زراعت و کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے آج مغربی بنگال کے دورے کے دوران کولکاتا میں ایک اعلیٰ سطح کے جائزہ اجلاس کی صدارت کی۔ اجلاس میں جناب شوبھیندو ادھیکاری، ریاستی کابینہ کے ارکان اور مرکزی و ریاستی حکومتوں کے سینئر افسران نے شرکت کی۔ ریاست کی ترقی کو تیز رفتار بنانے کے لیے اجلاس میں کئی اہم فیصلے کیے گئے اور متعدد اعلانات بھی کیے گئے۔

جناب شیوراج سنگھ چوہان نے جناب شوبھیندو ادھیکاری کے ساتھ مشترکہ پریس کانفرنس سے خطاب کرتے ہوئے کہا کہ آتم نربھر بھارت اور ترقی یافتہ بھارت کے وژن کی تکمیل ترقی یافتہ مغربی بنگال کے بغیر ممکن نہیں۔ انہوں نے ریاست کے اپنے سابقہ دوروں کا ذکر کرتے ہوئے کہا کہ ایک وقت تھا جب ترقیاتی سرگرمیاں تعطل کا شکار تھیں اور مرکزی حکومت کی فلاحی اسکیموں کے فوائد مؤثر انداز میں عوام تک نہیں پہنچ پا رہے تھے۔ تاہم وزیر اعظم جناب نریندر مودی کی رہنمائی اور ریاست کی نئی قیادت میں مغربی بنگال اب ترقی اور خوشحالی کے ایک نئے دور کی جانب گامزن ہے۔

مرکزی وزیر جناب شیوراج سنگھ چوہان نے پریس کانفرنس سے خطاب کرتے ہوئے کہا کہ مرکزی اور ریاستی حکومتیں مغربی بنگال میں بنیادی ڈھانچے کی ترقی کو تیز رفتار بنانے کے لیے مشترکہ طور پر کام کر رہی ہیں۔ اس سلسلے میں سڑکوں اور شاہراہوں، ریلوے، میٹرو، پٹرولیم و قدرتی گیس، کوئلہ اور محنت و روزگار کے شعبوں سے متعلق 82 ہزار کروڑ روپے سے زائد مالیت کے 19 بڑے بنیادی ڈھانچے کے منصوبوں کا جائزہ لیا گیا۔

انہوں نے بتایا کہ زمین کے حصول، بازآبادکاری و بازتصفیہ (آر اینڈ آر)، یوٹیلیٹی خدمات کی منتقلی، جنگلاتی منظوریوں اور مختلف محکموں کے درمیان تال میل سے متعلق طویل عرصے سے زیر التوا معاملات پر تفصیلی تبادلۂ خیال کیا گیا۔ متعلقہ مرکزی وزارتوں، ریاستی حکومت، ضلعی انتظامیہ اور عمل درآمد کرنے والے اداروں کو ہدایت دی گئی کہ وہ باہمی تعاون کے ساتھ مقررہ مدت کے اندر ان مسائل کا حل یقینی بنائیں۔ انہوں نے کہا کہ کئی پرانے منصوبوں میں حائل رکاوٹیں دور کی جا رہی ہیں تاکہ ان پر جلد عمل درآمد ہو اور عوام کو ان کے فوائد بروقت حاصل ہوں۔

جناب شیوراج سنگھ چوہان نے کہا کہ بنیادی ڈھانچے کے منصوبے اقتصادی ترقی، بہتر رابطہ کاری، روزگار کے مواقع اور عوام کے معیارِ زندگی میں بہتری کی بنیاد ہوتے ہیں۔ انہوں نے تمام متعلقہ فریقوں پر زور دیا کہ وہ قریبی اشتراک کے ساتھ کام کریں اور منصوبوں پر تیزی سے عمل درآمد کے لیے بروقت فیصلے کریں۔

