কির্গিজস্তানগী রাস্ত্রপতি,

এক্সিলেন্সীজ,

খুরুমজরি!

এস.সি.ও.গী ২৫শুবা মপোক কুমওনগী অখন্নবা থৌরম অসিদা ময়াম পুম্নমক্কী মরক্তা মফম অসিদা লাকপা অসিদা ঐহাক য়াম্না নুংঙাইবা ফাওই।

ঐহাক্না রাস্ত্রপতি জাপারোবপু বিস্কেক্তা ‌ঐখোয়বু তরাম্না ওকপিবা অমসুং মীয়োক-মীচান ফাবা মতৌগীদমক থাগৎপা ফোংদোকচরি।

ঐখোয়না ঙরাং কির্গিজস্তানগী নীংতম্বা নুমিৎকী থৌরমদা মফম অসিদা লাকপগী খুদোংচাবা ফংখি। ঐহাক্না অমুক্কা হন্না রাস্ত্রপতি অমসুং লৈবাক অসিগী মীয়াম্বু থম্মোয় শেংনা নুংঙাইবা ফোংদোকচরি।

অমসুং ঙসি, উজবেকিস্তানগী নীংতম্বা নুমিৎকী থৌরমদা, ঐহাক্না উজবেকিস্তানগী রাস্ত্রপতি অমসুং মীয়ামদা থম্মোয় শেংনা নুংঙাইবা ফোংদোকচরি।

ৱর্ল্দ নোমাদ গেম্সকী চাউথোকচনীংঙাই ওইবা হৌদোকপগী থৌরম অদুদা, ঐখোয়না পুম্নমক্না কির্গিজস্তানগী ‌ইনাক খুল্লবা চৎনবী অমসুং ঐখোয়গী অপুনবা হেরিতেজ অদু উবা ফংখি। অসিগুম্বা শেয়র হেরিতেজ অমসুং নাকল অনিগী ওইবা মরী অসিনা এস.সি.ও.গী ইমুংগী মরুওইবা পাঙ্গল অমা ওইরি।

মরুপশিং,

হৌখিবা চহি ২৫ অসিদা, এস.সি.ও.না য়ুরসিয়াগী পাক চাউরবা লমদম অসিদা দাইলোগ অমসুং কোওপরেসনগী মপাঙ্গল লৈবা চৎনবী অমা শেমগৎলে। পুন্না, ঐখোয়না ঐখোয়গী মীয়ামগী য়াইফনবা অমসুং মীওইবা জাতিগী খুমাং চাউশিলহন্নবা মমল য়াম্লবা থৌদাংশিং লৌরি। চহি ২৫ অসিদা ঐখোয়না কোওপরেসনগীদমক্তা অচেৎপা য়ুম্ফম অমা শেমগৎলে। হৌজিক লাক্কদৌরিবা চহি ২৫ অসিদা ঐখোয়গী পান্দমদি হায়রিবা কোওপরেসন অসিবু মশক থোকপা মহৈ ওইনা ওন্থোকপা ওইগদবনি।

ঙসি, মালেম অসিনা শিংনবা অমসুং তংদু লৈতাবা লৈতবগা লোয়ননা, ঐখোয়না ঐখোয়গী মান্নবা জিওগ্রাফী অসি মান্নবা খুদোংচাবদা ওন্থোক্কদবনি অমসুং ঐখোয়গী হোৎনবশিংগী খুত্থাংদা ঐখোয়গী মীয়ামগী পুন্সিদা পোজিতিব ওইবা অহোংবশিং পুরকপা তাই।

মরুপশিং,

মমাংগী মীফমদা ঐহাক্না এস.সি.ও.গী মতাংদা ভারতকী মীৎয়েংদগী মরুওইবা য়ুম্বী অহুমগী মতাংদা পনখি:

এস (S) - সেক্যুরিতী,

সি (C) – কনেক্তিবিতী, অমসুং

ও (O) – ওপুর্চুনিতী

অসিগুম্বা য়ুম্বী অহুম অসি খক্তদা য়েংবদা নত্তনা কংক্রিৎ ওইবা মহৈ ওইনা ওন্থোক্নবা মতম অদু য়ৌরে। মসিগীদমক খ্বাইদগী মরুওইবা মথৌ তাবা অসি শান্তি অমসুং সেক্যুরিতীনি। তেরোরিজম অসি মীওইবা খুন্নাই পুম্নমক্কী ওইনা অচৌবা শিংনবনি। মসিগী মায়োক্তা লান্থেংনবদা, ঐখোয়না 'এক্সন-রিএক্সন'গী ৱাখল্লোন খক্তদা য়ুম্ফম ওইবা য়ারোই।

ঐখোয়না তেরোরিজম ফাইনান্সিং, রিক্রুত তৌবা, রেদিকেলাইজেসন অমসুং সেফ হাভনশিংগী ইকোসিস্তেম পুম্নমক থুগায়গদবনি। মরুওইবা হীরম অসিগী মতাংদা দভল স্তেন্দর্দশিংগীদমক মফম লৈতে হায়না ঐখোয়না অমত্তা ওইনা ৱা ঙাংবা তাই।

