Ka Department of Administrative Reforms and Public Grievances (DARPG), ryngkat ka jingiatreilang bad ka sorkar Meghalaya, ka pynlong ia ka National Conference kaba ar sngi halor ka phang pdeng "NextGen Administrative & e-Gov Reforms" ha ka 13–14 tarik Naitung 2026 ha Shillong, Meghalaya. U Dr. Jitendra Singh, Myntri Khynnah ka sorkar pdeng (Independent Charge) ïa ka Science and Technology, Earth Sciences, bad Myntri Khynnah ha ka Prime Minister's Office, Personnel, Public Grievances and Pensions, Atomic Energy and Space, bad u Conrad K. Sangma, u Myntri Rangbah ka Jylla Meghalaya, kin ai jingkren ha ka jingïalang plie pyrda ia ka National Conference. Kane ka jingialang kan wanrah lang ia ki nongthaw polisi, ki nongpyniaid kam, ki riewshemphang ha ka teknoloji bad ki nongtreikam ha ka synshar khadar na kylleng ka ri ban iamir jingmut halor ka lawei jong ka synshar paidbah bad ka jingsynshar lyngba ki lad digital.

Ka Nivedita Shukla Verma, Secretary, DARPG, DoPPW & MDoNER, Sorkar India, bad u Dr. Shakil P. Ahammed, Chief Secretary, Sorkar Meghalaya, kin ai jingkren ha ka jingialang plie pyrda.

La khmih lynti ba palat 300 ngut ki nongmihkhmat, kynthup ïa ki heh ophisar na ka sorkar pdeng bad sorkar jylla, ki District Collector, ki nongthaw polisi, ki riewshemphang ha kane ka kam, ki nongmihkhmat na ki jaka pule bad ki nongtrei ha ka synshar paidbah, kin ïashim bynta ha kane ka Conference.

Ha kane ka jingialang kaba ar sngi kan don ki jingpyni ia ki sienjam ba la ioh khusnam jong u Myntri Rangbahduh ka ri (2023 & 2024), ki khusnam jong ka ri na ka bynta ki projek kiba la jop ha ka e-Governance, ki rukom treikam ba bha tam jong ka sorkar Meghalaya, bad ki State Collaborative Initiatives (SCI) ba la iarap da ka DARPG na ka thain shatei lammihngi. Ki jingpyni kin kynthup ia ki phang bapher bapher kynthup ia ka jingkyntiew ba pura ia ki distrik, ka jingsynshar lyngba ki lad digital, ka jingshngain ha ka kam cyber, ka jingpynpoi ia ki lad jingshakri na ka bynta ki paidbah, ka koit ka khiah, ka pule puthi, ka jingiada ia ki nongthied mar, ka kam bank, ka jingsynshar ha ki jaka sor, ka jingpynroi ia ki jaka nongkyndong bad ka jingsynshar kaba pyndonkam da ka teknoloji.

Ka jingialang kan sdang da ka jingialang kaba kyrpang halor ki rukom treikam ba bha tam jong ka sorkar Meghalaya, kaba pyni ia ki sienjam pyniaid kam ba thymmai jong ka Jylla bad ki jingpynkylla kiba phaikhmat sha ki nongshong shnong kiba la pynkhlain ia ka jingai jingshakri bad ka jingtreikam kaba paka ha ka rukom synshar.

Hadien kane yn bud sa ka jingïalang halor ki sienjam ba la ïoh khusnam jong u Myntri Rangbahduh (2023 & 2024), kaba pyni ïa ki jingsaindur thymmai ba long nuksa ha ki distrik bad ki rukom synshar kiba la pyni ïa ka jingktah kaba lah ban iohi ha ki bynta kum ka roi ka par ba pura, ka Pule Puthi, ki lad kamai jakpoh ha ki jaka nongkyndong bad ka Prokram Aspirational District.

Ka jingïalang kaba lai kaba pynshong nongrim ha ki National Awards for e-Governance, ki Projek kiba jop ha u snem 2026 kan pyni ïa ki sienjam ba thymmai jong ka jingsynshar lyngba ki lad digital na ki tnad treikam jong ka sorkar pdeng, ki sorkar jylla, ki bor ba dei peit ia ki jaka sor bad ki jaka treikam paidbah. Ki projek kin pyni ia ka jingpyndonkam ba wanrah jingkylla ia ki teknoloji ba dang mih ha ki kam kum ka jingsynshar ha ki jaka sor, ka koit ka khiah, ka kam Bank lyngba ki lad digital, ka jingpyniaid ia ki jingleit pilkrim, ka Panchayati Raj, ka jingiada ia ki nongpyndonkam bad ka jingshngain ha ka kam cyber, da kaba wanrah ia ki rukom treikam kiba lah ban pyniar kiba lah ban pyndonkam ha kylleng ka ri.

Ka jingialang kaba kyrpang halor ka roi ka par jong ka thain shatei lammihngi kan pynleit jingmut ha ki sienjam wanrah jingkylla ba la ialam da ka Tnad Development of North Eastern Region (DoNER) bad ka North Eastern Council (NEC), da kaba pyni ia ki sienjam ba thymmai ha ka jingkyntiew ia ki kam ba iadei bad ki siej bad u dieng agar, ka kam jngohkai pyrthei, ki jingdon jingem ha ka thain, ka jingbuddien ia ki projek bad ka jingiatreilang hapdeng ki jylla na ka bynta ka roi ka par kaba iaineh.

Ha kane ka Conference yn don ruh ka jingïalang kaba kyrpang halor ka DARPG/State Collaborative Initiative (SCI)- ki rukom treikam ba bha tam na ka thaiñ shatei lammihngi, ha kaba yn pyni ïa ki projek ba thymmai ha ka kam synshar khaddar na Meghalaya, Mizoram bad Nagaland. Kine ki sienjam ki pyni ia ka jingai jingshakri na ka bynta ki paidbah kaba pyndonkam da ka teknoloji, ki rukom peit bniah ia ki projek, ki rynsan ai jingsynshar lyngba ki lad digital, ki lad pynbeit ia ki jingeh jong ki nongpyndonkam bad ki lad pynbeit ia ka jingshngain jong ki paidbah ba la pynwandur da ka jingkyrshan ka DARPG ban pynkhlain ia ki bor synshar ha ka thain shatei lammihngi.

Ka jingialang ka thmu ban ai ka rynsan ha ka ri baroh kawei ban iasam ia ki rukom synshar ba thymmai, ban kyntiew ia ka jingiatreilang hapdeng ki Jylla bad ki Union Territory, bad ban kyntiew ia ka jingpdiang ia ki jingpynkylla ha ka rukom synshar na ka bynta ka pateng ban wan. Ka jingialang ka thmu ban pynsted ia ka jingkylla digital ha ka jingsynshar, ban pynkhlain ia ka jingai jingshakri kaba pynshong nongrim ha ki nongshong shnong, ban pynshlur ia ka jingpyndonkam ia ki rukom synshar kiba jop, bad ban pynsuk ia ka jingiasam jingtip halor ki teknoloji kiba dang mih bad ki rukom treikam kiba bha tam na ka bynta ban tei ia ka jingsynshar paidbah kaba shai, kaba thikna bad kaba shimkhia.

****