సెంట్రల్ బ్యూరో ఆఫ్ నార్కోటిక్స్ (సీబీఎన్) మధ్యప్రదేశ్ విభాగం ఆధ్వర్యంలో నిర్వహించిన ‘ఆపరేషన్ వజ్ర’లో భాగంగా, బీహార్‌లోని గయా, మసౌరీ (పాట్నా)లో నకిలీ మందులను నిల్వ చేసిన 8 గోదాములను, ఒక అక్రమ తయారీ కేంద్రాన్ని అధికారులు గుర్తించారు. నిందితులు వీటిని మాదక ద్రవ్యాలు, ఇతర నకిలీ మందులను అక్రమంగా తయారు చేయడానికి, నిల్వ చేయడానికి ఉపయోగిస్తున్నారు.

2025లో నమోదైన నేరాల దర్యాప్తులో ఇది మరో కీలక పురోగతి. విస్తృతమైన తదుపరి దశ ఆపరేషన్ ఫలితంగా బీహార్‌లోని గయాలో నాలుగు అక్రమ గోదాములను అధికారులు గుర్తించారు. ఈ ఘటనలో 68,200 ట్రమడాల్ మాత్రలు, 59,000 ఇతర మాత్రలు, 52,542 కోడైన్ సిరప్ సీసాలనూ అధికారులు స్వాధీనం చేసుకున్నారు.

నిరంతర దర్యాప్తు, సాంకేతిక- ‘మానవ’ నిఘా సమాచారం ఆధారంగా, 2026 జూలై 22న ప్రధాన నిందితుడిని సీబీఎన్ విజయవంతంగా అరెస్టు చేసింది. ఈ అరెస్టు ద్వారా లభించిన కీలకమైన ఆధారాలతో, విస్తృతమైన తదుపరి దశ ఆపరేషన్‌కు మార్గం సుగమమైంది.

2026 జూలై 16 - 27 తేదీల మధ్య, నీమచ్‌లోని సీబీఎన్ ఎంపీ యూనిట్ నిరోధక విభాగం బీహార్ వ్యాప్తంగా విస్తృత నిఘా, క్షేత్రస్థాయి కార్యకలాపాలను నిర్వహించింది. పరారీలో ఉన్న నిందితుడు గయాలోని ఖంజాహన్‌పూర్ ప్రాంతంలో అక్రమంగా తయారు చేసిన మాదక ద్రవ్యాలు, ఇతర నకిలీ మందులను నిల్వ చేయడానికి అక్రమ గోదాములను తిరిగి ప్రారంభించినట్లు దర్యాప్తులో వెల్లడైంది. అతని కదలికలపై పలు రోజుల పాటు రహస్యంగా నిఘా ఉంచిన సీబీఎన్ బృందం, అతడిని విజయవంతంగా అదుపులోకి తీసుకుంది.

నిందితులు వెల్లడించిన సమాచారం ఆధారంగా, సీబీఎన్ బృందం రెండు రిజిస్టర్ కాని, అనధికారిక గోదాముల్లో సోదాలు నిర్వహించింది. ఈ సందర్భంగా అనధికారికంగా తయారు చేసిన 21,373 బ్యూప్రెనార్ఫిన్ ఇంజెక్షన్లను స్వాధీనం చేసుకుంది. క్లావమ్-625, పాన్-40, బెటాడిన్ ఆయింట్‌మెంట్, అజిత్రాల్, అనేక ఇతర ఔషధాల తయారీ సహా భారీ పరిమాణంలో నకిలీ, కల్తీ నాన్-ఎన్‌డిపిఎస్ మందులనూ ఈ సోదాల్లో భాగంగా స్వాధీనం చేసుకున్నారు.

స్థానిక పోలీసుల సహాయంతో నిర్వహించిన తదుపరి దశ దాడుల్లో, నగరంలోని వివిధ ప్రాంతాల్లో ఉన్న మరో ఆరు అనుమతి లేని, అనధికార గోదాములనూ గుర్తించారు. ఈ ప్రాంగణాల నుంచి గణనీయ పరిమాణంలో నకిలీ, అనధికారికంగా నిల్వ ఉంచిన నాన్-ఎన్‌డిపిఎస్ మందులను స్వాధీనం చేసుకున్నారు. స్వాధీనం చేసుకున్న సరుకును, సీల్ చేసిన గోదాములను తదుపరి చట్టపరమైన చర్యల కోసం బీహార్ రాష్ట్ర ఔషధ నియంత్రణ విభాగానికి అప్పగించారు.

