مرکزی حکومت نے واضح کیا ہے کہ اقتصادی طور پر کمزور طبقات (ای ڈبلیو ایس) کے لیے تحفظات کی پالیسی کا مقصد ان مالی طور پر کمزور افراد کو تحفظات کے فوائد فراہم کرنا ہے جو درج فہرست ذاتوں(ایس سی)، درج فہرست قبائل (ایس ٹی) اور سماجی و تعلیمی طور پر پسماندہ طبقات (سی ای بی سی) کے لیے پہلے سے موجودہ تحفظاتی اسکیموں کے دائرہ کار میں نہیں آتے۔

سماجی انصاف اور تفویضِ اختیارات کے وزیرِ مملکت شری بی ایل ورما نے لوک سبھا میں شری وجے بگھیل کے ایک تحریری جواب میں یہ معلومات شیئر کیں۔ ایوان کو مطلع کیا گیا کہ آئین (ایک سو تین ویں ترمیم) ایکٹ، 2019 کے تحت آئین میں آرٹیکلز 15(6) اور 16(6) شامل کیے گئے، جس سے تعلیمی اداروں میں داخلوں اور سول آسامیوں اور خدمات میں تقرریوں کے لیے اقتصادی طور پر کمزور طبقات کے لیے 10 فیصد تک تحفظات کو ممکن بنایا گیا۔

تحریری جواب میں مزید بتایا گیا کہ ایسے افراد جن کے خاندان کی مجموعی سالانہ آمدنی 8.00 لاکھ روپے سے کم ہے، انہیں تحفظات کے مقصد کے لیے اقتصادی طور پر کمزور طبقات کے طور پر تسلیم کیا جاتا ہے، بشرطیکہ وہ پہلے سے موجودہ تحفظاتی اسکیموں کے دائرہ کار میں نہ آتے ہوں۔ تاہم، خاندانی آمدنی سے قطع نظر، ایسے افراد جن کے خاندان کے پاس پانچ ایکڑ یا اس سے زیادہ زرعی زمین ہو، 1,000 اسکوائر فٹ یا اس سے زیادہ کا رہائشی فلیٹ ہو، نوٹیفائیڈ بلدیاتی اداروں میں 100 اسکوائر یارڈ یا اس سے زیادہ کا رہائشی پلاٹ ہو، یا نوٹیفائیڈ بلدیاتی اداروں کے علاوہ دیگر علاقوں میں 200 اسکوائر یارڈ یا اس سے زیادہ کا رہائشی پلاٹ ہو، انہیں ای ڈبلیو ایس کے زمرے میں شامل ہونے سے باہر رکھا گیا ہے۔

چھتیس گڑھ میں ای ڈبلیو ایس تحفظات کی پالیسی کے نفاذ کے حوالے سے، ایوان کو مطلع کیا گیا کہ ریاستی حکومت سے موصولہ معلومات کے مطابق، 'چھتیس گڑھ پبلک سروسز (درج فہرست ذاتوں، درج فہرست قبائل اور دیگر پسماندہ طبقات کے لیے تحفظات) (ترمیمی) بل، 2022' جس میں اقتصادی طور پر کمزور طبقات کے لیے تحفظات کی شق شامل ہے، کو ابھی تک منظوری نہیں ملی ہے۔ نتیجے کے طور پر، ریاستی حکومت میں ای ڈبلیو ایس تحفظات کی پالیسی نافذ نہیں کی گئی ہے۔

اقتصادی طور پر کمزور طبقات کے لیے تحفظات سے متعلق موجودہ دفعات میں کسی قسم کی نظرثانی یا ترمیم کے حوالے سے پوچھے گئے سوال کا جواب دیتے ہوئے، ایوان کو مطلع کیا گیا کہ وزارت میں ایسی کوئی تجویز زیر غور نہیں ہے۔

**********

(ش ح –ا ب ن)

U.No:1445