ਰਾਸ਼ਟਰੀ ਕੁਸ਼ਟ ਰੋਗ ਖਾਤਮਾ ਪ੍ਰੋਗਰਾਮ (ਐੱਨਐੱਲਈਪੀ) ਦੀ ਦੋ ਦਿਨਾਂ ਸਮੀਖਿਆ-ਸਹਿ-ਸਮਰੱਥਾ ਨਿਰਮਾਣ ਵਰਕਸ਼ਾਪ ਅੱਜ ਮੱਧ ਪ੍ਰਦੇਸ਼ ਦੇ ਇੰਦੌਰ ਵਿੱਚ ਸ਼ੁਰੂ ਹੋਈ। ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੇ ਕੇਂਦਰੀ ਕੁਸ਼ਟ ਰੋਗ ਵਿਭਾਗ (ਸੀਐੱਲਡੀ) ਦੁਆਰਾ ਆਯੋਜਿਤ, ਇਸ ਵਰਕਸ਼ਾਪ ਦਾ ਉਦੇਸ਼ ਪ੍ਰੋਗਰਾਮ ਲਾਗੂਕਰਨ ਨੂੰ ਮਜ਼ਬੂਤ ​​ਕਰਨਾ, ਤਕਨੀਕੀ ਸਮਰੱਥਾਵਾਂ ਵਿੱਚ ਸੁਧਾਰ ਕਰਨਾ ਅਤੇ ਕੁਸ਼ਟ ਰੋਗ ਦੇ ਫੈਲਾਅ ਨੂੰ ਰੋਕਣ ਦੇ ਟੀਚੇ ਨੂੰ ਪ੍ਰਾਪਤ ਕਰਨ ਵੱਲ ਕੇਂਦ੍ਰਿਤ ਕਾਰਵਾਈ ਨੂੰ ਤੇਜ਼ ਕਰਨਾ ਹੈ।

ਇਸ ਵਰਕਸ਼ਾਪ ਵਿੱਚ 70 ਤੋਂ ਵੱਧ ਭਾਗੀਦਾਰਾਂ ਨੇ ਹਿੱਸਾ ਲਿਆ, ਜਿਨ੍ਹਾਂ ਵਿੱਚ ਸਿਹਤ ਸੇਵਾਵਾਂ ਦੇ ਡਾਇਰੈਕਟੋਰੇਟ ਜਨਰਲ (ਡੀਜੀਐੱਚਐੱਸ) ਦੇ ਵਧੀਕ ਡਾਇਰੈਕਟਰ ਜਨਰਲ, ਡਿਪਟੀ ਡਾਇਰੈਕਟਰ ਜਨਰਲ (ਕੁਸ਼ਟ ਰੋਗ), ਕੇਂਦਰੀ ਕੁਸ਼ਟ ਰੋਗ (ਕੋੜ੍ਹ) ਵਿਭਾਗ ਦੇ ਅਧਿਕਾਰੀ, ਆਰਐੱਲਟੀਆਰਆਈ ਰਾਏਪੁਰ ਅਤੇ ASKA ਸੰਸਥਾ ਦੇ ਪ੍ਰਤੀਨਿਧੀ, ਸਟੇਟ ਕੁਸ਼ਟ ਰੋਗ ਅਧਿਕਾਰੀ, ਮੁੱਖ ਮੈਡੀਕਲ ਅਤੇ ਸਿਹਤ ਅਧਿਕਾਰੀ, ਮੱਧ ਪ੍ਰਦੇਸ਼ ਦੇ ਸਾਰੇ 51 ਜ਼ਿਲ੍ਹਿਆਂ ਦੇ ਜ਼ਿਲ੍ਹਾ ਕੁਸ਼ਟ ਰੋਗ ਅਧਿਕਾਰੀ, ਜ਼ਿਲ੍ਹਾ ਸਲਾਹਕਾਰ, ਤਕਨੀਕੀ ਵਿਕਾਸ ਭਾਈਵਾਲ ਅਤੇ APAL ਦੇ  ਪ੍ਰਤੀਨਿਧੀ ਸ਼ਾਮਲ ਸਨ।

 

