بہار میں ریلوے کی گنجائش میں نمایاں اضافے کے لیے بھارتی ریلوے نے مشرقی وسطی ریلوے کے تحت داناپور سے فتحوہ تک 29 کلومیٹر طویل ریلوے سیکشن پر ملٹی ٹریکنگ منصوبے کی 976 کروڑ روپے کی لاگت سے منظوری دے دی ہے۔ یہ منصوبہ پٹنہ ریلوے راہداری کے مصروف ترین حصوں میں سے ایک پر بھیڑ بھاڑ کو کم کرے گا اور مسافر و مال بردار دونوں قسم کی ریل خدمات میں نمایاں اضافے کی گنجائش پیدا کرے گا۔

منظور شدہ منصوبہ 3 حصوں پر مشتمل ہے۔ داناپور اور پٹنہ کے درمیان تیسری اور چوتھی ریلوے لائنیں بچھائی جائیں گی۔ راجیندر نگر اور پٹنہ صاحب کے درمیان تیسری لائن تعمیر کی جائے گی۔ پٹنہ صاحب اور فتحوہ کے درمیان تیسری اور چوتھی ریلوے لائنیں بچھائی جائیں گی۔ ان اضافی لائنوں کی بدولت بھیڑ بھاڑ میں کمی آئے گی، تاخیر کم ہوگی اور پٹنہ خطے میں ٹرینوں کی وقت کی پابندی میں بہتری آئے گی۔

منصوبے کے عملی نفاذ کے پہلے ہی سال میں روزانہ 22 اضافی مسافر ٹرینیں اور 18 اضافی مال بردار ٹرینیں چلائی جا سکیں گی۔ اس کے علاوہ سالانہ 52 لاکھ ٹن اضافی مال برداری کو سنبھالنے کی صلاحیت بھی حاصل ہو جائے گی۔

یہ منصوبہ دہلی، دین دیال اُپادھیائے جنکشن، پٹنہ، کیول، بھاگلپور، کھنہ اور ہاوڑہ کے درمیان ریلوے لائنوں کو 4 لائنوں تک توسیع دینے کے منصوبے کا حصہ ہے۔ اس راستے کو بھارتی ریلوے کی توانائی، معدنیات اور سیمنٹ راہداری کے تحت اہم راہداری قرار دیا گیا ہے۔ یہ مضبوط کیا جانے والا ریلوے سیکشن بکسر ضلع کے چوسہ میں قائم کی جانے والی 2120 میگاواٹ کی مجوزہ حرارتی بجلی گھر کے لیے بھی نہایت اہم ہے، کیونکہ یہ منصوبہ بڑی مقدار میں خام مال اور دیگر ضروری اشیا کی ریلوے کے ذریعے نقل و حمل پر انحصار کرے گا۔

یہ منظوری اس بات کا اعادہ کرتی ہے کہ بھارتی ریلوے زیادہ ٹریفک والے ریلوے راستوں پر گنجائش بڑھانے، توانائی اور صنعتی شعبوں کے لیے نقل و حمل کے نظام کو مضبوط بنانے اور بہار کی سماجی و معاشی ترقی کو فروغ دینے کے لیے پُرعزم ہے۔

******

ش ح۔ ش ا ر۔ ول

Uno- 1094