نیشنل کونسل فار ووکیشنل ایجوکیشن اینڈ ٹریننگ (این سی وی ای ٹی) نے وزارت تعلیم، حکومت ہند کے تحت نیشنل انسٹی ٹیوٹ آف ٹیکنیکل ٹیچرز ٹریننگ اینڈ ریسرچ (این آئی ٹی ٹی ٹی آر)، کولکاتا کو ایوارڈنگ باڈی (دوہری) کے طور پر منظوری دے دی ہے۔ اس منظوری کے بعد این آئی ٹی ٹی ٹی آر کولکاتا ان منظور شدہ یا اختیار کردہ اہلیتوں کے لیے، جن کی تربیت وہ اپنے کیمپس یا اپنے زیرِ ملکیت یا مکمل طور پر زیرِ انتظام تربیتی مراکز میں براہِ راست فراہم کرے گا، تربیت حاصل کرنے والوں کا جائزہ لینے، انہیں اسناد جاری کرنے اور سرٹیفکیٹ دینے کا مجاز ہوگا۔

اس معاہدے پر دستخط کی تقریب کی صدارت ہنرمندی کی ترقی اور صنعت کاری کی وزارت کے ایڈیشنل سکریٹری اور این سی وی ای ٹی کے ایگزیکٹو رکن جناب نیرنجن کمار سدھانشو نے کی۔ تقریب میں این سی وی ای ٹی کے ڈائریکٹر (ریکگنیشن) لیفٹیننٹ کرنل وکرم سنگھ بھاٹی، ڈائریکٹر (مانیٹرنگ) لیفٹیننٹ کرنل سوربھ ایس بشٹ، این آئی ٹی ٹی ٹی آر کولکاتا کے ڈائریکٹر پروفیسر وی ایم ایس آر مورتی اور ادارے کے پروفیسر و صدر (سی ای) پروفیسر نوین بی پی بھی موجود تھے۔

ایک اہم سنگ میل کے طور پر این سی وی ای ٹی نے این آئی ٹی ٹی ٹی آر کولکاتا کی تیار کردہ پہلی اہلیت "فنڈامنٹلز آف سوائل ٹیسٹنگ" کی بھی منظوری دی ہے۔ اس پروگرام کو اس انداز میں تیار کیا گیا ہے کہ شرکا کو مٹی کے تجزیے، تجربہ گاہ میں جانچ کے طریقۂ کار، مٹی کی خصوصیات کی تشریح، معیار پر قابو پانے کے اصولوں اور جغرافیائی تکنیکی انجینئرنگ سے متعلق ہندوستانی معیارات کے عملی اطلاق کے بارے میں مضبوط بنیاد فراہم کی جا سکے۔

اس اہلیت کا مقصد تعمیرات، بنیادی ڈھانچے، نقل و حمل اور جیو ٹیکنیکل شعبوں میں ہنرمند افرادی قوت کی بڑھتی ہوئی ضرورت کو پورا کرنا ہے۔ اس کے لیے طلبہ کو صنعت کی ضروریات سے ہم آہنگ معلومات اور عملی مہارتیں فراہم کی جائیں گی۔ یہ پروگرام قومی اسکلز کوالیفکیشن فریم ورک (این ایس کیو ایف) سے ہم آہنگ، صلاحیت پر مبنی تربیت کے ذریعے تکنیکی اور پیشہ ورانہ تعلیم کو مضبوط بنانے کے قومی وژن کو بھی فروغ دیتا ہے۔

***

ش ح ۔   م  د ۔  م  ص

(U :  301)

(रिलीज़ आईडी: 2287407) आगंतुक पटल : 9