ਵਿਚਾਰ-ਵਟਾਂਦਰੇ ਦੌਰਾਨ ਕੁਸ਼ਟ ਰੋਗ (ਕੋੜ੍ਹ) ਦੀ ਮਹਾਮਾਰੀ ਸਬੰਧੀ ਸਥਿਤੀ ਦੀ ਸਮੀਖਿਆ ਕਰਨ, ਪ੍ਰੋਗਰਾਮ ਦੀ ਕਾਰਗੁਜ਼ਾਰੀ ਦਾ ਮੁਲਾਂਕਣ ਕਰਨ, ਲਾਗੂ ਕਰਨ ਦੇ ਪਾੜੇ ਦੀ ਪਛਾਣ ਕਰਨ ਅਤੇ ਖੇਤਰੀ ਤਜ਼ਰਬਿਆਂ ਅਤੇ ਵਧੀਆ ਅਭਿਆਸਾਂ ਨੂੰ ਸਾਂਝਾ ਕਰਨ 'ਤੇ ਧਿਆਨ ਕੇਂਦ੍ਰਿਤ ਕੀਤਾ ਗਿਆ। ਕੋੜ੍ਹ ਦੇ ਪ੍ਰਸਾਰ ਨੂੰ ਰੋਕਣ ਲਈ ਅੰਤਿਮ-ਪੜਾਅ ਦੀ ਰਣਨੀਤੀ ਦੇ ਮੁੱਖ ਹਿੱਸਿਆਂ ਵਜੋਂ ਸ਼ੁਰੂਆਤੀ ਕੇਸ ਪਛਾਣ, ਸੰਪਰਕ ਟਰੇਸਿੰਗ, ਸਮੇਂ ਸਿਰ ਇਲਾਜ ਸ਼ੁਰੂ ਕਰਨ ਅਤੇ ਪੂਰਾ ਕਰਨ, ਦਿਵਯਾਂਗਤਾ ਦੀ ਰੋਕਥਾਮ ਅਤੇ ਤੀਬਰ ਨਿਗਰਾਨੀ ਨੂੰ ਮਜ਼ਬੂਤ ​​ਕਰਨ'ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਗਿਆ।

ਵਰਕਸ਼ਾਪ ਦੀ ਸ਼ੁਰੂਆਤ ਮੱਧ ਪ੍ਰਦੇਸ਼ ਦੇ ਰਾਜ ਕੁਸ਼ਟ ਰੋਗ ਅਧਿਕਾਰੀ ਦੇ ਸਵਾਗਤੀ ਭਾਸ਼ਣ ਨਾਲ ਹੋਈ, ਜਿਸ ਤੋਂ ਬਾਅਦ ਡੀਜੀਐੱਚਐੱਸ ਦੇ ਵਧੀਕ ਡਾਇਰੈਕਟਰ ਜਨਰਲ ਦੁਆਰਾ ਇੱਕ ਵਿਸ਼ੇਸ਼ ਭਾਸ਼ਣ ਦਿੱਤਾ ਗਿਆ।

ਵਰਕਸ਼ਾਪ ਦੇ ਪਹਿਲੇ ਦਿਨ ਤਕਨੀਕੀ ਸੈਸ਼ਨ ਆਯੋਜਿਤ ਕੀਤੇ ਗਏ, ਜਿਸ ਵਿੱਚ ਮੱਧ ਪ੍ਰਦੇਸ਼ ਵਿੱਚ ਕੁਸ਼ਟ ਰੋਗ ਮਹਾਮਾਰੀ ਸਬੰਧੀ ਸਥਿਤੀ, ਐੱਨਐੱਲਈਪੀ ਅਧੀਨ ਕੇਂਦ੍ਰਿਤ ਰਣਨੀਤੀਆਂ, ਕੁਸ਼ਟ ਰੋਗ ਦੀ  ਪਛਾਣ ਮੁਹਿੰਮ (ਐੱਲਸੀਡੀਸੀ) ਦੀ ਗੁਣਵੱਤਾ ਅਤੇ ਨਤੀਜਿਆਂ ਵਿੱਚ ਸੁਧਾਰ ਅਤੇ ਰੈਟ੍ਰੋਸਪੈਕਟਿਵ ਅਤੇ ਰਿਵਰਸ ਸੰਪਰਕ ਟ੍ਰੇਸਿੰਗ ਪ੍ਰਣਾਲੀ ਨੂੰ ਮਜ਼ਬੂਤ ​​ਕਰਨ ਬਾਰੇ ਚਰਚਾ ਕੀਤੀ ਗਈ।

