પ્રધાનમંત્રી શ્રી નરેન્દ્ર મોદી 17મી જુલાઈ 2026 ના રોજ હરિયાણા, ચંદીગઢ અને પંજાબની મુલાકાત લેશે. આશરે સવારે 11 વાગ્યે, પ્રધાનમંત્રી જિંદ રેલવે સ્ટેશન ખાતે જિંદ અને સોનીપત વચ્ચે ભારતની પ્રથમ હાઇડ્રોજન ટ્રેનને લીલી ઝંડી બતાવી રવાના કરશે. આશરે સવારે 11:30 વાગ્યે, પ્રધાનમંત્રી જિંદના એકલવ્ય સ્ટેડિયમ ખાતે આશરે ₹14,700 કરોડના વિવિધ વિકાસ પ્રોજેક્ટ્સનો શિલાન્યાસ કરશે અને રાષ્ટ્રને સમર્પિત કરશે. તેઓ આ પ્રસંગે જનમેદનીને પણ સંબોધિત કરશે.

ત્યારબાદ, પ્રધાનમંત્રી ચંદીગઢ જશે જ્યાં આશરે બપોરે 1:45 વાગ્યે, તેઓ ₹4,700 કરોડથી વધુના વિવિધ વિકાસ પ્રોજેક્ટ્સનો શિલાન્યાસ અને ઉદ્ઘાટન કરશે. તેઓ આ પ્રસંગે જનમેદનીને પણ સંબોધિત કરશે.

ત્યારપછી, પ્રધાનમંત્રી જલંધરની મુલાકાત લેશે જ્યાં તેઓ ₹5,470 કરોડથી વધુના બહુવિધ વિકાસ પ્રોજેક્ટ્સનો શિલાન્યાસ અને ઉદ્ઘાટન કરશે.

જિંદમાં પીએમ

પ્રધાનમંત્રી જિંદ અને સોનીપત વચ્ચે ભારતની પ્રથમ હાઇડ્રોજન-સંચાલિત ટ્રેનને લીલી ઝંડી બતાવશે, જે રેલવે ક્ષેત્રમાં સ્વચ્છ અને ટકાઉ ગતિશીલતા (મોબિલિટી) અપનાવવા તરફ એક મહત્વપૂર્ણ પગલું દર્શાવે છે. ભારતમાં ડિઝાઇન, એન્જિનિયર્ડ અને ઇન્ટિગ્રેટેડ કરાયેલી આ ટ્રેન સ્વદેશી ટેકનોલોજીનો ઉપયોગ કરીને વિકસાવવામાં આવી છે, જે અદ્યતન રેલવે એન્જિનિયરિંગમાં દેશની વધતી જતી ક્ષમતાઓને પ્રતિબિંબિત કરે છે. આની રજૂઆત સાથે, ભારત હાઇડ્રોજન-સંચાલિત ટ્રેનો કાર્યરત ધરાવતા દેશોના પસંદગીના જૂથમાં સામેલ થશે.

આ ટ્રેન હાઇડ્રોજન ફ્યુઅલ સેલ ટેકનોલોજી દ્વારા સંચાલિત છે, જે ટ્રેનને આગળ ધપાવવા માટે હાઇડ્રોજનને વીજળીમાં રૂપાંતરિત કરે છે. આ પ્રક્રિયા બાય-પ્રોડક્ટ તરીકે માત્ર પાણીની વરાળ ઉત્પન્ન કરે છે, જેના પરિણામે કામગીરી દરમિયાન શૂન્ય કાર્બન ઉત્સર્જન થાય છે.

