ایئر مارشل سندیپ تھریجا نے یکم ستمبر 2026 کو مسلح افواج کی طبی خدمات کے 47ویں ڈائریکٹر جنرل (ڈی جی اے ایف ایم ایس) کے طور پر عہدہ سنبھال لیا۔ ڈی جی اے ایف ایم ایس کی حیثیت سے ایئر مارشل تھریجا دفاعی افواج کو جامع طبی سہولیات کی فراہمی کی نگرانی کریں گے۔ ان کی تقرری ایسے وقت میں ہوئی ہے جب مسلح افواج کی طبی خدمات میں نمایاں تبدیلیاں جاری ہیں، جن میں عملی طبی تیاری، مشترکہ طور پر کام کرنے کی صلاحیت، فوجی صحت کی دیکھ بھال کو جدید بنانا، ڈیجیٹل صحت، طبی تحقیق اور اختراع، انسانی وسائل کی ترقی اور خدمت کرنے والے اہلکاروں، سابق فوجیوں اور ان کے زیرکفالت افراد کو اعلیٰ معیار کی طبی سہولیات فراہم کرنے پر مسلسل زور دیا جا رہا ہے۔

آرمڈفورسز میڈیکل کالج (اے ایف ایم سی)، پونے کے سابق طالب علم ایئر مارشل تھریجا کو دسمبر 1986 میں آرمی میڈیکل کور میں کمیشن ملا۔ وہ ایک ممتاز معالج اور معدے و جگر کے امراض کے ماہر ہیں۔ انہوں نے دہلی سے طب میں ایم ڈی اور آل انڈیا انسٹی ٹیوٹ آف میڈیکل سائنسز، نئی دہلی سے معدے کے امراض میں ڈی ایم کی ڈگری حاصل کی۔

تقریباً چار دہائیوں پر محیط شاندار پیشہ ورانہ زندگی کے دوران ایئر مارشل نے طبی، تدریسی، عملی اور انتظامی شعبوں میں مختلف اہم عہدوں پر خدمات انجام دی ہیں۔ ان کی اہم کمانڈ اور انتظامی ذمہ داریوں میں 167 ملٹری ہسپتال کے کمانڈنٹ، بیس ہسپتال، دہلی چھاؤنی میں بریگیڈیئر انچارج ایڈمنسٹریشن اور کمانڈر ٹروپس، اور کمانڈ ہسپتال (سنٹرل کمانڈ) کے کمانڈنٹ کے عہدے شامل ہیں۔ کووڈ-19 وبا کے دوران بیس ہسپتال، دہلی چھاؤنی میں ان کی تعیناتی پیچیدہ اور تیزی سے بدلتے ہوئے طبی و انتظامی چیلنجوں سے نمٹنے کے حوالے سے نمایاں رہی۔ کمانڈ ہسپتال، لکھنؤ کی کمان سنبھالتے ہوئے نئے کمانڈ ہسپتال کے لیے تفصیلی پروجیکٹ رپورٹ ریکارڈ وقت میں تیار کی گئی۔

اے ایف ایم سی، پونے میں ڈائریکٹر اور کمانڈنٹ کی حیثیت سے انہوں نے طبی تعلیم اور تحقیق کو مضبوط بنانے کے لیے متعدد اقدامات کی قیادت کی۔ ڈی جی ایم ایس (ایئر) کی حیثیت سے انہوں نے گگن یان مشن کو فروغ دینے پر خصوصی توجہ دی اور خلابازوں کے انتخاب اور تربیت کے لیے اینالاگ تجربات کے انعقاد میں اہم کردار ادا کیا۔ ان کی نگرانی میں بی ایچ آئی ایس ایچ ایم (بھارت ہیلتھ انیشی ایٹو فار سہیوگ ہِتا اینڈ میتری) کیوبز وزیر اعظم کی جانب سے مالدیپ کو تحفے میں دیے گئے، جبکہ جمیکا، کیوبا، سری لنکا اور میانمار کو انسانی امداد اور آفات سے نمٹنے کے اقدامات کے تحت بھی یہ کیوبز فراہم کیے گئے۔

ڈی جی اے ایف ایم ایس کا عہدہ سنبھالنے سے قبل ایئر مارشل سندیپ تھریجا نے نئی دہلی میں نیشنل وار میموریل پر پھولوں کی چادر چڑھائی اور شہید فوجیوں کو خراج عقیدت پیش کیا۔

****

ش ح۔ ش آ ۔ ر ب

U. No-2881

(ریلیز آئی ڈی: 2305624) وزیٹر کاؤنٹر : 6