ਡਾ. ਸੁਨੀਲ ਵੀ. ਗਿੱਟੇ, ਡਿਪਟੀ ਡਾਇਰੈਕਟਰ ਜਨਰਲ (ਕੁਸ਼ਟ ਰੋਗ) ਦੀ ਅਗਵਾਈ ਵਿੱਚ, ਸੈਸ਼ਨ ਨੇ ਪ੍ਰੋਗਰਾਮ ਡੇਟਾ ਦੀ ਵਰਤੋਂ ਕਰਕੇ ਤਰਜੀਹੀ ਜ਼ਿਲ੍ਹਿਆਂ ਅਤੇ ਖੇਤਰਾਂ ਦੀ ਪਛਾਣ ਕਰਨ ਦੀ ਮਹੱਤਤਾ ਨੂੰ ਉਜਾਗਰ ਕੀਤਾ ਜਿਨ੍ਹਾਂ ਨੂੰ ਤੀਬਰ ਨਿਗਰਾਨੀ ਅਤੇ ਟੀਚਾਬੱਧ ਦਖਲਅੰਦਾਜ਼ੀ ਦੀ ਜ਼ਰੂਰਤ ਹੁੰਦੀ ਹੈ। ਕੁਸ਼ਟ ਰੋਗ ਦੀ ਪ੍ਰਸਾਰ ਦਰ ਨੂੰ ਪ੍ਰਤੀ 10,000 ਆਬਾਦੀ ਵਿੱਚ 1 ਤੋਂ ਘੱਟ ਕਰਨ ਲਈ ਕੇਂਦ੍ਰਿਤ ਰਣਨੀਤੀਆਂ ਲਾਗੂ ਕੀਤੀਆਂ ਗਈਆਂ, ਨਾਲ ਹੀ ਇਸਦੇ ਫੈਲਾਅ ਨੂੰ ਰੋਕਣ ਦੇ ਯਤਨਾਂ ਦੇ ਅੰਤਿਮ ਪੜਾਅ ਦੇ ਹਿੱਸੇ ਵਜੋਂ ਸ਼ੁਰੂਆਤੀ ਕੇਸ ਪਛਾਣ, ਸੰਪਰਕ ਟਰੇਸਿੰਗ, ਸਮੇਂ ਸਿਰ ਇਲਾਜ ਅਤੇ ਦਿਵਯਾਂਗਤਾ ਰੋਕਥਾਮ ਨੂੰ ਮਜ਼ਬੂਤ ​​ਕੀਤਾ ਗਿਆ।

ਵਿਸ਼ਵ ਸਿਹਤ ਸੰਗਠਨ (WHO) ਦੇ ਰਾਸ਼ਟਰੀ ਪ੍ਰੋਗਰਾਮ ਅਧਿਕਾਰੀ ਡਾ. ਰਸ਼ਮੀ ਸ਼ੁਕਲਾ ਨੇ "ਕੁਸ਼ਟ ਰੋਗ ਦੇ ਕੇਸ ਲੱਭਣ ਦੀਆਂ ਮੁਹਿੰਮਾਂ (ਐੱਲਸੀਡੀਸੀ) ਦੀ ਗੁਣਵੱਤਾ ਅਤੇ ਨਤੀਜਿਆਂ ਵਿੱਚ ਸੁਧਾਰ" ਵਿਸ਼ੇ 'ਤੇ ਇੱਕ ਤਕਨੀਕੀ ਸੈਸ਼ਨ ਦੀ ਅਗਵਾਈ ਕੀਤੀ। ਇਹ ਸੈਸ਼ਨ ਮੁਹਿੰਮ ਲਾਗੂ ਕਰਨ ਦੀ ਗੁਣਵੱਤਾ ਨੂੰ ਵਧਾਉਣ ਅਤੇ ਕੇਸ ਲੱਭਣ ਦੀਆਂ ਗਤੀਵਿਧੀਆਂ ਦੀ ਪ੍ਰਭਾਵਸ਼ੀਲਤਾ ਨੂੰ ਬਿਹਤਰ ਬਣਾਉਣ 'ਤੇ ਕੇਂਦ੍ਰਿਤ ਕੀਤਾ ਗਿਆ।

