حکومت نے راجیہ سبھا کو بتایا ہے کہ گزشتہ تین مالی سال  کے دوران کرناٹک میں مرکز کے زیر اہتمام درج فہرست ذاتوں (ایس سی) کے طلبہ کے لیے میٹرک کے بعد اسکالرشپ اسکیم کے تحت مستحقین کو مرکزی حصے کے طور پر مجموعی طور پر 1,178.20 کروڑ روپے جاری کیے گئے۔

سماجی انصاف و تفویضِ اختیارات کے وزیر مملکت جناب رام داس اٹھاولے نے کرناٹک میں درج فہرست ذاتوں کی فلاح و بہبود کے لیے مرکزی فنڈز سے متعلق راجیہ سبھا میں پوچھے گئے غیر ستارہ  سوال نمبر 2050 کے تحریری جواب میں یہ تفصیلات فراہم کیں۔

کرناٹک میں درج فہرست ذاتوں (ایس سی) کے طلبہ کے لیے میٹرک کے بعد اسکالرشپ اسکیم کے تحت مستحقین کو جاری کیا گیا مرکزی حصہ 2023-24 میں 421.08 کروڑ روپے، 2024-25 میں 422.90 کروڑ روپے اور 2025-26 میں 334.22 کروڑ روپے تھا۔ اس طرح گزشتہ تین مالی برسوں کے دوران مجموعی طور پر 1,178.20 کروڑ روپے جاری کیے گئے۔

سماجی انصاف و تفویض اختیارات کا محکمہ درج فہرست ذاتوں (ایس سی) کے طلبہ کے لیے میٹرک کے بعد اسکالرشپ اسکیم کو مرکز کے زیرِ اہتمام اسکیم کے طور پر ریاستی حکومتوں اور مرکز کے زیرِ انتظام علاقوں کی انتظامیہ کے ذریعے نافذ کرتا ہے۔ مالی سال 2021-22 سے یہ اسکیم مستحقین کے بینک کھاتوں میں براہِ راست رقم کی منتقلی (ڈی بی ٹی) کے ذریعے نافذ کی جا رہی ہے۔

اس اسکیم کے تحت اسکالرشپ کے مرکزی حصے کی رقم جاری کرنے کے لیے ضروری ہے کہ ریاستی حکومتیں اور مرکز کے زیر انتظام علاقوں کی انتظامیہ ریاست/مرکز کے زیرِ انتظام علاقے کی جانب سے ادا کی گئی اور حتمی طور پر تصدیق شدہ معلومات نیشنل اسکالرشپ پورٹل پر فراہم کریں۔ یہ اسکیم ملک بھر کے تسلیم شدہ اداروں میں زیرِ تعلیم تمام اہل طلبہ کے لیے کھلی اور طلب پر مبنی ہے۔

درج فہرست ذاتوں کے لیے ترقیاتی ایکشن پلان (ڈی اے پی ایس سی) کے حوالے سے حکومت نے بتایا کہ نیتی آیوگ نے 2017 میں اس منصوبے کے تحت فنڈز مختص کرنے کے لیے رہنما خطوط جاری کیے تھے۔ ان رہنما خطوط کے مطابق، متعلقہ ہر وزارت/محکمہ اپنی متعلقہ اسکیموں کے ذریعے درج فہرست ذاتوں کی سماجی و اقتصادی ترقی کے لیے ڈی اے پی ایس سی کے تحت فنڈز مختص کرتا ہے۔

ان اسکیموں کو متعلقہ وزارتیں اور محکمے نافذ کرتے ہیں، جبکہ کرناٹک سمیت ریاستوں اور مرکز کے زیرِ انتظام علاقوں کے لیے فنڈز مختص کرنے کا عمل بھی متعلقہ وزارتوں اور محکموں کی جانب سے اپنی اپنی اسکیموں کے رہنما خطوط کے مطابق انجام دیا جاتا ہے۔ ڈی اے پی ایس سی کے تحت متعلقہ وزارتوں اور محکموں کی جانب سے مختص کیے گئے فنڈز مرکزی بجٹ کے اخراجات کی تفصیلی دستاویز (ایکسپنڈیچر پروفائل) کے بیان نمبر 10اے میں درج کیے جاتے ہیں۔

حکومت کے جواب سے واضح ہوتا ہے کہ کرناٹک میں درج فہرست ذاتوں سے تعلق رکھنے والے اہل طلبہ کے لیے اسکالرشپ کی سہولت مانگ  پر مبنی طریقۂ کار اور براہِ راست مستحقین کے بینک کھاتوں میں رقم کی منتقلی (ڈی بی ٹی) کے نظام کے ذریعے فراہم کی جا رہی ہے۔

 

******

ش ح۔ ف ا۔ م ر

U-NO. 1677

 

(ریلیز آئی ڈی: 2296823) وزیٹر کاؤنٹر : 36