U Myntri Khynnah ka Sorkar Pdeng (Independent Charge) na ka bynta ka Science & Technology and Earth Sciences, bad u Myntri Khynnah ha ka Prime Minister's Office, Personnel, Public Grievances & Pensions, Atomic Energy and Space, Dr. Jitendra Singh u la ong ba ka North Eastern Space Applications Centre (NESAC) ka la kylla sha ka jaka treikam kaba kongsan kaba kyrshan ia ki jingthmu ba kongsan jong ka ri bad ka jingkiew ha ka imlang sahlang bad ka ioh ka kot jong ka thain shatei lammihngi lyngba ka jingpyndonkam ia ka teknoloji ba iadei bad ka kam haw haw.

U Dr. Jitendra Singh u la ong ba ka Sorkar Pdeng ka nohsynniang ha ka geospatial mapping jong u pud u sam jong ka India bad Myanmar bad kumjuh ruh ïa ki pud u sam hapdeng ki jylla ha ka thaiñ shatei lammihngi, katba ha kajuh ka por ka pyntreikam ïa ki projek bapher bapher kiba la pynïaid da ka teknoloji ha ka rep ka riang, ka jingiada na ki jingjia lynshop ki bor ka mariang, ka jingiada ia ki jingdon jingem ka mariang, ki tyllong um bad ka jingsynshar, da kaba wanrah ia ki jingmyntoi jong ka prokram ba iadei bad ka kam haw haw jong ka India kham jan sha ki paidbah.

U Dr. Jitendra Singh u la kren ïa kine ha ka jingleit jngoh jong u ïa ka North Eastern Space Applications Centre (NESAC) kaba don ha Umiam, Meghalaya. La pdiang sngewbha ïa u da u Dr. S.P. Aggarwal, Director, NESAC, uba la ai ka jingkren kaba bniah halor ki jingjop jong ka Centre bad ki prokram kiba dang ïaid shakhmat. Ka jingpyni ka kynthup jan 130 tylli ki projek, kynthup ïa kumba 50 tylli kiba dang shu dep bad 78 tylli ki sienjam kiba dang ïaid shakhmat kiba kynthup ïa ka rep ka riang, ki khlaw ki btap, ki tyllong um, ki geoscience, ka jingthmu na ka bynta ki jaka sor bad ki thaiñ, ka geoinformatics bad ka information technology, ki jingiasoh lyngba ki satellite, ki UAV application, space and atmospheric sciences, ka jingkyrshan ia ka jingiada na ki jinglynshop ki bor ka mariang bad ka jingpynsaphriang jingtip bad ki sienjam ban kyntiew ia ka bor treikam ha kylleng ka thain shatei lammihngi.

Haba ai jingiaroh ia ka bynta kaba nang kiew jong ka NESAC ha kaba pynkylla ïa ki teknoloji ba iadei bad ka kam haw haw sha ki lad na ka bynta ka roi ka par kiba lah ban pyntreikam, u Dr. Jitendra Singh u la ong ba ka Centre ka la paw kum ka jingpyniasoh kaba kongsan hapdeng ki bor kiba thymmai katkum ka jingstad saian bad ki jingangnud ia ka roi ka par jong phra tylli ki Jylla jong ka thaiñ Shatei Lammihngi. U la ong ba ka jingiadei kaba nang kiew jong ka jaka treikam bad ki Sorkar Jylla ka la plie lad ia ka teknoloji ba iadei bad ka kam haw haw ban long ka atiar kaba treikam bha na ka bynta ka jingthmu, ka jingsynshar, ka jingiada ia ki jingdon jingem bad ka jingai jingshakri na ka bynta ki paidbah.

U Myntri u la kyntu ïa ka jingïatreilang kaba kham jan hapdeng ka NESAC, ka North East Cane and Bamboo Development Council (NECBDC) bad ki Sorkar Jylla kiba dei peit ban pyndonkam ia ki jingmyntoi  na ka prokram bamboo mapping jong ka Sorkar Pdeng kaba dang ïaid shakhmat. U la ong ba ka mapping katkum ka jingstad science ia ki jingdon jingem ba iadei bad ki siej kan iarap ban pynkhlain ia ka jingkyntiew ia ki kam ba iadei bad ki siej, kan pynsuk ia ka jingthmu kaba kham bha ia ki jingdon jingem, kan kyntiew ia ki kam bad kan wanrah ia ki lad kamai jakpoh kiba lah ban iaineh ha kylleng ka thain.

