حکومت نے آج اس بات کی تصدیق کی ہے کہ ریسرچ، ڈیولپمنٹ اینڈ انوویشن (آر ڈی آئی) فنڈ کو ایک مضبوط ادارہ جاتی فریم ورک کے ذریعے نافذ کیا جا رہا ہے، جس کی بنیاد شفافیت، میرٹ پر مبنی تشخیص اور مفادات کے تصادم سے متعلق سخت حفاظتی اقدامات پر رکھی گئی ہے۔ محکمہ سائنس و ٹیکنالوجی (ڈی ایس ٹی)، ٹیکنالوجی ڈیولپمنٹ بورڈ (ٹی ڈی بی) اور انوسندھان نیشنل ریسرچ فاؤنڈیشن (اے این آر ایف) کے سینئر افسران نے "ریسرچ، ڈیولپمنٹ اینڈ انوویشن (آر ڈی آئی) فنڈ کے تحت مفادات کے تصادم سے متعلق تحفظات اور فنڈ کی تقسیم" کے موضوع پر ایک پریس کانفرنس سے خطاب کرتے ہوئے گورننس کے ڈھانچے، تشخیصی طریقۂ کار اور ادارہ جاتی حفاظتی اقدامات کے بارے میں تفصیل سے بتایا، جو فنڈ کو تقویت دیتے ہیں۔ انہوں نے اس بات کا اعادہ کیا کہ فنڈنگ کا ہر فیصلہ سختی سے منظور شدہ نفاذی رہنما خطوط کے مطابق کیا جاتا ہے اور اس میں تمام ضابطہ جاتی تقاضوں کی مکمل پاسداری کی جاتی ہے۔

پریس کانفرنس سے ٹیکنالوجی ڈیولپمنٹ بورڈ (ٹی ڈی بی) کے سکریٹری جناب راجیش کمار پاٹھک اور انوسندھان نیشنل ریسرچ فاؤنڈیشن (اے این آر ایف) کے چیف ایگزیکٹو آفیسر ڈاکٹر شیو کمار کلیان رمن نے خطاب کیا۔

سائنس اور ٹیکنالوجی کے محکمے کے سکریٹری اور ٹیکنالوجی ڈیولپمنٹ بورڈ کے چیئرپرسن پروفیسر امیش وی واگھمارے نے ورچوئل طریقے سے شرکت کی اور آر ڈی آئی فنڈ کے نفاذ میں شفافیت، انصاف پسندی اور اخلاقی حکمرانی کے لیے حکومت کے عزم کا اعادہ کرتے ہوئے اپنا پیغام دیا۔ اپنے پیغام میں سکریٹری نے کہا کہ حکومت نے مفادات کے تصادم سے متعلق رہنما خطوط اور فریم ورک پر پوری تندہی سے عمل کیا ہے اور اسے پختہ یقین ہے کہ کسی قسم کی خلاف ورزی نہیں ہوئی ہے۔ انہوں نے ماہر کمیٹی کے اراکین کی دیانت داری اور اخلاقی طرزِ عمل پر مکمل اعتماد کا اظہار کیا اور اس بات پر زور دیا کہ ڈی ایس ٹی، ٹی ڈی بی، اے این آر ایف، ٹیکنالوجی ڈیولپمنٹ بورڈ اور آر ڈی آئی فنڈ کے کام کاج میں شفافیت، انصاف پسندی اور جواب دہی کو یقینی بنانے کے لیے پرعزم ہیں۔

فنڈ کو چلانے والے ادارہ جاتی فریم ورک کی وضاحت کرتے ہوئے افسران نے بتایا کہ آر ڈی آئی کے نفاذی رہنما خطوط واضح طور پر تسلیم کرتے ہیں کہ جدید ترین ٹیکنالوجیز کا جائزہ لینے کے اہل ماہرین اکثر اختراعی ماحولیاتی نظام میں سابقہ تجربہ رکھتے ہیں، جس میں پیشہ ورانہ یا سرمایہ کاری سے متعلق وابستگیاں بھی شامل ہوتی ہیں۔ اس کے مطابق، فریم ورک کو ڈومین مہارت کو خارج کرنے کے لیے نہیں، بلکہ واضح طور پر متعین مفادات کے تصادم کی دفعات کے ذریعے اس کا نظم کرنے کے لیے تیار کیا گیا ہے۔ رہنما خطوط مفادات کے انکشاف، منظم فیصلہ سازی کے عمل اور جہاں بھی ممکنہ مفادات کا تصادم پیدا ہو وہاں خود کو الگ کرنے کا تقاضا کرتے ہیں، تاکہ فنڈنگ کے فیصلوں کی سالمیت برقرار رکھتے ہوئے تکنیکی مہارت سے بھی فائدہ اٹھایا جا سکے۔ یہ تمام دفعات پروجیکٹ کی تشخیص شروع ہونے سے پہلے ہی منظور شدہ نفاذی فریم ورک کا حصہ بنا دی گئی تھیں۔

