بھارت–ارجنٹینا مشترکہ تجارتی کمیٹی (جے ٹی سی) کا چوتھا اجلاس 24 اگست 2026 کو بیونس آئرس کے پالاسیو سان مارٹن میں منعقد ہوا۔ بھارتی وفد کی قیادت کامرس سکریٹری جناب راجیش اگروال نے کی، جبکہ ارجنٹینا کے وفد کی قیادت بین الاقوامی اقتصادی تعلقات کے سکریٹری سفیر فرنانڈو برون نے کی۔ دونوں فریقوں نے 2025 میں معزز وزیر اعظم جناب نریندر مودی کے ارجنٹینا کے دورے کے دوران طے پانے والے روڈ میپ پر پیش رفت کا جائزہ لیا اور دونوں ممالک کے درمیان اسٹریٹجک اور اقتصادی شراکت داری کو مزید گہرا کرنے کے عزم کا اعادہ کیا۔

بھارت اور ارجنٹینا کے درمیان دو طرفہ تجارت 2025 میں 6.5 ارب امریکی ڈالر سے تجاوز کر گئی، جبکہ سالانہ شرح نمو مسلسل 17 فیصد سے زیادہ رہی۔ بھارت ارجنٹینا کا پانچواں سب سے بڑا تجارتی شراکت دار بن چکا ہے، جو دو طرفہ تجارتی اشیا کے دائرۂ کار کو مزید وسعت دینے اور متنوع بنانے کے نمایاں امکانات کو اجاگر کرتا ہے۔ ارجنٹینا کی بیرونی تجارت کو آسان بنانے، غیر محصولاتی رکاوٹوں کو کم کرنے اور سرمایہ کاری کو فروغ دینے کی جاری کوششوں سے ارجنٹینا کی مارکیٹ میں بھارتی کمپنیوں کی زیادہ شمولیت کی توقع ہے۔ دونوں فریقوں نے اس بات پر زور دیا کہ اقتصادی شراکت داری کے فروغ کے ساتھ کاروباری اداروں کے لیے زیادہ باہمی تعاون اور مواقع کا زیادہ متوازن فریم ورک یقینی بنانا ضروری ہے۔

کان کنی، توانائی اور بنیادی ڈھانچے کے شعبوں میں سرمایہ کاری کے مواقع پر بھی تبادلۂ خیال کیا گیا، جس میں ارجنٹینا کے لیتھیم شعبے میں بھارتی کمپنی کے اے بی آئی ایل کی مسلسل شمولیت بھی شامل ہے۔ ارجنٹینا کے کاتامارکا صوبے میں کے اے بی آئی ایل کی کان کنی کی سرگرمیوں، جو ارجنٹینا میں کسی بھارتی کمپنی کا پہلا لیتھیم کان کنی کا منصوبہ ہے، میں نمایاں پیش رفت ہوئی ہے اور فیز دوم کی ڈرلنگ مکمل ہو چکی ہے۔ دونوں ممالک کے درمیان منصوبہ بند شراکت داری کو مزید گہرا کرنے کے لیے سالٹا اور خوخوئی صوبوں میں مزید تعاون کے امکانات کا بھی جائزہ لیا جا رہا ہے۔

مذاکرات میں بھارتی زرعی مصنوعات کو ارجنٹینا کی مارکیٹ میں داخلے کی سہولت فراہم کرنے کے سلسلے میں حوصلہ افزا پیش رفت کا بھی ذکر کیا گیا۔ صحت و نباتاتی تحفظ (ایس پی ایس) کے اقدامات سے متعلق تکنیکی سطح کے مذاکرات بھارتی پیاز، دودھ اور دودھ سے بنی مصنوعات، انگور، آلو، کیلے اور دالوں کے لیے جاری ہیں، جو ان مصنوعات کے لیے مارکیٹ تک رسائی کی جانب ایک اہم قدم ہے۔ توقع ہے کہ ان پیش رفت سے بھارتی کسانوں اور برآمد کنندگان کے لیے مزید مواقع پیدا ہوں گے، دو طرفہ زرعی تجارت مضبوط ہوگی اور وکست بھارت 2047 کے وسیع تر مقصد کے حصول میں مدد ملے گی۔

بھارتی دوا سازی کی مصنوعات کے لیے مارکیٹ تک رسائی آسان بنانے میں بھی نمایاں پیش رفت ہوئی۔ ارجنٹینا نے اپنے دوا سازی کے ضابطہ جاتی فریم ورک کے تحت بھارت کو اینکس II سے اینکس I میں منتقل کرنے اور مارکیٹ میں داخلے کی رکاوٹیں کم کرنے کے لیے کام کرنے کا عہد کیا ہے۔ اس سے بھارتی دوا ساز کمپنیوں کے لیے مزید مواقع پیدا ہونے اور ارجنٹینا میں معیاری اور قابلِ استطاعت صحت کی سہولیات تک رسائی بہتر ہونے کی توقع ہے۔ ارجنٹینا کی اے این ایم اے ٹی اور بھارت کی سی ڈی ایس سی او کے درمیان 2019 کے مفاہمت نامے کی بنیاد پر دونوں فریقوں نے آیوروید اور یوگا کے شعبوں میں مشترکہ اقدامات کے ذریعے تعاون مزید مضبوط کرنے کا بھی عہد کیا۔

