মথক্তা কাখৎলকপা মীওইশিংনা মালেম অসিবু মখা তানা থাঙ্গৎলি হায়বা মহাক্কী পুন্সি খোঙচৎকী লম্বীগী মশক লেপ্লিবা থাজবা অমগী মতাঙদা বিষ্ণু বাইনা ৱাখল খল্লি।  মহাক মঙলানশিংনা নোংমগী হিংবগী লানফমগী ৱাংম লানবা ঙমদবা অচমবা লৌমীগী ইমুং অমদা পোকখি। মহাক চহি নৌনা ময়ুম পানবা অমদি অনৌবা থৌদাংশিংনা মরম ওইরগা মহৈ মশিং তম্বগী লম্বী নিপানশুবা থাক্তা লেপখি। থা ১৮ গী মনুংদা মহাক্না ময়ুম পাল্লুরিবা ইমুং অদু শেল-থুমগী অৱাবনা মরম ওইদুনা ময়ুমদা অমুক হল্লকখি। মহাক্কী মবুংশিংনা শেলগী মতেং পীবিয়ু হায়বা য়াদ্রবদা মহাক্না মরোমদোম লেপচনবা লেপখি অমসুং ময়ুমদা ফিরোল তাইবা হৌরকখি। মহাক্কী অপীকপা শেন্থোক খুদিং চুম্নতগী শেন্থোক অমখক নত্তনা মনীং তম্বগী নৌরবা ৱাখল্লোন অমা ওইরকখি।

শ্রী রাম সেল্ফ-হেল্প গ্রূপকী খুত্থাঙদা মহাক্কী পুন্সি অওনবা অমা লাকখি, মসিনা মহাকপু ভোপালদা লৈবা রুরেল সেল্ফ এমপ্লোয়মেন্ত ত্রেনিং ইন্সতিত্যুৎ (RSETI) তা ত্রেনিং তৌবগী তাঞ্জা অমা ফংহনখি। মহাক্না নুপী অতৈগা লোয়ননা ফি তুবা তমবা পামখি, অদুবু খুন্নাইগী পলশিংনা মহাক্কী লম্বীদা খুরৌ ওইখি। চত্থোক চৎশিনগী খুদোংচাদবা লৈবা মরম্না মহাক্না মহাক্কী খুঙ্গংদা ত্রেনিং পীবিনবা হায়জখি। ইন্সতিত্যুৎ অদুনা পাউখুম পীবিখি, অমসুং পঞ্চায়ত ভৱন অদু থাজবগী ক্লাস রুম অম ওইরকখি। নুপীশিংনা মফম অদুদা পুনখি, অপিকপা লল্লোন ইতিক্কী থৌওং অমা চলাইবগী মচং ওইবা কাঙলোনশিংগা লোয়ননা মফমদুদা ফি তুবা তমখি। মীওই কয়া অমগী ওইনদি, মখোয়গী ময়ুমগী পলগী ৱাংমদা মালেম অসিদা খোঙ থাংদোরকপগী অহানবা খোঙথাং অমা ওইখি।

ত্রেনিং লোইরবা মতুংদা, বিষ্ণু বাইনা মহাক্কী খুঙ্গংদা অপিকপা ফি তুবগী দুকান অমা হাংদোকখি। মহাক্কী থবক অদু তম্না তম্না পাকথোক চাউথোরক্তুনা নুপীশিংগী ফিরোল তুবা য়াওরকখি। স্কুলগী য়ুনিফোর্মশিং তুনবগী লৈঙাক্কী ওর্দর অমনা চাং নাইবা শেন্থোক অমসুং অনৌবা থাজবা অমা পুরকখি। মসিগী মতুং, মহাক্না ইন্দস্ত্রিয়েল সিউ-ৱিং মেচিন লৈখি অমসুং মহাক্কী পাকথোক চাউথোরক্লিবা এন্তরপ্রাইজকী খুত্থাঙদা মরা চেৎপা পুন্সি মহিং অমা শেমগৎখি। মহাক্কী খোঙচত্তা খঙহৌদনা হোংলকপা নত্তবা লেপ্পা লৈতনা হোৎনবনা শেম্লকপা মথি ফোংদবা থৌনাগী মমি তারি। মহাক্কী অসিগুম্বা ৱারীশিংনা ভারতকী খুঙ্গংশিংদা খোন্থাং য়ৈদুনা খোঞ্জেল থোক্তনা অমদি মীয়াম মাঙদা থোক্তনা অওনবা কয়া পুরকখি।