افسران نے اس بات پر زور دیا کہ اختراعی ماحولیاتی نظام کے کسی ادارے کے ساتھ پیشہ ورانہ یا سرمایہ کاری کی وابستگی کا محض وجود مفادات کے تصادم کے اصولوں کی خلاف ورزی نہیں ہے۔ فریم ورک کے تحت ایسی تمام وابستگیوں کا مکمل انکشاف اور متعلقہ تجویز کی تشخیص اور فیصلہ سازی کے عمل سے مکمل علیحدگی لازمی ہے۔ ٹی ڈی بی نے اس سے بھی زیادہ سخت سی او آئی (سی او آئی) پالیسی اختیار کی ہے، جس کے تحت اگر کوئی آئی سی رکن کسی ای ٹی ای (بطور سی ای او، بانی یا شیئر ہولڈر) سے وابستہ ہو، تو اس رکن کی ذمہ داری ہے کہ وہ اس بات کو یقینی بنائے کہ اس ای ٹی ای کی جانب سے ٹی ڈی بی کو کوئی پروجیکٹ تجویز اس وقت تک پیش نہ کی جائے جب تک وہ آئی سی کا رکن ہو۔ پروجیکٹ کے انتخاب کے پہلے مرحلے کے دوران ان حفاظتی اقدامات پر سختی سے عمل درآمد کیا گیا، اور سرمایہ کاری کمیٹی کے ہر رکن نے، جہاں بھی قابل اطلاق تھا، مقررہ انکشاف اور علیحدگی سے متعلق تمام تقاضوں کی مکمل تعمیل کی۔

حکومت نے مزید واضح کیا کہ ٹیکنالوجی ڈیولپمنٹ بورڈ نے مقامی ٹیکنالوجی کی ترقی کی حمایت کرتے ہوئے تقریباً تین دہائیوں سے مفادات کے تصادم سے متعلق اسی نوعیت کے حفاظتی اقدامات پر مسلسل عمل کیا ہے۔ 1996 میں پارلیمنٹ کے ایک ایکٹ کے تحت اپنے قیام کے بعد سے، ٹی ڈی بی نے ٹیکنالوجی تجاویز کا جائزہ لینے کے لیے انفرادی افسران کے بجائے آزاد ماہر کمیٹیوں پر انحصار کیا ہے۔ یہی ادارہ جاتی اصول آر ڈی آئی فنڈ کے تحت پروجیکٹ کے انتخاب کو بھی کنٹرول کرتے ہیں، جس سے فیصلہ سازی کے عمل میں تسلسل، ساکھ اور عوامی اعتماد کو تقویت ملتی ہے۔

تشخیصی عمل کی وضاحت کرتے ہوئے افسران نے بتایا کہ پروجیکٹ کی منظوری اجتماعی طور پر ایک سرمایہ کاری کمیٹی کے ذریعے دی جاتی ہے، جس میں ٹیکنالوجی، صنعت اور سرمایہ کاری کے شعبوں سے تعلق رکھنے والے آزاد بیرونی ماہرین شامل ہوتے ہیں۔ سرکاری اہلکار تجاویز کی تکنیکی اہلیت کا تعین نہیں کرتے، اور ٹی ڈی بی کے ممبر سکریٹری کو سرمایہ کاری کمیٹی میں ووٹنگ کا کوئی حق حاصل نہیں ہے۔ مزید برآں، منظوری صرف سادہ اکثریت کے بجائے اہل اراکین کی اکثریت سے دی جاتی ہے، جو من مانی یا انفرادی فیصلہ سازی کے خلاف اضافی ادارہ جاتی تحفظ فراہم کرتی ہے۔ وہ اراکین جو مفادات کے تصادم کا اعلان کرتے ہیں، نہ تو بحث میں حصہ لیتے ہیں اور نہ ہی متعلقہ تجویز پر ووٹ دیتے ہیں۔ سرمایہ کاری کمیٹی، ٹی ڈی بی بورڈ کی جانب سے حتمی غور و خوض اور منظوری کے لیے انتہائی اکثریت سے پروجیکٹ تجاویز کی سفارش کرتی ہے۔