انہوں نے وزیر اعظم جناب نریندر مودی کی جانب سے پراگتی  پلیٹ فارم کے ذریعے بنیادی ڈھانچے کے منصوبوں کی باقاعدہ نگرانی کا حوالہ دیتے ہوئے مغربی بنگال میں ریاستی سطح کے پروجیکٹ مانیٹرنگ گروپ (اسٹیٹ پی ایم جی) کے قیام کی بھی تجویز دی۔ ان کا کہنا تھا کہ اس نظام سے منصوبوں کی نگرانی مزید مؤثر ہوگی، مختلف محکموں کے درمیان بہتر تال میل قائم ہوگا اور مرکزی و ریاستی حکومتوں کے ترقیاتی منصوبوں پر تیزی سے عمل درآمد ممکن ہو سکے گا۔

مرکزی وزیر جناب شیوراج سنگھ چوہان نے دیہی ترقی کے لیے مرکزی حکومت کے عزم کا اعادہ کرتے ہوئے اعلان کیا کہ مغربی بنگال کے لیے 8,508 کروڑ روپے سے زائد کی منظوری دی گئی ہے۔ ریاستی حکومت کے حصے کو شامل کرنے کے بعد 12,064 کروڑ روپے سے زیادہ کی مجموعی رقم 31 مارچ تک پنچایتوں کے ذریعے براہِ راست خرچ کی جائے گی، تاکہ روزگار کے مواقع پیدا کیے جا سکیں اور دیہی علاقوں کی ہمہ جہت ترقی کو فروغ دیا جا سکے۔

انہوں نے کہا کہ حکومت کا مقصد اب صرف 100 دن کے روزگار کی ضمانت تک محدود نہیں، بلکہ اسے بڑھا کر 125 دن تک لے جانا ہے، تاکہ دیہی خاندانوں کو زیادہ آمدنی کا تحفظ حاصل ہو اور قدرتی آفات یا مقامی ہنگامی حالات کے دوران بھی اضافی روزگار کے مواقع فراہم کیے جا سکیں۔

مرکزی وزیر نے وی بی-جی رام جی ایکٹ، 2025 کا بھی ذکر کیا، جو یکم جولائی سے نافذ ہو چکا ہے اور دیہی روزگار اور ذریعۂ معاش کے لیے ایک نیا قومی فریم ورک فراہم کرتا ہے۔ انہوں نے کہا کہ اس فریم ورک کے تحت مغربی بنگال میں پائیدار دیہی اثاثوں کی تعمیر پر خصوصی توجہ دی جائے گی، جن میں دیہی سڑکیں، تالاب، چھوٹے آبپاشی کے منصوبے، اسکول اور آنگن واڑی مراکز کی عمارتیں شامل ہیں۔

مرکزی وزیر جناب شیوراج سنگھ چوہان نے پردھان منتری آواس یوجنا (دیہی) کے تحت مغربی بنگال کے لیے عبوری طور پر ایک لاکھ مکانات کی منظوری کا اعلان کیا۔ انہوں نے کہا کہ شدید بارشوں کے باعث مستحقین کا سروے مقررہ مدت میں مکمل نہیں ہو سکا، اس لیے سروے کی آخری تاریخ بڑھا کر 15 اگست کر دی گئی ہے، تاکہ تمام اہل خاندانوں کی درست نشاندہی کی جا سکے اور کوئی بھی مستحق فرد اس سہولت سے محروم نہ رہے۔

انہوں نے متعلقہ افسران کو ہدایت دی کہ مستحقین کے سروے اور زمینی تصدیق کا عمل تیز کیا جائے، جبکہ تصدیق مکمل ہوتے ہی مکانات کی منظوری اور حوالگی کا عمل فوری شروع کیا جائے تاکہ اہل خاندانوں کو جلد از جلد مستقل رہائش فراہم کی جا سکے۔

