زراعت و کسانوں کی بہبود اور دیہی ترقی کے وزیرِ جناب شیوراج سنگھ چوہان نے پردھان منتری راشٹریہ کرشی وکاس یوجنا (پی ایم آر کے وی وائی) اور کرشونّتی یوجنا کے تحت راجستھان اور تلنگانہ کے لیے بڑے مالی تخصیصات کی منظوری دے دی ہے۔ دونوں ریاستوں میں زرعی ترقی، اخراجات کی صورتِ حال اور کسانوں کے مفاد کو مدنظر رکھتے ہوئے راجستھان کے لیے 340.59 کروڑ روپے مختص کیے گئے ہیں، جبکہ تلنگانہ کے لیے 265.12 کروڑ روپے جاری کیے جا رہے ہیں۔ جناب چوہان نے تلنگانہ کے وزیرِ زراعت کو ریاست میں کسان شناختی نمبر (فارمر آئی ڈی) اور کھاد کی تقسیم کے نئے ماڈل پر مبارک باد بھی دی۔ انہوں نے راجستھان حکومت کو زراعت کی ہمہ جہت ترقی کے لیے نیک تمناؤں کا اظہار کیا اور کسان کریڈٹ کارڈ (کے سی سی) کی صورتِ حال پر خصوصی توجہ دینے پر زور دیا۔

جناب شیوراج سنگھ چوہان نے آج بھوپال سے راجستھان کے وزیرِ زراعت جناب کیروری لال مینا اور تلنگانہ کے وزیرِ زراعت جناب تمّالا ناگیشور راؤ کے ساتھ ایک ورچوئل اجلاس منعقد کیا، جس کے دوران دونوں ریاستوں کے لیے دو اہم زرعی منصوبوں، پردھان منتری راشٹریہ کرشی وکاس یوجنا (پی ایم آر کے وی وائی) اور کرشونّتی یوجنا کے تحت اہم مالی منظوریوں کی منظوری دی گئی۔ اجلاس میں زراعت و کسانوں کی بہبود کے سکریٹری جناب اتیش چندر اور مرکزی حکومت کے اعلیٰ حکام کے علاوہ دونوں ریاستوں کے محکمۂ زراعت کے سینئر افسران بھی شریک ہوئے۔ یہ مالی منظوری دونوں ریاستوں کی پروجیکٹ منظوری کمیٹی کے اجلاسوں میں منظور کیے گئے سالانہ عملی منصوبوں، پہلی مدر سینکشن کے تحت فراہم کی گئی رقم کے استعمال، اور اب تک حاصل ہونے والی اخراجاتی پیش رفت کا جائزہ لینے کے بعد دی گئی۔

راجستھان

راجستھان کے لیے 20 اپریل 2026 کو منعقدہ پروجیکٹ منظوری کمیٹی (پی اے سی) کے اجلاس میں مالی سال 2026-27 کے لیے 849.37 کروڑ روپے کے سالانہ عملی منصوبے کی منظوری دی گئی، جس میں مرکزی حصہ 509.62 کروڑ روپے تھا۔ اس کے بعد 4 مئی 2026 کو 216.13 کروڑ روپے کی پہلی مدر سینکشن جاری کی گئی۔

آج تک ریاست 164.39 کروڑ روپے خرچ کر چکی ہے، جو پہلی مدر سینکشن کا 76.06 فیصد بنتا ہے۔ جناب شیوراج سنگھ چوہان کی منظوری کے بعد اب راجستھان کو مجموعی طور پر 340.59 کروڑ روپے مختص کیے جا رہے ہیں، جن میں 216.12 کروڑ روپے آر کے وی وائی اور 124.47 کروڑ روپے کے وائی کے تحت شامل ہیں۔

تلنگانہ

تلنگانہ کے لیے 27 اپریل 2026 کو منعقدہ پروجیکٹ منظوری کمیٹی (پی اے سی) کے اجلاس میں مالی سال 2026-27 کے لیے 651.06 کروڑ روپے کے سالانہ عملی منصوبے کی منظوری دی گئی، جس میں مرکزی حصہ 390.63 کروڑ روپے تھا۔ 12 مئی 2026 کو 157.65 کروڑ روپے کی پہلی مدر سینکشن جاری کی گئی۔ آج تک ریاست 96.05 کروڑ روپے خرچ کر چکی ہے، جو منظور شدہ رقم کا 60.93 فیصد ہے۔ اخراجاتی پیش رفت کی بنیاد پر اور مرکزی وزیرِ زراعت جناب شیوراج سنگھ چوہان کی منظوری کے بعد تلنگانہ کو مجموعی طور پر 265.12 کروڑ روپے مختص کیے جا رہے ہیں، جن میں 157.66 کروڑ روپے آر کے وی وائی اور 107.46 کروڑ روپے کے وائی کے تحت شامل ہیں۔

جناب شیوراج سنگھ چوہان نے تلنگانہ میں کسان شناختی نمبر (فارمر آئی ڈی) اور کھاد کی تقسیم کے نئے ماڈل کو سراہتے ہوئے ریاست کے وزیرِ زراعت کو اس اقدام پر مبارک باد دی۔ انہوں نے کہا کہ اس ماڈل سے کسانوں تک خدمات کی فراہمی زیادہ شفاف اور مؤثر انداز میں ممکن ہو سکے گی۔

مرکزی وزیرِ زراعت نے اس بات کی بھی نشاندہی کی کہ تلنگانہ میں تیل دار اجناس اور دالوں کے مشنوں کے تحت اخراجات کی پیش رفت نسبتاً سست ہے۔ انہوں نے ان مشنوں کے تحت اخراجات اور عمل درآمد کی پیش رفت کی ریاست کی جانب سے باقاعدہ نگرانی کی ضرورت پر زور دیا۔

راجستھان کے بارے میں جناب چوہان نے ریاستی حکومت کو زراعت کی ہمہ جہت ترقی کے لیے نیک تمناؤں کا اظہار کیا اور کسان کریڈٹ کارڈ (کے سی سی) کی صورتِ حال پر خصوصی توجہ دینے کی ضرورت پر زور دیا، تاکہ کسانوں کو بروقت اور بلا رکاوٹ قرض کی سہولت میسر آ سکے۔

جناب چوہان نے کہا کہ ان مالی منظوریوں کا مقصد ریاستوں میں زرعی منصوبوں کے بروقت اور مؤثر عمل درآمد کو یقینی بنانا ہے۔ انہوں نے کہا کہ وزیرِ اعظم جناب نریندر مودی کی قیادت اور رہنمائی میں مرکزی حکومت کسانوں کے مفاد میں وسائل کو مضبوط بنانے، تکنیکی معاونت فراہم کرنے اور مؤثر نگرانی کے لیے ریاستوں کے ساتھ قریبی اشتراک سے کام کر رہی ہے۔ ان مالی تخصیصات سے دونوں ریاستوں میں زرعی بنیادی ڈھانچے کی ترقی، زرعی پیداوار میں اضافہ، زرعی مداخل کی فراہمی اور کسانوں کی بہبود سے متعلق سرگرمیوں کو تیز رفتاری ملنے کی توقع ہے۔ جناب چوہان نے یقین ظاہر کیا کہ یہ رقوم ریاستی سطح پر منصوبوں کے عمل درآمد کو مزید تیز کریں گی اور ان کے فوائد زیادہ مؤثر انداز میں کسانوں تک پہنچ سکیں گے۔

******

ش ح۔ ش ا ر۔ ول

Uno-2042

 

(रिलीज़ आईडी: 2299198) आगंतुक पटल : 8