نیشنل ایکشن فار مکینائزڈ سینی ٹیشن ایکو سسٹم (نمستے) اسکیم کے تحت پیشہ ورانہ حفاظتی تربیتی پروگرام کا مغربی بنگال میں افتتاح کیا گیا۔ اس کے پہلے بیچ کی تربیت درگاپور میونسپل کارپوریشن کے صفائی کارکنوں کے لیے شروع کی گئی۔

یہ پروگرام حکومتِ ہند کی وزارتِ سماجی انصاف و تفویضِ اختیارات کی ’نمستے‘ اسکیم کے تحت منعقد کیا گیا، جس میں سائنسی و صنعتی تحقیقاتی کونسل-مرکزی مکینیکل انجینئرنگ ریسرچ انسٹی ٹیوٹ (سی ایس آئی آر۔ سی ایم ای آر آئی)  نے تکنیکی معاونت فراہم کی۔

پروگرام کا افتتاح حکومتِ مغربی بنگال کی شہری ترقی و بلدیاتی امور کی وزیرِ انچارج محترمہ اگنی مترا پال کی موجودگی میں کیا گیا۔

پروگرام میں سی ایس آئی آر۔ سی ایم ای آر آئی، ریاستی شہری ترقیاتی ایجنسی، آسنسول میونسپل کارپوریشن، درگاپور میونسپل کارپوریشن اور نیشنل صفائی کرمچاریز فنانس اینڈ ڈیولپمنٹ کارپوریشن (این ایس کے ایف ڈی سی) کے اعلیٰ حکام اور نمائندوں نے بھی شرکت کی۔

اجتماع سے خطاب کرتے ہوئے محترمہ اگنی مترا پال نے صفائی کارکنوں کو محفوظ، باوقار اور مشینی طریقۂ کار پر مبنی کام کا ماحول فراہم کرنے کی اہمیت پر زور دیا۔ انہوں نے تربیت، مناسب حفاظتی آلات کی فراہمی اور مشینی صفائی کے حل کے وسیع تر استعمال کے ذریعے خطرناک طریقۂ صفائی کے خاتمے کے عزم کا اعادہ کیا۔

محترمہ اگنی مترا پال نے مغربی بنگال میں صفائی کارکنوں کے تحفظ اور صلاحیتوں کو مضبوط بنانے میں وزارتِ سماجی انصاف و تفویضِ اختیارات، نیشنل صفائی کرمچاریز فنانس اینڈ ڈیولپمنٹ کارپوریشن (این ایس کے ایف ڈی سی) اور سائنسی و صنعتی تحقیقاتی کونسل — مرکزی مکینیکل انجینئرنگ تحقیقی ادارہ (سی ایس آئی آر۔ سی ایم ای آر آئی) کی جانب سے فراہم کی جانے والی معاونت کو سراہا۔ انہوں نے کہا کہ صفائی کارکن شہروں کو صاف ستھرا اور صحت مند رکھنے میں اہم کردار ادا کرتے ہیں اور ان کی عزتِ نفس، تحفظ اور فلاح و بہبود کو یقینی بنانا ہم سب کی مشترکہ ذمہ داری ہے۔

مغربی بنگال میں سیور اور سیپٹک ٹینک کی صفائی سے وابستہ 7,630 کارکنوں کی تفصیلات جمع کرنے کا عمل مکمل کرلیا گیا ہے۔ شناخت شدہ کارکنوں میں ذاتی حفاظتی سازوسامان کے کِٹس بھی تقسیم کیے جاچکے ہیں۔ ریاست کی 124 میونسپلٹیوں اور تین چھاؤنی بورڈوں میں صفائی کے خطرناک طریقوں کی روک تھام کے حوالے سے بیداری کی ورکشاپس بھی منعقد کی گئی ہیں۔

ہنگامی حالات سے نمٹنے کی تیاریوں کو مضبوط بنانے کے لیے صفائی کارکنوں کے بلڈ گروپ کی تفصیلات جمع کی گئی ہیں اور ایک ہنگامی معلوماتی نظام قائم کیا گیا ہے، تاکہ بحرانی حالات میں بروقت امداد فراہم کرنے میں سہولت ہو۔

پروگرام کے دوران صفائی کارکنوں میں شناختی کارڈ بھی تقسیم کیے گئے۔ اس اقدام کے ذریعے صفائی کارکنوں کو شہری صفائی کے نظام کا ایک لازمی حصہ تسلیم کرنے کے ساتھ ساتھ ان کے کام کی عزت و وقار اور اہمیت کو بھی اجاگر کیا گیا ہے۔

درگاپور میونسپل کارپوریشن سے وابستہ صفائی کارکنوں نے پروگرام میں شرکت کی۔ ذاتی حفاظتی سازوسامان کی اہمیت اور اس کے درست استعمال کو اجاگر کرنے والی صوتی و بصری حفاظتی پیشکش بھی پیش کی گئی۔ معززین نے ’سوچھ بھارت ٹیسٹ بیڈ‘ اور صفائی کارکنوں کے لیے سائنسی و صنعتی تحقیقاتی کونسل — مرکزی مکینیکل انجینئرنگ تحقیقی ادارے (سی ایس آئی آر۔ سی ایم ای آر آئی) کی جانب سے تیار کردہ تربیتی مرکز کا بھی دورہ کیا۔