ડીઝલ ટ્રેનોની તુલનામાં, તેઓ ટેલપાઇપ ઉત્સર્જનને નાબૂદ કરે છે, અશ્મિભૂત ઇંધણ (ફોસિલ ફ્યુઅલ) અને અશ્મિભૂત ઇંધણની આયાત પરની નિર્ભરતા ઘટાડે છે, અને નોંધપાત્ર રીતે ઓછા અવાજ સાથે કાર્ય કરે છે. પરંપરાગત ઇલેક્ટ્રિક ટ્રેનોથી વિપરીત, તેમને સતત ઓવરહેડ ઇલેક્ટ્રિફિકેશન ઇન્ફ્રાસ્ટ્રક્ચરની જરૂર પડતી નથી, કારણ કે વીજળી હાઇડ્રોજન ફ્યુઅલ સેલ દ્વારા ટ્રેનની અંદર જ ઉત્પન્ન થાય છે, જે તેમને એક સ્વચ્છ અને કાર્યક્ષમ ઉકેલ બનાવે છે. ગ્રીન હાઇડ્રોજનનો ઉપયોગ અશ્મિભૂત ઇંધણ આધારિત થર્મલ પાવર પ્લાન્ટ્સમાંથી ઉત્પન્ન થતી વીજળી પરની નિર્ભરતા પણ ઘટાડે છે, જે ટકાઉ પરિવહન તરફ ભારતના સંક્રમણને ટેકો આપે છે.

ભારતની હાઇડ્રોજન ટ્રેન 10-કોચનું કોન્ફિગરેશન ધરાવે છે, જે તેને અત્યાર સુધી વિકસિત કરવામાં આવેલી સૌથી લાંબી હાઇડ્રોજન-સંચાલિત પેસેન્જર ટ્રેનોમાંની એક બનાવે છે. તે 3,200 HP ની પ્રોપલ્શન સિસ્ટમ દ્વારા સંચાલિત છે, જે તેને કાર્યરત સૌથી શક્તિશાળી હાઇડ્રોજન-સંચાલિત ટ્રેનસેટ્સમાંનું એક બનાવે છે.

પ્રધાનમંત્રી હરિયાણામાં ₹12,470 કરોડથી વધુના નેશનલ હાઇવે પ્રોજેક્ટ્સ રાષ્ટ્રને સમર્પિત કરશે તેમજ તેનો શિલાન્યાસ પણ કરશે.

પ્રધાનમંત્રી આશરે ₹9,680 કરોડના ખર્ચે વિકસાવવામાં આવેલો 157.92 કિલોમીટર લાંબો ફોર-લેન, સંપૂર્ણ એક્સેસ-કંટ્રોલ્ડ દિલ્હી-અમૃતસર-કટરા એક્સપ્રેસવે (પેકેજ 1 થી 5) રાષ્ટ્રને સમર્પિત કરશે. આ ગ્રીનફિલ્ડ કોરિડોર 667 કિલોમીટર લાંબા દિલ્હી-અમૃતસર-કટરા એક્સપ્રેસવેનો એક ભાગ છે. આ એક્સપ્રેસવે દિલ્હી અને કટરા વચ્ચેનો મુસાફરીનો સમય આશરે 14 કલાકથી ઘટાડીને લગભગ 6 કલાક કરશે, જ્યારે દિલ્હી-અમૃતસરની મુસાફરી આશરે 8 કલાકથી ઘટાડીને 4 કલાક કરશે. આ પ્રોજેક્ટથી NH-44 (જીટી રોડ) પરનો ટ્રાફિક નોંધપાત્ર રીતે ઓછો થવાની, શ્રી માતા વૈષ્ણો દેવી માટે શ્રદ્ધાળુઓ અને પ્રવાસીઓની અવરજવરને વેગ મળવાની અને આ કોરિડોર પર ઔદ્યોગિક તેમજ લોજિસ્ટિક્સ વિકાસ ઝડપી બનવાની અપેક્ષા છે.

પ્રધાનમંત્રી NH-7 અને NH-344 પર 33.81 કિલોમીટર લાંબો ફોર-લેન, આંશિક રીતે એક્સેસ-કંટ્રોલ્ડ અંબાલા-કાલા અંબ હાઇવે પણ સમર્પિત કરશે. આ હાઇવે અંબાલા શહેરી વિસ્તાર અને કાલા અંબ ઔદ્યોગિક પટ્ટા વચ્ચેની કનેક્ટિવિટી મજબૂત કરશે, હરિયાણા અને હિમાચલ પ્રદેશ વચ્ચેના રોડ જોડાણો સુધારશે, પહાડી વિસ્તારોમાં પ્રવાસીઓની અવરજવરને સરળ બનાવશે અને કાલા અંબ વિસ્તારના ઉદ્યોગો માટે લોજિસ્ટિક્સ ખર્ચ ઘટાડશે.