حکومت نے یہ بھی واضح کیا کہ ٹی ڈی بی کے ذریعے آر ڈی آئی فنڈ کے تحت امداد مخصوص تحقیق اور ٹیکنالوجی کی ترقی کے منصوبوں کے لیے فراہم کی جاتی ہے، نہ کہ کمپنیوں کو بطور ادارہ مالی امداد دینے کے لیے۔ ٹی ڈی بی واضح طور پر شناخت شدہ ٹیکنالوجی منصوبوں سے منسلک نرم قرضے فراہم کرتا ہے، جبکہ تجویز پیش کیے جانے سے پہلے ہونے والے اخراجات کو غور و خوض سے خارج رکھا جاتا ہے۔ مزید برآں، سرکاری امداد صرف اہل غیر سرکاری ذرائع سے پروجیکٹ کی منظوری کے بعد حاصل کی گئی مماثل سرمایہ کاری کی بنیاد پر جاری کی جاتی ہے۔ یہ ڈھانچہ اس بات کو یقینی بناتا ہے کہ عوامی فنڈنگ اضافی نجی سرمایہ کاری کو متحرک کرے، جبکہ منصوبے کے نفاذ کے دوران مالی نظم و ضبط اور جواب دہی بھی برقرار رہے۔

وینچر کیپیٹل فنڈز یا اینجل انویسٹر نیٹ ورکس کی جانب سے کی گئی سابقہ سرمایہ کاری سے متعلق سوالات کے جواب میں حکام نے واضح کیا کہ ایسی سرمایہ کاری، اگر تجویز پیش کیے جانے سے پہلے کی گئی ہو، تو اس کا حکومت کے فنڈنگ کے فیصلے پر کوئی اثر نہیں پڑتا۔ اسی طرح، اگر کوئی نجی سرمایہ کار کامیاب تکنیکی تشخیص اور منظوری کے بعد کسی پروجیکٹ میں سرمایہ کاری کرنے کا فیصلہ کرتا ہے، تو ایسی سرمایہ کاری ایک آزاد تجارتی فیصلہ ہوتی ہے اور حکومت کے تشخیصی عمل کو متاثر نہیں کرتی۔ اس لیے تشخیصی فریم ورک مکمل طور پر زیر غور پروجیکٹ کی سائنسی قابلیت، تکنیکی اختراع اور اختراعی صلاحیت پر مرکوز رہتا ہے۔ ان 22 کمپنیوں میں سے ہر ایک گہری سائنس پر مبنی کمپنی ہے، جو خودمختار ٹیکنالوجیز تیار کر رہی ہے اور اہم مسائل کے حل پر کام کر رہی ہے۔ تیار کی جانے والی بہت سی ٹیکنالوجیز ہندوستان میں پہلی مرتبہ متعارف ہو رہی ہیں اور دنیا میں بھی ان کی مثالیں بہت کم ہیں۔ چونکہ ہندوستان میں یہ ڈیپ ٹیک، سائنس پر مبنی کمپنیاں اپنے ابتدائی مرحلے میں بازار سے قرض حاصل نہیں کر سکتیں، جبکہ آر ڈی آئی فنڈ صرف ٹی آر ایل-4 کے بعد دستیاب ہوتا ہے، اس لیے انہیں اینجل سرمایہ کاروں اور فنڈز سے ایکویٹی سرمایہ حاصل ہوئی، جو اس لحاظ سے مثبت ہے کہ اس سے ان کمپنیوں کی کامیابی کے امکانات بڑھ جاتے ہیں۔ ان 22 ای ٹی ایز میں سے کئی کو شریک سرمایہ کاروں کے ساتھ ساتھ وی سی فنڈز/خاندانی دفاتر سے بھی فنڈنگ حاصل ہوئی، جہاں سرمایہ کاری کمیٹی کے کسی بھی رکن کا مفادات کا تصادم موجود نہیں تھا۔ اس سے آر ڈی آئی فنڈ کی سرمایہ کاری پر مزید اعتماد قائم ہوتا ہے۔

