لوک سبھا کے اسپیکر جناب اوم برلا نے آج پارلیمنٹ ہاؤس کمپلیکس میں سیشلز کی قومی اسمبلی کی اسپیکر محترمہ ازاریل یولانڈا ارنیستا اور سیشلز کے معزز پارلیمانی وفد کے ساتھ دوطرفہ پارلیمانی مذاکرات کیے۔

محترمہ ازاریل ارنیستا کا خیرمقدم کرتے ہوئے جناب برلا نے انہیں سیشلز کی قومی اسمبلی کی پہلی خاتون اسپیکر منتخب ہونے پر مبارک باد پیش کی۔ جناب برلا نے رواں سال کے اوائل میں نئی دہلی میں منعقدہ دولتِ مشترکہ کے اسپیکروں اور صدور کی 28ویں کانفرنس (سی ایس پی او سی ) کے دوران محترمہ ارنیستا کے ساتھ اپنی سابقہ ملاقات کو گرمجوشی سے یاد کرتے ہوئے ہندوستان کی روحانی روایات، بالخصوص یوگا، میں ان کی گہری دلچسپی کو سراہا۔ انہوں نے دیوی ما کالی سے ان کی عقیدت کا بھی گرمجوشی سے اعتراف کیا۔

ہندوستان اور سیشلز کے درمیان گہری اور دیرپا دوستی کا ذکر کرتے ہوئے جناب برلا نے سیشلز کو اس کی آزادی کی 50ویں سالگرہ اور دونوں ممالک کے درمیان سفارتی تعلقات کے قیام کی 50ویں سالگرہ پر مبارک باد پیش کی۔ انہوں نے کہا کہ ہندوستان اور سیشلز کے تعلقات روایتی سفارتی دائرۂ کار سے کہیں آگے ہیں اور صدیوں پرانے تہذیبی روابط، ہند نژاد افراد کی فعال برادری اور عوام سے عوام کے دیرپا تعلقات نے انہیں مزید مستحکم اور مالا مال کیا ہے۔

جناب برلا نے کہا کہ دونوں ممالک کی مشترکہ جمہوری اقدار اور روایات نے اس قریبی رشتے کو مزید مستحکم کیا ہے۔ انہوں نے بالخصوص سیشلز میں ہندوستان کی روحانی روایات، خصوصاً یوگا، میں گہری اور بڑھتی ہوئی دلچسپی کو اجاگر کیا۔ محترمہ ارنیستا کی یوگا سے ذاتی رغبت کو سراہتے ہوئے انہوں نے سیشلز میں یوگا کو مزید مقبول بنانے کے لیے ہندوستانی ماہرینِ یوگا کی خدمات کے ذریعے ہندوستان کی جانب سے تعاون کی پیشکش کی۔

وزیر اعظم جناب نریندر مودی کے سیشلز کے حالیہ سرکاری  دورے کا حوالہ دیتے ہوئے جناب برلا نے وزیر اعظم مودی اور سیشلز کے صدر عزت مآب ڈاکٹر پیٹرک ہرمینی کے درمیان قریبی اور گرمجوشی پر مبنی  تعلقات کا ذکر کیا۔ انہوں نے اس امر پر خصوصی فخر کا اظہار کیا کہ وزیر اعظم مودی نے سیشلز کی قومی اسمبلی کے ایک غیر معمولی اجلاس سے خطاب کیا اور ایسا کرنے والے پہلے ہندوستانی وزیر اعظم بن گئے۔

جناب برلا نے کہا کہ وزیر اعظم مودی کے اس تاریخی خطاب نے ہندوستان اور سیشلز کے درمیان کثیرجہتی تعلقات میں نئی توانائی اور تازہ رفتار پیدا کی ہے، جس سے دونوں ممالک کے درمیان شراکت داری کی گرمجوشی اور گہرائی کی ایک بار پھر توثیق ہوئی ہے۔ پارلیمانی روابط کی اہمیت پر زور دیتے ہوئے جناب برلا نے دونوں ممالک کی قانون ساز اسمبلیوں کے درمیان تعاون کو مزید مستحکم کرنے اور جمہوریت اور جمہوری اداروں کی مشترکہ وراثت کو مزید آگے بڑھانے پر زور دیا۔

محترمہ ارنیستا کے ہندوستان کے ساتھ سابقہ تعلق کا ذکر کرتے ہوئے جناب برلا نے بتایا کہ انہوں نے پارلیمانی مطالعات اور تربیت کے بیورو (بی پی ایس ٹی) کے زیر اہتمام ایک تربیتی پروگرام میں شرکت کی تھی، جو اب پارلیمانی تحقیق و تربیت کے ادارے (پرائیڈ) کے نام سے جانا جاتا ہے۔ انہوں نے کہا کہ ہندوستان کے ساتھ محترمہ ارنیستا کی دیرینہ وابستگی نے دونوں پارلیمانوں کے درمیان قائم دیرپا روابط کو فروغ دینے میں بامعنی کردار ادا کیا ہے۔ سیشلز کی قومی اسمبلی کے اراکین کو ہندوستانی پارلیمنٹ کا دورہ کرنے کی دعوت دیتے ہوئے جناب برلا نے کہا کہ اس طرح کے باہمی تبادلے ہندوستان کی ثروت مند اور متحرک جمہوری روایات کو قریب سے دیکھنے اور ان کا تجربہ کرنے کا موقع فراہم کریں گے۔ انہوں نے پارلیمانی تحقیق و تربیتی ادارہ برائے جمہوریت (پرائیڈ) کے پارلیمانی صلاحیتوں کو مضبوط بنانے میں کردار کو اجاگر کیا اور بتایا کہ سیشلز کے اراکین اور حکام کے لیے قانون سازی کا مسودہ تیار کرنے، پارلیمانی طریقۂ کار اور قانون سازی کے دیگر مراحل سے متعلق خصوصی ضروریات کے مطابق تربیتی پروگرام منعقد کیے جا سکتے ہیں۔

