প্রধান মন্ত্রী শ্রী নরেন্দ্র মোদীনা ঙসি অঙনবদা সেবা তীর্থদা স্পেস স্তার্তঅপ ২০গী সি.ই.ও. অমসুং ফাউন্দরশিংগা ৱারী শানখ্রে।

রোকেত অমদি অমুক হন্না শীজিন্নবা য়াবা সেমি-ক্রাইওজেনিক লোঞ্চ ভেহিকলশিং শাবা, এভিওনিক, সেতলাইত, এদভান্স প্রোপল্সন সিস্তেম, স্পেস অমদি দিফেন্স ইন্তলিজেন্স, রিমুভিং স্পেস দেব্রি, এ.আই.-পৱার্দ হাইপরলোকেল ৱেদর, অমদি ক্লাইমেত ইন্তলিজেন্সনচিংবা তোঙান তোঙানবা লমদা থবক তৌরিবা স্পেস সেক্তরদা লৈবা মাঙজিল থাবা কম্পেনীশিংগী সি.ই.ও.শিং ৱারী শানবা অদুদা শরুক য়াখি। মখোয়না ভারতকী প্রাইভেত স্পেস ইন্দস্ত্রীনা খোঙজেল য়াঙনা চেৎখৎলক্লিববু ফোঙদোকখি অমদি সেক্তর অসিগী তুংলমচৎকী মীৎয়েঙ পাউদমখি। মখোয়না মখোয়গী মতিং অমসুং লৈবাকসিদা মথৌ তাবা তেক্নোলোজী শেমগৎপদা মতম অমদি হুমাংমল কয়া থাদখ্রে হায়রদুনা, প্রধান মন্ত্রীদগী ফংলিবা ঙাক্লৌগীদমক থাগৎপা ফোঙদোকখি। মখোয়না লৈঙাক্কী অকনবা ঙাক্লৌ অমসুং ইন্দস্ত্রী মনুংদা খুৎশম্ননা চৎমিন্নরিববু পাউদম্লদুনা, মখোয়গী তীমশিং অসি য়াম্না ইচঙ থৌই অমসুং স্পেস সেক্তরদা অচৌবা পান্দমশিং ফংননবা খোঙফম চেৎনা লেপ্তুনা থবক তৌরি হায়খি।

স্পেস সেক্তরবু প্রাইভেত পার্তিসিপেসনগীদমক হাংদোকখিবনা ইন্দস্ত্রী অসিদা ইখৌ লাংবা য়াম্না পোকহনখি অমদি অনৌবা খুদোংচাবশিং শেমগৎলে হায়খি। ভারতকী প্রাইভেত স্পেস ইন্দস্ত্রীদা শেমগৎপা তেক্নোলোজীশিং কম্পেনী কয়ামরুম্না শীজিন্ননিংবগী অপাম্বা ফোঙদোক্নরক্লি হায়না মখোয়না ফোঙদোকখি।

প্রধান মন্ত্রীনা স্পেস সেক্তরগী লুচিংবশিংবু থৌনা উৎপগীদমক অমসুং অনৌবা লম অসিদা মাঙজিল থাদুনা চৎপগীদমক নুংঙাইবা ফোঙদোকখি। সেক্তর অসিনা উৎলিবা থাজবা অসিনা স্পেস সেক্তর অসিবু প্রাইভেত পার্তিসিপেসনগীদমক হাংদোকখিবা অসিগী মঙলান অসি হেন্না মপাঙ্গল কনখৎহল্লে হায়খি। লৈবাক কয়া অমনা স্পেস সেক্তরদা শেল থাদবা ঙম্নদে নৎত্রগা শেল থাদবা পাম্নদে। মসিনা ভারত্তা মালেমগী স্পেস সেক্তরগী খোঙফম থুনা চেৎশিলহন্নবা অচৌবা খুদোংচাবা অমা পীরি।

প্রধান মন্ত্রীনা স্পেস কম্পেনীশিংবু মখোয়গী তেক্নোলোজীশিংগী অনৌবা শীজিন্নফমশিং থিননবা অমসুং মখোয়সিনা মীয়ামগী পুন্সিবু হেন্না লায়থোকহনগদগে হায়বদা মীৎয়েঙ থম্নবা পুক্নিং থৌগৎখি।

প্রধান মন্ত্রীনা স্পেস সেক্তরদা লৈরিবা কম্পেনীশিংগা অতৈ সেক্তরশিংদা থবক তৌরিবা কম্পেনীশিংগা হেন্না খুৎশম্ননা থবক তৌমিন্ননবা ৱাফম থমখি। স্পেস দেব্রিগী লমদা থবক তৌরিবা কম্পেনীশিংনা এনভাইরনমেন্তেল ওর্গনাইজেসনশিংগা পুন্না থবক তৌমিন্নদুনা মখোয়গী তেক্নোলোজী স্কেল অপ তৌবা য়াই। লৌউ-শিংউগী সেক্তরগা থবক তৌমিন্নরিবা স্পেস তেক্নোলোজী কম্পেনীশিংনা লৌমীশিংদা মরম খঙনা ফিরেপ লৌবা ঙমহন্নবা অমসুং চাথোক হেনগৎহন্নবা এগ্রিকলচরেল য়ুনিভর্সিতীশিং অমসুং দিপার্তমেন্তশিংগা খুৎশম্নরগা থবক তৌমিন্নবা য়াই।

প্রধান মন্ত্রীনা মালেম অসিনা স্পেসকী মরমদা ৱাখল খল্লকপা মতমদা ভারতলোমদা য়েংলক্নবা ইকোসিস্তেম অমসুং এনভাইরনমেন্ত অমা শেমগৎনবা ৱাফম থমখি। ভারতকী স্পেস সেক্তর অসিনা মালেমগী তেলেন্ত, কম্পেনী, অমসুং লঅবাকশিংদা তৌবা ইনভেস্তমেন্তশিং চিংশিনবা ঙম্বা সেক্তর অমা ওইবা ঙমগনি হায়না মহাক্না ফোঙদোকখি।

মহাক্না অতল তিঙ্করিং লেবশিংগা হেন্না নক্ননা খুৎশম্ননা চৎমিন্ননবা ৱাফমসু থমখি। মসিনা চহি নৌরিবা অঙাংশিংদা ঙল্লিঙৈদগী হৌনা স্পেস সেক্তরদা ইখৌ লাংবা অমসুং অপাম্বা পোকহনগনি হায়না মহাক্না ফোঙদোকখি।

ৱারী ৱাতায় শানবা অদুদা স্কাইরুত এরোস্পেস, অগ্নিকুল কোসমোস, পিক্সেল, ধ্রুব স্পেস, গেলেক্সআই, পিয়রসাইত, বেল্লাত্রিক্স এরোস্পেস, দিগনতারা, সতসুরে, সুহোরা তেক্নোলোজিজ, মনস্তু স্পেস, এস্ত্রোবেজ, তেকমি২স্পেস, ভ্যোমিক, কোস্মোসর্ব স্পেস, ওর্বিতএইদ এরোস্পেস, স্কাইসর্ব (হাইস্পেস), সেরেন্দিপিতী স্পেস, ভস্সার লেব্স অমসুং মিস্তইও য়াওনা স্পেস সেক্তরদা থবক তৌরিবা স্পার্তঅপ ২০ গী সি.ই.ও. অমসুং ফাউন্দরশিং শরুক য়াখি।

***