’فِٹ انڈیا اتوار سائیکل پر‘ کے 89ویں پروگرام کا انعقاد آج سورت میں ’ترقی یافتہ ہندوستان کے لیے منشیات سے پاک نوجوان‘ کے موضوع کے تحت کیا گیا۔ اس پروگرام میں کھلاڑیوں، صحت و تندرستی کے شائقین، طلبہ، نوجوانوں اور شہریوں نے شرکت کی، جس کا مقصد صحت مند، فعال اور نشہ آور اشیا سے پاک طرزِ زندگی کو فروغ دینا تھا۔

نوجوانوں کے امور و کھیل کے مرکزی وزیر ڈاکٹر منسکھ مانڈویہ اور گجرات کے نائب وزیرِ اعلیٰ جناب ہرش سنگھوی نے شرکاء کے ہمراہ ’منشیات سے پاک رہنے کا عہد‘ لیا اور ایک صحت مند، محفوظ اور منشیات سے پاک ہندوستان کی تعمیر کے لیے اپنے اجتماعی عزم کا اعادہ کیا۔

اس عہد نے معزز وزیرِ اعظم کے منشیات سے نجات عزم مہم کے تحت اجتماعی عزم کے پیغام کو مزید مضبوط کیا اور شہریوں، بالخصوص نوجوانوں کو نشہ آور اشیا کے استعمال سے دور رہنے اور منشیات سے پاک ہندوستان کے تصور کی تکمیل میں اپنا کردار ادا کرنے کی ترغیب دی۔

سورت میں ’اتوار سائیکل پر‘ کے 89ویں پروگرام کا آغاز صبح سویرے سردار پٹیل کے مجسمے، مانگڑھ چوک سے ہوا۔ شرکاء نے سائیکل سواری شروع کرنے سے قبل جسمانی تندرستی کی سرگرمیوں، یوگا، زومبا اور مختلف مشقوں میں حصہ لیا، جس کے بعد وہ سائیکل چلاتے ہوئے سرتھانا چڑیا گھر کی جانب روانہ ہوئے۔

مجمع سے خطاب کرتے ہوئے ڈاکٹر مانڈویہ نے کہا: ’’وزیرِ اعظم جناب نریندر مودی کی ’فِٹ انڈیا‘ تحریک کے نتیجے میں ملک گیر سطح پر ’اتوار سائیکل پر‘ مہم کا آغاز ہوا ہے۔ ایک ترقی یافتہ ملک کے لیے صحت مند آبادی ناگزیر ہے اور سائیکل چلانا ایک صحت مند معاشرے کے قیام میں معاون ثابت ہوتا ہے۔‘‘

انہوں نے کہا: ’’اس کے کئی اہم فوائد ہیں: یہ ورزش کی ایک مؤثر شکل ہے، یہ ’منشیات سے پاک ہندوستان‘ مہم کی حمایت کرتی ہے، آلودگی کے مسئلے سے نمٹنے میں مدد دیتی ہے اور ایندھن کے استعمال کو کم کرکے ماحول کے تحفظ میں معاون ہوتی ہے۔‘‘

انہوں نے مزید کہا: ’’سائیکل چلانے کو صرف اتوار تک محدود نہیں رکھنا چاہیے؛ لوگوں کو اسے اپنے روزمرہ معمولات کا حصہ بنانا چاہیے، خصوصاً قریبی کام کی جگہوں پر آنے جانے کے لیے۔ اس سے ’صحت مند ہندوستان‘ کے تصور کو مزید تقویت ملے گی۔‘‘

اس 89ویں پروگرام کا انعقاد ملک بھر میں کیا گیا، جس میں 25,000 سے زائد مقامات پر 50 لاکھ سے زیادہ نوجوانوں نے شرکت کی اور ترقی یافتہ ہندوستان کے لیے منشیات سے پاک نوجوانوں کا پیغام عام کیا۔

متعدد ممتاز کھلاڑیوں نے منشیات سے پاک عزم مہم کی اہمیت کے بارے میں بیداری پیدا کرنے کے لیے 6 کلومیٹر طویل سائیکل سواری میں شرکت کی۔

