پنشن اور پنشن یافتگان کی بہبود کے محکمے (ڈی او پی پی ڈبلیو) کی جانب سے مرکزی حکومت کے پنشن یافتگان کی فلاح و بہبود کے لیے عزم کے تحت ان کی شکایات کا بامعنی اور آسان رسائی کے ساتھ ازالہ بھی یقینی بنایا جاتا ہے۔ اسی مقصد کے لیے 2024 سے ہر سال خصوصی مہم منعقد کی جا رہی ہیں۔ اس سلسلے کی تیسری مہم کے طور پر محکمے نے 7 جولائی 2026 کو طویل عرصے سے زیرِ التوا پنشن سے متعلق شکایات، دعووں اور مسائل کا بروقت اور معیاری ازالہ یقینی بنانے کے لیے خصوصی مہم 3 کا آغاز کیا۔ اس مہم میں تیاری کا مرحلہ اور عمل درآمد کا مرحلہ شامل تھا اور یہ 31 اگست 2026 کو اختتام پذیر ہوئی۔

تیاری کے مرحلے کے دوران تمام وزارتوں، محکموں اور ان سے منسلک یا ماتحت دفاتر کو آن لائن اور بالمشافہ دونوں ذرائع سے موصول ہونے والی طویل عرصے سے زیرِ التوا شکایات، دعووں اور مسائل کی نشاندہی کرنے کی ہدایت دی گئی۔ وزارتوں اور محکموں نے اس مرحلے کے تحت 1,062 ہدفی معاملات کی نشاندہی کی۔ اس کے علاوہ سی پی ای این جی آر اے ایم ایس   پورٹل پر ایک ماہ سے زائد عرصے سے زیرِ التوا 2,131 شکایتی معاملات کو بھی اس مرحلے میں ازالے کے لیے شامل کیا گیا۔

عمل درآمد کے مرحلے کے دوران محکمے نے ان معاملات کے ازالے کے لیے وزارتوں اور محکموں کے ساتھ فعال طور پر رابطہ اور تال میل قائم رکھا۔ مہم کے دوران دو جائزہ اجلاس منعقد کیے گئے اور ان معاملات کے زیرِ التوا رہنے کی صورتِ حال کے بارے میں باقاعدگی سے معلومات حاصل کی گئیں۔

40 وزارتوں اور محکموں کی مربوط کوششوں کے نتیجے میں لیے گئے 3,193 معاملات میں سے 2,306 معاملات کامیابی کے ساتھ نمٹا دیے گئے، جس کے نتیجے میں ازالے کی شرح 72% رہی۔ باقی ماندہ شکایات کے ازالے کے لیے بھی فعال طور پر مسلسل پیروی کی جا رہی ہے۔

ازالہ کی جانے والی شکایات کی جغرافیائی تقسیم سے ظاہر ہوتا ہے کہ حل کیے گئے زیادہ تر معاملات دیہی علاقوں میں رہنے والے پنشن یافتگان اور خاندانی پنشن یافتگان سے متعلق ہیں۔ یہ ایک حوصلہ افزا رجحان ہے، کیونکہ مختلف وزارتوں اور محکموں کے زیرِ انتظام مختلف پورٹلز اور سی پی ای این جی آر اے ایم ایس    پورٹل کے ذریعے دیہی علاقوں سے آن لائن موصول ہونے والی شکایات کا ازالہ ڈیجیٹل تفریق کو کم کرنے میں معاون ثابت ہو رہا ہے۔

اجتماعی کوششوں کے نتیجے میں طویل عرصے سے زیرِ التوا بعض معاملات کا کامیابی کے ساتھ ازالہ ممکن ہوا ہے۔

کامیابی کے چند اہم معاملات درج ذیل ہیں:

1. دفاعی پنشن یافتہ کی معذور زیرِ کفالت بیٹی محترمہ جے لکشمی کرنن کو جون 2013 سے خاندانی پنشن کے بقایاجات کی مد میں 16.70 لاکھ روپے جاری کیے گئے۔
2. دفاعی پنشن یافتہ جناب ایدن سنگھ کے حق میں 16.09.2016 سے معذوری پنشن کے 30 لاکھ روپے کے بقایاجات کی ادائیگی کا معاملہ نمٹایا گیا۔
3. دفاعی پنشن یافتہ جناب کپور سنگھ کو 01.01.2006 سے جنگی چوٹ کے عنصر کے بقایاجات کی مد میں 26.12 لاکھ روپے موصول ہوئے۔
4. دفاعی پنشن یافتہ کی اہلیہ محترمہ رکمنی نائر کے حق میں 24.09.2012 سے دوہری خاندانی پنشن کے بقایاجات کی مد میں 19 لاکھ روپے جاری کیے گئے۔
5. فوجی اہلکار کی والدہ محترمہ سرنجیت کور کو 28.07.2008 سے بقایا خصوصی خاندانی پنشن کی مد میں سود سمیت 18.57 لاکھ روپے اور ایکس گریشیا کی بقایا رقم کی مد میں سود سمیت 12.60 لاکھ روپے ادا کیے گئے۔
6. دفاعی پنشن یافتہ کی بیوہ بیٹی محترمہ سنینا کماری کو 18.03.2022 سے زیرِ التوا خاندانی پنشن کے بقایاجات کی مد میں 6.27 لاکھ روپے جاری کیے گئے۔
7. دفاعی پنشن یافتہ کی اہلیہ محترمہ سیمارٹو کو 01.01.1996 سے رعایتی خاندانی پنشن کے بقایاجات کی مد میں 10.66 لاکھ روپے ادا کیے گئے۔
8. دفاعی پنشن یافتہ کی اہلیہ محترمہ انگوری دیوی کو 01.01.1996 سے عام خاندانی پنشن اور خصوصی خاندانی پنشن کے درمیان فرق کی مد میں خاندانی پنشن کے بقایاجات کے طور پر 37.40 لاکھ روپے ادا کیے گئے۔
9. دفاعی پنشن یافتہ جناب رنجیت سنگھ کو اکتوبر 2004 سے دسمبر 2023 تک کی مدت سے متعلق مدتِ معیاد گزر جانے کے باوجود واجب الادا سروس پنشن کے بقایاجات کی مد میں 25.99 لاکھ روپے ادا کیے گئے۔
10. دفاعی پنشن یافتہ کی اہلیہ محترمہ کورنگا لکشمی کو جون 2011 سے فروری 2026 تک کی خاندانی پنشن کے بقایاجات کی مد میں 30.15 لاکھ روپے ادا کیے گئے۔

 

******

 

ش ح۔ ف ا۔ م ر

U-NO. 3029

 

(ریلیز آئی ڈی: 2306706) وزیٹر کاؤنٹر : 12