عام ٹیلی کام صارفین کی معلومات کے لیے بھارتی ٹیلی کام ریگولیٹری اتھارٹی (ٹرائی) نے مئی 2026 کے دوران کرناٹک کے ضلع اُتر کنڑ میں لائسنس یافتہ سروس ایریا (ایل ایس اے) میں کیے گئے آزادانہ ڈرائیو ٹیسٹ (آئی ڈی ٹی) کے نتائج جاری کیے ہیں۔ اس جانچ کا مقصد ٹیلی کام سروس فراہم کنندگان (ٹی ایس پیز) کی جانب سے فراہم کی جانے والی موبائل نیٹ ورک خدمات (آواز اور ڈیٹا دونوں) کے حقیقی وقت کے معیار کا جائزہ لینا اور اس کی تصدیق کرنا ہے۔ آئی ڈی ٹی کے دوران ٹرائی، کوریج، کال ڈراپ کی شرح (سی ڈی آر)، کال سیٹ اپ کامیابی کی شرح (سی ایس ایس آر)، ڈیٹا ڈاؤن لوڈ اور اپ لوڈ تھروپٹ جیسے اہم معیارِ خدمت (کیو او ایس) اشاریوں کے حوالے سے ٹی ایس پیز کی کارکردگی کا جائزہ لیتی ہے۔ بعد ازاں یہ معلومات صارفین کو آگاہ کرنے اور ٹی ایس پیز کو اپنی خدمات بہتر بنانے کی ترغیب دینے کے لیے شائع کی جاتی ہیں۔

یہ آزادانہ ڈرائیو ٹیسٹ اس طرح ترتیب دیے جاتے ہیں کہ شہروں، اہم مقامات (ہاٹ اسپاٹس)، عوامی نقل و حمل کے مراکز اور دیگر مختلف استعمال کے ماحول میں تمام ٹی ایس پیز کے زمینی موبائل نیٹ ورک کی کارکردگی کا جائزہ لیا جا سکے۔ اس دوران 2جی، 3جی، 4جی اور 5جی نیٹ ورکس پر تمام ٹی ایس پیز کے سم کارڈ استعمال کرتے ہوئے براہِ راست آواز اور ڈیٹا سیشن قائم کیے جاتے ہیں۔ اس مقصد کے لیے جدید ٹیسٹنگ ہینڈ سیٹس استعمال کیے جاتے ہیں اور جدید سافٹ ویئر نظام کے ذریعے ان سیشنز کی حقیقی وقت میں نگرانی اور تجزیہ کیا جاتا ہے۔

ٹرائی نے اپنی نامزد ایجنسی کے ذریعے 18 سے 21 مئی 2026 کے دوران کرناٹک کے لائسنس یافتہ سروس ایریا میں کاروار شہر اور اس کے اطراف میں ڈرائیو ٹیسٹ کیے۔ ان میں شہری ڈرائیو 440.5 کلومیٹر، 12 ہاٹ اسپاٹس، 8.7 کلومیٹر واک ٹیسٹ اور 761.0 کلومیٹر ریلوے روٹ شامل تھے۔ یہ ٹیسٹ ٹرائی کے بنگلورو علاقائی دفتر کی نگرانی میں انجام دیے گئے۔ ڈرائیو ٹیسٹ رپورٹ میں پیش کیے گئے مشاہدات صرف انہی دنوں اور اوقات کے دوران متعلقہ علاقوں اور راستوں پر ٹی ایس پیز کی کارکردگی کی عکاسی کرتے ہیں جن میں یہ جانچ کی گئی۔

ڈرائیو ٹیسٹ روٹ کا نقشہ: ذیل میں دیا گیا نقشہ ڈرائیو ٹیسٹ کے مختلف راستوں کا مجموعی جائزہ پیش کرتا ہے، جس میں شہری ڈرائیو، مختلف آپریٹروں کے درمیان کال ٹیسٹ، ہاٹ اسپاٹس اور واک ٹیسٹ شامل ہیں، جیسا کہ نقشے میں دی گئی علامتوں کے مطابق دکھایا گیا ہے۔

