નાણા મંત્રાલયના નાણાકીય સેવાઓ વિભાગ (DFS) દ્વારા આજે નવી દિલ્હી ખાતે DFS સચિવના અધ્યક્ષસ્થાને ધ ન્યૂ ઇન્ડિયા એશ્યોરન્સ કંપની લિમિટેડ દ્વારા ડિઝાઇન કરવામાં આવેલી ભારતની પ્રથમ સાર્વભૌમ-સમર્થિત (sovereign-backed) ભારત મેરિટાઇમ ઇન્શ્યોરન્સ પૂલ (BMIP) હેઠળની પ્રોટેક્શન એન્ડ ઇન્ડેમ્નિટી (P&I) ઇન્શ્યોરન્સ પ્રોડક્ટ લૉન્ચ કરવા માટે એક કાર્યક્રમ યોજાયો હતો.

આ કાર્યક્રમમાં ડાયરેક્ટર જનરલ ઓફ શિપિંગ શ્રી શ્યામ જગન્નાથન, નાણાકીય સેવાઓ વિભાગના વરિષ્ઠ અધિકારીઓ જેમાં અતિરિક્ત સચિવ શ્રી દેબાશિષ પ્રુસ્ટી, તેમજ સીએમડી - જનરલ ઇન્શ્યોરન્સ કોર્પોરેશન ઓફ ઇન્ડિયા શ્રી હિતેશ જોશી, સીએમડી - ન્યૂ ઇન્ડિયા એશ્યોરન્સ કંપની લિમિટેડ શ્રીમતી ગિરિજા સુબ્રમણિયન, સીએમડી - શિપિંગ કોર્પોરેશન ઓફ ઇન્ડિયા લિમિટેડ કેપ્ટન બીનેશ કુમાર ત્યાગી, સેક્રેટરી જનરલ - જનરલ ઇન્શ્યોરન્સ કાઉન્સિલ શ્રીમતી કસ્તૂરી સેનગુપ્તા, ICCSA અને INSA ના વરિષ્ઠ અધિકારીઓ તેમજ બંદરો, શિપિંગ અને જળમાર્ગ મંત્રાલયના સંયુક્ત સચિવ શ્રી શ. વેંકટેસાપથી એસ. હાજર રહ્યા હતા.

આ પ્રસંગે બોલતા, સચિવ, DFS એ ભારતના દરિયાઈ (મેરિટાઇમ) ક્ષેત્ર માટે આ ઐતિહાસિક માઈલસ્ટોન હાસલ કરવા બદલ પ્રોટેક્શન એન્ડ ઇન્ડેમ્નિટી (P&I) ઇન્શ્યોરન્સ પ્રોડક્ટ તૈયાર કરવાની પ્રક્રિયામાં સામેલ તમામ હિતધારકોને અભિનંદન પાઠવ્યા હતા. સચિવ, DFS એ શિપિંગ કોર્પોરેશન ઓફ ઇન્ડિયા લિમિટેડને BMIP હેઠળ ધ ન્યૂ ઇન્ડિયા એશ્યોરન્સ કંપની લિમિટેડ દ્વારા જારી કરાયેલ પ્રથમ P&I પોલિસી દસ્તાવેજ સોંપ્યો હતો, જે પૂલની સંયુક્ત ક્ષમતા દ્વારા 1.5 બિલિયન યુએસ ડોલર સુધીની ક્ષતિપૂર્તિ મર્યાદા (indemnity limit) સાથે ક્રૂ અને કાર્ગો જવાબદારી, પ્રદૂષણ જવાબદારી, જહાજના ભંગારને હટાવવા (wreck removal), 24x7 પોર્ટ કોરસ્પોન્ડન્ટ નેટવર્ક સહિતની તૃતીય-પક્ષ જવાબદારીઓ સામે નાણાકીય સુરક્ષા પૂરી પાડે છે.

12 મે, 2026 ના રોજ સાર્વભૌમ ગેરંટી દ્વારા સમર્થિત BMIP ની નાણાકીય સેવાઓ વિભાગ (DFS) દ્વારા શરૂઆત થયા પછી, આ પૂલે નોંધપાત્ર બજાર સ્વીકૃતિ દર્શાવી છે અને ભારતીય હિતધારકોને અવિરત વૉર રિસ્ક ઇન્શ્યોરન્સ ક્ષમતા પૂરી પાડવાના તેના પ્રાથમિક ઉદ્દેશ્યને સફળતાપૂર્વક પૂર્ણ કર્યો છે. BMIP ની શરૂઆત સાથે, જો પશ્ચિમ એશિયા સંઘર્ષના ચરમસીમાના તબક્કે જોવા મળેલા સ્તરો સાથે સરખામણી કરવામાં આવે તો, વૉર રિસ્ક પ્રીમિયમ દરોમાં આશરે 35-40% નો ઘટાડો થયો છે. 29 જુલાઈ 2026 સુધીમાં, પૂલ હેઠળ કાર્ગો વૉર રિસ્ક અને હલ વૉર રિસ્કને આવરી લેતી કુલ 1608 પોલિસીઓ જારી કરવામાં આવી છે.

જ્યારે BMIP પદ્ધતિ મેરિટાઇમ વૉર રિસ્ક ઇન્શ્યોરન્સ કવરેજની નિરંતરતા સુનિશ્ચિત કરે છે, દેશી અંડરરાઇટિંગ ક્ષમતાના વિકાસને પ્રોત્સાહન આપે છે, અને ભારતના શિપિંગ અને વેપાર ક્ષેત્રના હિતધારકોમાં આત્મવિશ્વાસ વધારે છે, ત્યારે પ્રોટેક્શન એન્ડ ઇન્ડેમ્નિટી (P&I) કવરેજનો સમાવેશ કરવા માટે પૂલનો વિસ્તાર કરવાથી ભારતનું મેરિટાઇમ રિસ્ક મેનેજમેન્ટ માળખું વધુ મજબૂત બનશે અને તેના મેરિટાઇમ ઇન્શ્યોરન્સ ઇકોસિસ્ટમની સ્થિતિસ્થાપકતામાં સુધારો થશે.

આ પહેલ સ્થિતિસ્થાપક, દેશી વીમા ક્ષમતાઓ અને સમર્થનના નિર્માણ પ્રત્યે દેશની પ્રતિબદ્ધતા તરફનું બીજું એક પગલું છે, જે વિશિષ્ટ વીમા ઉકેલોમાં સ્વનિર્ભરતાને પ્રોત્સાહન આપીને, વિદેશી બજારો પરની નિર્ભરતા ઘટાડીને અને ભારતના દરિયાઈ વેપારમાંથી ઉત્પન્ન થતું મૂલ્ય સ્થાનિક અર્થતંત્રમાં જ રહે તે સુનિશ્ચિત કરીને આત્મનિર્ભર ભારતના વ્યાપક રાષ્ટ્રીય દ્રષ્ટિકોણને ટેકો આપે છે.

SM/JD

(रिलीज़ आईडी: 2292071) आगंतुक पटल : 9