گوا، 25 اگست 2026

دفاعی شعبے کی ایک سرکردہ سرکاری کمپنی گوا شپ یارڈ لمیٹڈ (جی ایس ایل) نے دیسی جہاز سازی کے میدان میں ایک اور اہم سنگِ میل حاصل کرتے ہوئے جدید ترین فاسٹ پٹرول ویسل (ایف پی وی) آئی سی جی ایس اجیت (یارڈ 1277) کو آج باضابطہ طور پر بھارتی کوسٹ گارڈ کے حوالے کر دیا۔

حوالگی کی تقریب سے قبل فرسٹ ریڈنگ تقریب منعقد کی گئی۔ اس موقع پر جی ایس ایل کے چیئرمین اور منیجنگ ڈائریکٹر جناب برجیش کمار اپادھیائے، ڈائریکٹر (آپریشنز) ریئر ایڈمرل نیلسن ڈی سوزا، این ایم، آئی این (ریٹائرڈ)، ڈائریکٹر (فنانس) جناب جہانگیر عالم انصاری، ڈائریکٹر (سی پی پی اینڈ بی ڈی) جناب ناگیش داس پائی، ڈی آئی جی وی۔ کے۔ پرمار، ٹی ایم، پی ڈی (میٹ)، اور آئی سی جی ایس اجیت کے کمانڈنگ آفیسر کمانڈنٹ (جے جی) منیش تالان کے علاوہ بھارتی کوسٹ گارڈ اور جی ایس ایل کے سینئر افسران بھی موجود تھے۔

65 فیصد سے زیادہ دیسی ساخت کے اجزا سے تیار کیا گیا آئی سی جی ایس اجیت ہندوستان کی مقامی دفاعی جہاز سازی کی صنعت کی بڑھتی ہوئی صلاحیتوں اور حکومت کے آتم نربھر بھارت کے وژن کی عکاسی کرتا ہے۔

51.43 میٹر طویل اور 8 میٹر چوڑے اس جہاز کا پانی میں ڈوباؤ 2.5 میٹر کی گہرائی پر 330 ٹن ہے۔ یہ دو بحری ڈیزل انجنوں سے چلتا ہے، جو متغیر زاویۂ پرواز والے پروپیلروں کو حرکت دیتے ہیں۔ فاسٹ پٹرول ویسلز کی اس کلاس میں یہ اپنی نوعیت کی پہلی خصوصیت ہے، جو بہتر پروپلشن کارکردگی اور عملیاتی صلاحیت فراہم کرتی ہے۔

27 ناٹ سے زیادہ کی زیادہ سے زیادہ رفتار اور 1,500 بحری میل تک سفر کی صلاحیت رکھنے والے اس جہاز میں جدید مربوط مشینری کنٹرول نظام نصب ہے، جو عملیاتی تیاری، کارکردگی اور پائیداری کو بہتر بنانے میں معاون ہے۔

آئی سی جی ایس اجیت کو 6 افسران اور 35 ملاحوں پر مشتمل عملہ چلائے گا۔ اس جہاز کو سمندری سلامتی سے متعلق متعدد اہم ذمہ داریاں انجام دینے کے لیے تیار کیا گیا ہے، جن میں ماہی گیری کے تحفظ، خصوصی اقتصادی خطے (ای ای زیڈ) کی نگرانی، ساحلی گشت، اسمگلنگ اور بحری قزاقی کے خلاف کارروائیاں، نیز تلاش اور بچاؤ کی کارروائیاں شامل ہیں۔

آئی سی جی ایس اجیت کی بھارتی کوسٹ گارڈ میں شمولیت سے ہندوستان کے ساحلی اور سمندری حدود سے باہر کے علاقوں کی حفاظت کے لیے اس کی صلاحیتیں مزید مضبوط ہوں گی اور ملک کے بحری سلامتی کے نظام کو بھی تقویت ملے گی۔

اس جہاز کی حوالگی گوا شپ یارڈ لمیٹڈ کے اس عزم کو مزید اجاگر کرتی ہے کہ وہ ہندوستان کی دفاعی افواج کے لیے جدید اور اعلیٰ کارکردگی کی حامل دفاعی پلیٹ فارم فراہم کرنے کے لیے مسلسل کوشاں ہے۔ یہ اقدام دیسی جہاز سازی کو فروغ دینے، دفاعی خود انحصاری کو تقویت دینے اور میک اِن انڈیا پہل کے تحت ہندوستان کو عالمی جہاز سازی کے مرکز کے طور پر ابھارنے کے مقصد میں جی ایس ایل کے کردار کو بھی مزید مضبوط کرتا ہے۔

ٹیکنالوجی، جدت اور مقامی سطح پر تیاری پر مسلسل توجہ کے ساتھ، جی ایس ایل ہندوستان کی بحری صلاحیتوں کو مزید مضبوط بنانے اور ملک کی نیلی معیشت کی ترقی میں اپنا کردار ادا کرنے کے لیے پُرعزم ہے۔

 

*****

 

ش  ح۔م م - ف ر

U-no-2657

                                                                                                                                         

(ریلیز آئی ڈی: 2303776) وزیٹر کاؤنٹر : 17