జెనెసిస్ ఈఐఆర్ 3.0 కోసం దరఖాస్తులకు ఆహ్వానం

‘జెనెసిస్ ఈఐఆర్ కోహార్ట్-3’ని ఎలక్ట్రానిక్స్, ఐటీ మంత్రిత్వశాఖ స్టార్టప్ హబ్ అమలు చేస్తోంది. ఎలక్ట్రానిక్స్, సమాచార సాంకేతికత (ఐటీ), ఇన్ఫర్మేషన్ - కమ్యూనికేషన్ టెక్నాలజీ (ఐసీటీ), డీప్‌టెక్ రంగాల్లో సాంకేతికత చోదక విధానాలను అభివృద్ధి చేసే ప్రారంభ దశ ఆవిష్కర్తలకు అండగా నిలుస్తోంది. ఎంపికైన దరఖాస్తుదారులకు జెనెసిస్ భాగస్వామ్య ఇంక్యుబేటర్ల ద్వారా ఇంక్యుబేషన్, మార్గనిర్దేశక, నెట్‌వర్కింగ్ అవకాశాలతోపాటు రూ. 10 లక్షల వరకు ఆర్థికసాయం లభిస్తుంది.

ఎంపికైన ఆవిష్కర్తలు పొందేవి:

• రూ. 10 లక్షల వరకు ఆర్థిక సహాయం

• జెనెసిస్ భాగస్వామ్య ఇంక్యుబేటర్లతో సంప్రదింపుల సదుపాయం

• వ్యక్తిగత మార్గదర్శకత్వం, నిపుణుల సలహాలు

• ఉత్పత్తి అభివృద్ధి, ఎంవీపీ తయారీలో సహకారం

• ఇంక్యుబేషన్, వ్యాపారాభివృద్ధి చేయూత

• ప్రొటోటైపింగ్, సాంకేతిక అభివృద్ధి, ప్రామాణీకరణలకు మద్దతు

• పరిశ్రమ, అంకుర సంస్థల వ్యవస్థాగత అనుసంధానాలు

• వాణిజ్యీకరణకూ, అంకుర సంస్థల అభివృద్ధికీ మార్గదర్శనం

ముఖ్యమైన రంగాలు:

ఎలక్ట్రానిక్స్ - ఐటీ రంగం, డీప్‌టెక్, కృత్రిమ మేధ/మెషిన్ లెర్నింగ్ (ఏఐ/ఎంఎల్), ఇంటర్నెట్ ఆఫ్ థింగ్స్ (ఐవోటీ), సెమీకండక్టర్/వీఎల్ఎస్ఐ, సైబర్‌ భద్రత, బ్లాక్‌చెయిన్, క్వాంటం సాంకేతికతలు, ఏఆర్/వీఆర్, ప్రాదేశిక – ఇమ్మర్సివ్ టెక్నాలజీలు.

అర్హత ప్రమాణాలు:

1. దరఖాస్తుదారులు భారత పౌరులై ఉండాలి.

2. దరఖాస్తుదారులు ఔత్సాహిక పారిశ్రామికవేత్తలు, ఆవిష్కర్తలు, పరిశోధకులు, విద్యార్థులు లేదా ప్రారంభ దశలో ఉన్న అంకుర సంస్థల వ్యవస్థాపకులు/ సహ-వ్యవస్థాపకులు అయి ఉండవచ్చు.

3. ప్రతిపాదిత ఆవిష్కరణ.. ఎలక్ట్రానిక్స్ - ఐటీ రంగం, డీప్‌టెక్, ఏఐ/ఎంఎల్, ఐఓటి, సెమీకండక్టర్/ వీఎల్ఎస్ఐ, సైబర్‌ భద్రత, బ్లాక్‌చెయిన్, క్వాంటం సాంకేతికతలు, లేదా ఏఆర్/విఆర్, ప్రాదేశిక - వాస్తవిక (ఇమ్మర్సివ్) సాంకేతికతల వంటి వర్ధమాన సాంకేతికతల్లో ఉండాలి.

4. సాంకేతికతా సన్నద్ధతా స్థాయి (టీఆర్ఎల్) 1–4 (ఆలోచన, భావనా నిరూపణ, నమూనా, ఎంవీపీ, లేదా ప్రాథమిక ధ్రువీకరణ దశ)లో ఆ ఆవిష్కరణ ఉండాలి.

5. ఆ అంకుర సంస్థ ద్వితీయ లేదా తృతీయ శ్రేణి నగరంలో ఉండాలి.

6. అంకుర సంస్థ ఒకవేళ నమోదు చేసుకుని ఉంటే.. దరఖాస్తు తేదీ నాటికి అది రెండేళ్లు దాటకుండా ఉండాలి.

7. అదే ప్రతిపాదిత ఆలోచన లేదా అంకుర సంస్థ కోసం.. ఏదైనా కేంద్ర లేదా రాష్ట్ర ప్రభుత్వ పథకం కింద ఆ అంకుర సంస్థ రూ. 10 లక్షలకు మించిన ఆర్థిక సాయాన్ని పొంది ఉండకూడదు.

ముఖ్యమైన తేదీలు, దరఖాస్తు వివరాలు:

జెనెసిస్ కోహోర్ట్ -3 దరఖాస్తు కోసం విండో 2026 ఆగస్టు 4 నుంచి సెప్టెంబరు 3 వరకు అందుబాటులో ఉంటుంది. ఆసక్తి గల అభ్యర్థులు https://mshportal.meity.gov.in/ext/form/23966/1/apply ద్వారా ఆన్‌లైన్‌లో దరఖాస్తు చేసుకోవచ్చు.