RSETIs: এস্পিরেসন্দগী এন্তরপ্রাইজ ফাওবগী খোঙ

মরা চেৎনা মরুমদা থবক তৌদুনা মশান মশাবু থবক পীজবা অমসুং মাইক্রো-এন্তারপ্রাইজশিং য়োকখৎলিবা দিনদয়াল অন্ত্যোদয় যোজনা-নেসনেল রুরেল লাইভলিহুদ মিশন (DAY-NRLM)গী মখাদা লৈবা রুরেল সেল্ফ এমপ্লোয়মেন্ত ত্রেনিং ইন্সতিত্যুৎ (RSETI) শিংনা অসিগুম্বা ফীভমশিং অসিগী মরুমদা লৈরি। দিস্ত্রিক্তকী থাক্তা লৈবা ইন্সতিত্যুৎ অসিনা চহি ১৮ অমসুং ৫০গী মরক্তা লৈবা থবক ফংদ্রিবা খুঙ্গিংগী মীওইশিংদা লেম্না, অতেনবা মতমগী, থবক ওইনা পাঙথোকপা য়াবা, য়ুমদা লৈরগা তৌবা য়াবা ত্রেনিংশিং পীরি। খুঙ্গং চাওখৎ থৌরাং মন্ত্রালয়, স্তেত/য়ু.তি. লৈঙাকশিং, অমসুং স্পোনসর তৌরিবা বেঙ্কশিং য়াওনা লম্বী অহুমগী খুত্থাঙদা, মখোয়গী থৌদাংশিং অসিনা ক্লাসরুমগী ৱাংমদা থোরক্তুনা ক্রেদিত সপ্পোর্ত অমসুং লেপ্তনা লমজিং পীদুনা হিংনবগী লম্বী ফংহল্লি।

লৌউ-শিংউ, পোৎ পুথোকপা, সর্ভিস, অমসুং ওন্ত্রপ্রিন্যুরসিপ য়াওনা লৈরিবা কোৰ্স ৭৫ অসিনা নেসনেল স্কিল স্তেন্দর্দশিংগা চুননা চৎলি। পাকথোক চাউথোকপা ঙমগদবা এন্তরপ্রাইজশিং শেমগৎনবগীদমক ত্রেনীশিংদা ক্রেদিত ফংনবগী থবক স্পোনসর তৌরিবা বেঙ্কশিংনা থৌদাং লৌরি। অসুম্না পুন্না চঙশিল্লিবা থৌরাং অসিনা স্কিলশিং অসি থিওরী খক্তা ওইনা লৈহন্দনা তশেংবা শেন্মিৎলোনগী থবক থৌরমশিং ওইহল্লি। মীওই কয়া অমগী ওইনদি, মতেং পাংবগী পাম্বৈ অসিনা ওইথোকপা য়াবশিংগী মশক লেপ্লক্লিবা অওনবা তাঙ্কক অমা ওইরক্লি।

নোংমগী খুৎশুমল তান্দুনা লৈরম্বদগী থবক পীবা মীশক অমা ওইরকখিবা উমেশ শিবাজি ইংলেগী অসিগুম্বা খোঙচৎ অমদসু RSETI শিংনা পুন্সি কয়াবু মপাঙ্গল হাপ্তুনা হোংহল্লি হায়বগী মমি তারি। শেন্থোক্কী নিংথিনা লৈতবা ইমুং অমদগী হৌরকপনা, মহাক্না ক্লান তেন ফাওবা খক্তা তমবা ঙমহৌখি। চহি মঙারোম, মহাক্না নুদল ফেক্তরী অমদা নোংমগী খুৎশুমল তান্দুনা থবক তৌখি। পুং কয়া থবক তৌরবসু, মহাক্কী শেন্থোক অদুনা মহাক্কী ইমুংগী মথৌ তাবশিং মপুং ফানা মেনখৎপা ঙম্লমদে। মরুপ অমগী পাউতাক্না মহাকপু RSETI ত্রেনিং প্রোগ্রাম অদুদা পুশিন্দুনা থাজরুদবা লম্বী অমা ফংহনখি। মহাক্না মহাক্কী ফেক্তরীদা থেংনরকখিবশিংবু হেন্না মমুৎ তানা তম্নবগীদমক ওন্ত্রপ্রিন্যুরসিপ দিভেলপমেন্ত প্রোগ্রাম অমদা মমিং চনখি। ত্রেনিং লোইরবা মতুংদা, মহাক্না সেকেন্দ হেন্দ মেচিন অমা অমসুং মচং ওইবা খুৎলায় খরগা লোয়ননা অপিকপা নুদল য়ুনিৎ অমা হৌদোকখি। হৌরকপদা, মহাক্না নোংমদা নুদল কিলোগ্রাম ১০০০দগী ১২০০ রোম পুথোকখি। তপ্না তপ্না, দিমান্দ হেনগৎলকখি, অমসুং মহাক্কী এন্তরপ্রাইজ অদুনা থা অমগী লুপা লিশিং ৩০ রোমগী শেন্থোক ফংবা হৌরকখি। মহাক্না শেলথুমগী ফীভম ফত্তবা নুপী মরি থবক পীদুনা, মহাক্কী ইমুং খক্ত নত্তনা অতোপ্পশিংদসু খুদোংচাবা ফংহনখি। বেঙ্কতগী লুপা লাখ ৮ গী লোন লৌদুনা মহাক্কী থবক মখা তানা পাকথোক চাউথোকহনবদা মতেং পাংখি। মহাক্না MIDC অকোলাদা লৈবা হেন্না চাউবা য়ুনিৎ অমদা হোংজিন্দনা, হেনগৎলক্লিবা দিমান্দশিং পীবা ঙম্ননবা পোত্থোক পুথোকপগী চাং হেনগৎহনখি। নোংমগী খুৎশুমল তানবা মীশক অমদগী থবক পীবা মীওই অমা ফাওবগী মহাক্কী খোঙচৎ অদুনা অতোপ্পশিংগীদমক শেন্থোক লম্বী শেমদুনা পুন্সিগী পান্দম অদু অমুক হন্না মশক লেপখি।

