’’تجارتی شعبے کو پہلے ہی دن سے تجربہ گاہ کے ساتھ وابستہ ہونا چاہیے۔‘‘ اس پیغام کے ساتھ سائنس و ٹیکنالوجی اور ارضیاتی علوم کے مرکزی وزیرِ مملکت (آزادانہ چارج) اور وزیرِ اعظم کے دفتر، عملہ، عوامی شکایات، پنشن، جوہری توانائی اور خلاء کے مرکزی وزیرِ مملکت ڈاکٹر جتیندر سنگھ نے صنعت اور تحقیقی اداروں کے باہمی تعاون کے طریقۂ کار میں بنیادی تبدیلی کی ضرورت پر زور دیا۔ انہوں نے کولکاتا میں سائنسی و صنعتی تحقیقاتی کونسل کی بھارتی مرکباتی حیاتیاتی کیمیا تحقیقی تجربہ گاہ میں منعقدہ چھٹی ’رائز کانکلیو‘ کے موقع پر صنعتوں کے اعلیٰ انتظامی عہدیداروں، اعلیٰ سائنسی عہدیداروں اور اعلیٰ عملیاتی عہدیداروں کے ساتھ گفتگو کے دوران یہ بات کہی۔

انہوں نے کہا کہ ممکنہ تجارتی شراکت داروں کی شناخت منصوبے کی تیاری کے مرحلے ہی میں کرلی جانی چاہیے اور انہیں اسی مرحلے سے منصوبے کے ساتھ وابستہ کیا جانا چاہیے تاکہ بازار کی ضروریات اور عملی تقاضے اس وقت بھی ٹیکنالوجی کی تشکیل میں اپنا کردار ادا کرسکیں جب وہ ابھی تیاری کے مرحلے میں ہو۔

صنعت کی جانب سے دی گئی اس تجویز کے جواب میں کہ تجارتی شراکت داروں کو تجربہ گاہ کی سطح ہی پر شامل کیا جانا چاہیے، ڈاکٹر جتیندر سنگھ نے کہا کہ ابتدائی مرحلے میں صنعت کی شمولیت سے بازار کی صورتِ حال، ڈیزائن، ماحولیاتی پائیداری، رسد کے سلسلے کی ضروریات اور تجارتی افادیت کے بارے میں صنعت کی رائے حاصل کی جاسکے گی۔ انہوں نے زور دیتے ہوئے کہا کہ کسی ٹیکنالوجی کو بازار میں پہنچنے کے بعد یہ معلوم نہیں ہونا چاہیے کہ حقیقی صارفین کی ضروریات پوری کرنے کے لیے اس میں ترمیم کی ضرورت ہے۔

اس کے بعد ہونے والی گفتگو صنعت کے لیے ایک براہِ راست پلیٹ فارم بن گئی، جہاں صنعت کے نمائندوں نے وزیر کے سامنے مخصوص ٹیکنالوجیوں سے متعلق مسائل اور چیلنجز پیش کیے۔

اہم معدنیات اور مقامی طور پر تیار کردہ ٹیکنالوجی بھی صنعت کی دلچسپی کے نمایاں شعبوں کے طور پر سامنے آئے۔ شرکاء نے نایاب ارضی عناصر کے استخراج، مستقل مقناطیس، دوبارہ استعمال، لیتھیم کی تطہیر اور وینیڈیم و ٹائٹینیم جیسی تزویراتی اہمیت رکھنے والی معدنیات کی بازیابی پر تبادلۂ خیال کیا۔ صنعت کے نمائندوں نے ان ٹیکنالوجیوں کو بڑے پیمانے پر عملی شکل دینے کے لیے سائنسی و صنعتی تحقیقاتی کونسل کی تجربہ گاہوں سے تکنیکی رہنمائی اور معاونت طلب کی۔ گفتگو میں مشرقی ہندوستان میں نایاب ارضی عناصر اور دیگر اہم معدنیات کی تلاش کے امکانات بھی زیرِ بحث آئے۔

ڈاکٹر جتیندر سنگھ نے سائنسی و صنعتی تحقیقاتی کونسل کے اداروں اور دیگر سرکاری سائنسی ایجنسیوں میں فروغ دی جارہی صلاحیتوں سے بھرپور فائدہ اٹھانے کی ضرورت پر زور دیا۔

وزیر نے خلائی ٹیکنالوجی اور خصوصی نوعیت کے نوری اجزا سے متعلق صنعت کی جانب سے پیش کی گئی تجاویز کا بھی جواب دیا۔ ڈاکٹر جتیندر سنگھ نے متعلقہ تفصیلات طلب کیں اور اشارہ دیا کہ خلاء سے متعلق اس معاملے کو محکمۂ خلاء کے سامنے پیش کیا جاسکتا ہے۔

ڈاکٹر جتیندر سنگھ نے کہا کہ ضابطہ جاتی طریقۂ کار کو آسان بنانے کے لیے پہلے ہی اقدامات کیے جاچکے ہیں اور انہوں نے صنعت سے مزید مخصوص تجاویز پیش کرنے کی دعوت دی، جنہیں غور و خوض کے لیے سامنے لایا جاسکتا ہے۔

ڈاکٹر جتیندر سنگھ نے دھات ڈھلائی کے شعبے کے لیے ایک مشترکہ تحقیق و ترقی کی سہولت قائم کرنے کی تجویز دی، جس کے لیے صنعت کو متحد ہوکر اپنی ضروریات واضح کرنی چاہئیں اور حکومت کو اس مشترکہ پلیٹ فارم کی سہولت فراہم کرنی چاہیے۔

