મહિલા અને બાળ વિકાસ કેન્દ્રીય મંત્રી શ્રીમતી અન્નપૂર્ણા દેવીએ આજે કોલકાતા ખાતે પશ્ચિમ બંગાળમાં અમલમાં મુકાયેલી મહિલા અને બાળ વિકાસ મંત્રાલયની યોજનાઓની સમીક્ષા બેઠકની અધ્યક્ષતા કરી હતી. મહિલા અને બાળ વિકાસ કેન્દ્રીય રાજ્ય મંત્રી શ્રીમતી સાવિત્રી ઠાકુર, પશ્ચિમ બંગાળ સરકારના રાજ્ય મંત્રી (સ્વતંત્ર પ્રભારો) શ્રીમતી માલતી રવા રોય અને ભારત સરકારના મહિલા અને બાળ વિકાસ મંત્રાલયના સચિવ શ્રી અનિલ મલિક પણ આ પ્રસંગે ઉપસ્થિત રહ્યા હતા. કેન્દ્રીય મહિલા અને બાળ વિકાસ મંત્રાલય તેમજ પશ્ચિમ બંગાળ સરકારના મહિલા અને બાળ વિકાસ તથા સમાજ કલ્યાણ વિભાગ અને આરોગ્ય તથા પરિવાર કલ્યાણ વિભાગના વરિષ્ઠ અધિકારીઓ પણ બેઠકમાં હાજર રહ્યા હતા.

આ પ્રસંગે બોલતા મહિલા અને બાળ વિકાસ કેન્દ્રીય મંત્રી શ્રીમતી અન્નપૂર્ણા દેવીએ જણાવ્યું હતું કે મહિલા નેતૃત્વ હેઠળના વિકાસ અને વિકસિત ભારતના પ્રધાનમંત્રીના વિઝનને સાકાર કરવા માટે સમન્વયિત કામગીરી જરૂરી છે. તેમણે કહ્યું કે સમીક્ષા ક્રિયામાં, ક્રિયા પરિણામમાં અને પરિણામ પરિવર્તનમાં પરિણમવું જોઈએ. તેમણે ગ્રાઉન્ડ લેવલે યોજનાઓના સમયબદ્ધ અમલીકરણ, પારદર્શિતા અને યોજનાઓના રીયલ-ટાઇમ મોનિટરિંગ પર ભાર મૂક્યો જેથી તેઓ લક્ષિત લાભાર્થીઓ સુધી પહોંચી શકે.

કેન્દ્રીય મંત્રીએ રાજ્ય સરકારના અધિકારીઓનો તેમના ભાગીદારી બદલ આભાર માન્યો અને વિશ્વાસ વ્યક્ત કર્યો કે, વધુ સારા સમન્વય અને વહેંચાયેલી પ્રતિબદ્ધતા સાથે, પશ્ચિમ બંગાળ તેની મહિલાઓ અને બાળકો સુધી આ યોજનાઓનો પૂરો લાભ પહોંચાડવામાં સક્ષમ બનશે.

બેઠકમાં પશ્ચિમ બંગાળમાં મિશન શક્તિ, મિશન સક્ષમ આંગણવાડી અને પોષણ 2.0 અને મિશન વાત્સલ્ય હેઠળની યોજનાઓની પ્રગતિની સમીક્ષા કરવામાં આવી હતી. ડિજિટલ પ્લેટફોર્મ્સ જેવા કે પોષણ ટ્રેકર, PMMVY પોર્ટલ વગેરેના અસરકારક ઉપયોગ અંગે પણ ચર્ચા કરવામાં આવી હતી.

મહિલા અને બાળ વિકાસ મંત્રાલય માટે સંસદસભ્યોની સલાહકાર સમિતિની બેઠક આવતીકાલે કોલકાતા ખાતે યોજાવાની છે. આ બેઠકની અધ્યક્ષતા મહિલા અને બાળ વિકાસ કેન્દ્રીય મંત્રી શ્રીમતી અન્નપૂર્ણા દેવી કરશે અને તેમાં મહિલા અને બાળ વિકાસ રાજ્ય મંત્રી શ્રીમતી સાવિત્રી ઠાકુર સહિત સંસદસભ્યો ઉપસ્થિત રહેશે.

SM/JD

(रिलीज़ आईडी: 2301735) आगंतुक पटल : 9