تجارت و صنعت کے مرکزی وزیر جناب پیوش گوئل نے فن لینڈ کی معروف ٹیکنالوجی اور صنعتی کمپنیوں کے اعلیٰ حکام سے سلسلہ وار ملاقاتیں کیں۔ یہ ملاقاتیں ہندوستان اور فن لینڈ کے درمیان بڑھتے ہوئے تعلقات اور باہمی تعاون کی رفتار کی عکاس ہیں۔ ان بات چیت میں جدید مینوفیکچرنگ، ڈیجیٹل ٹیکنالوجی، اختراع، پائیدار بنیادی ڈھانچے اور تحقیق کے شعبوں میں تعاون کو مزید وسعت دینے کے مشترکہ عزم کا اظہار کیا گیا۔

جناب گوئل نے نوکیا کارپوریشن کی اعلیٰ قیادت سے ملاقات کی، جس میں اگلی نسل کی ٹیلی کمیونیکیشن، 5جی اور 6جی ٹیکنالوجی، ڈیجیٹل بنیادی ڈھانچے، الیکٹرانکس مینوفیکچرنگ، تحقیق و ترقی اور اختراعی شراکت داری کو مضبوط بنانے پر تبادلۂ خیال کیا گیا۔ اس موقع پر ہندوستان کے ٹیلی کام شعبے میں نوکیا کی طویل موجودگی کا بھی جائزہ لیا گیا اور ابھرتی ہوئی ڈیجیٹل ٹیکنالوجیز میں تعاون کے نئے امکانات پر غور کیا گیا۔

وزیر موصوف نے یورپ کے ممتاز تحقیقی ادارے وی ٹی ٹی ٹیکنیکل ریسرچ سینٹر کا بھی دورہ کیا، جہاں تحقیق، اختراع، صاف ستھری ٹیکنالوجی، صنعتی تبدیلی، جدید مواد، ڈیجیٹلائزیشن اور پائیدار ترقی کے شعبوں میں تعاون بڑھانے پر بات چیت ہوئی۔ دونوں فریقوں نے ہندوستانی اور فن لینڈ کے اداروں کے درمیان تحقیقی شراکت داری کو فروغ دینے اور ٹیکنالوجی کی منتقلی کو مزید مؤثر بنانے کے امکانات کا جائزہ لیا۔

جناب گوئل نے کونے کارپوریشن کے چیئرمین اور اعلیٰ انتظامیہ سے بھی ملاقات کی۔ اس ملاقات میں اسمارٹ شہری بنیادی ڈھانچے، لفٹ اور ایسکلیٹر ٹیکنالوجی، پائیدار تعمیراتی حل، جدید مینوفیکچرنگ اور مقامی پیداوار (لوکلائزیشن) کے شعبوں میں تعاون بڑھانے پر گفتگو ہوئی۔ اس دوران ہندوستان کے تیزی سے فروغ پاتے بنیادی ڈھانچے اور مینوفیکچرنگ شعبے سے مشترکہ فوائد حاصل کرنے کے امکانات پر بھی تبادلۂ خیال کیا گیا۔

اپنے دورے کی آخری ملاقات میں جناب گوئل نے کیمپی گروپ کے مالکان اور اعلیٰ قیادت سے ملاقات کی۔ اس دوران جدید صنعتی مشینری، ویلڈنگ ٹیکنالوجی، مینوفیکچرنگ میں اختراع، ماحول دوست صنعتی حل اور ہندوستان کے بڑھتے ہوئے مینوفیکچرنگ و بنیادی ڈھانچے کے شعبوں میں سرمایہ کاری کے امکانات پر تبادلۂ خیال کیا گیا۔ اس کے علاوہ الیکٹرک گاڑیوں (ای وی) کے چارجنگ بنیادی ڈھانچے اور صنعتی ٹیکنالوجی جیسے ابھرتے ہوئے شعبوں میں تعاون کے امکانات کا بھی جائزہ لیا گیا۔

ان ملاقاتوں نے فن لینڈ کی صنعتوں کے سرکردہ نمائندوں کے ساتھ براہِ راست تبادلۂ خیال کا موقع فراہم کیا، جس میں ہندوستان کو قابلِ اعتماد مینوفیکچرنگ اور اختراعی شراکت دار کے طور پر اجاگر کیا گیا، جبکہ دونوں ممالک کے درمیان بڑھتی ہوئی اقتصادی شراکت داری کو بھی مزید مضبوطی ملی۔

یہ دورہ اس عزم کے اعادے کے ساتھ اختتام پذیر ہوا کہ ہندوستان اور فن لینڈ ٹیکنالوجی، اختراع، پائیدار مینوفیکچرنگ، تحقیق اور سرمایہ کاری کے شعبوں میں اپنے تعاون کو مزید وسعت دیں گے۔ گزشتہ روز منعقدہ ہند-فن لینڈ بزنس فورم کی کامیابی کے بعد ان صنعتی ملاقاتوں نے کاروباری اداروں کے درمیان براہِ راست روابط کو مزید مستحکم کیا اور اسٹریٹجک شعبوں میں طویل مدتی تعاون کے نئے مواقع بھی پیدا کیے۔

************

ش ح ۔   م  د ۔  م  ص

(U : 101 )