منظم اسمگلنگ نیٹ ورکس اور بین الاقوامی اسمگلنگ گروہوں کے خلاف اپنی مسلسل مہم کے تحت محکمہ محصولات کی انٹیلی جنس (ڈی آر آئی) نے گزشتہ ہفتے ملک بھر میں خفیہ اطلاعات کی بنیاد پر متعدد کارروائیاں انجام دیں، جن میں غیر ملکی سونا، ہیروئن، ایم ڈی ایم اے، ہائیڈروپونک گانجا، سرخ صندل، ممنوعہ جنگلی حیات سے متعلق اشیا، ای سگریٹ، غیر ملکی پوست کے بیج اور سپاری سمیت مختلف ممنوعہ اشیا ضبط کی گئیں۔ان کارروائیوں کے دوران اسمگلنگ اور غیر قانونی تجارت میں ملوث پانچ غیر ملکی شہریوں سمیت 20 افراد کو گرفتار کیا گیا۔ اس کے علاوہ منظم جرائم پیشہ گروہوں کی جانب سے ممنوعہ اشیا چھپانے کے لیے اختیار کیے گئے جدید اور پیچیدہ طریقوں کا بھی پردہ فاش ہوا۔

دہلی کے آئی جی آئی ہوائی اڈے پر 4 کلوگرام سونا ضبط

29 جولائی 2026 کو اندرا گاندھی بین الاقوامی ہوائی اڈے، نئی دہلی پر ایک اہم کارروائی کے دوران ڈی آر آئی کے اہلکاروں نے دبئی سے آنے والے دو غیر ملکی مسافروں کو روک کر تلاشی لی۔ مسافروں کی ٹرالیوں کی جانچ کے دوران ان میں اسٹیل شیٹ اور دو طرفہ چپکنے والی ٹیپ کی مدد سے نہایت مہارت سے تیار کیا گیا خفیہ خانہ برآمد ہوا، جس سے غیر ملکی ساخت کی 40 سونے کی سلاخیں برآمد ہوئیں، جن کا مجموعی وزن چار کلوگرام تھا۔ سونا ضبط کر لیا گیا اور دونوں مسافروں کو گرفتار کر لیا گیا۔

اسی ہفتے ڈی آر آئی اور بارڈر سکیورٹی فورس (بی ایس ایف) نے ہند-بنگلہ دیش سرحد پر مشترکہ کارروائیوں کے دوران تقریباً 3.2 کلوگرام غیر ملکی سونا ضبط کیا۔ یہ سونا ٹنگی میں سرحدی باڑ کے قریب ایک شخص، ہِلی بارڈر گیٹ پر ایک دوسرے شخص اور حکیم پور کے نزدیک ایک موٹر سائیکل سوار سے برآمد کیا گیا۔ ان کارروائیوں کے سلسلے میں ایک خاتون سمیت تین افراد کو گرفتار کیا گیا۔

اس کے علاوہ ڈی آر آئی نے وارانسی، دہلی ہوائی اڈے اور تمل ناڈو میں تین الگ الگ کارروائیوں کے دوران مزید تقریباً 2.2 کلوگرام سونا ضبط کیا اور چار افراد کو گرفتار کیا۔

ان تمام کارروائیوں میں مجموعی طور پر تقریباً 9.5 کلوگرام سونا، جس کی مالیت تقریباً 14 کروڑ روپے بتائی گئی ہے، ضبط کیا گیا اور نو افراد کو گرفتار کیا گیا۔

ممنوعہ جنگلی حیات سے متعلق اشیا

ایک اہم کارروائی میں ڈی آر آئی نے تقریباً 14 میٹرک ٹن پاکستانی نژاد گگّل رال  درآمد کرنے کی کوشش ناکام بنا دی، جس کی مالیت تقریباً 1.4 کروڑ روپے ہے۔ اس کھیپ کو جعلی طور پر صومالیہ کی قدرتی رال قرار دے کر دبئی کے راستے ہندوستان بھیجا جا رہا تھا۔

گگّل رال  (کومیفورا ریزن) بھارت اور پاکستان کے خشک علاقوں میں پائی جانے والی ایک نایاب نسل ہے، جو سائٹس   کے ضمیمہ دوم میں شامل ہے اور آئی یو سی این کی سرخ فہرست میں نہایت خطرے سے دوچار انواع میں شمار ہوتی ہے۔ تحقیقات سے ثابت ہوا کہ یہ کھیپ پاکستانی نژاد تھی اور جعلی دستاویزات کے ذریعے اسے دوسرے ملک سے بھیجا گیا تھا، جو پاکستان سے براہ راست یا بالواسطہ درآمد پر پابندی سے متعلق ڈی جی ایف ٹی کے ضوابط کی خلاف ورزی ہے۔ اس سازش میں ملوث دو افراد کو گرفتار کر لیا گیا۔

