مرکزی کونسل برائے تحقیقِ آیورویدک سائنسز (سی سی آر اے ایس)، جو کہ وزارتِ آیوش، حکومتِ ہند کے تحت تحقیق کا اعلیٰ ترین ادارہ ہے، اور بیورو آف انڈین اسٹینڈرڈز (بی آئی ایس)، جو کہ بھارت کا قومی معیاری ادارہ ہے، نے آج آیوش کے شعبے میں معیار، مطابقت کے تعین، سائنسی تحقیق اور صلاحیتوں کو بڑھانے کے لیے مشترکہ طور پر کام کرنے کی خاطر ایک مفاہمتی عرضداشت پر دستخط کیے۔

اس مفاہمتی عرضداشت پر سی سی آر اے ایس کے ڈائریکٹر جنرل پروفیسر (ویدیہ) ربینارائن اچاریہ، اور بی آئی ایس کے ڈپٹی ڈائریکٹر جنرل (اسٹینڈرڈائزیشن - II) جناب سنجے پنت نے، وزارتِ آیوش کے سیکریٹری ویدیا راجیش کوٹیچا کی باوقار موجودگی میں دستخط کیے۔ یہ معاہدہ آیوروید کے لیے عالمی سطح پر تسلیم شدہ معیارات قائم کرنے کی بھارت کی کوششوں میں ایک اہم سنگِ میل ہے، جو زیادہ محفوظ، سائنسی طور پر تصدیق شدہ اور بین الاقوامی سطح پر مقبول آیورویدک مصنوعات، طریقوں اور تحقیق کی راہ ہموار کرتا ہے۔

یہ شراکت داری آیوروید اور آیوش کے دیگر نظاموں کے لیے مشترکہ طور پر معیارات تیار کرنے میں مدد کرے گی، لیبارٹری کے معیار اور مطابقت کے تعین کے نظام کو مضبوط بنائے گی، روایتی علم کی سائنسی توثیق کو فروغ دے گی، اور بین الاقوامی معیار سازی کی کوششوں میں بھارت کے تعاون کو بڑھائے گی۔

اس موقع پر ویدیہ راجیش کوٹیچا نے کہا، معیار ہی ساکھ کی بنیاد ہے، اور ساکھ ہی عالمی قبولیت کی کلید ہے۔ سی سی آر اے ایس اور بی آئی ایس کے درمیان یہ شراکت داری مضبوط اور سائنس پر مبنی معیارات تیار کرنے کی جانب ایک انقلابی قدم ہے، جو آیوروید پر عوام کے اعتماد کو مضبوط کرے گی، اختراع کو فروغ دے گی، اور دنیا بھر میں ثبوتوں پر مبنی روایتی ادویات کے شعبے میں بھارت کی قیادت کو مزید مستحکم کرے گی۔

پروفیسر (ویدیہ) ربی نارائن اچاریہ نے کہا، "سی سی آر اے ایس نے بین الاقوامی سطح پر تسلیم شدہ معیاری نظاموں کو اپنا کر اپنے تحقیقی نظام کو مسلسل مضبوط کیا ہے، جس کے تحت اس کے کئی ادارے اور لیبارٹریز پہلے ہی این اے بی ایل اور آئی ایس او کے معیارات کے تحت تصدیق شدہ ہیں۔ بی آئی ایس کے ساتھ یہ تعاون تحقیقی معیار، لیبارٹری کے طریقوں کی معیاربندی، اور سائنسی طور پر تصدیق شدہ معیارات کی تیاری کو مزید فروغ دے گا جس سے محققین، صنعت اور بالآخر عوام کو فائدہ پہنچے گا۔