افسران نے مزید بتایا کہ موجودہ فنڈنگ راؤنڈ کے تحت منظور کیے گئے متعدد منصوبوں کا آر ڈی آئی فنڈ کے تحت غور کیے جانے سے پہلے ہی قومی اختراعی پلیٹ فارمز اور ماہرین کے تشخیصی نظام کے ذریعے آزادانہ جائزہ لیا جا چکا تھا۔ انہوں نے یہ بھی بتایا کہ متعدد مستفید ہونے والی کمپنیوں کو وینچر کیپیٹل یا اینجل سرمایہ کاروں سے سرمایہ کاری حاصل کرنے سے پہلے ہی ٹی ڈی بی کی جانب سے برسوں تک پروجیکٹ پر مبنی معاونت حاصل رہی تھی۔ یہ امر ترقی کے ابتدائی مرحلے میں امید افزا مقامی ٹیکنالوجیز کی شناخت اور ان کی حمایت میں ٹی ڈی بی کے دیرینہ کردار کی عکاسی کرتا ہے، اور اسے موجودہ فنڈنگ پروگرام کے تحت کسی قسم کا ترجیحی سلوک نہیں سمجھا جانا چاہیے۔

اے این آر ایف نے اس بات کا اعادہ کیا کہ مفادات کے تصادم کا انتظام آر ڈی آئی فنڈ کے گورننس فریم ورک کا ایک بنیادی اصول ہے۔ نفاذی رہنما خطوط میں دوسری سطح کے فنڈ منیجروں کے لیے یہ لازم قرار دیا گیا ہے کہ وہ سرمایہ کاری کمیٹیاں اس انداز میں تشکیل دیں کہ جہاں بھی ضروری ہو، مفادات کے ممکنہ تصادم سے بچنے کے لیے انکشاف، علیحدگی اور منظم فیصلہ سازی کو یقینی بنایا جا سکے۔ یہ دفعات، گورننس سے متعلق دیگر حفاظتی اقدامات کے ساتھ، فنڈنگ کے عمل کے آغاز سے قبل عوامی طور پر دستیاب نفاذی فریم ورک میں شامل کی گئی تھیں اور منصوبوں کی تشخیص اور منظوری کے دوران ان پر مسلسل عمل کیا گیا۔

حکومت نے اس بات پر زور دیا کہ ڈیپ ٹیک اختراع میں عالمی رہنما کے طور پر ابھرنے کے ہندوستان کے عزائم کے لیے ملک کی بہترین سائنسی، تکنیکی اور سرمایہ کاری کی مہارت کی شمولیت ضروری ہے۔ اس کے ساتھ ہی اس نے اس بات پر بھی زور دیا کہ ایسی شمولیت کو شفاف ادارہ جاتی حفاظتی اقدامات کے ذریعے منظم کیا جانا چاہیے، تاکہ عوام کا اعتماد برقرار رہے۔ اسی لیے آر ڈی آئی فنڈ کو مفادات کے انکشاف، علیحدگی، اجتماعی فیصلہ سازی اور آزادانہ تشخیص کے بین الاقوامی طور پر تسلیم شدہ اصولوں کی بنیاد پر تشکیل دیا گیا ہے، تاکہ سالمیت اور انصاف پسندی پر سمجھوتہ کیے بغیر مہارت سے بھرپور استفادہ کیا جا سکے۔

جوابدہ حکمرانی کے لیے اپنے عزم کا اعادہ کرتے ہوئے حکومت نے کہا کہ آر ڈی آئی فنڈ کے تحت معاونت یافتہ ہر پروجیکٹ کا انتخاب ایک شفاف، اصول پر مبنی اور میرٹ پر مبنی عمل کے ذریعے کیا جاتا ہے، جو ہندوستان کے تحقیق و اختراع کے ماحولیاتی نظام کو آگے بڑھانے کے لیے وضع کیا گیا ہے۔ حکومت نے اس بات کا بھی اعادہ کیا کہ مفادات کے انکشاف، لازمی علیحدگی، آزاد ماہرین کی تشخیص اور سپر اکثریت سے منظوری سے متعلق قائم کردہ حفاظتی اقدامات ایک مضبوط ادارہ جاتی فریم ورک فراہم کرتے ہیں، جو عوامی فنڈنگ کی سالمیت کا تحفظ کرتے ہوئے ہندوستان کے عالمی ڈیپ ٹیک اختراع کے مرکز بننے کے سفر کو تیز کرتے ہیں۔

***

UR-1602

(ش ح۔اس ک  )

(रिलीज़ आईडी: 2296344) आगंतुक पटल : 6