ہوا بازی، خلائی ٹیکنالوجی، ٹیلی مواصلات اور ڈیجیٹل خدمات سمیت ابھرتے ہوئے شعبوں کی نشاندہی بھی باہمی تعاون کے مزید مواقع رکھنے والے شعبوں کے طور پر کی گئی، خصوصاً 5G، مصنوعی ذہانت اور ڈیجیٹل بنیادی ڈھانچے میں۔

بھارت–مرکوسر ترجیحی تجارتی معاہدہ بھی مارکیٹ تک رسائی کو وسعت دینے اور اقتصادی انضمام مضبوط کرنے کا ایک اہم ذریعہ ہے۔ شرائط و ضوابط پر پیش رفت اور ڈیجیٹل سرٹیفکیٹس آف اوریجن کو اپنانے سے تجارت کو آسان بنانے اور کاروباری اداروں کے لیے سرحد پار تجارت کو زیادہ مؤثر بنانے میں مدد ملنے کی توقع ہے۔

جے ٹی سی کے بعد ارجنٹینا کے وزیر خارجہ، انٹرنیشنل ٹریڈ اینڈ ورشپ جناب پابلو کوئرنو اور G6 صنعتی چیمبرز کے نمائندوں کے ساتھ ایک اجلاس بھی منعقد ہوا۔ اس ملاقات میں ارجنٹینا کی کاروباری برادری نے بھارت–ارجنٹینا اقتصادی تعلقات میں موجود مواقع کے بارے میں قیمتی معلومات فراہم کیں اور صنعت کی ضروریات اور توقعات کے مطابق حکومتی اقدامات کو ہم آہنگ کرنے کی اہمیت کو مزید تقویت ملی۔

کامرس سکریٹری جناب راجیش اگروال نے زراعت، مویشی پروری اور ماہی گیری کے قومی سکریٹری جناب سرجیو اریتا کے ساتھ بھی ملاقات کی، جس میں پیاز، ترش پھلوں، ڈیری مصنوعات، اخروٹ، انگور اور کیلے سے متعلق روڈ میپ کا جائزہ لیا گیا۔ انہوں نے ڈی ریگولیشن کے سکریٹری جناب الیخاندرو کاسیسے کے ساتھ غیر محصولاتی رکاوٹوں اور بھارتی دوا ساز مصنوعات کے لیے ضابطہ جاتی منظوری پر تبادلۂ خیال کیا۔ اس کے علاوہ اختراع، سائنس و ٹیکنالوجی کی سکریٹری محترمہ ایڈریانا باراوایے، سی او این اے ای کی محترمہ خوسے فینا پیریز اور جوہری و خلائی شعبے کی ڈائریکٹر محترمہ خیمینا شیافینو کے ساتھ خلائی اور جوہری تعاون، بشمول مجوزہ اسرو– سی او این اے ای اجلاس، پر بھی بات چیت کی گئی۔

یہ روابط 25 اگست 2026 کو پالاسیو سان مارٹن میں منعقدہ بھارت–ارجنٹینا بزنس فورم کے ذریعے مزید مضبوط ہوئے۔ فورم میں دونوں ممالک کے سرکاری نمائندوں اور معروف کاروباری اداروں نے شرکت کی۔ کامرس سکریٹری جناب راجیش اگروال نے ارجنٹینا کا دورہ کرنے والے اب تک کے سب سے بڑے بھارتی کاروباری وفد کی قیادت کی، جس میں 25 سے زائد کاروباری رہنما شامل تھے، جن میں یو پی ایل، کرلوسکر اور آدتیہ برلا گروپ کے نمائندے بھی شامل تھے۔ وفد نے ارجنٹینا کی کاروباری برادری کے ساتھ ملاقاتیں کیں تاکہ دونوں ممالک کے مشترکہ وژن کو ٹھوس تجارتی نتائج میں تبدیل کیا جا سکے۔

فورم نے بھارتی کمپنیوں کو اپنے ارجنٹائنی ہم منصبوں کے ساتھ براہ راست رابطے، تجارت و سرمایہ کاری کے نئے راستے تلاش کرنے اور زراعت، معدنیات، توانائی، دوا سازی، صحت، سیاحت، بینکاری اور ٹیلی مواصلات سمیت اہم شعبوں میں شراکت داری کے امکانات تلاش کرنے کے لیے ایک اہم پلیٹ فارم فراہم کیا۔ مذاکرات میں حکومتی سطح کے روابط کو ٹھوس تجارتی نتائج میں تبدیل کرنے، مارکیٹ تک رسائی بہتر بنانے، ضابطہ جاتی اور تجارتی رکاوٹوں کو دور کرنے اور کاروبار سے کاروبار (بی2بی) روابط کو مزید فروغ دینے پر توجہ مرکوز کی گئی۔

بھارت–ارجنٹینا اقتصادی شراکت داری میں تجارت کو وسعت دینے، سرمایہ کاری کو گہرا کرنے اور قدر پیدا کرنے کے نئے مواقع پیدا کرنے کی نمایاں صلاحیت موجود ہے۔ روایتی اور ابھرتے ہوئے شعبوں میں تعاون کو مضبوط بنانے سے دونوں معیشتوں کی ترقی اور خوشحالی میں مزید نمایاں کردار ادا کیا جا سکتا ہے۔

**************

ش ح۔ ف ش ع

29-08-2026

                                                                                                                                       U: 2747