 

جائزے کے اہم معیارات:

الف) کوریج میں خلا: متعلقہ ٹیکنالوجی (2جی/3جی/4جی/5جی) کے لیے مقررہ کم از کم سگنل طاقت سے کم سگنل رکھنے والے نمونوں کا تناسب۔

ب) صوتی خدمات: کال سیٹ اپ کامیابی کی شرح (سی ایس ایس آر)، کال منقطع ہونے کی شرح (ڈی سی آر)، کال سیٹ اپ کا وقت، کال خاموشی کی شرح اور آواز کا معیار (ایم او ایس)۔

ج) کال خاموشی کے واقعات: کال کے دوران تین سیکنڈ سے زیادہ خاموشی کے واقعات کی تعداد۔

د) ڈیٹا خدمات: ڈاؤن لوڈ/اپ لوڈ تھروپٹ، لیٹنسی، جِٹر اور پیکٹ ڈراپ کی شرح۔

ضلع اُتر کنڑ میں اہم اشاریوں کے لحاظ سے مجموعی موبائل نیٹ ورک کارکردگی کا خلاصہ درج ذیل ہے:

الف) کوریج میں خلا:خودکار انتخابی موڈ (5جی/4جی/3جی/2جی) میں ڈرائیو ٹیسٹ کے دوران کمزور سگنل والے نمونوں کی تعداد ایئرٹیل کے لیے 34,323 میں سے 5,104، بی ایس این ایل کے لیے 35,480 میں سے 10,378، آر جے آئی ایل کے لیے 37,941 میں سے 7,089 اور وی آئی ایل کے لیے 28,580 میں سے 6,626 ریکارڈ کی گئی۔ کوریج میں موجود خلا کی تفصیلات منسلک نقشے میں دی گئی ہیں۔

ب) کال منقطع ہونے کے واقعات:کامیابی سے ہونے والی کالوں کے مقابلے میں منقطع ہونے والی کالوں کی تعداد ایئرٹیل کے لیے 311 میں سے 14، بی ایس این ایل کے لیے 306 میں سے 28، آر جے آئی ایل کے لیے 346 میں سے 17 اور وی آئی ایل کے لیے 260 میں سے 12 رہی۔ ان مقامات کی تفصیلات منسلک نقشے میں فراہم کی گئی ہیں۔

ج) کال خاموشی کے واقعات:تین سیکنڈ سے زیادہ دورانیے کی کال خاموشی کے واقعات ایئرٹیل میں 304 میں سے 17، بی ایس این ایل میں 274 میں سے 8، آر جے آئی ایل میں 331 میں سے 12 اور وی آئی ایل میں 230 میں سے 8 ریکارڈ کیے گئے۔ ان واقعات کے مقامات کی تفصیلات بھی منسلک نقشے میں موجود ہیں۔

ڈیٹا ڈاؤن لوڈ اور اپ لوڈ تھروپٹ:

i) ڈیٹا ڈاؤن لوڈ کی کارکردگی (مجموعی):اوسط ڈاؤن لوڈ رفتار ایئرٹیل (5جی/4جی) کے لیے 109.02 میگا بٹس فی سیکنڈ، بی ایس این ایل (4جی) کے لیے 5.73 میگا بٹس فی سیکنڈ، آر جے آئی ایل (5جی/4جی) کے لیے 229.12 میگا بٹس فی سیکنڈ اور وی آئی ایل (5جی/4جی/2جی) کے لیے 25.04 میگا بٹس فی سیکنڈ ریکارڈ کی گئی۔ ڈاؤن لوڈ تھروپٹ کی تفصیلات منسلک نقشے میں فراہم کی گئی ہیں۔

ii) ڈیٹا اپ لوڈ کی کارکردگی (مجموعی):اوسط اپ لوڈ رفتار ایئرٹیل (5جی/4جی) کے لیے 26.02 میگا بٹس فی سیکنڈ، بی ایس این ایل (4جی) کے لیے 2.07 میگا بٹس فی سیکنڈ، آر جے آئی ایل (5جی/4جی) کے لیے 18.19 میگا بٹس فی سیکنڈ اور وی آئی ایل (5جی/4جی/2جی) کے لیے 10.78 میگا بٹس فی سیکنڈ ریکارڈ کی گئی۔ اپ لوڈ تھروپٹ کی تفصیلات منسلک نقشے میں فراہم کی گئی ہیں۔