સમર્પિત કરવામાં આવનારો અન્ય એક મોટો પ્રોજેક્ટ NH-352A પર 40.60 કિલોમીટર લાંબો જિંદ-ગોહાના ગ્રીનફિલ્ડ હાઇવે છે. આ નવો હાઇવે જિંદ અને ગોહાના વચ્ચેનો મુસાફરીનો સમય આશરે બે કલાકથી ઘટાડીને માત્ર 40 મિનિટ કરશે, જે મુસાફરો, માલસામાન પરિવહન અને કૃષિ ક્ષેત્રે મહત્વપૂર્ણ એવા જિંદ-ગોહાના ક્ષેત્રને લાભ આપશે અને સાથે રોહતક, પાનિપત અને દિલ્હી-એનસીઆર સાથેની કનેક્ટિવિટીમાં સુધારો કરશે.

પ્રધાનમંત્રી 24.27 કિલોમીટર લાંબા હાંસી-બરવાલા બ્રાઉનફિલ્ડ હાઇવે પ્રોજેક્ટનો શિલાન્યાસ પણ કરશે, જે હાલના કેરેજવેને પેવ્ડ શોલ્ડર્સ સાથે 2/4-લેન કોન્ફિગરેશનમાં અપગ્રેડ કરશે.

પ્રધાનમંત્રી કુરુક્ષેત્રમાં એલિવેટેડ રેલવે ટ્રેક સમર્પિત કરશે, જે એક મોટો શહેરી ઇન્ફ્રાસ્ટ્રક્ચર પ્રોજેક્ટ છે જે શહેરમાં રેલવે ક્રોસિંગ પરના લાંબા સમયના ટ્રાફિક જામની સમસ્યાને દૂર કરશે. આ પ્રોજેક્ટ વાહનોની સરળ અવરજવર સુનિશ્ચિત કરશે, માર્ગ સલામતીમાં સુધારો કરશે અને રેલવે તેમજ રોડ પરિવહન પ્રણાલી બંનેની કાર્યક્ષમતામાં વધારો કરશે.

પ્રધાનમંત્રી અગ્રણી તબીબી સંસ્થાઓ - પંડિત નેકી રામ શર્મા ગવર્નમેન્ટ મેડિકલ કોલેજ, ભિવાની; મહર્ષિ ચ્યવન મેડિકલ કોલેજ અને રાવ તુલા રામ હોસ્પિટલ, કોરિયાવસ, નારનૌલ પણ રાષ્ટ્રને સમર્પિત કરશે. આ સંસ્થાઓ હરિયાણામાં ગુણવત્તાયુક્ત તબીબી શિક્ષણ સુધીની પહોંચ વિસ્તારશે, એમબીબીએસ (MBBS) બેઠકોની સંખ્યામાં વધારો કરશે, નિષ્ણાત હેલ્થકેર પ્રોફેશનલ્સની ઉપલબ્ધતામાં સુધારો કરશે અને લોકોને તેમના ઘરની નજીક વધુ સારી તબીબી સેવાઓ મેળવવા સક્ષમ બનાવશે, જેથી રાજ્યની હેલ્થકેર ઇકોસિસ્ટમ મજબૂત થશે.

આ ક્ષેત્રના સાંસ્કૃતિક ઇન્ફ્રાસ્ટ્રક્ચરને વધુ સમૃદ્ધ બનાવતા, પ્રધાનમંત્રી કુરુક્ષેત્રમાં શીખ મ્યુઝિયમનો શિલાન્યાસ કરશે. આ મ્યુઝિયમ આધુનિક ટેકનોલોજીના ઉપયોગ દ્વારા શીખ ધર્મનો ઇતિહાસ, શીખ ગુરુઓના ઉપદેશો, તેમની હિંમત, બલિદાનો અને ભારતની સભ્યતા તેમજ સંસ્કૃતિમાં શીખ સમુદાયના અમૂલ્ય યોગદાનને પ્રદર્શિત કરશે.

