યુવા બાબતો અને રમતગમત મંત્રાલયના યુવા બાબતોના વિભાગ દ્વારા મેરા યુવા ભારત (માય ભારત) ના માધ્યમથી ઇન્દિરા ગાંધી પ્રતિષ્ઠાન, લખનૌ ખાતે માય ભારત રાષ્ટ્રીય યુવા સ્વયંસેવક સંમેલનનું આયોજન કરવામાં આવ્યું હતું, જેમાં સમગ્ર ઉત્તર પ્રદેશમાંથી અંદાજે 1500 થી વધુ માય ભારત યુવા સ્વયંસેવકો એકસાથે આવ્યા હતા. આ સંમેલનનો ઉદ્દેશ્ય યુવા નેતૃત્વ, સ્વયંસેવા અને સમુદાય જોડાણને મજબૂત કરવાનો હતો અને સાથે જ સ્વયંસેવકોને કર્તવ્ય ભાવ, સેવા અને રાષ્ટ્ર-પ્રથમના કાર્યો દ્વારા વિકસિત ભારત @2047 ના વિઝન તરફ સક્રિયપણે યોગદાન આપવા માટે સજ્જ કરવાનો હતો. આ કાર્યક્રમમાં માય ભારત પોર્ટલ, નેતૃત્વ અને સામુદાયિક ગતિશીલતા પર ઓરિએન્ટેશન સત્રો, વિકસિત ભારત માટે નશામુક્ત યુવા અભિયાન પર સાંસ્કૃતિક પ્રસ્તુતિ અને ઉત્કૃષ્ટ યુવા સિદ્ધિ મેળવનારાઓનું સન્માન કરવામાં આવ્યું હતું.

આ કાર્યક્રમમાં કેન્દ્રીય યુવા બાબતો અને રમતગમત તેમજ શ્રમ અને રોજગાર મંત્રી ડૉ. મનસુખ માંડવિયા; ઉત્તર પ્રદેશ સરકારના રમતગમત અને યુવા કલ્યાણ મંત્રી શ્રી ગિરીશ ચંદ્ર યાદવ; યુવા બાબતોના વિભાગના સચિવ ડૉ. પલ્લવી જૈન ગોવિલ; ઉત્તર પ્રદેશ સરકારના રમતગમત અને યુવા કલ્યાણ વિભાગના સચિવ શ્રી સુહાસ એલ. વાય.; માય ભારતના સીઈઓ ડૉ. પ્રિયંકા શુક્લા અને માય ભારત તેમજ માય ભારત રાષ્ટ્રીય સેવા યોજના (NSS) ના વરિષ્ઠ અધિકારીઓ ઉપસ્થિત રહ્યા હતા.

સભાને સંબોધતા ડૉ. મનસુખ માંડવિયાએ યુવાનોને કર્તવ્ય ભાવ, સેવા અને રાષ્ટ્ર પ્રથમની ભાવનાથી પ્રેરિત થઈને વિકસિત ભારત @2047 ના ઘડવૈયા બનવા આહવાન કર્યું હતું. કેન્દ્રીય મંત્રીએ જણાવ્યું હતું કે, "અમૃતકાળના આગામી 25 વર્ષ યુવાનોના છે. આપણે વિકસિત ભારત જોઈ શકીએ છીએ, પરંતુ તમે વિકસિત ભારતમાં જીવશો. તેનું નિર્માણ કરવું એ તમારું કર્તવ્ય છે."

ડૉ. માંડવિયાએ જણાવ્યું હતું કે ભારતની વસ્તી વિષયક શક્તિ, જેમાં તેની અંદાજે 65 ટકા વસ્તી 35 વર્ષથી ઓછી ઉંમરની છે, તે યુવાનોને દેશની વિકાસ યાત્રા પાછળનું ચાલક બળ બનાવે છે. રાજકીય કે પારિવારિક પૃષ્ઠભૂમિ વિનાના એક લાખ યુવા નેતાઓને તૈયાર કરવાના પ્રધાનમંત્રી શ્રી નરેન્દ્ર મોદીના વિઝનનો ઉલ્લેખ કરતા તેમણે જણાવ્યું હતું કે નેતૃત્વ દરેક ગામ, આદિવાસી સમુદાય, ટાપુ, નગર અને શહેરમાંથી બહાર આવવું જોઈએ.

