কেন্দ্ৰীয় যোগাযোগ আৰু উত্তৰ-পূৰ্বাঞ্চল উন্নয়ন মন্ত্ৰী জ্যোতিৰাদিত্য এম সিন্ধিয়াই আজি নতুন দিল্লীৰ তালকোটৰা ষ্টেডিয়ামত অনুষ্ঠিত নৱম সংখ্যক উত্তৰ-পূব শিক্ষাৰ্থী উৎসৱত অংশগ্ৰহণ কৰে আৰু উত্তৰ-পূৰ্বাঞ্চলৰ বিভিন্ন ৰাজ্যৰ শিক্ষাৰ্থী তথা যুৱক-যুৱতীসকলৰ সৈতে মত বিনিময় কৰে।

অনুষ্ঠানত শ্ৰী সিন্ধিয়াই নেপালত সংঘটিত বিধ্বংসী বানপানীৰ পৰিপ্ৰেক্ষিতত দেশখনৰ জনসাধাৰণৰ সৈতে সংহতি প্ৰকাশ কৰে। তেওঁ উপস্থিত সকলোকে থিয় হৈ বানপানীত প্ৰাণ হেৰুওৱা লোকসকলৰ স্মৃতিত দুমিনিটৰ মৌনতা পালন কৰিবলৈ আহ্বান জনায় আৰু প্ৰাণ হেৰুওৱা লোকসকলৰ বাবে প্ৰাৰ্থনা কৰাৰ লগতে তেওঁলোকৰ পৰিয়ালবৰ্গলৈ সমবেদনা জ্ঞাপন কৰে।

সমবেতসকলক সম্বোধন কৰি সিন্ধিয়াই কয় যে উত্তৰ-পূব শিক্ষাৰ্থী উৎসৱ অঞ্চলটোৰ সজীৱ সংস্কৃতি, সৃজনশীলতা আৰু যুৱ সমাজৰ উদযাপন। তেওঁ বিগত ২১ বছৰত ৰাষ্ট্ৰীয় একতা, সামাজিক সম্প্ৰীতি আৰু যুৱ সবলীকৰণৰ ক্ষেত্ৰত মাই হোম ইণ্ডিয়াৰ ভূমিকাৰ ওপৰত আলোকপাত কৰে। উত্তৰ-পূবৰ শিক্ষাৰ্থীসকলৰ বাবে এই পদক্ষেপ ‘ঘৰৰ পৰা আঁতৰত আন এটা ঘৰ’ হিচাপে আৰম্ভ হোৱাৰ কথা স্মৰণ কৰি সিন্ধিয়াই কয় যে আজি ই এক ৰাষ্ট্ৰীয় মঞ্চলৈ ৰূপান্তৰিত হৈছে, য’ত ভাৰতীয় যুৱ সমাজে তেওঁলোকক অনন্য কৰি তোলা বৈচিত্ৰ্য আৰু তেওঁলোকক একত্ৰিত কৰা উমৈহতীয়া বন্ধন দুয়োটাকে উদযাপন কৰে।

ভাৰতৰ নদীসমূহৰ সৈতে তুলনা কৰি সিন্ধিয়াই কয় যে গংগা, যমুনা, সৰস্বতী আৰু ব্ৰহ্মপুত্ৰ বিভিন্ন ভূখণ্ডৰ পৰা উৎপত্তি হৈ পৃথক পৃথক ভূদৃশ্যৰ মাজেৰে বৈ যায়, তথাপি অৱশেষত নিজৰ স্বকীয় পৰিচয় অক্ষুণ্ণ ৰাখি এক শক্তিশালী সোঁত হিচাপে একত্ৰিত হয়।

যুৱ সমাজক উত্তৰ-পূবৰ প্ৰকৃত বিকাশৰ চালিকাশক্তি আৰু বিকশিত ভাৰতৰ নিৰ্মাতা হিচাপে অভিহিত কৰি কেন্দ্ৰীয় মন্ত্ৰী সিন্ধিয়াই ক্ৰীড়া, সংগীত, শিক্ষা, প্ৰযুক্তি আৰু উদ্ভাৱনৰ ক্ষেত্ৰত অঞ্চলটোৰ যুৱ প্ৰতিভাই অৰ্জন কৰা সাফল্যৰ ওপৰত আলোকপাত কৰে। তেওঁ অঞ্চলটোৰ পৰা উদ্ভৱ হোৱা অপৰিসীম প্ৰতিভাৰ উদাহৰণ হিচাপে মীৰাবাই চানু আৰু লাভলীনা বৰগোঁহাইৰ সাফল্যৰ কথা উল্লেখ কৰে।

কেন্দ্ৰীয় মন্ত্ৰী সিন্ধিয়াই উৎসৱত অনুষ্ঠিত নৃত্য প্ৰতিযোগিতাৰ শিক্ষাৰ্থী আৰু অংশগ্ৰহণকাৰীসকলক সম্বৰ্ধনা জনোৱাৰ লগতে সকলো বিজয়ীকে অভিনন্দন জ্ঞাপন কৰে।

 

 

*****

PS/AA

(ৰিলিজ আই ডি : 2306862) অতিথি কক্ষ : 7