بھارت نے برفانی چیتے کے مطالعے اور تحفظ سے متعلق روس-بھارت گول میز اجلاس میں شرکت کی، جو 26 اگست 2026 کو روس کے دارالحکومت ماسکو میں واقع روسی اکیڈمی آف سائنسز کے اے این سیورٹسوف انسٹی ٹیوٹ آف ایکولوجی اینڈ ایوولوشن میں منعقد ہوا۔ یہ اجلاس دسمبر 2025 میں بین علاقائی ایسوسی ایشن ‘آئی آر بی آئی ایس’اور انٹرنیشنل بِگ کیٹ الائنس (آئی بی سی اے) کے درمیان طے پانے والے شراکت داری معاہدے کے تحت منعقد کیا گیا۔ اس کا مقصد برفانی چیتے کی تحقیق اور تحفظ کے شعبے میں بین الاقوامی تعاون کو مزید مضبوط بنانا تھا۔

 

 

حکومتِ ہند کی وزارتِ ماحولیات، جنگلات اور موسمیاتی تبدیلی کے وفد نے سائنسی بنیادوں پر تیار کیے جانے والے اقدامات کے ذریعے برفانی چیتے کے تحفظ کے شعبے میں ملک کی پیش رفت کو اجاگر کیا۔ بھارتی وائلڈ لائف انسٹی ٹیوٹ کے حکام نے برفانی چیتے کی آبادی کےتناسب، ریڈیو ٹیلی میٹری اور جینیاتی تجزیے کے شعبوں میں ہونے والی پیش رفت کی تفصیلات پیش کیں اور اس بات پر زور دیا کہ تحفظ کی کوششوں کو مزید مؤثر بنانے میں سائنسی ذرائع کا کردار مسلسل بڑھ رہا ہے۔

اس اجلاس میں روسی وفاق کی وزارتِ قدرتی وسائل و ماحولیات، روسی اکیڈمی آف سائنسز کے اے این سیورٹسوف انسٹی ٹیوٹ آف ایکولوجی اینڈ ایوولوشن، ماسکو چڑیا گھر، روس پرائرود نادزور اور برفانی چیتے کی تحقیق و تحفظ کے شعبے سے وابستہ ممتاز ماہرین اوردیگر نمائندوں نے بھی شرکت کی۔ بھارتی وفد نے گول میز اجلاس اور موضوعاتی مباحثوں میں حصہ لیا، جن میں برفانی چیتے کے تحفظ اور سائنسی مطالعے کے لیے باہمی تعاون پر مبنی طریقۂ کار کو مزید فروغ دینے پر توجہ مرکوز کی گئی۔

یہ گول میز اجلاس بھارت اور بین الاقوامی شراکت داروں کو علم اور تجربات کے تبادلے اور برفانی چیتے کی تحقیق، نگرانی اور تحفظ کے شعبوں میں تعاون کو مزید مضبوط بنانے کے لیے ایک اہم پلیٹ فارم ثابت ہوا۔

 

********

 

 

ش ح۔ ع و۔ج ا

U-2640

 

(ریلیز آئی ڈی: 2303673) وزیٹر کاؤنٹر : 8