માય ભારત પ્લેટફોર્મ (mybharat.gov.in) ને યુવા સશક્તિકરણ માટેનું વન-સ્ટોપ સોલ્યુશન ગણાવતા મંત્રીએ જણાવ્યું હતું કે તે યુવાનોને સ્વયંસેવાના અવસરો, કારકિર્દીના માર્ગો, અનુભવજન્ય શિક્ષણ કાર્યક્રમો, સામુદાયિક સેવા અને ઇનોવેશન સાથે જોડે છે. તેમણે નોંધ્યું હતું કે વિકસિત ભારત યંગ લીડર્સ ડાયલોગ (VBYLD) દ્વારા ઉત્પન્ન થયેલા વિચારોએ નીતિ ઘડતરને પ્રભાવિત કર્યું છે અને ઉમેર્યું હતું કે યુવા સહભાગીઓની કેટલીક ભલામણો કેન્દ્રીય બજેટ 2026 માં પ્રતિબિંબિત થઈ હતી.

કાર્ય માટે સ્પષ્ટ આહવાન આપતા ડૉ. માંડવિયાએ દરેક માય ભારત યુવા સ્વયંસેવકોને આગામી ત્રણ મહિનામાં ઓછામાં ઓછા 300 યુવાનોને માય ભારત પ્લેટફોર્મ સાથે જોડવા અને 100 સક્રિય યુવા ક્લબોની નોંધણીની સુવિધા આપવા વિનંતી કરી હતી. તેમણે કહ્યું કે, "દરેક યુવા ક્લબ સેવા, નેતૃત્વ અને રાષ્ટ્ર નિર્માણનું કેન્દ્ર બનવી જોઈએ." તેમણે સ્વયંસેવકોને નિયમિત સામુદાયિક પ્રવૃત્તિઓનું આયોજન કરવા અને પીડિત પરિવારોની વાર્તાઓને ઉજાગર કરીને, તેનો સંદેશ દરેક ગામ, વિસ્તાર અને ઘર સુધી લઈ જઈને વિકસિત ભારત માટે નશામુક્ત યુવા અભિયાનને મજબૂત કરવા વિનંતી કરી હતી. તેમણે સ્વયંસેવકોને પ્રતિબદ્ધતા, ઇનોવેશન અને શિસ્ત સાથે કામ કરવા વિનંતી કરતા ઉમેર્યું હતું કે "ભારતનું ભવિષ્ય માત્ર સરકારી કચેરીઓમાં જ લખવામાં નહીં આવે; તે દેશભરના દરેક સમુદાયમાં કામ કરતા યુવા નાગરિકો દ્વારા લખવામાં આવશે."

યુવાઓની આગેવાની હેઠળના વિકાસ અને સામૂહિક જવાબદારી પર ભાર મૂકતા શ્રી ગિરીશ ચંદ્ર યાદવે જણાવ્યું હતું કે માય ભારત રાષ્ટ્ર નિર્માણ અને વિકસિત ભારત @2047 ના વિઝનને સાકાર કરવા તરફ યુવાનોની ઊર્જાને વાળવા માટે એક શક્તિશાળી પ્લેટફોર્મ તરીકે ઉભરી આવ્યું છે. તેમણે કહ્યું કે, "શેરી નાટક, સાંસ્કૃતિક પ્રવૃત્તિઓ, સ્વયંસેવા કે સામુદાયિક અભિયાનો હોય, માય ભારતે યુવાનોને રાષ્ટ્ર સાથે જોડ્યા છે. આ પ્લેટફોર્મ વિકસિત ભારત @2047 નું કેન્દ્રબિંદુ બનશે."

આ પહેલમાં ઉત્તર પ્રદેશના યોગદાન પર પ્રકાશ પાડતા શ્રી યાદવે જણાવ્યું હતું કે દેશભરમાં 2.25 કરોડથી વધુ યુવાનો માય ભારત સાથે જોડાયેલા છે, ત્યારે ઉત્તર પ્રદેશે તેની નોંધણી 13.5 લાખથી વધારીને 23 લાખથી વધુ યુવાનો સુધી પહોંચાડીને તેની પહોંચ નોંધપાત્ર રીતે વિસ્તૃત કરી છે. તેમણે આ સિદ્ધિને રાષ્ટ્ર નિર્માણ પ્રત્યે રાજ્યની યુવા વસ્તીના ઉત્સાહ અને પ્રતિબદ્ધતાનું પ્રતિબિંબ ગણાવ્યું હતું.