ڈاکٹر جتیندر سنگھ نے کہا کہ صنعتوں کے ایک ساتھ مل کر ایسا پلیٹ فارم قائم کرنے پر کوئی پابندی نہیں ہے اور انہوں نے فولاد کے شعبے سے وابستہ اداروں پر باہمی تعاون کی اپیل کی۔ انہوں نے کہا: ’’ہم فورم فراہم کرنے کے لیے تیار ہیں۔ آپ آئیں، فولاد کی مختلف صنعتوں سے آپ سب نمائندوں کی حیثیت سے ایک گروپ کی صورت میں آئیں اور کہیں کہ ’ہمیں ایک فورم فراہم کریں۔‘ ہم فراہم کریں گے۔‘‘

بنگال کیمیکلز اینڈ فارماسیوٹیکلز نے سانپ کے کاٹنے کے علاج کے لیے استعمال ہونے والی زہریلے اثر کے تریاق کی مقامی سطح پر دوبارہ تیاری شروع کرنے کا امکان پیش کیا۔ ادارے نے نشاندہی کی کہ مشرقی ہندوستان میں سانپوں کی مختلف اور مخصوص انواع پائی جاتی ہیں، اس لیے اس خطے کی ضروریات بھی الگ نوعیت کی ہیں۔ ڈاکٹر جتیندر سنگھ نے کمپنی کو مغربی بنگال کی وزارتِ صحت کے ساتھ رابطہ کرنے کا مشورہ دیا اور اس بات پر زور دیا کہ ایسی کسی بھی کوشش کو سائنسی اور عوامی صحت سے متعلق ضروریات کے مطابق ہونا چاہیے۔

اس کے بعد سانپ کے زہر اور سانپ کے کاٹنے سے متعلق کام کرنے والے ایک نئے کاروباری ادارے نے ایسی ٹیکنالوجیوں کو پیش کیا جن کے ذریعے سانپ کے کاٹنے کے ذمہ دار سانپ کی نوع کی شناخت اور نئے تریاق تیار کرنے کے حل وضع کیے جاسکتے ہیں۔ ڈاکٹر جتیندر سنگھ نے اس اختراع کا خیرمقدم کیا، تاہم اس بات پر زور دیا کہ وسیع پیمانے پر استعمال سے قبل ایسی ٹیکنالوجیوں کی مناسب سائنسی توثیق اور طبی آزمائشیں ضروری ہوں گی۔ انہوں نے زور دے کر کہا کہ مریضوں کی سلامتی پر کسی صورت سمجھوتا نہیں کیا جاسکتا اور انہوں نے اختراع کاروں کو ضروری توثیق کے لیے مغربی بنگال کی وزارتِ صحت سے رابطہ کرنے کی ہدایت کی۔

پوری گفتگو کے دوران ڈاکٹر جتیندر سنگھ نے صنعت کے نمائندوں کی حوصلہ افزائی کی کہ وہ عمومی گفت و شنید سے آگے بڑھ کر مخصوص اور قابلِ عمل ضروریات پیش کریں اور یقین دلایا کہ حکومت اور سائنسی ادارے مناسب روابط قائم کرنے میں ہر ممکن تعاون فراہم کریں گے۔ اپنے اختتامی کلمات میں انہوں نے کہا: ’’آپ ہمیں بتائیں کہ ہم آپ کے لیے کیا کرسکتے ہیں، یا آپ کے لیے کیا نہیں کر رہے، یا آپ کے لیے ہم مزید بہتر کیا کرسکتے ہیں۔‘‘ اس طرح انہوں نے واضح کیا کہ حکومت صنعت کی واضح طور پر بیان کردہ ضروریات پر فوری توجہ دینے کے لیے تیار ہے۔

ڈاکٹر جتیندر سنگھ نے یہ بھی واضح کیا کہ اس طرح کا رابطہ صرف رسمی تقریبات تک محدود نہیں رہنا چاہیے۔ انہوں نے کہا: ’’اگر مزید تجاویز ہوں تو آپ جب چاہیں پیش کرسکتے ہیں۔ ایسا نہیں ہے کہ آپ کو اس طرح کے کسی رسمی موقع کا انتظار کرنا پڑے۔‘‘ اس کے ذریعے انہوں نے صنعت کو متعلقہ اداروں کے ساتھ مسلسل رابطہ برقرار رکھنے کی دعوت دی۔

اس طرح چھٹی ’رائز کانکلیو‘ میں ہونے والی گفتگو نے ہندوستان کے ٹیکنالوجی کے نظام کو مضبوط بنانے کے لیے ایک واضح نمونہ پیش کیا: تحقیق و ترقی کے آغاز ہی سے صنعت کو شراکت دار کے طور پر شامل کیا جائے، سائنسی ادارے ٹیکنالوجی کو عملی شکل دینے میں معاون بنیں اور حکومت تجربہ گاہ سے بازار اور بالآخر وسیع تر معاشرتی استعمال تک امید افزا ٹیکنالوجیوں کو پہنچانے کے عمل میں سہولت کار کا کردار ادا کرے۔

******

ش ح۔ ش ا ر۔ ول

Uno-3084

(ریلیز آئی ڈی: 2307209) وزیٹر کاؤنٹر : 10