કેન્દ્રીય કૃષિ અને ખેડૂત કલ્યાણ તથા ગ્રામીણ વિકાસ મંત્રી શ્રી શિવરાજ સિંહ ચૌહાણે પ્રધાનમંત્રી રાષ્ટ્રીય કૃષિ વિકાસ યોજના (PMRKVY) અને કૃષોન્નતિ યોજના હેઠળ રાજસ્થાન અને તેલંગાણા માટે મોટી નાણાકીય ફાળવણીની મંજૂરી આપી છે. બંને રાજ્યોમાં પ્રગતિ, ખર્ચની સ્થિતિ અને ખેડૂતોના હિતોને ધ્યાનમાં રાખીને રાજસ્થાનને રૂ. 340.59 કરોડ ફાળવવામાં આવી રહ્યા છે, જ્યારે તેલંગાણા માટે રૂ. 265.12 કરોડ મુક્ત કરવામાં આવી રહ્યા છે. શ્રી ચૌહાણે રાજ્યના ફાર્મર આઈડી અને ખાતર વિતરણના નવા મોડલ માટે તેલંગાણાના કૃષિ મંત્રીને અભિનંદન પણ પાઠવ્યા હતા. તેમણે કૃષિના સર્વાંગી વિકાસ માટે રાજસ્થાન સરકારને શુભેચ્છાઓ પાઠવી હતી અને કિસાન ક્રેડિટ કાર્ડની સ્થિતિ પર વિશેષ ધ્યાન આપવા આહ્વાન કર્યું હતું.

શ્રી ચૌહાણે આજે ભોપાલથી રાજસ્થાનના કૃષિ મંત્રી શ્રી કિરોડી લાલ મીણા અને તેલંગાણાના કૃષિ મંત્રી શ્રી તુમ્મલા નાગેશ્વર રાવ સાથે વર્ચ્યુઅલ બેઠક યોજી હતી, જે દરમિયાન બે મુખ્ય કૃષિ યોજનાઓ PM RKVY અને કૃષોન્નતિ યોજના હેઠળ બંને રાજ્યોને નોંધપાત્ર નાણાકીય મંજૂરીઓ આપવામાં આવી હતી. કેન્દ્રીય કૃષિ અને ખેડૂત કલ્યાણ સચિવ શ્રી અતિશ ચંદ્ર અને કેન્દ્ર સરકારના વરિષ્ઠ અધિકારીઓએ બંને રાજ્યોના વરિષ્ઠ કૃષિ અધિકારીઓ સાથે બેઠકમાં ભાગ લીધો હતો. બંને રાજ્યોની પ્રોજેક્ટ એપ્રુવલ કમિટી (PAC)ની બેઠકો દરમિયાન મંજૂર કરવામાં આવેલી વાર્ષિક કાર્ય યોજનાઓ, પ્રથમ મધર સેંક્શનના ઉપયોગ અને અત્યાર સુધી પ્રાપ્ત થયેલી ખર્ચની પ્રગતિની સમીક્ષા કર્યા પછી આ મંજૂરીઓ આપવામાં આવી હતી.

રાજસ્થાન

રાજસ્થાન માટે, 20 એપ્રિલ, 2026ના રોજ યોજાયેલી PAC બેઠકમાં 2026-27 માટે રૂ. 849.37 કરોડની વાર્ષિક કાર્ય યોજનાને મંજૂરી આપવામાં આવી હતી, જેમાં રૂ. 509.62 કરોડના કેન્દ્રીય હિસ્સાનો સમાવેશ થાય છે. ત્યારબાદ, 4 મે, 2026ના રોજ રૂ. 216.13 કરોડનું પ્રથમ મધર સેંક્શન બહાર પાડવામાં આવ્યું હતું. આજની તારીખે, રાજ્યએ રૂ. 164.39 કરોડનો ખર્ચ કર્યો છે, જે પ્રથમ મધર સેંક્શનના 76.06 ટકા રજૂ કરે છે. શ્રી ચૌહાણની મંજૂરી પછી, રાજસ્થાનને હવે કુલ રૂ. 340.59 કરોડ ફાળવવામાં આવી રહ્યા છે, જેમાં RKVY હેડ હેઠળ રૂ. 216.12 કરોડ અને KY હેડ હેઠળ રૂ. 124.47 કરોડનો સમાવેશ થાય છે.

