প্ৰধানমন্ত্ৰীৰ কাৰ্যালয়
২৬ জুলাইত ‘বিকশিত ভাইব্ৰেণ্ট ভিলেজ প্ৰগ্ৰেম ২০২৬’ৰ অংশগ্ৰহণকাৰীসকলৰ সৈতে মত বিনিময় কৰিব প্ৰধানমন্ত্ৰীয়ে
এক সমগ্ৰ দেশজুৰি অনুষ্ঠিত অনলাইন কুইজ প্ৰতিযোগিতাৰ জৰিয়তে প্ৰতিখন ৰাজ্য আৰু কেন্দ্ৰীয়শাসিত অঞ্চলক প্ৰতিনিধিত্ব কৰা ৪০০ৰো অধিক যুৱ-অংশগ্ৰহণকাৰীক ‘বিকশিত ভাইব্ৰেণ্ট ভিলেজ প্ৰগ্ৰেম ২০২৬’ৰ বাবে নিৰ্বাচিত কৰা হৈছিল
লাডাখ, হিমাচল প্ৰদেশ আৰু উত্তৰাখণ্ডৰ ৭৪খন ভাইব্ৰেণ্ট সীমান্তৱৰ্তী গাঁৱৰ সৈতে যুৱপ্ৰজন্মক সংযোগ কৰি ৪ জুনৰ পৰা ৩০ জুনলৈকে ‘বিকশিত ভাইব্ৰেণ্ট ভিলেজ প্ৰগ্ৰেম ২০২৬’ অনুষ্ঠিত কৰা হৈছিল
এই কাৰ্যসূচীয়ে অংশগ্ৰহণকাৰীসকলক ভাৰতৰ সীমান্তৱৰ্তী অঞ্চলসমূহৰ আৰ্থ-সামাজিক পৰিৱেশ, সাংস্কৃতিক ঐতিহ্য আৰু উন্নয়নমূলক আকাংক্ষাসমূহ প্ৰত্যক্ষভাৱে অনুভৱ কৰাৰ সুযোগ প্ৰদান কৰে
प्रविष्टि तिथि:
25 JUL 2026 11:10AM by PIB Guwahati
প্ৰধানমন্ত্ৰী শ্ৰী নৰেন্দ্ৰ মোদীয়ে ২৬ জুলাই, ২০২৬ৰ বিয়লি ৪:৩০ বজাত ভিডিঅ’ কনফাৰেন্সিংযোগে ‘বিকশিত ভাইব্ৰেণ্ট ভিলেজ প্ৰগ্ৰেম ২০২৬’ৰ অংশগ্ৰহণকাৰীসকলৰ সৈতে মত-বিনিময় কৰিব।
ভাৰতৰ সীমান্তৱৰ্তী গাঁওসমূহক দেশৰ 'প্ৰথম গাঁও' হিচাপে গণ্য কৰা আৰু 'বিকশিত ভাৰত'ৰ যাত্ৰাত সেইবোৰক সক্ৰিয় অংশীদাৰ কৰি তোলাৰ প্ৰধানমন্ত্ৰীৰ দৃষ্টিভংগীক বাস্তৱায়িত কৰাৰ উদ্দেশ্যে 'মাই ভাৰত'ৰ জৰিয়তে এই 'বিকশিত ভাইব্ৰেণ্ট ভিলেজ প্ৰগ্ৰেম' গ্ৰহণ কৰা হৈছে।
'বিকশিত ভাইব্ৰেণ্ট ভিলেজ প্ৰগ্ৰেম ২০২৬' ৪ জুনৰ পৰা ৩০ জুন, ২০২৬লৈকে দুটা পৰ্যায়ত অনুষ্ঠিত কৰা হৈছিল, য’ত লাডাখ, হিমাচল প্ৰদেশ আৰু উত্তৰাখণ্ডৰ ৭৪খন ভাইব্ৰেণ্ট গাঁও সামৰি লোৱা হৈছিল। তিনি লাখৰো অধিক যুৱকে অংশগ্ৰহণ কৰা এক সমগ্ৰ দেশজুৰি অনুষ্ঠিত অনলাইন কুইজ প্ৰতিযোগিতাৰ জৰিয়তে প্ৰতিখন ৰাজ্য আৰু কেন্দ্ৰীয়শাসিত অঞ্চলক প্ৰতিনিধিত্ব কৰা ৪০০ৰো অধিক যুৱ-অংশগ্ৰহণকাৰীক নিৰ্বাচিত কৰা হৈছিল।
এই কাৰ্যসূচীৰ অংশ হিচাপে অংশগ্ৰহণকাৰীসকলে স্থানীয় সম্প্ৰদায়ৰ সৈতে একেলগে বাস কৰিছিল আৰু স্বচ্ছতা অভিযান, চৰকাৰী আঁচনিৰ বিষয়ে সচেতনতা সমদল, যুৱ সন্মিলন, সাংস্কৃতিক বিনিময় কাৰ্যসূচী, বৃক্ষৰোপণ অভিযান, মিনি মডেল পঞ্চায়ত অনুশীলন, স্থানীয় শিল্পীসকলৰ সৈতে মত-বিনিময় আৰু কৌশলগতভাৱে গুৰুত্বপূৰ্ণ প্ৰতিষ্ঠান পৰিদৰ্শনৰ দৰে কাৰ্যসূচীত অংশগ্ৰহণ কৰিছিল। এই কাৰ্যসূচীয়ে অংশগ্ৰহণকাৰীসকলক ৰাইজৰ অংশগ্ৰহণ, ৰাষ্ট্ৰীয় একতা আৰু সীমান্তৱৰ্তী গাঁৱৰ কৌশলগত গুৰুত্বৰ বিষয়ে গভীৰ উপলব্ধি প্ৰদান কৰাৰ লগতে ভাৰতৰ সীমান্ত অঞ্চলৰ আৰ্থ-সামাজিক পৰিৱেশ, সাংস্কৃতিক ঐতিহ্য আৰু উন্নয়নমূলক আকাংক্ষাসমূহ প্ৰত্যক্ষভাৱে অনুভৱ কৰাৰ সুযোগ প্ৰদান কৰে।
***
MJPS/SS/ST/DB
(रिलीज़ आईडी: 2289333)
आगंतुक पटल : 14