సీబీఎన్ అందించిన సమాచారం ఆధారంగా, రాష్ట్ర ఔషధ విభాగం అక్రమ గోదాముల నుంచి కింద పేర్కొన్న పరిమాణంలో నాన్-ఎన్‌డిపిఎస్ నకిలీ మందులను స్వాధీనం చేసుకుంది:

 * మాత్రలు/క్యాప్సూల్స్ – 4,39,774

* ఇంజెక్షన్స్/వెయిల్స్/ఆంపుల్స్ – 1,895

* సిరప్స్/బాటిల్స్ – 3,811

* ఇతర ఔషధ తయారీలు (లోషన్స్/ట్యూబ్స్/డ్రాప్స్, మొదలైనవి.) – 3,490

ఇంతకుముందు అరెస్టయిన తన సహచరుల్లో ఒకరు పాట్నాలోని మసౌరీ సమీపంలో ఉన్న ఒక ఫామ్‌హౌస్‌లో అక్రమ తయారీ కేంద్రాన్ని ఏర్పాటు చేశారనీ... అక్కడ బ్యూప్రెనార్ఫిన్, ఇతర మాదక ద్రవ్యాల అక్రమ తయారీకి యంత్రాలు, పరికరాలను ఉపయోగిస్తున్నారనీ సుదీర్ఘ విచారణలో నిందితులు వెల్లడించారు. ఈ సమాచారంపై వెంటనే స్పందించిన సీబీఎన్ బృందం... స్థానిక పోలీసులు, రాష్ట్ర మాదక ద్రవ్యాల విభాగం, ఆహార విభాగాల అధికారుల సహాయంతో ఆ ప్రాంగణంలో సంయుక్తంగా సోదాలు నిర్వహించింది. ఈ సోదాల్లో వివిధ తయారీ యంత్రాలు, పరికరాలు, రసాయనాలు, కృత్రిమ రుచికారకాలనూ స్వాధీనం చేసుకున్నారు. మొత్తం అక్రమ తయారీ కేంద్రాన్ని ధ్వంసం చేసి, ఎన్‌డిపిఎస్ చట్టం- 1985 నిబంధనల ప్రకారం అన్ని యంత్రాలు, పరికరాలు, సంబంధిత సామగ్రిని స్వాధీనం చేసుకున్నారు.

ఈ సిండికేట్ అనుసరించిన మోసపూరిత పద్ధతినీ దర్యాప్తు బృందం వెల్లడించింది. నిందితులు అద్దె ఒప్పందాలు చేసుకోకుండానే తక్కువ అద్దెకు లభించే ఆవరణలను అద్దెకు తీసుకున్నారు. ఎలాంటి డిజిటల్ ఆధారాలు లేకుండా ఉండేందుకు అద్దె చెల్లింపులనూ నగదు రూపంలో చేశారు. చట్టాన్ని అమలు చేసే సంస్థల నుంచి తప్పించుకోవడానికి నకిలీ గుర్తింపు పత్రాల ద్వారా పొందిన మొబైల్ కనెక్షన్లను వారు ఉపయోగించారు.

ప్రస్తుత క్యాలెండర్ సంవత్సరంలో, సీబీఎన్ ఎంపీ యూనిట్ 3 అక్రమ ప్రయోగశాలలపై దాడులు సహా మొత్తం 90 కేసులు నమోదు చేసింది. ఇప్పటివరకు 121 మంది అనుమానితులనూ అరెస్టు చేసింది. వ్యవస్థీకృత మాదకద్రవ్యాల అక్రమ రవాణా సిండికేట్‌లను నిర్మూలించడం... మాదకద్రవ్యాలు-సైకోట్రోపిక్ పదార్థాల అక్రమ తయారీ, నిల్వ, రవాణాలో పాలుపంచుకున్న వారిపై చట్టాన్ని కఠినంగా అమలు చేయడం... దేశంలో మాదకద్రవ్యాల సురక్షిత వినియోగాన్ని నిర్ధారించడం పట్ల తమ అచంచల నిబద్ధతను సెంట్రల్ బ్యూరో ఆఫ్ నార్కోటిక్స్ (సీబీఎన్) పునరుద్ఘాటిస్తోంది.

 

***

(रिलीज़ आईडी: 2293244) आगंतुक पटल : 16