خواتین کے اپنی مدد آپ گروپوں کے لیے 295 کروڑ روپے کی مالی معاونت

دین دیال انتیودیہ یوجنا کے تحت جناب شیوراج سنگھ چوہان نے مغربی بنگال میں خواتین کے اپنی مدد آپ گروپوں کے لیے اضافی مالی معاونت کا اعلان کیا۔ اس پیکیج میں 245 کروڑ روپے بینک قرضوں اور 50 کروڑ روپے کمیونٹی سرمایہ کاری فنڈ کے تحت فراہم کیے جائیں گے۔

انہوں نے کہا کہ دیہی خواتین بچت، قرضہ جاتی سرگرمیوں اور چھوٹے کاروباروں کے ذریعے گھریلو معیشت کو مضبوط بنا رہی ہیں۔ یہ اضافی مالی امداد انہیں پیداوار، پروسیسنگ، اقدار میں اضافہ اور مارکیٹنگ میں زیادہ مؤثر کردار ادا کرنے کے قابل بنائے گی، جس سے روزگار کے نئے مواقع پیدا ہوں گے اور دیہی آمدنی میں اضافہ ہوگا۔

مالدہ کو قومی کلین پلانٹ نیٹ ورک میں شامل کیا جائے گا

مرکزی وزیر نے ملک بھر میں نو کلین پلانٹ مراکز قائم کرنے کے قومی منصوبے کا حوالہ دیتے ہوئے کہا کہ آم سمیت دیگر پھلوں کی پیداوار کے لیے مشہور مالدہ کو بھی کلین پلانٹ نیٹ ورک میں شامل کیا جائے گا۔

انہوں نے بتایا کہ مجوزہ مالدہ کلین پلانٹ مرکز میں آم، لیچی اور دیگر پھلدار فصلوں کے لیے بیماریوں سے پاک اور اعلیٰ معیار کا پودا تیار کیا جائے گا، جس سے کسانوں کو معیاری پودے دستیاب ہوں گے، پیداوار میں اضافہ ہوگا اور برآمدی معیار کے پھل پیدا کیے جا سکیں گے۔

انہوں نے مزید کہا کہ کلین پلانٹ پروگرام کے تحت جدید نرسری نظام بھی قائم کیا جا رہا ہے، جس کے لیے بڑی نرسریوں کو 3 کروڑ روپے اور درمیانی درجے کی نرسریوں کو ڈیڑھ کروڑ روپے تک کی مالی معاونت فراہم کی جائے گی، تاکہ ہر سال لاکھوں بیماریوں سے پاک پودے کسانوں تک پہنچائے جا سکیں۔

دھان، مکئی اور آرکڈ کی اقداری سلسلے، مشرقی بھارت کے لیے سیڈ ہب

جناب شیوراج سنگھ چوہان نے اعلان کیا کہ مغربی بنگال کے اہم دھان پیدا کرنے والے علاقوں کے لیے خصوصی منصوبوں کی منظوری دی گئی ہے، جن کا مقصد غذائیت، اقداری سلسلے اور پروسیسنگ کے بنیادی ڈھانچے کو مضبوط بنانا ہے۔

انہوں نے کہا کہ ان منصوبوں کے تحت غذائیت سے بھرپور دھان کی اقسام، مکئی کے بیجوں کی پیداوار، ذخیرہ، پروسیسنگ اور اقدار میں اضافے پر خصوصی توجہ دی جائے گی، تاکہ کسانوں کو بہتر قیمتیں اور زیادہ مستحکم منڈیاں میسر آ سکیں۔

انہوں نے مزید اعلان کیا کہ مغربی بنگال کو مشرقی بھارت کا سیڈ ہب بنایا جائے گا۔ اس مقصد کے لیے ریاستی حکومت کے ساتھ آلو کے بیج، ہائبرڈ مکئی کے بیج اور دیگر فصلوں کے بیجوں کی پیداوار سے متعلق مفاہمت ناموں پر دستخط کیے جا چکے ہیں۔

