیا۔

اجلاس میں متعلقہ وزارتوں اور محکموں کے تحت کام کرنے والے تمام ماتحت دفاتر، تعلیمی اداروں، خود مختار اداروں، سرکاری شعبے کے اداروں اور فیلڈ سطح کے اداروں میں عہد کی تقریبات منعقد کرنے پر تبادلۂ خیال کیا گیا۔ ان میں ریلوے، دفاع، شہری دفاع، امور نوجوانان و کھیل، اسکولی و اعلیٰ تعلیم، ڈاک، پولیس، مرکزی مسلح پولیس فورس، این سی سی، آیوش، دیہی ترقی، صحت و خاندانی بہبود اور محصولات کے محکمے شامل ہیں۔ اس کے علاوہ سماجی، رضاکارانہ اور روحانی تنظیموں نیز سماجی اثر انگیز شخصیات کو بھی اس مہم میں شامل کرنے پر غور کیا گیا۔

شرکت کی تفصیلات اور عوامی رسائی سے متعلق معلومات پیش کرنے کے لیے یکساں رپورٹنگ کے طریقۂ کار پر بھی اجلاس میں تبادلۂ خیال کیا گیا۔

منصوبے اور مربوط حکمتِ عملی سے متعلق پاور پوائنٹ پریزنٹیشن پر تفصیلی غور کیا گیا، جس کے دوران متعلقہ محکموں اور وزارتوں کے تمام نمائندوں نے فعال طور پر تبادلۂ خیال میں حصہ لیا۔

این ایم بی اے عہد ایک ایسی پہل ہے جس کے تحت نشہ آور اشیا کے استعمال سے متاثرہ افراد تک پہنچنے کے لیے رضاکارانہ طور پر خدمات انجام دینے کا عزم کیا جاتا ہے۔ اس عہد کا مقصد ذمہ دارانہ رویے کی حوصلہ افزائی کرنا، لوگوں میں منشیات سے دور رہنے کے لیے احساسِ ذمہ داری پیدا کرنا، اور اتحاد و عزم کے جذبے کو فروغ دینا ہے، تاکہ متعلقہ فریقوں کو ایک مشترکہ مقصد کے حصول کے لیے مل کر کام کرنے کی ترغیب دی جا سکے۔ اس عہد کا مزید مقصد نوجوانوں کو ایک منشیات سے پاک معاشرے کی تشکیل میں فعال کردار ادا کرنے کے لیے بااختیار بنانا ہے۔

این ایم بی اے کے آن لائن عہد کا لنک یہ ہے: https://nashamukt.dosje.gov.in/epledge

اجلاس میں اس اہم پیغام کو فروغ دینے اور اس کی حوصلہ افزائی پر بھی زور دیا گیا کہ ہیلپ لائن—14446 کے ذریعے منشیات کی لت سے نجات حاصل کی جائے۔

 

 

اجلاس میں شہریوں میں رضاکارانہ طور پر کام کرنے کے بڑھتے ہوئے جذبے پر توجہ مرکوز کی گئی، جس کے تحت وہ محکمے کی سرکاری ویب سائٹ کے ذریعے نشہ مکتی متر کے طور پر اپنا اندراج کرا رہے ہیں:

https://nashamukt.dosje.gov.in/nasha-mukti-mitr

مرکزی وزارتِ سماجی انصاف و تفویضِ اختیار نے ملک میں منشیات کی طلب پر قابو پانے کے لیے 15 اگست 2020 کو نشہ مکت بھارت ابھیان (این ایم بی اے) کا آغاز کیا تھا۔ اجتماعی اقدامات کی فوری ضرورت کو تسلیم کرتے ہوئے وزارت مختلف اقدامات کے درمیان تال میل قائم کرتی ہے، جن میں منشیات کے استعمال کی روک تھام، تشخیص، علاج، بازآبادکاری، بعد از علاج نگہداشت، عوامی معلومات کی فراہمی اور معاشرے میں بیداری پیدا کرنا شامل ہے۔

وزارت منشیات کی  مانگ میں کمی کے لیے قومی ایکشن پلان (این اے پی ڈی ڈی آر) کے تحت شواہد پر مبنی ایک جامع حکمتِ عملی نافذ کر رہی ہے۔ یہ حکمتِ عملی بھارت میں نشہ آور اشیا کے استعمال کی وسعت اور نوعیت سے متعلق پہلے قومی سروے کے نتائج پر مبنی ہے، جو نئی دہلی کے ایمس میں واقع قومی مرکز برائے منشیات پر انحصار کے علاج (این ڈی ڈی ٹی سی) نے کیا تھا۔

این اے پی ڈی ڈی آر کے تحت وزارت ریاستی حکومتوں، مرکز کے زیر انتظام علاقوں، غیر سرکاری تنظیموں اور سرکاری اسپتالوں کو احتیاطی تعلیم، بیداری پیدا کرنے، مشاورت، علاج اور بازآبادکاری کے لیے مالی امداد فراہم کرتی ہے۔

اب تک اس مہم کے ذریعے ملک گیر بیداری کی سرگرمیوں کے ذریعہ 34.42 کروڑ سے زائد شہریوں تک رسائی حاصل کی جا چکی ہے، جن میں 13.64 کروڑ سے زائد نوجوان اور 10.58 کروڑ خواتین شامل ہیں۔ کمیونٹیز کی شرکت کو مزید مستحکم کرنے کے لیے 1.65 لاکھ سے زائد نشہ مکتی متر (این ایم ایم) بھی اس مہم میں شامل ہو چکے ہیں۔

این ایم بی اے پورٹل: https://www.dosje.gov.in/organisation/nasha-mukt-bharat-abhiyaan/

علاج کی سہولیات تک رسائی کو مزید آسان بنانے کے لیے وزارت نے این ایم بی اے 2.0 موبائل ایپلی کیشن بھی شروع کی ہے، جس کے ذریعے شہری اپنے قریب ترین منشیات سے نجات کے مرکز کا پتا معلوم کر سکتے ہیں۔

یہ ایپ اس لنک کے ذریعے گوگل پلے اسٹور سے ڈاؤن لوڈ کی جا سکتی ہے:

https://play.google.com/store/apps/details?id=com.dosje.nmba_app&hl=en_IN

حکومت بحالی کے بنیادی ڈھانچے کو وسعت دے کر، منشیات کے استعمال کی روک تھام کے اقدامات کو مزید مؤثر بنا کر، عمل درآمد کے طریقۂ کار کو آسان بنا کر اور مرکزی سرکار کی معاونت سے چلنے والی اسکیموں کی مؤثر فراہمی کو یقینی بنا کر منشیات سے پاک اور سماجی طور پر سب کو شامل رکھنے والے بھارت کے عزم کو مسلسل مضبوط کر رہی ہے۔ معاشرے کی مسلسل شرکت، بہتر حکمرانی اور ٹیکنالوجی کے ذریعے خدمات کی فراہمی کے ساتھ وزارت کمزور اور محروم طبقات کے تحفظ اور سب کے لیے سماجی انصاف کے فروغ کے اپنے عزم پر قائم ہے۔

 

******

ش ح۔ ف ا۔ م ر

U-NO. 3169

(ریلیز آئی ڈی: 2307984) وزیٹر کاؤنٹر : 8