ఒక వినూత్న ఆలోచన – బలంగా నిలదొక్కుకోగల అంకుర సంస్థ.. ఈ రెండు భావనల నడుమ అంతరాన్ని భర్తీ చేసే లక్ష్యంతో ‘జెనెసిస్ ఈఐఆర్ కోహోర్ట్-3’ని రూపొందించారు. ఇంక్యుబేషన్, మార్గనిర్దేశాలతో ఆర్థిక సాయాన్ని అనుసంధానించడం ద్వారా.. ఆవిష్కర్తలు తమ సాంకేతికతలను అభివృద్ధి చేసుకోవడానికి, వాటి ప్రామాణీకరణను పూర్తి చేసి మార్కెట్ వినియోగానికి సిద్ధం చేయడానికి ఈ కార్యక్రమం తోడ్పడుతుంది. ఈ కార్యక్రమం ద్వారా భారతీయ సాంకేతిక అంకుర సంస్థల వ్యవస్థను మరింత బలోపేతం చేయడంతోపాటు.. దేశవ్యాప్తంగా ఉన్న ఆవిష్కర్తలు విస్తరణ సామర్థ్యమూ, విస్తృత ప్రభావమూ కలిగిన వ్యాపారాలను నిర్మించేలా సాధికారత కల్పించాలని మంత్రిత్వశాఖ స్టార్టప్ హబ్ లక్ష్యంగా పెట్టుకుంది.

జెనెసిస్ గురించి

దేశంలోని ద్వితీయ, తృతీయ శ్రేణి నగరాల్లో అంకుర సంస్థలను గుర్తించడం, ప్రోత్సహించడం, అభివృద్ధిపరచడం, వాటి ఎదుగుదలను వేగవంతం చేయడం లక్ష్యంగా.. కేంద్ర ఎలక్ట్రానిక్స్, ఐటీ మంత్రిత్వశాఖకు చెందిన ‘స్టార్టప్ హబ్’ రూపొందించిన ప్రతిష్ఠాత్మక పథకం ‘జెన్-నెక్స్ట్ సపోర్ట్ ఫర్ ఇన్నోవేటివ్ స్టార్టప్స్ (జెనెసిస్)’. ఎంట్రప్రెన్యూర్-ఇన్-రెసిడెన్స్, పైలట్, పెట్టుబడి, డీప్‌టెక్ ఫండింగ్ విభాగాల ద్వారా.. ప్రారంభ ఆలోచన, ప్రయోగ దశల నుంచి ప్రామాణీకరణ, పెట్టుబడులు, వ్యాపార విస్తరణ వరకు ఆవిష్కర్తలకు, అంకుర సంస్థలకు జెనెసిస్ అండగా నిలుస్తోంది. మొత్తం రూ. 490 కోట్ల బడ్జెట్ కేటాయింపులతో చేపట్టిన ఈ పథకం.. వేగంగా ఎదుగుతున్న ప్రాంతాల్లోని పారిశ్రామిక సామర్థ్యాన్ని వెలికితీయడంతోపాటు, దేశీయ ఆవిష్కరణల వ్యవస్థతో వాటిని మరింత బలంగా అనుసంధానించాలని లక్ష్యంగా పెట్టుకుంది.

జెనెసిస్ ఎంట్రప్రెన్యూర్- ఇన్- రెసిడెన్స్ (ఈఐఆర్) విభాగం గురించి:

జెనెసిస్ పథకంలోని ఎంట్రప్రెన్యూర్-ఇన్-రెసిడెన్స్ విభాగం ద్వారా... ఆలోచన, ప్రాథమిక నమూనాల దశల్లో ఉన్న ఆవిష్కర్తలు, విద్యార్థులు, ఔత్సాహిక పారిశ్రామికవేత్తలను ప్రోత్సహించడం కోసం ఒక్కో అంకుర సంస్థకు గరిష్టంగా రూ. 10 లక్షల వరకు ఆర్థిక సాయాన్ని అందిస్తారు. లక్ష్యిత నిధుల కేటాయింపు, ఇంక్యుబేషన్ మద్దతు ద్వారా.. ప్రారంభ దశ ఆలోచనలను వినియోగానికి సిద్ధంగా ఉండే విధానాలుగా మలచడమే ఈ కార్యక్రమ ముఖ్య ఉద్దేశం.

ఎలక్ట్రానిక్స్, ఐటీ మంత్రిత్వశాఖ స్టార్టప్ హబ్ గురించి:

ఎలక్ట్రానిక్స్, ఐటీ మంత్రిత్వశాఖ పరిధిలో ఈ స్టార్టప్ హబ్ సేవలందిస్తుంది. దేశ అంకుర సంస్థలు, డీప్ టెక్ వ్యవస్థలను బలోపేతం చేసే దిశగా.. అంకుర సంస్థలు, ఇంక్యుబేషన్, ఆవిష్కరణ కార్యక్రమాలను సమీకృతం చేసే ఏకీకృత జాతీయ వేదిక ఇది. ఆలోచన దశ నుంచి ఇంక్యుబేషన్, వ్యాపారాన్ని వేగవంతం చేయడం, నిధుల సదుపాయం, వ్యాపార విస్తరణ వరకు అన్ని స్థాయుల్లోనూ వివిధ పథకాల ద్వారా మద్దతునందిస్తోంది.

***