منسلک نقشے میں سرخ نقطے پر کلک کرکے کال منقطع ہونے اور کال خاموشی کے واقعات کے مقامات دیکھے جا سکتے ہیں۔

آئی ڈی ٹی کے دوران ڈرائیو ٹیسٹ کے راستے اور احاطہ کیے گئے علاقوں کی تفصیلات:-

الف) شہری راستہ:شہری ڈرائیو کے دوران ضلع اُتر کنڑ کے شیرواد، کوڈی باگ، ہٹیکیری، انکولا، مرجان، بھٹکل، اننت واڑی، کاسرکوڈ، کمٹا، دیوی مانے، سرسی، منچیکیری، یلاپور، بھگوتی، امبیکا نگر، ڈانڈیلی، باپیلی، گنیش گڈی اور ہلیال سمیت مختلف علاقوں کا احاطہ کیا گیا۔

ب) ریلوے راستہ:ریلوے ڈرائیو ٹیسٹ بنگلورو سے کاروار تک کے راستے پر کیا گیا، جو حسن، منگلورو، اُڈپی، مُردیشور اور انکولا سے گزرتا ہے۔

ج) ہاٹ اسپاٹس:صارفین کے تجربے کا جائزہ لینے کے لیے انکولا بس اسٹینڈ، بھٹکل بس اسٹینڈ، ڈانڈیلی بس اسٹینڈ، کاروار ضلع اسپتال، ڈانڈیلی سرکاری اسپتال، ہلیال سرکاری اسپتال، ہلیال بس اسٹینڈ، ہوناور بس اسٹینڈ، کاروار بس اسٹینڈ، کمٹا بس اسٹینڈ، سرسی بس اسٹینڈ اور یلاپور بس اسٹینڈ کو ہاٹ اسپاٹس کے طور پر منتخب کیا گیا۔

د) واک ٹیسٹ:19 اور 20 مئی 2026 کو کیے گئے واک ٹیسٹ میں بھٹکل اولڈ ٹاؤن واک وے، کاروار بیچ پرومینیڈ، کمٹا ٹاؤن بازار، مُردیشور بیچ اور مندر واک وے، اور سرسی کے شری ماریکامبا مندر کے اطراف کے علاقوں کا احاطہ کیا گیا تاکہ پیدل چلنے والے علاقوں میں موبائل نیٹ ورک کی کارکردگی کا جائزہ لیا جا سکے۔

اس آئی ڈی ٹی رپورٹ کے نتائج متعلقہ ٹیلی کام سروس فراہم کنندگان (ٹی ایس پیز) کے ساتھ شیئر کر دیے گئے ہیں تاکہ وہ اپنی جانب سے ضروری اصلاحی اقدامات کر سکیں۔ آئی ڈی ٹی کی تفصیلی رپورٹیں ٹرائی کی ویب سائٹ www.trai.gov.in پر دستیاب ہیں۔ مزید معلومات یا وضاحت کے لیے adv.bengaluru@trai.gov.in پر ای میل کی جا سکتی ہے یا ٹرائی کے بنگلورو علاقائی دفتر سے فون نمبر +91-80-22865004 پر رابطہ کیا جا سکتا ہے۔

ضمیمہ کیلئے یہاں کلک کریں

 

*

ش ح۔ع ح۔خ م                                                     

U-No. 28

(रिलीज़ आईडी: 2285397) आगंतुक पटल : 7