ભારત અને ઈઝરાયેલ વચ્ચે પ્રસ્તાવિત ભારત-ઈઝરાયેલ મુક્ત વેપાર કરાર (FTA) માટે વાટાઘાટોનો બીજો રાઉન્ડ 20 થી 23 જુલાઈ 2026 દરમિયાન નવી દિલ્હીના વાણિજ્ય ભવન ખાતે યોજાયો હતો અને તે સફળતાપૂર્વક પૂર્ણ થયો હતો. ચાર દિવસીય વાટાઘાટો દરમિયાન, બંને પક્ષોએ પ્રસ્તાવિત કરારના તમામ ક્ષેત્રોમાં વિગતવાર ચર્ચા કરી હતી અને સંતુલિત, વ્યાપક અને પરસ્પર લાભદાયી FTA તરફ પ્રગતિ કરવાનું ચાલુ રાખ્યું હતું.

નવેમ્બર 2025માં હસ્તાક્ષર કરવામાં આવેલા ટર્મ્સ ઓફ રેફરન્સ (ToR), બંને દેશો વચ્ચે દ્વિપક્ષીય વેપાર, આર્થિક સહયોગ અને સમગ્ર આર્થિક ભાગીદારીને મજબૂત કરવા માટે નિર્ધારિત ક્ષેત્રો પર વાટાઘાટો માટે સંરચિત માળખું પૂરું પાડવાનું ચાલુ રાખે છે.

નાણાકીય વર્ષ 2025-26માં ભારત અને ઈઝરાયેલ વચ્ચેનો કુલ માલસામાન વેપાર 3.93 અબજ યુએસ ડોલર હતો. બંને દેશો અનેક ક્ષેત્રોમાં મજબૂત પૂરકતાઓ ધરાવે છે, અને પ્રસ્તાવિત FTA દ્વિપક્ષીય વેપાર, રોકાણ અને આર્થિક સંકલનને વધુ વધારવા માટે નોંધપાત્ર તકો રજૂ કરે છે.

આ રાઉન્ડ દરમિયાન, બંને પક્ષોના ટેકનિકલ નિષ્ણાતોએ પ્રસ્તાવિત કરાર હેઠળ માલસામાનનો વેપાર, સેવાઓનો વેપાર, રૂલ્સ ઓફ ઓરિજિન, સેનિટરી એન્ડ ફાઇટોસેનિટરી ઉપાયો, વેપારમાં તકનીકી અવરોધો, બૌદ્ધિક સંપદા અધિકારો (IPR), કસ્ટમ્સ પ્રક્રિયાઓ અને વેપાર સુવિધા, આર્થિક સહયોગ અને અન્ય પ્રકરણોને આવરી લેતા સમર્પિત સત્રો યોજ્યા હતા. ચર્ચાઓ રચનાત્મક અને ભવિષ્યલક્ષી હતી, જેમાં બંને પક્ષોએ મતભેદો ઘટાડવા અને સમાનતાના ક્ષેત્રોની ઓળખ કરવાના ઉદ્દેશ્યથી વિગતવાર તકનીકી વિચાર-વિમર્શ હાથ ધર્યો હતો.

ઉદ્ઘાટન સત્ર દરમિયાન, FTA માટે ભારતના મુખ્ય વાટાઘાટકાર, વાણિજ્ય વિભાગના અધિક સચિવ શ્રી અજય ભાદુએ સંતુલિત, વ્યાપક અને પરસ્પર લાભદાયી કરારની વાટાઘાટો માટે ભારતની પ્રતિબદ્ધતાનો પુનરોચ્ચાર કર્યો હતો જે બંને દેશો વચ્ચેના દ્વિપક્ષીય વેપાર અને આર્થિક સંબંધોને વધુ મજબૂત બનાવશે. ઈઝરાયેલના મુખ્ય વાટાઘાટકાર, અર્થતંત્ર અને ઉદ્યોગ મંત્રાલયના ફોરેન ટ્રેડ એડમિનિસ્ટ્રેશનના સિનિયર ડિરેક્ટર (ટ્રેડ પોલિસી એન્ડ એગ્રીમેન્ટ્સ) અને ડેપ્યુટી ટ્રેડ કમિશનર સુશ્રી યિફાત અલોન પેરેલે વાટાઘાટોના પ્રથમ રાઉન્ડ પછી થયેલી પ્રગતિની પ્રશંસા કરી હતી અને મહત્વાકાંક્ષી તથા પરસ્પર લાભદાયી પરિણામ પ્રાપ્ત કરવા તરફ ગતિ જાળવી રાખવાના મહત્વ પર ભાર મૂક્યો હતો.

બંને પક્ષોએ સંતુલિત, વ્યાપક અને પરસ્પર લાભદાયી FTA ના વહેલા સમાપન માટે કામ કરવાની તેમની પ્રતિબદ્ધતાનો દોહરાવ કર્યો હતો જે ભારત અને ઈઝરાયેલ વચ્ચે દ્વિપક્ષીય વેપાર, રોકાણ અને આર્થિક સંબંધોને વધુ ગાઢ બનાવશે.

IJ/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com