U Dr. Jitendra Singh u la kyntu ruh ban pynbha shuh shuh ia ka jinglong kaba thikna bad kaba iadei bad ka jaka ha ka rukom ai jingtip lypa jong ka NESAC shaphang ka jingshlei um khnang ba ki briew kiba sah ha ki jaka ba kham don jingma kin ioh ia ki jingtip kiba kham biang por bad kiba lah ban pyntrei. U la pynshlur ruh ïa ka Centre ban ïatreilang bad ki Sorkar Jylla na ka bynta ban pdiang kham bha ïa ki rukom lum um kiba jop, kynthup ïa ka sienjam ba la pyntreikam ha Ramakrishna Mission, Cherrapunjee, ban kyntiew ïa ka jingshngaiñ jong ka um ha ka samoi kaba jrong ha ka thaiñ.

Haba ban jur ïa ka jingdonkam ba kongsan jong ki teknoloji geospatial, u Dr. Jitendra Singh u la ong ba ka bor treikam jong ka NESAC kidei ban bteng ban kyrshan ïa ki jingthmu ba kongsan jong ka ri ha ki thaiñ khappud kiba kongsan katba dang pynneh ïa ka jingïatreilang kaba jan bad ki tnad ba dei khmih. U la pynshlur ruh ïa ka Centre ban pynkhlaiñ ïa ka GeoTourism ‘ManzilNE’ dashboard da kaba pynsuk ïa ka jingïashim bynta kaba kham bun jong ki riew shimet ha ka kam jngoh kai pyrthei, kaba plie lad ïa ka teknoloji ban kyntiew ïa ka kolshor ba riewspah jong ka thaiñ Shatei Lammihngi.

U Myntri u la kyntu ruh ïa ka NESAC ban pynkhlain ïa ka jingïatreilang bad ki tnad sorkar pdeng, ki sorkar jylla, ki jaka wad bniah, ki riewshemphang, ki start-up, ki karkhana shimet bad kiwei kiwei ki nongïashim bynta ban pynsted ïa ka jingpdiang ïa ki application ba iadei bad ka kam haw haw ha kylleng ki bynta. U la ong ba ka jingiatreilang kaba kham bha kan pynthikna ba ki jingsaindur thymmai katkum ka jingstad saian kin kylla sha ki lad ki lynti kiba lah ban pynheh bad kiba don jingktah kiba lah ban weng ia ki jingeh ha ka roi ka par jong ka thain.

U Dr. Jitendra Singh u la ong ba ka thain shatei lammihngi ka la kylla long kawei na ki jaka ba khlain tam jong ka roi ka par jong ka ri India hapoh ka jingialam jong u Myntri Rangbah duh ka ri u Narendra Modi, ha kaba ka science bad technology ki paw kum ki nongplie lad ba kongsan jong ka roi ka par kaba kynthup lang ia baroh. U la pynpaw ka jingshaniah ba ka NESAC, lyngba ka jingpyniar jong ka ïa ki prokram ba pynshong nongrim ha ka jingpyntreikam bad ki sienjam ba kongsan, kan dang ïai bteng ban leh ïa ka bynta kaba kongsan ha kaba pynkhlain ïa ka jingsynshar, ban kyntiew ïa ka jinglah ban ïakhun pyrshah ïa ki jingjia lynshop ki bor ka mariang, ban kyrshan ïa ka jingiada ia ki jingdon jingem kiba lah ban iaineh bad kyntiew ïa ka jingthmu jong ka thaiñ shatei lammihngi kaba riewspah bad kaba la pynkup bor ha ka liang ka teknoloji.

 

 

*****

(रिलीज़ आईडी: 2284629) आगंतुक पटल : 8