منشیات کے استعمال کے خلاف قومی اجتماعی عہد 18 اگست 2026 کو نشا مُکت بھارت ابھیان (NMBA) کی چھٹی سالگرہ کے موقع پر منعقد کیا جائے گا۔ سماجی انصاف اور بااختیاری کی مرکزی وزارت اس مہم کی نگران وزارت ہے، جس کا مقصد عملی اور آن لائن شرکت کے ذریعے 10 سے 12 کروڑ سے زائد شہریوں کو اس عہد میں شامل کرنا ہے۔

اس سلسلے میں آج قومی دارالحکومت میں وزارت کے جوائنٹ سیکریٹری (منشیات کی روک تھام) ڈاکٹر سندیپ ریواجی راتھوڈ کی صدارت میں اعلیٰ سطحی رابطہ اجلاس منعقد ہوا۔ اجلاس میں نشا مُکت بھارت ابھیان کے مقاصد کے مطابق ملک گیر عہد میں مقررہ تعداد میں شہریوں کی عملی اور آن لائن شرکت کو یقینی بنانے کے لیے منصوبہ بندی اور جامع حکمتِ عملی پر تبادلۂ خیال کیا گیا۔

اجلاس میں مختلف وزارتوں اور محکموں کے اعلیٰ حکام کے نمائندوں نے شرکت کی۔ اجلاس کے دوران مہم کے نفاذ کے لیے جاری حکمتِ عملی اور اس پر ہونے والے کام کا جائزہ لیا گیا۔ ملک گیر عہد میں افسران، ملازمین، طلبہ، والدین، رضاکاروں اور دیگر متعلقہ فریقوں کو شامل کرنے کے لیے متعلقہ وزارتوں اور محکموں کے کردار پر بھی تبادلۂ خیال کیا گیا۔

اجلاس میں اس بات پر بھی غور کیا گیا کہ مختلف وزارتوں اور محکموں کے ماتحت تمام متعلقہ دفاتر، تعلیمی اداروں، خود مختار اداروں، سرکاری شعبے کے اداروں (PSUs) اور فیلڈ سطح کے مراکز میں عہد کی تقریبات منعقد کی جائیں۔ اس میں ریلوے، دفاع، پولیس، مرکزی مسلح پولیس دستے (CAPF)، قومی کیڈٹ کور (NCC)، آیوش، دیہی ترقی، محکمۂ محصولات کے علاوہ سماجی، رضاکارانہ، روحانی تنظیموں اور سماجی اثر و رسوخ رکھنے والی شخصیات کو بھی شامل کیا جائے گا۔

اجلاس میں شرکت کی تفصیلات اور عوام تک رسائی سے متعلق معلومات جمع کرانے کے لیے یکساں رپورٹنگ نظام پر بھی تبادلۂ خیال کیا گیا۔ منصوبے اور مربوط حکمتِ عملی سے متعلق ایک پاور پوائنٹ پریزنٹیشن پیش کی گئی، جس پر تفصیل سے غور و خوض کیا گیا۔ اس دوران متعلقہ محکموں اور وزارتوں کے تمام نمائندوں نے فعال طور پر مباحثے میں حصہ لیا اور اپنی تجاویز پیش کیں۔

این ایم بی اے (NMBA) عہد ایک ایسی رضاکارانہ پہل ہے جس کا مقصد منشیات کے استعمال سے متاثرہ افراد تک رسائی حاصل کرنے اور ان کی مدد کے لیے آگے بڑھنا ہے۔ یہ عہد لوگوں میں ذمہ داری کا احساس پیدا کرنے، انہیں منشیات سے دور رہنے کے لیے بااختیار بنانے اور ذمہ دارانہ طرزِ عمل کو فروغ دینے کا مقصد رکھتا ہے۔ اس عہد کے ذریعے اتحاد اور عزم کے جذبے کو مضبوط بنانے کی کوشش کی جاتی ہے، تاکہ تمام متعلقہ فریق مشترکہ مقصد کے حصول کے لیے مل کر کام کرنے کی ترغیب حاصل کریں۔ مزید برآں، یہ عہد نوجوانوں کو ایک منشیات سے پاک معاشرے کی تشکیل میں فعال کردار ادا کرنے کے لیے بااختیار بنانے کا بھی ذریعہ ہے۔

این ایم بی اے ای-عہد کا لنک یہ ہے: https://nmba.dosje.gov.in/pledge-certificate?type=e-pledge

