ਰਾਸ਼ਟਰੀ ਰਾਜਧਾਨੀ ਖੇਤਰ (ਐੱਨਸੀਆਰ) ਵਿੱਚ ਗੈਰ-ਕਾਨੂੰਨੀ ਅਤੇ ਪ੍ਰਦੂਸ਼ਣ ਫੈਲਾਉਣ ਵਾਲੀਆਂ ਉਦਯੋਗਿਕ ਇਕਾਈਆਂ ਵਿਰੁੱਧ ਆਪਣੀ ਨਿਰੰਤਰ ਕਾਰਵਾਈ ਦੇ ਹਿੱਸੇ ਵਜੋਂ, ਏਅਰ ਕੁਆਲਿਟੀ ਮੈਨੇਜਮੈਂਟ ਕਮਿਸ਼ਨ (ਸੀਏਕਿਊਐੱਮ) ਨੇ 25 ਅਗਸਤ, 2026 ਨੂੰ ਲੋਨੀ, ਗਾਜ਼ੀਆਬਾਦ ਵਿਖੇ ਆਪ੍ਰੇਸ਼ਨ ਕਲੀਨ ਏਅਰ ਦੇ ਤਹਿਤ ਇੱਕ ਵਿਸ਼ੇਸ਼ ਤੀਬਰ ਨਿਰੀਖਣ ਮੁਹਿੰਮ ਚਲਾਈ। ਇਸ ਨਿਰੀਖਣ ਮੁਹਿੰਮ ਦਾ ਉਦੇਸ਼ ਵਾਤਾਵਰਣ ਰੈਗੂਲੇਟਰੀ ਢਾਂਚੇ ਤੋਂ ਬਾਹਰ ਗੈਰ-ਕਾਨੂੰਨੀ ਤੌਰ 'ਤੇ ਕੰਮ ਕਰ ਰਹੀਆਂ ਇਕਾਈਆਂ ਦੀ ਪਛਾਣ ਕਰਨਾ ਸੀ।

ਕਮਿਸ਼ਨ ਨੇ ਗਾਜ਼ੀਆਬਾਦ ਦੇ ਲੋਨੀ ਵਿੱਚ 28 ਉਦਯੋਗਿਕ ਇਮਾਰਤਾਂ ਦਾ ਨਿਰੀਖਣ ਕਰਨ ਲਈ ਮੈਜਿਸਟ੍ਰੇਟ, ਪੁਲਿਸ ਅਤੇ ਉੱਤਰ ਪ੍ਰਦੇਸ਼ ਪ੍ਰਦੂਸ਼ਣ ਕੰਟਰੋਲ ਬੋਰਡ (ਯੂਪੀਪੀਸੀਬੀ) ਦੇ ਅਧਿਕਾਰੀਆਂ ਦੇ ਨਾਲ ਸੱਤ ਫਲਾਇੰਗ ਸਕੁਐਡ ਤਾਇਨਾਤ ਕੀਤੇ। ਨਿਰੀਖਣਾਂ ਵਿੱਚ ਵਿਆਪਕ ਗੈਰ-ਪਾਲਣਾ ਦਾ ਖੁਲਾਸਾ ਹੋਇਆ ਅਤੇ ਸਾਰੀਆਂ 28 ਨਿਰੀਖਣ ਕੀਤੀਆਂ ਗਈਆਂ ਇਮਾਰਤਾਂ ਲਾਗੂ ਵਾਤਾਵਰਣ ਨਿਯਮਾਂ ਦੀ ਪਾਲਣਾ ਨਹੀਂ ਕਰਦੀਆਂ ਪਾਈਆਂ ਗਈਆਂ।

ਨਿਰੀਖਣ ਦੌਰਾਨ ਪਾਈਆਂ ਗਈਆਂ ਵੱਡੀਆਂ ਬੇਨਿਯਮੀਆਂ ਵਿੱਚ 21 ਮਾਮਲਿਆਂ ਵਿੱਚ ਵੈਧ ਸੰਮਤੀ (ਸੀਟੀਓ) ਤੋਂ ਬਿਨਾਂ ਸੰਚਾਲਨ, 14 ਮਾਮਲਿਆਂ ਵਿੱਚ ਲੱਕੜ ਅਤੇ ਕੋਲੇ ਵਰਗੇ ਗੈਰ-ਮਨਜ਼ੂਰਸ਼ੁਦਾ ਬਾਲਣਾਂ ਦੀ ਵਰਤੋਂ, 8 ਮਾਮਲਿਆਂ ਵਿੱਚ ਲੋੜੀਂਦੇ ਹਵਾ ਪ੍ਰਦੂਸ਼ਣ ਨਿਯੰਤਰਣ ਯੰਤਰਾਂ (ਏਪੀਸੀਡੀ) ਅਤੇ ਸਟੈਕ/ਚਿਮਨੀ ਤੋਂ ਬਿਨਾਂ ਭੱਠੀਆਂ ਦਾ ਸੰਚਾਲਨ ਅਤੇ ਢੁਕਵੇਂ ਹਵਾ ਪ੍ਰਦੂਸ਼ਣ ਨਿਯੰਤਰਣ ਬੁਨਿਆਦੀ ਢਾਂਚੇ ਤੋਂ ਬਿਨਾਂ ਉਦਯੋਗਿਕ ਗਤੀਵਿਧੀਆਂ ਦਾ ਸੰਚਾਲਨ ਸ਼ਾਮਲ ਹੈ। ਖੁੱਲ੍ਹੀ ਹਵਾ ਵਿੱਚ ਪੇਂਟਿੰਗ/ਪਾਊਡਰ-ਕੋਟਿੰਗ ਗਤੀਵਿਧੀਆਂ ਅਤੇ ਉਦਯੋਗਿਕ ਇਕਾਈਆਂ ਦਾ ਗੈਰ-ਕਾਨੂੰਨੀ ਸੰਚਾਲਨ ਵੀ ਪਾਇਆ ਗਿਆ।

