لوک سبھا اسپیکر جناب اوم برلا نے رکشا بندھن کے موقع پر عوام کو مبارکباد پیش کی ہے۔ اپنے پیغام میں جناب برلا نے کہا:

’’پیارے ہم وطنو، بھائیو اور بہنو،

رکشا بندھن کے اس مقدس موقع پر آپ سب کو دلی مبارکباد۔ یہ تہوار بھائی اور بہن کے درمیان باہمی محبت، شفقت اور اعتماد کے خوبصورت رشتے کا جشن ہے۔

یہ تہوار ہمارے ملک کی عظیم ثقافت، خاندانی اقدار اور محبت و اپنائیت کے اٹوٹ رشتوں کی علامت ہے۔ رکشا بندھن محض حفاظت کی مقدس ڈوری باندھنے کا تہوار نہیں، بلکہ اعتماد، احترام، محبت اور زندگی بھر ایک دوسرے کا ساتھ دینے کے عزم کا جشن ہے۔ بھائی اور بہن کا رشتہ دنیا کے پاکیزہ ترین رشتوں میں شمار ہوتا ہے۔ اس رشتے میں نہ خود غرضی ہوتی ہے اور نہ ہی کوئی شرط۔‘‘

ہر بھائی اپنی بہن کی خوشی، سلامتی اور عزت و وقار کو اپنی ذمہ داری سمجھتا ہے، جبکہ ہر بہن اپنے بھائی کی خوشی، اچھی صحت، کامیابی اور روشن مستقبل کے لیے خلوصِ دل سے دعا کرتی ہے۔ یہ بے لوث محبت ہمارے خاندانوں کو مضبوط بناتی ہے اور اسی کے نتیجے میں ہمارا معاشرہ بھی مزید مضبوط ہوتا ہے۔

ہماری ثقافت میں تحفظ کا مفہوم صرف بہنوں کی سلامتی یقینی بنانے تک محدود نہیں ہے۔ یہ خواتین کی عزت، وقار، حقوق اور خوابوں کے تحفظ کے عزم کی بھی علامت ہے۔ معاشرے کی ہر بیٹی اور ہر بہن جب محفوظ، باعزت اور اعتماد کے ساتھ آگے بڑھنے کے قابل ہوگی، تب ہی ہمارا ملک حقیقی معنوں میں مزید مضبوط اور بااختیار بنے گا۔

آج کے بدلتے ہوئے دور میں ہمیں یہ عہد بھی کرنا چاہیے کہ ہم اپنے خاندانوں میں محبت، اعتماد اور کھلے دل سے بات چیت کے جذبے کو ہمیشہ برقرار رکھیں گے۔ ہمیں اپنے بزرگوں کا احترام کرنا چاہیے، اپنی بیٹیوں کو مساوی مواقع فراہم کرنے چاہئیں اور معاشرے میں بھائی چارے، ہم آہنگی اور اتحاد کے جذبے کو مزید مضبوط کرنا چاہیے۔ یہی ہماری اقدار ہیں اور یہی بھارت کی سب سے بڑی طاقت ہیں۔

اسی پیغام کے ساتھ، ایک بار پھر، میں رکشا بندھن کے موقع پر تمام شہریوں کو دلی مبارکباد پیش کرتا ہوں۔

جے ہند۔ شکریہ۔‘‘

۔۔۔۔۔۔۔۔۔۔۔

ش ح۔ ت ف۔ ن م۔

U- 2659