ચંદીગઢમાં પીએમ

પ્રધાનમંત્રી હેલ્થકેર, શિક્ષણ અને રોડ ઇન્ફ્રાસ્ટ્રક્ચરને આવરી લેતા ₹4,700 કરોડથી વધુના બહુવિધ પ્રોજેક્ટ્સનું ઉદ્ઘાટન અને શિલાન્યાસ કરશે.

પ્રધાનમંત્રી પોસ્ટ ગ્રેજ્યુએટ ઇન્સ્ટિટ્યૂટ ઓફ મેડિકલ એજ્યુકેશન એન્ડ રિસર્ચ (PGIMER), ચંદીગઢ ખાતે એડવાન્સ મધર એન્ડ ચાઇલ્ડ સેન્ટર અને એડવાન્સ ન્યુરોસાયન્સ સેન્ટરનું ઉદ્ઘાટન કરશે.

એડવાન્સ મધર એન્ડ ચાઇલ્ડ સેન્ટરને હાઇ-રિસ્ક (જોખમી) ગર્ભાવસ્થા, ગંભીર રીતે બીમાર નવજાત શિશુઓ અને વિશિષ્ટ સારવારની જરૂરિયાતવાળા બાળકો માટે વ્યાપક ટર્શિયરી હેલ્થકેર સેવાઓ પૂરી પાડવા માટે ડિઝાઇન કરવામાં આવ્યું છે. 300 બેડ અને અદ્યતન તબીબી સુવિધાઓથી સજ્જ, આ કેન્દ્ર માતૃત્વ અને બાળ આરોગ્ય સંભાળ સેવાઓને નોંધપાત્ર રીતે મજબૂત કરશે અને સમગ્ર ક્ષેત્રના હજારો પરિવારોને લાભ આપશે.

એડવાન્સ ન્યુરોસાયન્સ સેન્ટર એક જ છત નીચે ન્યુરોલોજી, ન્યુરોસર્જરી, ન્યુરો-ક્રિટિકલ કેર અને અદ્યતન નિદાન સુવિધાઓમાં સંકલિત સેવાઓ પૂરી પાડશે. તે જટિલ ન્યુરોલોજીકલ વિકૃતિઓથી પીડાતા દર્દીઓ માટે સમયસર અને વિશ્વસ્તરીય સારવાર સુનિશ્ચિત કરશે અને સાથે જ ન્યુરોસાયન્સમાં તબીબી સંશોધન, શિક્ષણ અને તાલીમને મજબૂત કરશે.

પ્રધાનમંત્રી પીજીઆઇએમઇઆર (PGIMER), ચંદીગઢ ખાતે પ્રધાનમંત્રી આયુષ્માન ભારત હેલ્થ ઇન્ફ્રાસ્ટ્રક્ચર મિશન (PM-ABHIM) હેઠળ 150-બેડના અદ્યતન ક્રિટિકલ કેર બ્લોકનો શિલાન્યાસ પણ કરશે. આ સુવિધા કટોકટીની સજ્જતા, સઘન સારવાર (ઇન્ટેન્સિવ કેર) સેવાઓ અને આપત્તિ વ્યવસ્થાપન ક્ષમતાઓમાં નોંધપાત્ર વધારો કરશે અને સાથે આ ક્ષેત્રના એકંદર હેલ્થકેર ઇન્ફ્રાસ્ટ્રક્ચરને મજબૂત કરશે.