ان میں پدم شری اعزاز یافتہ اور میجر دھیان چند کھیل رتن اور ارجن ایوارڈ یافتہ جناب اچنتا شرتھ کمل، ارجن ایوارڈ یافتہ اور سابق عالمی نمبر ایک پہلوان محترمہ سرتا مور، ارجن ایوارڈ یافتہ اور دولتِ مشترکہ کھیلوں کے طلائی تمغہ یافتہ جناب ہرمیت دیسائی، 23 سال سے کم عمر کھلاڑیوں کی عالمی چیمپئن شپ میں نقرئی اور طلائی تمغہ جیتنے والی محترمہ شوانی پوار اور دولتِ مشترکہ چیمپئن شپ اور عالمی کیڈٹ چیمپئن شپ کے طلائی تمغہ یافتہ جناب راہل مان شامل تھے۔

اس پروگرام میں جسمانی تندرستی کے شعبے سے وابستہ معروف شخصیات اور عوامی اثر و رسوخ رکھنے والی شخصیات نے بھی شرکت کی، جن میں جناب وسپی خراڈی، جناب راکیش سینی، محترمہ اروِی پروانی، جناب پنکج پاسی اور جناب بھشم مدانی سمیت دیگر افراد شامل تھے۔

ادھر قومی دارالحکومت نئی دہلی میں ’فِٹ انڈیا اتوار سائیکل پر‘ کے 89ویں پروگرام کا انعقاد میجر دھیان چند قومی اسٹیڈیم میں اساتذہ کے دن کے خصوصی موضوع کے ساتھ کیا گیا، جس میں نوجوانوں کی زندگیوں اور پیشہ ورانہ مستقبل کی تشکیل میں اساتذہ اور کوچوں کی گراں قدر خدمات کو خراجِ تحسین پیش کیا گیا۔

’فِٹ انڈیا اتوار سائیکل پر‘ کے 89ویں پروگرام میں تقریباً ایک ہزار طلبہ، نوجوانوں اور جسمانی تندرستی کے شائقین نے شرکت کی۔

اس پروگرام کی رونق میں محترمہ مونیکا بھولا (فِٹ انڈیا چیمپئن)، محترمہ مونیکا شرما (یوگا تربیت کار اور فِٹ انڈیا سفیر) اور حوالدار سنجے سنگھ (بین الاقوامی ایتھلیٹکس کوچ) نے شرکت کی۔

Cycling ON ✅
Nasha OUT ❌
Youth FIT 💪
India HIT 🇮🇳#SundaysOnCycle

📍 Surat, Gujarat pic.twitter.com/6vCyoqK6EJ

— Dr Mansukh Mandaviya (@mansukhmandviya) September 6, 2026

’فِٹ انڈیا اتوار سائیکل پر‘ کا انعقاد نوجوانوں کے امور اور کھیلوں کی وزارت (ایم وائی اے ایس) کی جانب سے سائیکلنگ فیڈریشن آف انڈیا (سی ایف آئی)، راہگیری فاؤنڈیشن اور ایم وائی بھارت کے اشتراک سے کیا جاتا ہے۔

یہ سائیکل سواری مہم تمام ریاستوں اور مرکز کے زیرِ انتظام علاقوں میں بیک وقت منعقد کی جاتی ہے، جس میں اسپورٹس اتھارٹی آف انڈیا (ایس اے آئی) کے علاقائی مراکز، قومی اعلیٰ کارکردگی مراکز (این سی او ایز)، ایس اے آئی کے تربیتی مراکز (ایس ٹی سی)، کھیلو انڈیا ریاستی اعلیٰ کارکردگی مراکز (کے آئی ایس سی ایز) اور کھیلو انڈیا مراکز (کے آئی سیز) بھی شامل ہیں۔

ملک بھر میں 6,000 سے زائد ’نمو فِٹ انڈیا کلب‘ بھی ہر ہفتے اس سائیکل سواری مہم کا اہتمام کرتے ہیں۔

******

ش ح۔ ش ا ر۔ ول

Uno-3077

(ریلیز آئی ڈی: 2307157) وزیٹر کاؤنٹر : 8