سماجی انصاف اور تفویضِ اختیار کی وزارت، ریاستی حکومتوں اور مرکز کے زیرِ انتظام علاقوں کی انتظامیہ کے ذریعے درج فہرست ذاتوں کے طلبہ کے لیے میٹرک کے بعد وظائف کی مرکزی معاونت سے چلنے والی اسکیم نافذ کر رہی ہے۔ اس اسکیم کے تحت اہل طلبہ کو میٹرک اور ثانوی تعلیم کے بعد اعلیٰ تعلیم جاری رکھنے میں مدد فراہم کی جاتی ہے اور تعلیمی مواقع تک وسیع تر رسائی کو فروغ دیا جاتا ہے۔

اس اسکیم کے تحت درخواستیں متعلقہ ریاستی وظیفہ پورٹل یا قومی وظیفہ پورٹل کے ذریعے طلب کی جاتی ہیں۔ ریاستیں اور مرکز کے زیرِ انتظام علاقے اس اسکیم کو نافذ کرنے والے اداروں کی حیثیت سے درخواستیں طلب کرنے، ان کی جانچ پڑتال، تصدیق اور دیگر عملی کارروائیوں کے لیے بنیادی انتظامات طے کرتے ہیں اور اپنی سطح پر مناسب طریقۂ کار وضع کرتے ہیں۔

مرکزی حصے کی رقم جاری کرنے کا عمل متعلقہ ریاست یا مرکز کے زیرِ انتظام علاقے کے حصے کی رقم کی تقسیم اور قومی وظیفہ پورٹل پر مستفیدین کے حتمی طور پر تصدیق شدہ اعداد و شمار جمع کرانے سے منسلک ہے۔ یہ مربوط طریقۂ کار مستفیدین کی درست تصدیق اور وظیفے کی رقم کی جواب دہانہ منتقلی کو یقینی بنانے میں معاون ہے۔

اسکیم کے تحت براہِ راست فائدہ منتقلی کا نظام 22-2021میں متعارف کرایا گیا تھا۔ اس نظام نے رقوم کی منتقلی کو زیادہ آسان اور تیز بنایا ہے، جبکہ مستحقین کی درست نشاندہی، دوہری اندراج کی روک تھام، کارکردگی اور شفافیت کو بھی مضبوط کیا ہے۔ آدھار سے منسلک بینک کھاتوں کے ذریعے ادائیگی نے ادائیگی کے عمل کو مزید آسان بنایا ہے اور وظائف کی رقم کی تقسیم میں تاخیر کم کرنے میں بھی مدد کی ہے۔

اسکیم کے بارے میں بیداری بڑھانے کے لیے سماجی انصاف اور تفویضِ اختیار کا محکمہ قومی اور علاقائی اخبارات میں اشتہارات، سوشل میڈیا مہمات اور ریاستوں و مرکز کے زیرِ انتظام علاقوں کے ساتھ باقاعدہ رابطے کے ذریعے تشہیری و آگاہی سرگرمیاں انجام دیتا ہے۔ ان کوششوں کا مقصد اہل طلبہ اور ان کے اہل خانہ کو درخواست دینے اور اسکیم پر عمل درآمد کے طریقۂ کار سے متعلق بروقت معلومات تک رسائی فراہم کرنا ہے۔

اسکیم پر عمل درآمد کا باقاعدگی سے جائزہ قومی سطح پر منعقد ہونے والے چنتن شِور، علاقائی اجلاسوں اور قومی کانفرنسوں کے ذریعے لیا جاتا ہے، جن میں متعلقہ فریقوں کے ساتھ ریاستوں اور مرکز کے زیرِ انتظام علاقوں کے افسران بھی شرکت کرتے ہیں۔ ان مشاورتی اجلاسوں کے ذریعے عملی مسائل کا جائزہ لینے، باہمی تال میل کو مضبوط بنانے اور طلبہ تک وظائف کے فوائد کی مؤثر فراہمی کو مزید بہتر بنانے میں مدد ملتی ہے۔

وزارت متعلقہ فریقوں سے مشاورت اور مقررہ طریقۂ کار کے مطابق اپنی اسکیموں کا باقاعدگی سے جائزہ لے کر ان میں ضروری ترامیم بھی کرتی ہے۔ مسلسل توجہ اس بات پر مرکوز ہے کہ ملک بھر میں درج فہرست ذاتوں سے تعلق رکھنے والے اہل طلبہ کے لیے درخواست دینے کا عمل آسان اور قابلِ رسائی ہو، ادائیگی کا نظام قابلِ اعتماد ہو، اسکیموں پر مؤثر عمل درآمد ہو اور فوائد کی فراہمی شفاف طریقے سے یقینی بنائی جائے۔

********

 ش ح۔م ح۔ش ت

Urdu No-3110