پیشہ ورانہ حفاظتی تربیتی پروگرام پانچ روز تک جاری رہے گا اور اس میں 30 گھنٹے کی تربیت دی جائے گی۔ ہر بیچ میں زیادہ سے زیادہ 45 صفائی کارکن شامل ہوں گے۔

تربیت مکمل ہونے کے بعد شرکا کی کارکردگی کا جائزہ لیا جائے گا۔ کم از کم 70 فیصد حاضری برقرار رکھنے والے شرکا کو سند کے ساتھ ایک ہزار روپے وظیفہ بھی دیا جائے گا۔

اس تربیت کے ذریعے صفائی کارکنوں کے پیشہ ورانہ تحفظ، ذاتی حفاظتی سازوسامان کے مناسب استعمال، محفوظ طریقۂ کار، ہنگامی صورتِ حال سے نمٹنے اور مشینی صفائی کے کاموں سے متعلق معلومات اور عملی مہارتوں میں اضافہ ہوگا۔

پہلے مرحلے میں یہ تربیتی پروگرام درگاپور میونسپل کارپوریشن، آسنسول میونسپل کارپوریشن، بردھمان میونسپلٹی، بدھان نگر میونسپل کارپوریشن اور چندن نگر میونسپل کارپوریشن میں نافذ کیا جا رہا ہے۔ بعد ازاں اسے مرحلہ وار ریاست کی دیگر میونسپلٹیوں تک بھی توسیع دی جائے گی۔

اس اقدام کے تحت سائنسی و صنعتی تحقیقاتی کونسل — مرکزی مکینیکل انجینئرنگ تحقیقی ادارہ (سی ایس آئی آر۔ سی ایم ای آر آئی) کو صفائی کارکنوں کے تحفظ اور صفائی کے کاموں میں مشینی طریقۂ کار کے فروغ کے لیے ایک جامع اور واحد ادارہ جاتی مرکز کے طور پر کام کرنے کی تجویز ہے۔ یہ ادارہ پیشہ ورانہ تحفظ کی تربیت، حفاظتی سازوسامان کی جانچ اور جائزے، نیز صفائی کے کاموں میں استعمال ہونے والے آلات اور دیگر سازوسامان کی تصدیق کے لیے ایک مربوط پلیٹ فارم فراہم کرے گا۔

یہ ادارہ جاتی نظام متعلقہ تکنیکی اور حفاظتی تقاضوں کے مطابق حفاظتی سازوسامان کی منظم جانچ میں سہولت فراہم کرتے ہوئے موزوں اور قابلِ اعتماد حفاظتی آلات کے استعمال کو فروغ دے گا۔ اس کے علاوہ، منظم تکنیکی اور عملی تربیت کے ذریعے صفائی کارکنوں اور دیگر متعلقہ افراد کی صلاحیتوں میں اضافے میں بھی معاونت کرے گا۔

تربیت، ٹیکنالوجی، جانچ اور آلات کی تصدیق کو ایک ہی ادارہ جاتی نظام کے تحت یکجا کرنے سے یہ اقدام شہری بلدیاتی اداروں کو حفاظتی سازوسامان اور مشینی صفائی کے حل سے متعلق باخبر اور موزوں فیصلے کرنے میں مدد دے گا۔

’نمستے‘ اسکیم صفائی کارکنوں کے تحفظ، عزت و وقار اور سماجی و معاشی بہبود کو فروغ دینے کے ساتھ ساتھ صفائی کے کاموں میں مشینی طریقۂ کار کو رواج دینے اور خطرناک طریقۂ صفائی کے خاتمے کے لیے کوشاں ہے۔

اس اسکیم کا مقصد یہ یقینی بنانا ہے کہ صفائی کارکنوں کو سیور یا سیپٹک ٹینک میں خطرناک طور پر ہاتھ سے داخل ہوکر صفائی کرنے پر مجبور نہ ہونا پڑے۔ شہری بلدیاتی اداروں، سرکاری و نجی تنظیموں، ٹھیکیداروں اور صفائی کے کاموں سے وابستہ دیگر اداروں سے توقع کی جاتی ہے کہ وہ مقررہ حفاظتی طریقۂ کار پر عمل کریں اور مشینی طریقوں کو اختیار کریں۔

اس پروگرام کے ذریعے حکومتِ ہند اور حکومتِ مغربی بنگال نے محفوظ، مشینی اور باوقار صفائی کے نظام کی تشکیل کے اپنے عزم کا اعادہ کیا۔

تحفظ، عزت و وقار اور مشینی طریقۂ کار ’نمستے‘ اسکیم کے تین بنیادی ستون ہیں۔

 

***

ش ح۔ ف ا۔ م ر

U-NO. 3001

(ریلیز آئی ڈی: 2306521) وزیٹر کاؤنٹر : 9