اجلاس میں اس اہم پیغام کو بھی اجاگر کیا گیا کہ ہیلپ لائن نمبر 14446 کے ذریعے منشیات سے نجات (ڈی ایڈکشن) کے عمل کو فروغ دینے اور اس کی حوصلہ افزائی پر توجہ دی جائے۔ اجلاس میں شہریوں کے اندر بڑھتے ہوئے اس جذبے پر بھی غور کیا گیا کہ وہ رضاکار کے طور پر اپنا کردار ادا کریں اور محکمہ کی سرکاری ویب سائٹ کے ذریعے "نشا مکتی متر" کے طور پر اپنا اندراج کروائیں۔

https://nmba.dosje.gov.in/volunteer/registration

سماجی انصاف اور بااختیاری کی مرکزی وزارت نے ملک میں منشیات کی طلب کو کم کرنے کے مقصد سے 15 اگست 2020 کو نشا مُکت بھارت ابھیان (NMBA) کا آغاز کیا تھا۔ منشیات کے مسئلے سے نمٹنے کے لیے اجتماعی اقدامات کی فوری ضرورت کو محسوس کرتے ہوئے، وزارت مختلف اقدامات میں رابطہ کاری کا کردار ادا کرتی ہے، جن میں روک تھام، جائزہ، علاج، بحالی، بعد از علاج نگہداشت، عوامی معلومات کی فراہمی اور کمیونٹی سطح پر آگاہی پیدا کرنا شامل ہیں۔

وزارت منشیات کی طلب میں کمی کے لیے قومی عملی منصوبہ (NAPDDR) کے تحت ایک جامع اور شواہد پر مبنی حکمتِ عملی نافذ کر رہی ہے۔ یہ حکمتِ عملی بھارت میں نشہ آور اشیا کے استعمال کی وسعت اور طریقۂ کار سے متعلق کیے گئے پہلے قومی سروے کے نتائج پر مبنی ہے، جو نئی دہلی کے آل انڈیا انسٹی ٹیوٹ آف میڈیکل سائنسز (AIIMS) کے نیشنل ڈرگ ڈیپینڈنس ٹریٹمنٹ سینٹر (NDDTC) کی جانب سے انجام دیا گیا تھا۔

این اے پی ڈی ڈی آر (NAPDDR) کے تحت وزارت ریاستی حکومتوں، مرکز کے زیرِ انتظام علاقوں، غیر سرکاری تنظیموں (NGOs) اور سرکاری اسپتالوں کو مالی معاونت فراہم کرتی ہے تاکہ منشیات کے استعمال کی روک تھام سے متعلق تعلیم، آگاہی پیدا کرنے، مشاورت، علاج اور بحالی کے اقدامات انجام دیے جا سکیں۔

اب تک یہ مہم ملک گیر آگاہی سرگرمیوں کے ذریعے 29.68 کروڑ سے زائد شہریوں تک پہنچ چکی ہے، جن میں 11.43 کروڑ سے زیادہ نوجوان اور 8.05 کروڑ سے زائد خواتین شامل ہیں۔ کمیونٹی کی شمولیت کو مزید مضبوط بنانے کے لیے 1.25 لاکھ سے زیادہ "نشا مکتی متر" (NMM) بھی اس مہم کا حصہ بن چکے ہیں۔

علاج کی سہولیات تک رسائی کو آسان بنانے کے لیے وزارت نے این ایم بی اے 2.0 موبائل ایپلی کیشن شروع کی ہے، جس کے ذریعے شہری اپنے قریب ترین منشیات سے نجات کے مرکز کا پتا معلوم کر سکتے ہیں۔

حکومت ایک منشیات سے پاک اور سماجی طور پر ہمہ گیر بھارت کے عزم کو مسلسل مضبوط بنا رہی ہے۔ اس مقصد کے لیے بحالی کے بنیادی ڈھانچے کو وسعت دی جا رہی ہے، روک تھام سے متعلق اقدامات کو مزید مؤثر بنایا جا رہا ہے، عمل درآمد کے طریقۂ کار کو آسان کیا جا رہا ہے اور مرکزی معاونت یافتہ اسکیموں کی مؤثر فراہمی کو یقینی بنایا جا رہا ہے۔مسلسل عوامی شمولیت، بہتر حکمرانی اور ٹیکنالوجی پر مبنی خدمات کی فراہمی کے ذریعے وزارت کمزور اور متاثرہ طبقات کے تحفظ اور سب کے لیے سماجی انصاف کے فروغ کے عزم پر قائم ہے۔

 

*********

 ش ح۔م م ع۔ش ت

Urdu No-725

(रिलीज़ आईडी: 2290303) आगंतुक पटल : 3