પ્રધાનમંત્રી ચંદીગઢમાં શૈક્ષણિક સંસ્થાઓ સંબંધિત કેટલાક ઇન્ફ્રાસ્ટ્રક્ચર પ્રોજેક્ટ્સનું ઉદ્ઘાટન અને શિલાન્યાસ કરશે. આમાં પંજાબ એન્જિનિયરિંગ કોલેજ ખાતે કુરુક્ષેત્ર બોયઝ હોસ્ટેલ એન્ડ મેસનું ઉદ્ઘાટન, ગવર્નમેન્ટ કોલેજ, સેક્ટર 46 ખાતે હોસ્ટેલ બ્લોકનું ઉદ્ઘાટન અને પંજાબ એન્જિનિયરિંગ કોલેજ ખાતે રિસર્ચ સ્કોલર્સ હોસ્ટેલનો શિલાન્યાસ સામેલ છે. આ સુવિધાઓ શૈક્ષણિક ઇન્ફ્રાસ્ટ્રક્ચરને મજબૂત કરશે, વિદ્યાર્થીઓ અને સંશોધકો માટે રહેણાંક સુવિધાઓમાં સુધારો કરશે અને ઉચ્ચ શિક્ષણ માટે વધુ સારું વાતાવરણ ઊભું કરશે.

પ્રધાનમંત્રી આ ક્ષેત્રમાં કનેક્ટિવિટી સુધારવાના ઉદ્દેશ્ય સાથે મોટા રોડ ઇન્ફ્રાસ્ટ્રક્ચર પ્રોજેક્ટ્સનું ઉદ્ઘાટન અને શિલાન્યાસ કરશે. તેઓ મોહાલી જિલ્લામાં આઈટી સિટીથી કુરાલી સુધીના 6-લેન ગ્રીનફિલ્ડ હાઇવેનું ઉદ્ઘાટન કરશે, જે આ ક્ષેત્ર માટે એક મહત્વપૂર્ણ ઇન્ફ્રાસ્ટ્રક્ચર પ્રોજેક્ટ છે. આ હાઇવે મોહાલી, ખરાર અને કુરાલી વચ્ચેનો મુસાફરીનો સમય ઘટાડશે અને પંજાબ, હરિયાણા, હિમાચલ પ્રદેશ અને જમ્મુ તેમજ કાશ્મીર વચ્ચે બહેતર કનેક્ટિવિટી પૂરી પાડશે.

પ્રધાનમંત્રી અંબાલા-ચંદીગઢ ગ્રીનફિલ્ડ હાઇવે (NH-205A) ના PR-7 સ્પર માટે પણ શિલાન્યાસ કરશે, જે 10.3 કિલોમીટર લાંબો ગ્રીનફિલ્ડ કોરિડોર છે જે લાંબા અંતરના ટ્રાફિકને ઝીરકપુરના શહેરી વિસ્તારોને બાયપાસ કરવા સક્ષમ બનાવશે અને ઝીરકપુર બાયપાસને સીધો એરોસિટી, ચંદીગઢ સાથે જોડશે.

જલંધરમાં પીએમ

પ્રધાનમંત્રી આ ક્ષેત્રમાં કનેક્ટિવિટી મજબૂત કરવા, મુસાફરોની સુવિધામાં સુધારો કરવા અને આર્થિક વિકાસને વેગ આપવાના ઉદ્દેશ્ય સાથે ₹5,470 કરોડથી વધુના રેલવે અને રોડ ઇન્ફ્રાસ્ટ્રક્ચર પ્રોજેક્ટ્સનું ઉદ્ઘાટન અને શિલાન્યાસ કરશે.

પ્રધાનમંત્રી અમૃત ભારત સ્ટેશન યોજના હેઠળ જલંધર કેન્ટ સહિત 75 પુનર્વિકસિત રેલવે સ્ટેશનોનું ઉદ્ઘાટન કરશે. 20 રાજ્યોમાં 75 અમૃત સ્ટેશનોનું ઉદ્ઘાટન એ અમૃત ભારત સ્ટેશન યોજના હેઠળ અન્ય એક મહત્વપૂર્ણ સીમાચિહ્નરૂપ છે, જે વિશ્વના સૌથી મોટા સ્ટેશન પુનર્વિકાસ કાર્યક્રમોમાંનો એક છે. આશરે ₹1,570 કરોડના ખર્ચે વિકસાવવામાં આવેલા આ સ્ટેશનોને આધુનિક, મુસાફરોને અનુકૂળ સુવિધાઓમાં પરિવર્તિત કરવામાં આવ્યા છે. 'વિરાસત ભી, વિકાસ ભી' ની ભાવના સાથે પુનર્વિકસિત આ સ્ટેશનોમાં સ્થાનિક સંસ્કૃતિ, ધરોહર અને સ્થાપત્ય (આર્કિટેક્ચર) ને પ્રતિબિંબિત કરતા તત્વોનો સમાવેશ કરવામાં આવ્યો છે.