ਆਰਐੱਲਟੀਆਰਆਈ ਰਾਏਪੁਰ ਦੇ ਡਾ. ਸੰਦੀਪ ਜੋਗਦੰਡ ਦੁਆਰਾ ਆਯੋਜਿਤ ਇੱਕ ਹੋਰ ਤਕਨੀਕੀ ਸੈਸ਼ਨ ਵਿੱਚ "ਰੇਟ੍ਰੋਸਪੈਕਟਿਵ ਅਤੇ ਰਿਵਰਸ ਸੰਪਰਕ ਟ੍ਰੇਸਿੰਗ" ਬਾਰੇ ਚਰਚਾ ਕੀਤੀ ਗਈ। ਇਸ ਸੈਸ਼ਨ ਨੇ ਸੰਭਾਵੀ ਤੌਰ 'ਤੇ ਅਣਪਛਾਤੇ ਮਰੀਜ਼ਾਂ ਦੀ ਪਛਾਣ ਕਰਨ ਅਤੇ ਪ੍ਰਭਾਵਿਤ ਭਾਈਚਾਰਿਆਂ ਵਿੱਚ ਸੰਚਾਰ ਸਥਿਤੀ ਨੂੰ ਬਿਹਤਰ ਢੰਗ ਨਾਲ ਸਮਝਣ ਲਈ ਸੰਪਰਕ ਟਰੇਸਿੰਗ ਉਪਾਵਾਂ ਨੂੰ ਮਜ਼ਬੂਤ ​​ਕਰਨ ਬਾਰੇ ਤਕਨੀਕੀ ਮਾਰਗਦਰਸ਼ਨ ਪ੍ਰਦਾਨ ਕੀਤਾ।

ਤਕਨੀਕੀ ਵਿਚਾਰ-ਵਟਾਂਦਰੇ ਤੋਂ ਬਾਅਦ, ਮੱਧ ਪ੍ਰਦੇਸ਼ ਦੇ ਵੱਖ-ਵੱਖ ਜ਼ਿਲ੍ਹਿਆਂ ਦੇ ਜ਼ਿਲ੍ਹਾ ਕੁਸ਼ਟ ਰੋਗ ਅਧਿਕਾਰੀਆਂ ਨਾਲ ਇੱਕ ਵਿਚਾਰ-ਵਟਾਂਦਰਾ ਅਤੇ ਅਨੁਭਵ ਸਾਂਝਾ ਕਰਨ ਵਾਲਾ ਸੈਸ਼ਨ ਆਯੋਜਿਤ ਕੀਤਾ ਗਿਆ। ਅਲੀਰਾਜਪੁਰ, ਅਨੂਪਪੁਰ, ਬਰਵਾਨੀ, ਬੁਰਹਾਨਪੁਰ ਅਤੇ ਧਾਰ ਸਮੇਤ ਜ਼ਿਲ੍ਹਿਆਂ ਨੇ ਆਪਣੇ ਖੇਤਰੀ ਅਨੁਭਵ ਸਾਂਝੇ ਕੀਤੇ। ਇਨ੍ਹਾਂ ਅਨੁਭਵਾਂ ਵਿੱਚ ਪ੍ਰੋਗਰਾਮ ਦੀ ਕਾਰਗੁਜ਼ਾਰੀ, ਸੰਚਾਲਨ ਸਬੰਧੀ ਚੁਣੌਤੀਆਂ, ਤਰਜੀਹੀ ਖੇਤਰਾਂ ਅਤੇ ਦਿਵਯਾਂਗਤਾ ਦੀ ਸ਼ੁਰੂਆਤੀ ਪਛਾਣ, ਸਮੇਂ ਸਿਰ ਇਲਾਜ ਅਤੇ ਰੋਕਥਾਮ ਨੂੰ ਮਜ਼ਬੂਤ ​​ਕਰਨ ਲਈ ਜ਼ਿਲ੍ਹਾ ਪੱਧਰ 'ਤੇ ਕੀਤੀਆਂ ਜਾ ਰਹੀਆਂ ਕਾਰਵਾਈਆਂ ਨੂੰ ਉਜਾਗਰ ਕੀਤਾ ਗਿਆ।