انہوں نے بتایا کہ آرکڈ کی کاشت اور باغبانی سے متعلق منصوبوں کی بھی منظوری دی گئی ہے، جس سے موزوں موسمی علاقوں کے کسان زیادہ آمدنی والی پھولوں اور باغبانی کی فصلوں کی کاشت کی طرف راغب ہوں گے اور ان کی آمدنی میں اضافہ ہوگا۔

سائنسی بنیادوں پر زرعی روڈ میپ تیار کیا جا رہا ہے

مرکزی وزیر نے بتایا کہ زراعتی ریسرچ کی بھارتی کونسل (آئی سی اے آر)، ریاستی زرعی جامعات اور زرعی سائنس دان مشترکہ طور پر مغربی بنگال کے لیے سائنسی زرعی روڈ میپ تیار کر رہے ہیں۔

انہوں نے کہا کہ اس روڈ میپ کے ذریعے موسمی حالات، مٹی کی نوعیت، پانی کی دستیابی اور مقامی وسائل کو مدنظر رکھتے ہوئے ہر علاقے کے لیے موزوں فصلوں کی منصوبہ بندی کی جائے گی، جبکہ جدید ٹیکنالوجی اور ویلیو چین ماڈلز کی سفارش بھی کی جائے گی تاکہ زرعی پیداوار میں زیادہ سے زیادہ اضافہ ممکن ہو۔

انہوں نے مزید کہا کہ دھان سے متعلق تحقیقی اداروں کو مراکزِ امتیاز میں تبدیل کرنے کی کوششیں بھی جاری ہیں، تاکہ مغربی بنگال دھان، آلو اور مکئی جیسی فصلوں کی تحقیق میں ایک نمایاں ریاست کے طور پر ابھر سکے۔

پردھان منتری فصل بیمہ یوجنا اور کسان کریڈٹ کارڈ کی توسیع

جناب شیوراج سنگھ چوہان نے اعلان کیا کہ مغربی بنگال کے زیادہ سے زیادہ کسانوں کو پردھان منتری فصل بیمہ یوجنا کے دائرے میں لایا جائے گا تاکہ قدرتی آفات سے ہونے والے فصلی نقصانات سے انہیں مؤثر تحفظ حاصل ہو سکے۔

انہوں نے کہا کہ کسان کریڈٹ کارڈ (کے سی سی) تک کسانوں کی رسائی اب بھی محدود ہے، اس لیے نبارڈ اور بینکوں کے اشتراک سے دیہی سطح پر خصوصی کیمپ منعقد کیے جائیں گے تاکہ زیادہ سے زیادہ کسانوں کو سستے ادارہ جاتی قرضے دستیاب ہوں اور غیر رسمی قرض دہندگان پر انحصار کم ہو۔

انہوں نے مزید کہا کہ قومی قدرتی کھیتی مشن، پردھان منتری دھن-دھانیہ کرشی یوجنا، ڈیجیٹل ایگری ٹیک اور غذائیت کے فروغ سے متعلق پروگرام مغربی بنگال کے زرعی شعبے میں نمایاں تبدیلی لائیں گے۔

پریس کانفرنس کے اختتام پر جناب شیوراج سنگھ چوہان نے کہا کہ ایک وقت تھا جب مغربی بنگال میں ترقی کا عمل رکا ہوا تھا، لیکن اب جناب سویندو ادھیکاری کی قیادت اور وزیر اعظم جناب نریندر مودی کی رہنمائی میں ریاست ترقی یافتہ مغربی بنگال کی جانب گامزن ہے۔ انہوں نے یقین دلایا کہ مرکزی حکومت، ریاستی حکومت کے ساتھ قریبی اشتراک میں کام کرتے ہوئے مغربی بنگال کی ترقی کو مزید رفتار دے گی اور اسے ملک کی ترقی یافتہ ریاستوں میں شامل کرنے کے لیے ہر ممکن تعاون فراہم کرے گی۔

************

ش ح ۔   م  د ۔  م  ص

(U :9941  )