اس شراکت داری کی اہمیت پر روشنی ڈالتے ہوئے بی آئی ایس کے ڈپٹی ڈائریکٹر جنرل (اسٹینڈرڈائزیشن- II) جناب سنجے پنت نے کہا، "یہ مفاہمتی عرضداشت بی آئی ایس کے لیے ایک تاریخی سنگِ میل ہے، کیونکہ یہ ہمارا 100واں معاہدہ ہے اور کسی آیوش ادارے کے ساتھ دستخط ہونے والا پہلا معاہدہ ہے۔ بی آئی ایس نے ملک بھر کے سو سے زیادہ معروف تعلیمی اور تحقیقی اداروں کے ساتھ کامیاب شراکت داریاں قائم کی ہیں۔ ہم اس نیٹ ورک میں سی سی آر اے ایس کو خوش آمدید کہتے ہوئے بے حد مسرور ہیں۔ سی سی آر اے ایس کے سائنسدانوں کی مہارت معیارات تیار کرنے کے عمل کو مزید بہتر بنائے گی، اور پروجیکٹ لیڈرز کے طور پر ان کا کردار آیوروید کے لیے مضبوط ہندوستانی معیارات کی تشکیل کو تیز کرے گا۔

بی آئی ایس کی آیوروید سیکشنل کمیٹی کے چیئرمین، ویدیا جینت دیوپوجاری نے کہا، "قومی اور بین الاقوامی دونوں سطحوں پر آیوروید میں اعتماد بڑھانے کے لیے سائنسی معیاربندی لازمی ہے۔ یہ شراکت داری آیوش کے شعبے میں معیار کی یقین دہانی کے لیے ایک مضبوط اور پائیدار فریم ورک تیار کرنے کی خاطر تحقیقی مہارت اور معیارات کی مہارت کو ایک ساتھ لاتی ہے۔"

معیارات کی تیاری میں ہونے والی پیش رفت کا ذکر کرتے ہوئے، بی آئی ایس کے آیوش ڈپارٹمنٹ کے ڈاکٹر راگھویندرا نائک نے بتایا کہ اس وقت آیوروید سیکشنل کمیٹی کے تحت 128 ہندوستانی معیارات موجود ہیں، جب کہ گزشتہ تین برسوں کے دوران مختلف آیوش شعبوں پر مشتمل 243 معیارات تیار کیے گئے ہیں۔ انہوں نے اس اعتماد کا اظہار کیا کہ "سی سی آر اے ایس کے ساتھ یہ تعاون ثبوتوں پر مبنی اور عالمی سطح پر موزوں معیارات کی تیاری کو نمایاں طور پر تیز کرے گا، جس سے آیوروید کے معیاری نظام کو مزید مضبوطی ملے گی۔

اس موقع پر بی آئی ایس کے آیوش ڈپارٹمنٹ کی ہیڈ اور سائنٹسٹ 'ای' محترمہ سرشٹی دکشت، سی سی آر اے ایس کے ڈی ڈی جی ڈاکٹر این سریکانت، اور بی آئی ایس کے آیوش ڈپارٹمنٹ کے ریسرچ آفیسر ڈاکٹر راگھویندرا نائک کے ساتھ دونوں اداروں کے اعلیٰ حکام بھی موجود تھے۔ سی سی آر اے ایس کے تمام 30 ذیلی اداروں اور مراکز کے سائنسدانوں اور افسران نے ورچوئل طریقے سے اس تاریخی تقریب کا مشاہدہ کیا۔

یہ مفاہمتی عرضداشت بھارت کے صفِ اول کے آیوروید تحقیقی ادارے اور ملک کے قومی معیاری ادارے کے درمیان ایک تزویراتی ملاپ کی نمائندگی کرتی ہے۔ سائنسی تحقیق کو بین الاقوامی سطح پر تسلیم شدہ معیاربندی کے طریقوں کے ساتھ جوڑ کر، امید ہے کہ یہ شراکت داری معیار کی یقین دہانی کو بہتر بنائے گی، لیبارٹری کی صلاحیتوں کو مضبوط کرے گی، ثبوتوں پر مبنی تحقیق کو فروغ دے گی، آیوش کی صنعت کو مدد فراہم کرے گی، اور آیوروید کے لیے عالمی سطح پر مقبول معیارات کی تیاری میں اپنا تعاون پیش کرے گی۔

**********

 

 

 (ش ح –ا ب ن)

U.No:1620

(ریلیز آئی ڈی: 2296269) وزیٹر کاؤنٹر : 39