ਉਲੰਘਣਾਵਾਂ ਦਾ ਨੋਟਿਸ ਲੈਂਦੇ ਹੋਏ, ਯੂਪੀਪੀਸੀਬੀ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਫਲਾਇੰਗ ਸਕੁਐਡ ਦੇ ਤਾਲਮੇਲ ਨਾਲ, 16 ਯੂਨਿਟਾਂ/ਪਰਿਸਰਾਂ ਨੂੰ ਸੀਲ ਕਰ ਦਿੱਤਾ। ਸਬੰਧਤ ਯੂਨਿਟਾਂ ਨੂੰ ਛੇ ਮੁੱਢਲੀਆਂ ਰਿਪੋਰਟਾਂ/ਕਾਰਨ ਦੱਸੋ ਨੋਟਿਸ (ਐੱਸਸੀਐੱਨ) ਜਾਰੀ ਕੀਤੇ ਗਏ ਸਨ। ਛੇ ਹੋਰ ਮਾਮਲਿਆਂ ਵਿੱਚ ਪਰਿਸਰ /ਦਰਵਾਜ਼ਿਆਂ 'ਤੇ ਨੋਟਿਸ ਲਗਾਏ ਗਏ ਸਨ, ਜਿਨ੍ਹਾਂ ਵਿੱਚ ਉਹ ਵੀ ਸ਼ਾਮਲ ਹਨ ਜਿੱਥੇ ਇਕਾਈਆਂ ਬੰਦ ਪਾਈਆਂ ਗਈਆਂ ਸਨ ਜਾਂ ਨਿਗਰਾਨ ਅਧਿਕਾਰੀਆਂ ਦੇ ਆਉਣ ਦੀ ਜਾਣਕਾਰੀ ਮਿਲਣ 'ਤੇ ਰਹਿਣ ਵਾਲਿਆਂ ਨੇ ਪਰਿਸਰ  ਖਾਲੀ ਕਰ ਦਿੱਤੇ ਸਨ।

ਕਮਿਸ਼ਨ ਨੇ ਦੁਹਰਾਇਆ ਕਿ ਐੱਨਸੀਆਰ ਵਿੱਚ ਕੰਮ ਕਰਨ ਵਾਲੀਆਂ ਉਦਯੋਗਿਕ ਇਕਾਈਆਂ ਲਈ ਸਾਰੇ ਲਾਗੂ ਵਾਤਾਵਰਣ ਨਿਯਮਾਂ ਦੀ ਸਖ਼ਤੀ ਨਾਲ ਪਾਲਣਾ ਲਾਜ਼ਮੀ ਹੈ। ਬਿਨਾਂ ਕਿਸੇ ਕਾਨੂੰਨੀ ਸਹਿਮਤੀ ਦੇ ਉਦਯੋਗਿਕ ਗਤੀਵਿਧੀਆਂ ਕਰਨਾ, ਗੈਰ-ਮਨਜ਼ੂਰਸ਼ੁਦਾ ਈਂਧਣਾਂ ਦੀ ਵਰਤੋਂ ਕਰਨਾ ਅਤੇ ਲੋੜੀਂਦੇ ਹਵਾ ਪ੍ਰਦੂਸ਼ਣ ਨਿਯੰਤਰਣ ਪ੍ਰਣਾਲੀਆਂ ਤੋਂ ਬਿਨਾਂ ਭੱਠੀਆਂ/ਪ੍ਰਕਿਰਿਆਵਾਂ ਚਲਾਉਣਾ ਗੰਭੀਰ ਉਲੰਘਣਾਵਾਂ ਹਨ ਅਤੇ ਇਨ੍ਹਾਂ ‘ਤੇ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।

ਕਮਿਸ਼ਨ ਨੇ ਅੱਗੇ ਜ਼ੋਰ ਦਿੱਤਾ ਕਿ ਨਿਰਧਾਰਿਤ ਨਿਯਮਾਂ ਦੀ ਜ਼ਮੀਨੀ ਪੱਧਰ 'ਤੇ ਪਾਲਣਾ ਦੀ ਨਿਗਰਾਨੀ ਕਰਨ ਅਤੇ ਉਲੰਘਣਾਵਾਂ ਵਿਰੁੱਧ ਸਮੇਂ ਸਿਰ ਸੁਧਾਰਾਤਮਕ ਕਾਰਵਾਈ ਨੂੰ ਯਕੀਨੀ ਬਣਾਉਣ ਲਈ ਓਪਰੇਸ਼ਨ ਕਲੀਨ ਏਅਰ ਅਧੀਨ ਨਿਰੀਖਣ ਅਤੇ ਲਾਗੂ ਕਰਨ ਦੀਆਂ ਮੁਹਿੰਮਾਂ ਪੂਰੇ ਐੱਨਸੀਆਰ ਵਿੱਚ ਜਾਰੀ ਰਹਿਣਗੀਆਂ। ਸਬੰਧਤ ਏਜੰਸੀਆਂ ਨੂੰ ਸਖ਼ਤੀ ਨਾਲ ਪਾਲਣਾ ਨੂੰ ਯਕੀਨੀ ਬਣਾਉਣ ਅਤੇ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੀਆਂ ਇਕਾਈਆਂ ਵਿਰੁੱਧ ਲੋੜੀਂਦੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

*****

ਵੀਐੱਮ/ਟੀਵਾਈ /ਬਲਜੀਤ ਸਿੰਘ