খোঙচৎ খরনা শেন্থোক্কী মথৌ তাবদগী হৌরকই, অদুগা অতোপ্পা খরদি ক্রিএতিব এস্পিরেসন্দগী হৌরকই। ধরৱাদকী, সঞ্জয় মলাগীগী ৱারীদা RSETI শিংনা তোঙান-তোঙানবা মঙলানশিংবু এন্তরপ্রাইজ ওইহনবদা করম্না মতেং পাংবগে হায়বা অদু উৎলি। ইলেক্ত্রিকেল ইঞ্জিনিয়রিংদা দিম্লোমা অমা লোইরবা মতুংদা, মহাক্না বেঙ্গলুরুদা লৈবা মল্তিনেস্নেল কম্পনী অমদা থবক তৌখি। মতমগী মতুং ইন্না পেন্দবা হেনগৎলক্তুনা, মহাকপু মফম অদু থাদোক্লম্লগা ময়ুমদা হন্দুনা পুন্সিগী পান্দম অমা থিনবা পুক্নিং থৌগৎখি। মহাক্কী ফিরেপ লৈত্রবা তাঙ্কক অদুদা মহাক্না RSETI ধরৱাদনা পীবা ফোতোগ্রাফী কোৰ্স অমা থেংনখি। মহাক্না মমিং চনশিনখি, অমসুং খঙনিংবগী ইথিল অমা ওইনা হৌরকখিবা অদুনা তশেং তশেংবা ওন্ত্রপ্রিন্যুরগী মঙলান অমা ওইরকখি। ২০১৯দা, মহাক্না মহাক্কী কম্পনী সিনেৱিংস হৌদোক্তুনা, ৱারী লীবগী তাইবঙপান অমদা চঙশিনখি। মহাক্কী থবক অসিনা ভিদিওগ্রাফী, ইদিতিং, অমসুং দিরেক্সনখক্তা নত্তনা ভারতকী লোল কয়াদা ৱারীশিং শেমগৎলি। মহাক্কী ফিল্মশিং অসিনা ময়ুম হোংবা, রাজনিতি, অমসুং তেক্নোলোজী লান্না শিজিন্নববু পুক্নিংদা ফাওবা ইথিলগা লোয়ননা উৎলি।

মহাক্কী ফিল্ম ‘তমসোমা জ্যোতির্গময়’না ফিশাবা মীওইশিংগী অৱাবা ফীভমশিং উৎপগীদমক মালেমগী মনা অনি ফংখি। ‘হিন্নোতা’ হায়রিবা অতোপ্পা ফিল্ম অসিনা, ২০২০-২১ চহিগী কোচিন ইন্তরনেসনল শোর্ত ফিল্ম ফেস্তিবেলদা মহাকপু খ্বায়দগী ফবা দিরেক্তরগী মনা ফংহনখি। মতমগী মতুং ইন্না, মহাক্না মনা ১০ রোম ফংদুনা মহাক্কী ক্রিএতিব ওইবা খোঞ্জেলশিং মীয়াম্না মশক খঙনরকখি। মহাক্কী কম্পনী অদু শহর কয়া অমদা থবক তৌবা হৌখি অমসুং তোঙান-তোঙানবা প্রোফেস্নেল প্রোজেক্তশিং পায়খৎখি, অমসুং মফম মফম কয়াদা থবকসু পীখি।