তেরোরিজমবু স্তেত পোলিসীগী খুৎলাই অমা ওইনা শীজিন্নরিবা অমসুং তেরোরিস্তশিংদা লৈফম অমসুং মতেং পীরিবা লৈবাকশিংদা অকনবা পাউজেল অমা পীগদবনি: তেরোরিজম অসি কনাগুম্বা অমত্তগী স্ত্রেতেজিক এসেৎ অমা ওইহনবা য়ারোই।

য়ুরেশিয়াদা শান্তি অমসুং সেক্যুরিতী লৈহন্নবা ঐখোয়গী অপাম্বা অসি অফগানিস্তান্দা শান্তি অমসুং তংদু লৈতাবা লৈহনবগসু মরী লৈনৈ। ভারতনা অফগানিস্তানগী মীয়ামগী চাউখৎ-থৌরাং অমসুং হ্যুমেনিতরিয়নগী মথৌ তাবশিংদা মতেং পাংদুনা লাক্লি অমসুং মখা তানা পাংথোক্কনি।

ঙসিগী ইন্তর-কনেক্তেদ ওইবা মালেম অসিদা, সেক্যুরিতীগী স্কোপ অসি মশক থোক্না পাকথোক চাউথোক্লে। নোংচুপ থংবা এসিয়াগী ক্রাইসিসনা উৎখ্রে মদুদি লমদম অমদা চত্থরিবা লান অসি লমদম অদুখক্তদা য়ুম্ফম ওইদুনা লৈতে। মসিনা মালেমগী ইনর্জী সেক্যুরিতী, মেরিতাইম ত্রেদ অমসুং সপ্লাই চেনশিংদা অকাইবা পীরি। মসিদা খ্বাইদগী হেন্না শোকহল্লিবসি গ্লোবেল সাউথকী লৈবাকশিংনি। মরম অদুনা, ভারতনা মতম পুম্নমক্তা হায়দুনা লাক্লি মদুদি অৱাবা অমসুং অয়েৎপা পুম্নমক্কী ৱারোইশিন অসি লানফমদা নত্তনা ৱারী শানদুনা অমসুং দিপ্লোমেসীগী খুত্থাংদা ওইথোকপা য়াই।

দ্রগ ত্রাফিক অসি ক্রাইম অমা খক্তা নত্তনা ঐখোয়গী নহা ওইরিবা জেনরেসন অমসুং রিজনেল সেক্যুরিতীগীদমক য়াম্না চাউবা খুদোংথীবা অমনি। এস.সি.ও.গী মখাদা সেক্যুরিতী থ্রেৎশিং, ওর্গানাইজ ক্রাইম, ইনফোর্মেসন সেক্যুরিতী অমসুং নারকোতিক্সকুম্বা শিংনবশিং থেংননবা সেন্তরশিং লিংখৎপা অসি পোজিতিব ওইবা খোঙথাং অমনি। ঐখোয়না মখোয়বু প্রেক্তিকেল কোওর্দিনেসন অমসুং মতম চানা এক্সন লৌনবগী ইফেক্তিব ওইবা খুৎলাইশিং ওইহন্নবা হোৎনগদবনি।

মরুপশিং,

ঐখোয়গী অপুনবা চাউখৎপগী অনিশুবা য়ুম্বী অসি মপাঙ্গল কনবা অমসুং থাজবা য়াবা কনেক্তিবিতীনি। ভারতনা কৈথেলশিং শম্নহন্নবা, ললোন-ইতিক লাইথোকহন্নবা অমসুং চাউখৎপগী অনৌবা লম্বীশিং হাংদোক্নবা হোৎনরিবা পুম্নমকপু শৌগৎলি। অদুম ওইনমক, লৈবাক খুদিংমক্কী লৈঙাক অমসুং লমগী অপুনবগী ইকাই খুম্নবা অসি হোৎনবদা তঙাইফদবা অমনি। মসিনা এস.সি.ও.গী চার্তরগী মপুং ওইবা ৱাখল্লোনসু ওইরি।

তুংলমচৎতা, কনেক্তিবিতীগী স্কোপ অসি মখা তানা পাকথোক চাউথোকহল্লগনি। লম্বীশিং, রেলৱেজশিং অমসুং এয়র কোরিদোরশিংগী মথক্তা ঐখোয়না কস্তমগী থৌওংশিং লাইথোকহনগদবনি, দিজিতেল দোকুমেন্তশিং প্রমোৎ তৌগদবনি, অমসুং লোজিস্তিক নেৎৱার্কশিংবু হেন্না ইফিসেন্ত ওইহনগদবনি।