અગાઉ, સ્વયંસેવકોનું સ્વાગત કરતા યુવા બાબતોના વિભાગના સચિવ ડૉ. પલ્લવી જૈન ગોવિલે જણાવ્યું હતું કે દેશના સૌથી મોટા રાજ્યએ સેવાની ભાવનાથી એકજૂથ થયેલા માય ભારતના સ્વયંસેવકોની આટલી મોટી સભા એકત્રિત કરી છે તે ગર્વની બાબત છે. તેમણે કહ્યું કે યુવાનોના ઉત્સાહને રાષ્ટ્રીય વિકાસ અને સામાજિક પરિવર્તન તરફ વાળવો જોઈએ. તેમણે જણાવ્યું કે, "જ્યારે યુવાનો કોઈ ઉદ્દેશ્યને પોતાની અંગત પ્રતિબદ્ધતા બનાવે છે, ત્યારે તેઓ કાયમી પરિવર્તન લાવે છે. વિકસિત ભારત તરફ યુવાનોનું યોગદાન રાષ્ટ્રીય યુવા સ્વયંસેવકોના સમર્પણ અને જવાબદારીની ભાવના દ્વારા ઘડાશે."

આ કાર્યક્રમનું એક મુખ્ય આકર્ષણ એ હતું કે માનનીય કેન્દ્રીય મંત્રી દ્વારા નેશન ફર્સ્ટ ચેલેન્જના ટોચના પાંચ વિજેતાઓનું સન્માન કરવામાં આવ્યું હતું. પુરસ્કાર મેળવનારાઓમાં અભિષેક રામદાસ નાઈકવાડી (મહારાષ્ટ્ર), ટી. રમેશ (તેલંગાણા), નમરેડ્ડી રીત્વિક રેડ્ડી (તેલંગાણા), સ્વામીકેરી વેંકટ લોકેશ (આંધ્રપ્રદેશ) અને ક્રિષ્નાનંદ જયસ્વાલ (ઉત્તર પ્રદેશ) નો સમાવેશ થાય છે.

સંમેલન દરમિયાન, માય ભારત યુવા સ્વયંસેવકોએ માય ભારત પોર્ટલ, યુવા નેતૃત્વ અને સામુદાયિક ગતિશીલતા પરના પરસ્પર સંવાદત્મક સત્રોમાં ભાગ લીધો હતો, જે તેમને યુવા બાબતોના વિભાગની ફ્લેગશિપ પહેલોને પાયાના સ્તરે ચલાવવા માટેના જ્ઞાન અને કૌશલ્યોથી સજ્જ કરે છે. વિકસિત ભારત માટે નશામુક્ત યુવા અભિયાન પરની સાંસ્કૃતિક પ્રસ્તુતિએ નશામુક્ત ભારતના સંદેશને વધુ મજબૂત બનાવ્યો અને યુવાઓની આગેવાની હેઠળની જાગૃતિ અને સામુદાયિક પ્રવૃત્તિઓની પરિવર્તનકારી ભૂમિકાનું પ્રદર્શન કર્યું.

સંમેલનનું સમાપન નશામુક્તિના શપથ લેવડાવવા સાથે થયું હતું, જે નશામુક્ત ભારતના સંદેશને દરેક ગામ, દરેક વિસ્તાર અને દરેક ઘર સુધી પહોંચાડવાના માય ભારત યુવા સ્વયંસેવકોના સામૂહિક સંકલ્પને વધુ મજબૂત બનાવે છે, જ્યારે તેઓ સેવા, કર્તવ્ય ભાવ અને વિકસિત ભારત @2047 ના વિઝન તરફ અતૂટ પ્રતિબદ્ધતા, શિસ્ત અને નશામુક્ત, વિકસિત અને આત્મનિર્ભર ભારતના નિર્માણ માટે સેવાની ભાવના સાથે કામ કરે છે.

IJ/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(रिलीज़ आईडी: 2285776) आगंतुक पटल : 13