খোঙচৎশিং অসিনা পুন্না লৈবাক পুম্বদা থোক্লক্লিবা হেন্না চাউবা ৱারী অমা পুথোরক্লি। মখোয়দা তারিবা মমিশিং অসি নায়তোম মায় পাকপগী মমি নত্তে, খাঙবা কনবা অমসুং খুদোংচাবগী পাকথোক চাউথোরক্লিবা ইকোসিস্তেম অমগী মমিনি। মার্চ ২০২৬ ফাওবদা, স্তেত/য়ু.তি. ৩৩ দা RSETI ৬৩২ থবক তৌরি। মখোয়না দিস্ত্রিক্ত ৬১৯ কোনশিল্লি অমসুং লৈবাক পুম্বদা স্পোনসর তৌবা বেঙ্ক ২৫ না মতেং পাংলি। ২০০৯ দা হৌদোকখিবদগী হৌরগা ফেব্রুৱারী ২০২৬ ফাওবদা, RSETI শিংনা লৈবাক পুম্বদা তুং কোইবা অমসুং শাফু লৈবা মাংলোমদা চঙশিনবা মতৌ উৎলি। লাখ ৬০.৮১ ত্রেনিং পীনবা পান্দম থম্বদা, চাউরাক্না ৯৯.৭% ফংবা ঙমখ্রে, অমসুং কেন্দিদেৎ লাখ ৬০.৬৩ ত্রেন তৌখ্রে। মসিগী মনুংদা, কেন্দিদেৎ লাখ ৪৩.৮৯ না তুং কোইগদবা হিংবগী লম্বী ফংখ্রে।। ইন্সতিত্যুসনগী মতেংনা কেন্দিদেত লাখ ২২.৫২ বু বেঙ্ক ফাইনান্স ফংনবা মখা তানা মতেং পাংখ্রে। হৌখিবা চহিশিং অসিনা চাওখৎপা হেনগৎলক্তুনা, মসিনা মফম মফম য়ৌবগী চাং পাকথোক চাউথোরকপা অমসুং ইন্সতিত্যুসনগী থবক তৌবগী মতিং ফগৎলকপা অদু উৎলি। পনবা য়াবদি, ২০২৪-২৫ দা কেন্দিদেৎ লাখ ৬.২১ ত্রেন তৌদুনা খ্বায়দগী ৱাংবা চহিগী ত্রেনিং পীবগী মায় পাকপগী রেকোর্দ থমখি।

মশিংশিং অসিনা ৱারী অমা লীরি, অদুবু হেন্না ৱাহন্থোক লৈবা ৱারীদি মীওইবা কয়াগী পুন্সিদা অওনবা পুরকপা অসিনি। RSETI শিং অসি ত্রেনিং তৌফম খক্তা নত্তে, মঙলান কয়াগী মরা তাহল্লিবা মফম্নি। খুঙ্গং খুঙ্গংদা, অপিকপা এন্তরপ্রাইজশিংনা মফমদুগী শেন্মিৎলোনগী মশক লেপ্লি অমসুং ইকায়খুম্নবা ফংহনলি। মায় পাকপা ৱারী খুদিংমক্কা লোয়ননা, থাজবনা নিংহন্নবগী মহুৎ শিল্লক্লি, অমসুং থাজববু মশক উবা ঙম্লক্লি। অসিগুম্বা খোঞ্জেল থোক্তবা অহোংবশিং অসিদা, ভারতকী খুঙ্গংশিংনা মরোমদোম লেপচবা অমসুং থাজবনা মশক লেপ্পা তুংলমচৎ অমগী লম্বীদা চঙশিল্লি।

মচাকশিং

খুঙ্গং চাওখৎ থৌরাং মন্ত্রালয়

https://sansad.in/getFile/annex/270/AU3335_V9FZLF.pdf?source=pqars

https://www.pib.gov.in/PressReleaseDetail.aspx?PRID=2246334&reg=1&lang=1

নিতি আয়োগ

https://www.nitiforstates.gov.in/public-assets/Best_Practices/Compendiums/75%20Inspirational%20Stories%20of%20Aatmanirbhar%20Rural%20Women.pdf 

পি.দি.এফ. ফাইলগীদমক মসিদা নম্বিয়ু।

***