ਅਨੁਭਵ ਸਾਂਝਾ ਕਰਨ ਵਾਲੇ ਸੈਸ਼ਨ ਨੇ ਜ਼ਿਲ੍ਹਾ ਟੀਮਾਂ ਵਿਚਕਾਰ ਪੀਅਰ-ਲਰਨਿੰਗ ਨੂੰ ਵੀ ਉਤਸ਼ਾਹਿਤ ਕੀਤਾ ਅਤੇ ਪ੍ਰੋਗਰਾਮ ਲਾਗੂਕਰਨ ਨੂੰ ਮਜ਼ਬੂਤ ​​ਕਰਨ ਲਈ ਵਿਵਹਾਰਕ, ਦੁਹਰਾਉਣ ਯੋਗ ਉਪਾਵਾਂ ਦੀ ਪਛਾਣ ਕਰਨ ਦਾ ਮੌਕਾ ਪ੍ਰਦਾਨ ਕੀਤਾ। ਏਪੀਏਐੱਲ ਦੇ ਉਪ-ਪ੍ਰਧਾਨ ਨੇ ਜਲਦੀ ਮਰੀਜ਼ ਪਛਾਣ ਅਤੇ ਕਮਿਊਨਿਟੀ-ਪੱਧਰੀ ਕਾਰਵਾਈ ਨੂੰ ਮਜ਼ਬੂਤ ​​ਕਰਨ ਨਾਲ ਸਬੰਧਿਤ ਤਜਰਬੇ ਅਤੇ ਵਿਵਹਾਰਕ ਸੁਝਾਅ ਸਾਂਝੇ ਕੀਤੇ। ਉਨ੍ਹਾਂ ਨੇ ਪ੍ਰੋਗਰਾਮ ਲਾਗੂਕਰਨ ਵਿੱਚ ਕੁਸ਼ਟ ਰੋਗ ਤੋਂ ਪ੍ਰਭਾਵਿਤ ਵਿਅਕਤੀਆਂ ਦੇ ਦ੍ਰਿਸ਼ਟੀਕੋਣਾਂ ਨੂੰ ਸ਼ਾਮਲ ਕਰਨ ਅਤੇ ਭਾਈਚਾਰਕ ਸ਼ਮੂਲੀਅਤ ਵਧਾਉਣ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ।

ਇਹ ਦੋ-ਦਿਨਾਂ ਵਰਕਸ਼ਾਪ 20 ਅਗਸਤ, 2026 ਤੱਕ ਜਾਰੀ ਰਹੇਗੀ। ਜ਼ਿਲ੍ਹਾ-ਪੱਧਰੀ ਰਣਨੀਤੀਆਂ ਨੂੰ ਮਜ਼ਬੂਤ ​​ਕਰਨ, ਪ੍ਰੋਗਰਾਮ ਲਾਗੂ ਕਰਨ ਨੂੰ ਮਜ਼ਬੂਤ ​​ਕਰਨ ਅਤੇ ਕੁਸ਼ਟ ਰੋਗ ਦੇ ਸੰਚਾਰ ਨੂੰ ਰੋਕਣ ਦੇ ਰਾਸ਼ਟਰੀ ਟੀਚੇ ਵੱਲ ਕੇਂਦ੍ਰਿਤ ਦਖਲਅੰਦਾਜ਼ੀ ਨੂੰ ਤੇਜ਼ ਕਰਨ ਲਈ ਹੋਰ ਵਿਚਾਰ-ਵਟਾਂਦਰੇ ਅਤੇ ਸਮਰੱਥਾ-ਨਿਰਮਾਣ ਸੈਸ਼ਨ ਆਯੋਜਿਤ ਕੀਤੇ ਜਾਣਗੇ।

*****

 

ਐੱਸਆਰ/ਏਕੇ

(रिलीज़ आईडी: 2301876) आगंतुक पटल : 7