પ્રધાનમંત્રી નાંગલ ડેમ-તલવાડા-મુકેરિયા નવી રેલ લાઇન પ્રોજેક્ટના ભાગ રૂપે આશરે ₹830 કરોડના ખર્ચે નિર્મિત કૌલતપુર ચોક-કાર્તોલી નવી રેલ લાઇનનું પણ ઉદ્ઘાટન કરશે. તે હોશિયારપુર અને ઉના જિલ્લાઓને લાભ આપીને પંજાબ અને હિમાચલ પ્રદેશ વચ્ચેની રેલ કનેક્ટિવિટીને નોંધપાત્ર રીતે મજબૂત કરશે. આ નવી રેલ લાઇન શ્રી આનંદપુર સાહિબ અને મા ચિંતપૂર્ણી મંદિર જેવા મહત્વના ધાર્મિક સ્થળો માટે કનેક્ટિવિટી પૂરી પાડશે, જ્યારે મુસાફરોને વધુ ઝડપી, સુરક્ષિત અને વધુ વિશ્વસનીય પરિવહન મોડ પ્રદાન કરીને અંતરિયાળ વિસ્તારો સુધીની પહોંચમાં વધારો કરશે.

પ્રધાનમંત્રી કાર્તોલી-અંબાલા ટ્રેન સેવાનો પ્રારંભ કરાવશે, જે પંજાબ, હરિયાણા અને હિમાચલ પ્રદેશમાં કનેક્ટિવિટી સુધારશે. પ્રધાનમંત્રી અમૃતસર (છેહરતા)-વારાણસી ટ્રેન સેવાનો પણ પ્રારંભ કરાવશે, જે ભારતના બે સૌથી પૂજનીય આધ્યાત્મિક અને સાંસ્કૃતિક કેન્દ્રો વચ્ચે સીધો રેલ સંપર્ક સ્થાપિત કરશે.

રાજ્યમાં રોડ ઇન્ફ્રાસ્ટ્રક્ચરને વધુ મજબૂત કરતા, પ્રધાનમંત્રી ₹3,070 કરોડથી વધુના નેશનલ હાઇવે પ્રોજેક્ટ્સનું ઉદ્ઘાટન અને શિલાન્યાસ કરશે.

પ્રધાનમંત્રી ફોર-લેન ગ્રીનફિલ્ડ દિલ્હી-અમૃતસર-કટરા એક્સપ્રેસવેનું 30.9 કિલોમીટર લાંબુ પેકેજ-6 રાષ્ટ્રને સમર્પિત કરશે. આ સેક્શન ખાસ કરીને ભારે વાહનો માટે સરળ અને ઝડપી મુસાફરીની સુવિધા આપશે, જ્યારે ઇંધણનો વપરાશ અને વાહન સંચાલન ખર્ચ ઘટાડશે.

પ્રધાનમંત્રી 25.2 કિલોમીટર લાંબા સિક્સ-લેન ગ્રીનફિલ્ડ સધર્ન લુધિયાણા બાયપાસના વિકાસ માટે શિલાન્યાસ પણ કરશે. આ પ્રોજેક્ટ લુધિયાણા અને ભટિંડા વચ્ચેનું મુસાફરીનું અંતર અને સમય ઘટાડશે, જ્યારે અન્ય અગ્રણી આર્થિક કેન્દ્રો સાથેની કનેક્ટિવિટીમાં પણ સુધારો કરશે.

SM/IJ/JD