پارلیمانی امور میں ٹیکنالوجی کے تبدیلی لانے والے کردار پر روشنی ڈالتے ہوئے جناب برلا نے بتایا کہ ہندوستانی پارلیمنٹ نے کاغذ سے پاک پارلیمنٹ کے تصور کو اختیار کرلیا ہے اور پارلیمانی کارروائی کو ہندوستان کی 22 زبانوں میں ترجمہ کرنے کی سہولت فراہم کرنے کے لیے مصنوعی ذہانت سے استفادہ کیا جا رہا ہے۔ انہوں نے جدید ترین ٹیکنالوجی، بشمول ڈیجیٹل پارلیمنٹ، میں ہندوستان کی جانب سے کی جانے والی وسیع سرمایہ کاری اور ملک بھر کے قانون ساز اداروں کو ایک مشترکہ ڈیجیٹل پلیٹ فارم سے منسلک کرنے کی کوششوں کو بھی اجاگر کیا۔ انہوں نے صحت، ڈیجیٹل تبدیلی، بنیادی ڈھانچے اور قابلِ تجدید توانائی جیسے شعبوں میں ہندوستان اور سیشلز کے درمیان تعاون کے وسیع امکانات پر زور دیا۔ جناب برلا نے پارلیمانی صلاحیت سازی کے شعبے میں پرائیڈ کے ذریعے ہندوستان کے وسیع تجربے سے استفادہ کرنے کی پیشکش کی اور تجویز پیش کی کہ سیشلز کی قومی اسمبلی کے اراکین اور عہدیدار پرائیڈ کے خصوصی تربیتی پروگراموں سے فائدہ اٹھا سکتے ہیں۔

جناب برلا نے ثقافت، تعلیم اور سیاحت کے ذریعے ہندوستان اور سیشلز کے درمیان عوام سے عوام کے تعلقات کو مزید مستحکم اور مالا مال کرنے کی اہمیت پر زور دیا۔ انہوں نے اس بات کی بھی نشاندہی کی کہ دونوں ممالک عالمی جنوب کی آواز اور امنگوں کو مؤثر انداز میں اجاگر کرنے کے لیے مل کر کام کر سکتے ہیں۔ سیشلز کو بحرِ ہند کے خطے میں ہندوستان کا ایک قابلِ اعتماد اور قابلِ قدر شراکت دار قرار دیتے ہوئے جناب برلا نے وژن مہاساگر کے تناظر میں اس کی اہمیت کو اجاگر کیا۔ انہوں نے اقوامِ متحدہ اور دیگر کثیرجہتی فورمز سمیت مختلف پلیٹ فارمز کے ذریعے علاقائی امن، استحکام اور خوشحالی کے فروغ کے لیے دونوں ممالک کے درمیان مزید قریبی تعاون کی اہمیت پر زور دیا۔

اس موقع پر اظہارِ خیال کرتے ہوئے معزز محترمہ ازاریل ارنیستا نے جناب برلا کی جانب سے ان کے اور پارلیمانی وفد کے لیے کی جانے والی پرتپاک میزبانی پر ان کا شکریہ ادا کیا۔ سی ایس پی او سی کے دوران ہندوستانی پارلیمنٹ کے اپنے سابقہ دورے کو یاد کرتے ہوئے انہوں نے کہا، ’’ہندوستان میرے دل میں بستا ہے۔‘‘ ہندوستان کو ’’جمہوریت کی ماں‘‘ قرار دیتے ہوئے محترمہ ارنیستا نے ہندوستان کے ساتھ اپنی دیرینہ وابستگی کو خوشگوار انداز میں یاد کیا۔ انہوں نے کہا کہ ہندوستانی سیشلز میں آباد ہونے والے اولین باشندوں میں شامل تھے اور ہندوستانی تہذیب و ثقافت جزیرہ نما ملک کے سماجی اور ثقافتی تانے بانے میں گہرائی سے پیوست ہے۔

یہ نشاندہی کرتے ہوئے کہ ہندوستان اور سیشلز کے درمیان محض ایک سمندر ہی مشترک نہیں بلکہ مشترکہ تاریخ اور دیرپا روابط بھی موجود ہیں، محترمہ ارنیستا نے پارلیمنٹ کو ڈیجیٹل بنانے کے شعبے میں ہندوستان کی نمایاں پیش رفت اور اس کے امورِ کار میں ٹیکنالوجی کے وسیع پیمانے پر استعمال کو سراہا۔

اس موقع پر ڈاکٹر ڈی  پُرندیشوری، رکن پارلیمنٹ؛ محترمہ اپراجیتا سارنگی، رکن پارلیمنٹ؛ اور محترمہ ہمادری سنگھ، رکن پارلیمنٹ بھی موجود تھیں۔

******

ش ح۔ ف ا۔ م ر

U-NO. 2951