ماہی گیری، مویشی پروری اور ڈیری کی وزارت نے آج راجیہ سبھا کو بتایا کہ ملک بھر میں ویٹرنری اور جانوروں صحت کی خدمات کو مضبوط بنانے، وائٹ ریولوشن 2.0 کی رفتار تیز کرنے اور آوارہ کتوں کے انسانی ہمدردی پر مبنی انتظام کو بہتر بنانے کے لیے متعدد جاری اور مجوزہ اقدامات پر عمل کیا جا رہا ہے۔

 

ویٹرنری خدمات

 

لائیو اسٹاک ہیلتھ اینڈ ڈیزیز کنٹرول پروگرام کے تحت محکمہ مویشی پروری و ڈیری، منہ اور کھر کی بیماری (فُٹ اینڈ ماؤتھ ڈیزیز)، بروسیلوسس، پی پی آر اور کلاسیکل سوائن فیور کے خلاف ٹیکہ کاری کے لیے 100 فیصد مرکزی مالی امداد فراہم کر رہا ہے۔ اس کے علاوہ، ویٹرنری اسپتالوں اور ڈسپنسریوں کو مضبوط بنانے کے جزو کے تحت 29 ریاستوں اور مرکز کے زیر انتظام علاقوں میں 4,019 موبائل ویٹرنری یونٹ فعال ہیں۔ بیماریوں کی روک تھام، تشخیصی تجربہ گاہوں کے قیام اور ویٹرنری ڈاکٹروں اور پیرا ویٹرنری عملے کی تربیت کے لیے بھی معاونت فراہم کی جا رہی ہے۔

 

وائٹ ریولوشن 2.0

 

حکومت نے بتایا کہ وائٹ ریولوشن 2.0 کا مقصد ان دیہاتوں تک ڈیری کوآپریٹو نیٹ ورک کو وسعت دینا ہے جہاں اب تک اس کی رسائی نہیں ہو سکی ہے۔ اس کے لیے 2028–29 تک 75,000 نئی ڈیری کوآپریٹو سوسائٹیاں قائم کی جائیں گی اور 46,422 موجودہ سوسائٹیوں کو مضبوط بنایا جائے گا۔ اس پروگرام کے تحت اب تک نمایاں پیش رفت حاصل ہوئی ہے، جہاں مارچ 2026 تک 54,442 کے ہدف کے مقابلے میں مجموعی طور پر 67,433 سوسائٹیاں قائم یا مستحکم کی جا چکی ہیں۔ 2025–26 کے دوران کوآپریٹو اداروں کے ذریعے دودھ کی اوسط خرید 700 لاکھ لیٹر یومیہ تک پہنچ گئی ہے۔

 

کسانوں کے لیے معاونت

 

غیر منظم شعبے سے وابستہ ڈیری کسانوں کو باقاعدہ کوآپریٹو ڈھانچے میں شامل کرنے کے لیے قومی ڈیری ترقی پروگرام کے تحت ڈیری کوآپریٹو سوسائٹیوں کے قیام اور ان کی مضبوطی، تربیت اور دودھ کے معیار کی جانچ کے آلات فراہم کیے جا رہے ہیں۔ حکومت نے یہ بھی بتایا کہ نیشنل ڈیری ڈیولپمنٹ بورڈ (این ڈی ڈی بی) کی قیادت میں جدید پروسیسنگ ٹیکنالوجی، خودکار نظام اور پائیدار توانائی کے اقدامات کے ذریعے ڈیری پلانٹ کو جدید بنایا جا رہا ہے۔ شفاف اور حقیقی وقت میں کسانوں کو ادائیگی یقینی بنانے کے لیے آٹومیٹک ملک کلیکشن یونٹس اور ڈیٹا پروسیسر ملک کلیکشن یونٹس سمیت ڈیجیٹل ادائیگی کے نظام استعمال کیے جا رہے ہیں۔

 

آوارہ کتوں کا انتظام

 

حکومت نے بتایا کہ اس نے اینیمل برتھ کنٹرول رولز، 2023 کو نافذ کیا ہے، جس کے ذریعے آوارہ کتوں کے انسانی ہمدردی اور سائنسی بنیادوں پر انتظام کے لیے نس بندی اور ریبیز مخالف ٹیکہ کاری پر مبنی ایک قانونی فریم ورک قائم کیا گیا ہے۔ 2026–27 کے لیے سرمایہ جاتی سرمایہ کاری کے لیے ریاستوں کو خصوصی معاونت اسکیم کے تحت ریاستیں کتوں کی پناہ گاہیں، جانوروں کی پناہ گاہیں اور اینیمل برتھ کنٹرول مراکز بھی قائم کر سکتی ہیں، جبکہ نس بندی اور ٹیکہ کاری کو اصلاحات سے منسلک اقدامات میں شامل کیا گیا ہے۔

 

ریبیز کے خاتمے کی مہم

 

وزارت نے کتوں کے ذریعے پھیلنے والے ریبیز کے خاتمے کے لیے قومی عملی منصوبے کا بھی حوالہ دیا، جس پر ون ہیلتھ نقطۂ نظر کے تحت متعلقہ وزارتوں کے اشتراک سے عمل کیا جا رہا ہے، تاکہ 2030 تک کتوں کے ذریعے منتقل ہونے والے ریبیز کا مکمل خاتمہ کیا جا سکے۔ محکمہ نے مزید ریاستوں اور مرکز کے زیر انتظام علاقوں کو ہدایات جاری کی ہیں کہ وہ 19 مئی 2026 کے سپریم کورٹ کے احکامات کی مکمل روح اور منشا کے مطابق اینیمل برتھ کنٹرول پروگرام پر عمل درآمد کو یقینی بنائیں۔

                                               **************

 

ش ح۔ ف ش ع

                                                                                                                                          U: 384

 

(रिलीज़ आईडी: 2287956) आगंतुक पटल : 5