মরুপশিং,

অহুমশুবা য়ুম্বী অসিদি 'ওপুর্চুনিতী'নি।

মসিগী ৱাহন্থোক্তি এস.সি.ও.গী তেংবাং পীনবগী কান্নবশিং অসি ঐখোয়গী মীয়ামদা হকথেংননা য়ৌহন্নবগীদমক থাজবা পীবা হায়বসিনি। ঐখোয়গী খ্বাইদগী চাউবা পোৎলমদি ঐখোয়গী মীয়ামগী মরক্তা লৈনরিবা মরী অদুনি। ভারতকী ওইনা, এস.সি.ও.না অচৌবা সিভিলাইজেসনশিং, কলচরশিং অমসুং ৱাখল্লোনশিংগী অপুনবা অমা উৎলি। লাক্কদৌরিবা চহি ২৫ অসিদা, ঐখোয়না এস.সি.ও.গী মনুংদা ঐখোয়গী কোওপরেসনগী ময়াইদা পিপল-তু-পিপল বোন্দশিং থমগদবনি।

ঐখোয়গী মাইপাকপগী অশেংবা চাং অদুদি ঐখোয়গী হোৎনবনা নহারোলশিংগীদমক অনৌবা খুদোংচাবশিং, ঐখোয়গী ওন্ত্রপ্রিন্যুওরশিংগীদমক হাংলিবা অনৌবা কৈথেলশিং, ঐখোয়গী লৌমীশিংনা তেক্নোলোজীদগী কদাই ফাওবা কান্নবা ফংলবগে, অমসুং ঐখোয়গী নাগরিকশিংগী পুন্সি মহিং ফগৎলকপগে হায়বসিনি।

মসিনা “সেক্যুরিতী, কনেক্তিবিতী অমসুং ওপুর্চুনিতি”গী অশেংবা ৱাহন্থোক্নি।

এস.সি.ও.গী মনুংদা ঐখোয়গী মতেং পীনবা অসি সরকারনা খক্তনা থৌদাং লৌবা নত্তনা মীয়ামনা থৌদাং লৌগদবনি। কির্গিজস্তানগী প্রসিদেন্সীগী মখাদা এস.সি.ও.গী মনুংদা নহারোলশিং শরুক য়াবদা অখন্নবা মীৎয়েং থম্লিবা অসিদা ঐহাক নুংঙাইবা ফাওই। ভারতনা এস.সি.ও.গী মনুংদা স্তার্ত-অপ ফোরম, য়ং ওথর্স কনক্লেব, অমসুং য়ং সাইন্তিস্ত ফোরম অসিনচিংবা ইনিসিয়েতিবশিং হৌদোকখ্রে।

হৌখিবা চহিদা ভারতনা এস.সি.ও. সিভিলাইজেস্নেল দাইলোগ ফোরম শেম্নবা ৱাফম পুখৎখি। মসিগী অহানবা সেসন অসি চহি অসিদা ভারত্তা পাংথোক্কনি হায়বা অসিদা ঐহাক নুংঙাইবা ফাওই। ঐহাক্না থাজবা থম্লি মদুদি, অদোম্না থৌনা ফনা শরুক য়াবগা লোয়ননা, ফোরম অসিনা এস.সি.ও.গী মনুংদা পুক্নিং থৌগৎনীংঙাই ওইবা ৱারী শানবগী শক্তি লৈবা প্লেৎফোর্ম অমা ওইরগনি।

মরুপশিং,

কির্গিজস্তানগী শক্নাইরবা অইবা চিংগিজ আইতমাতোবনা মালেমদা য়াম্না ফজবা অমসুং কান্নরবা ৱাখল্লোন অমা পীখি। মহাক্না হায়খি মদুদি ঐখোয়না ঐখোয় অমত্তা ওইহনবদা হেন্না মীৎয়েং থম্বা নত্তনা ঐখোয়বু খায়দোক্লিবা অদুদা হেন্না মীৎয়েং থম্মী।

মসিগী পাউজেল অসি ঙসিসু এস.সি.ও.গী ওইনসু অচুম্বা ওইরি। ঐখোয়গী খেন্নবসি ঐখোয়গী মশকনি; ঐখোয়গী মান্নবা পান্দম অসি ঐখোয়গী পাঙ্গলনি। ঐখোয়না বিস্কেকতগী মসিগী ৱারেপ অসিগা লোয়ননা মাংলোমদা চংশিনবা তাই -

শেয়র্দ জিওগ্রাফিদগী শেয়র্দ ওপুর্চুনিতীশিং ফাওবা,

ভিজনদগী হৌরগা ফলশিং ফাওবা,

অমসুং সরকারনা শাহৌ পীরিবা কোওপরেসনদগী মীওইশিংনা শাহৌ পীবা পার্তনরশিপ ফাওবা। অসিগুম্বা থাজবা অমসুং অচেৎপা ফিরেপকা লোয়ননা ভারতনা এস.সি.ও.গী ইমুং-মনুংগী পুন্না চৎমিন্নরিবা খোঙচৎ অসিদা শরুক য়ানবা শেম-শারি।

হন্না হন্না থাগৎচরি।

***