તેલંગાણા

તેલંગાણા માટે, 27 એપ્રિલ, 2026 ના રોજ યોજાયેલી PAC બેઠકમાં 2026-27 માટે રૂ. 651.06 કરોડની વાર્ષિક કાર્ય યોજનાને મંજૂરી આપવામાં આવી હતી, જેમાં રૂ. 390.63 કરોડના કેન્દ્રીય હિસ્સાનો સમાવેશ થાય છે. 12 મે, 2026ના રોજ રૂ. 157.65 કરોડનું પ્રથમ મધર સેંક્શન બહાર પાડવામાં આવ્યું હતું. આજની તારીખે રાજ્યએ રૂ. 96.05 કરોડનો ખર્ચ કર્યો છે, જે મંજૂર થયેલી રકમના 60.93 ટકા છે. ખર્ચની પ્રગતિના આધારે અને કેન્દ્રીય કૃષિ મંત્રી શ્રી શિવરાજ સિંહ ચૌહાણની મંજૂરી પછી, તેલંગાણાને હવે કુલ રૂ. 265.12 કરોડ ફાળવવામાં આવી રહ્યા છે, જેમાં RKVY હેડ હેઠળ રૂ. 157.66 કરોડ અને KY હેડ હેઠળ રૂ. 107.46 કરોડનો સમાવેશ થાય છે.

શ્રી શિવરાજ સિંહ ચૌહાણે તેલંગાણાના ફાર્મર આઈડી અને ખાતર વિતરણના નવા મોડલની પ્રશંસા કરી હતી અને આ પહેલ માટે રાજ્યના કૃષિ મંત્રીને અભિનંદન પાઠવ્યા હતા. તેમણે કહ્યું કે આ મોડલ ખેડૂતોને વધુ પારદર્શક અને અસરકારક રીતે સેવાઓ પહોંચાડવામાં મદદ કરશે.

કેન્દ્રીય કૃષિ મંત્રીએ એ પણ નોંધ્યું હતું કે તેલંગાણાનો તેલીબિયાં અને કઠોળ મિશન હેઠળનો ખર્ચ નિર્ધારિત સમયપત્રક કરતાં પ્રમાણમાં પાછળ છે. તેમણે રાજ્ય દ્વારા આ મિશન હેઠળ ખર્ચ અને અમલીકરણની પ્રગતિનું નિયમિત નિરીક્ષણ કરવાની જરૂરિયાત પર ભાર મૂક્યો હતો.

રાજસ્થાન માટે, શ્રી ચૌહાણે કૃષિના સર્વાંગી વિકાસ માટે રાજ્ય સરકારને શુભેચ્છાઓ પાઠવી હતી અને કિસાન ક્રેડિટ કાર્ડની સ્થિતિ પર વિશેષ ધ્યાન આપવા આહ્વાન કર્યું હતું જેથી ખેડૂતોને સમયસર અને વિના ઝંઝટ ક્રેડિટ સહાય મળે.

શ્રી ચૌહાણે જણાવ્યું હતું કે નાણાકીય મંજૂરીઓનો ઉદ્દેશ્ય રાજ્યોમાં કૃષિ યોજનાઓનું સમયસર અને અસરકારક અમલીકરણ સુનિશ્ચિત કરવાનો છે. તેમણે કહ્યું કે પ્રધાનમંત્રી શ્રી નરેન્દ્ર મોદીના નેતૃત્વ અને માર્ગદર્શન હેઠળ કેન્દ્ર સરકાર ખેડૂતોના હિતમાં સંસાધનો, તકનીકી સહાય અને મોનિટરિંગને મજબૂત કરવા માટે રાજ્યો સાથે નજીકના સંકલનમાં કામ કરી રહી છે. નાણાકીય ફાળવણીથી બંને રાજ્યોમાં કૃષિ ઇન્ફ્રાસ્ટ્રક્ચર, ઉત્પાદકતામાં વધારો, ઇનપુટ સહાય અને ખેડૂત કલ્યાણ સંબંધિત પ્રવૃત્તિઓમાં ઝડપ આવવાની અપેક્ષા છે. શ્રી ચૌહાણે વિશ્વાસ વ્યક્ત કર્યો હતો કે આ રકમ મુક્ત થવાથી રાજ્ય સ્તરે યોજનાઓના અમલીકરણમાં ઝડપ આવશે અને તેના લાભો ખેડૂતો સુધી વધુ અસરકારક રીતે પહોંચશે.

SM/DK/JD