ایک اور بڑی کارروائی میں ڈی آر آئی نے چنئی کے مضافات میں ایک ٹرک روک کر اس میں خالی پلاسٹک کے کریٹوں کے پیچھے چھپائے گئے سرخ صندل کی 142 لکڑیاں برآمد کیں، جن کا مجموعی وزن تقریباً 4.8 میٹرک ٹن تھا۔ سرخ صندل ایک محفوظ نسل ہے، جو سائٹس کے ضمیمہ دوم اور جنگلی حیات (تحفظ) قانون 1972 کے تحت محفوظ قرار دی گئی ہے۔ ضبط شدہ کھیپ کی مالیت تقریباً 2.5 کروڑ روپے بتائی گئی ہے۔ تحقیقات میں منظم اسمگلنگ نیٹ ورک کے ملوث ہونے کا انکشاف ہوا اور تین افراد کو گرفتار کیا گیا۔

منشیات

منی پور میں میانمار سے سرحد پار منشیات کی اسمگلنگ سے متعلق خفیہ اطلاع پر ڈی آر آئی نے آسام رائفلز اور منی پور پولیس کے تعاون سے چوراچاند پور کے قریب ایک گاڑی کو روک کر اس میں صابن کی 220 ڈبیوں میں چھپائی گئی تقریباً 2.7 کلوگرام ہیروئن برآمد کی۔ اس معاملے میں دو افراد کو گرفتار کیا گیا۔

اسی طرح ممبئی میں دو الگ الگ کارروائیوں کے دوران ڈی آر آئی نے دہلی سے آنے والی دو غیر ملکی خواتین مسافروں کے سامان میں خصوصی طور پر تیار کردہ خفیہ خانوں سے مصنوعی منشیات برآمد کیں۔ ان کارروائیوں میں مجموعی طور پر تقریباً دو کلوگرام ایمفیٹامین کرسٹل اور ایم ڈی ایم اے گولیاں ضبط کی گئیں۔ دونوں خواتین کو این ڈی پی ایس ایکٹ، 1985 کے تحت گرفتار کر لیا گیا۔

ایم ڈی ایم اے گولیاں اور ایمفیٹامین کرسٹل ضبط

دو الگ الگ کارروائیوں میں اندرا گاندھی بین الاقوامی ہوائی اڈہ، نئی دہلی اور کالیکٹ بین الاقوامی ہوائی اڈے پر ڈی آر آئی کے اہلکاروں نے ایک غیر ملکی شہری سمیت دو مسافروں کو روک کر ان کے قبضے سے تقریباً 25 کلوگرام ہائیڈروپونک گانجا برآمد کیا۔

دونوں مسافر بینکاک سے آئے تھے۔ ضبط شدہ منشیات کو قبضے میں لے لیا گیا اور دونوں ملزمان کو گرفتار کر لیا گیا۔

ہائیڈروپونک گانجا

تمباکو کی مصنوعات

ممنوعہ اشیا کی غیر قانونی درآمد پر روک لگانے کے لیے ایک اور کارروائی میں ڈی آر آئی کے اہلکاروں نے نہاوا شیوا بندرگاہ پر ایک درآمدی کھیپ کو روک لیا، جسے جعلی طور پر ایل ای ڈی لائٹس اور لائٹنگ فکسچرز قرار دیا گیا تھا۔تلاشی کے دوران مختلف برانڈز اور ذائقوں والی 9,230 ممنوعہ ای سگریٹ برآمد کی گئیں۔ ہندوستان میں الیکٹرانک سگریٹ (ممانعت) قانون، 2019 کے تحت ای سگریٹ کی درآمد، فروخت اور استعمال ممنوع ہے۔

ڈی آر آئی نے ممنوعہ ای سگریٹ اور ان کی آڑ میں لائی گئی دیگر اشیا سمیت تقریباً 3.70 کروڑ روپے مالیت کی پوری کھیپ ضبط کر لی۔

ممبئی میں ممنوعہ ای سگریٹ ضبط

محدود پابندی والی اشیا

میزورم میں ڈی آر آئی کے اہلکاروں نے آسام رائفلز کی مدد سے ہند-میانماں سرحد کے قریب چار مشتبہ گوداموں کی تلاشی لی، جہاں سے تقریباً 14.5 میٹرک ٹن غیر ملکی پوست کے بیج اور 14 میٹرک ٹن غیر ملکی سپاری برآمد کی گئی، جن کی مجموعی مالیت تقریباً 3.6 کروڑ روپے بتائی گئی ہے۔

ابتدائی تحقیقات سے معلوم ہوا ہے کہ یہ اشیا ہند-میانماں سرحد کے زوکھاوتھر سیکٹر کے راستے غیر قانونی طور پر ہندوستان لائی گئی تھیں۔ ضبط شدہ سامان کو کسٹمز ایکٹ، 1962 کے تحت قبضے میں لے لیا گیا۔

غیر ملکی تجارتی پالیسی کے تحت پوست کے بیج کو "محدود درآمدی شے" قرار دیا گیا ہے اور اس کی درآمد صرف مخصوص شرائط کے تحت ہی کی جا سکتی ہے۔ ان شرائط میں نامزد ممالک میں قانونی طور پر کاشت کی گئی پیداوار کی درآمد اور تمام درآمدی معاہدوں کا گوالیار میں نارکوٹکس کمشنر کے پاس لازمی اندراج شامل ہے۔

************

ش ح ۔   م  د ۔  م  ص

(U : 1114 )