محکمۂ انتظامی اصلاحات و عوامی شکایات (ڈی اے آر پی جی)، حکومتِ میگھالیہ کے اشتراک سے 13 اور 14 جولائی 2026 کو شیلانگ، میگھالیہ میں ’نئی نسل کی انتظامی اور برقی حکمرانی کی اصلاحات‘ کے موضوع پر دو روزہ قومی کانفرنس کا انعقاد کر رہا ہے۔ مرکزی وزیر مملکت (آزادانہ چارج) برائے سائنس و ٹیکنالوجی اور ارضیاتی علوم نیز وزیر مملکت برائے وزیر اعظم کا دفتر، عملہ، عوامی شکایات و پنشن، جوہری توانائی اور خلائی امور، ڈاکٹر جتیندر سنگھ اور میگھالیہ کے وزیر اعلیٰ جناب کونراڈ کے سنگما قومی کانفرنس کے افتتاحی اجلاس سے خطاب کریں گے۔ اس کانفرنس میں ملک بھر سے پالیسی ساز، منتظمین، تکنیکی ماہرین اور نظم و نسق سے وابستہ ماہرین یکجا ہوں گے اور عوامی انتظامیہ اور رقمی حکمرانی کے مستقبل پر غور و خوض کریں گے۔

حکومتِ ہند میں ڈی اے آر پی جی، محکمۂ پنشن و پنشن یافتگان کی بہبود اور شمال مشرقی خطے کی ترقی کی وزارت کی سکریٹری محترمہ نویدیتا شکلا ورما اور حکومتِ میگھالیہ کے چیف سکریٹری ڈاکٹر شکیل پی احمد بھی افتتاحی اجلاس سے خطاب کریں گے۔

مرکزی اور ریاستی حکومتوں کے اعلیٰ افسران، ضلع کلکٹروں، پالیسی سازوں، متعلقہ شعبوں کے ماہرین، تعلیمی اداروں کے نمائندوں اور عوامی انتظامیہ سے وابستہ ماہرین سمیت 300 سے زائد مندوبین کی کانفرنس میں شرکت متوقع ہے۔

دو روزہ کانفرنس میں وزیر اعظم ایوارڈ یافتہ اقدامات (2023 اور 2024)، برقی حکمرانی کے قومی ایوارڈ یافتہ منصوبوں، حکومتِ میگھالیہ کے بہترین طریقۂ کار اور شمال مشرقی خطے میں ڈی اے آر پی جی کے تعاون سے جاری ریاستی اشتراکی اقدامات (ایس سی آئی) پر پیشکشیں کی جائیں گی۔ ان پیشکشوں میں اضلاع کی ہمہ گیر ترقی، رقمی حکمرانی، سائبر تحفظ، عوامی خدمات کی فراہمی، صحت، تعلیم، صارفین کا تحفظ، بینک کاری، شہری نظم و نسق، دیہی ترقی اور ٹیکنالوجی سے تقویت یافتہ حکمرانی سمیت متنوع موضوعات کا احاطہ کیا جائے گا۔

کانفرنس کا آغاز حکومتِ میگھالیہ کے بہترین طریقۂ کار کے لیے مخصوص اجلاس سے ہوگا، جس میں ریاست کے اختراعی حکمرانی کے اقدامات اور شہریوں پر مرکوز ان اصلاحات کو اجاگر کیا جائے گا، جن سے خدمات کی فراہمی اور انتظامی کارکردگی مضبوط ہوئی ہے۔

اس کے بعد وزیر اعظم ایوارڈ یافتہ اقدامات (2023 اور 2024) پر ایک اجلاس منعقد ہوگا، جس میں ضلعی سطح کی مثالی اختراعات اور نظم و نسق کے ایسے نمونے پیش کیے جائیں گے جنہوں نے ہمہ گیر ترقی، تعلیم، دیہی روزگار و معاش اور امنگوں والے اضلاع کے پروگرام جیسے شعبوں میں قابلِ پیمائش اثرات مرتب کیے ہیں۔

تیسرا اجلاس برقی حکمرانی کے قومی ایوارڈ 2026 کے انعام یافتہ منصوبوں پر مبنی ہوگا، جس میں وزارتوں، ریاستی حکومتوں، شہری مقامی اداروں اور عوامی اداروں کے جدید ترین رقمی حکمرانی کے اقدامات پیش کیے جائیں گے۔ یہ منصوبے شہری نظم و نسق، صحت نگہداشت، رقمی بینک کاری، زیارت گاہوں کے انتظام، پنچایتی راج، صارفین کے تحفظ اور سائبر تحفظ جیسے شعبوں میں ابھرتی ہوئی ٹیکنالوجیوں کے انقلابی استعمال کو اجاگر کریں گے اور ملک بھر میں اپنائے جانے کے قابل قابلِ توسیع نمونے پیش کریں گے۔

شمال مشرقی خطے کی ترقی کے لیے مخصوص ایک اجلاس میں وزارتِ ترقیٔ شمال مشرقی خطہ (ڈونر) اور شمال مشرقی کونسل (این ای سی) کی قیادت میں جاری انقلابی اقدامات پر توجہ مرکوز کی جائے گی۔ اس میں بانس اور عود کی قدر زنجیروں، سیاحت، علاقائی بنیادی ڈھانچے، منصوبوں کی نگرانی اور پائیدار ترقی کے لیے بین ریاستی تعاون کے شعبوں میں اختراعی اقدامات کو اجاگر کیا جائے گا۔

کانفرنس میں شمال مشرقی خطے کے ڈی اے آر پی جی/ریاستی اشتراکی اقدام (ایس سی آئی) کے تعاون سے اپنائے گئے بہترین طریقۂ کار پر ایک خصوصی اجلاس بھی منعقد ہوگا، جس میں میگھالیہ، میزورم اور ناگالینڈ کے اختراعی حکمرانی کے منصوبے پیش کیے جائیں گے۔ ان اقدامات میں ٹیکنالوجی کی مدد سے عوامی خدمات کی فراہمی، منصوبوں کی نگرانی کے نظام، رقمی حکمرانی کے پلیٹ فارم، صارفین کی شکایات کے ازالے کے طریقۂ کار اور عوامی تحفظ کے لیے تیار کردہ حل شامل ہیں۔ یہ اقدامات شمال مشرقی خطے میں نظم و نسق کی صلاحیتوں کو مضبوط بنانے کے لیے ڈی اے آر پی جی کے تعاون سے تیار کیے گئے ہیں۔

اس کانفرنس کا مقصد اختراعی حکمرانی کے بہترین طریقۂ کار کے تبادلے، ریاستوں اور مرکز کے زیر انتظام علاقوں کے درمیان تعاون کو فروغ دینے اور نئی نسل کی انتظامی اصلاحات کو اپنانے کے لیے ایک قومی پلیٹ فارم فراہم کرنا ہے۔ کانفرنس کا مقصد نظم و نسق میں رقمی تبدیلی کی رفتار تیز کرنا، شہریوں پر مرکوز عوامی خدمات کی فراہمی کو مضبوط بنانا، کامیاب حکمرانی کے نمونوں کو دیگر مقامات پر اپنانے کی حوصلہ افزائی کرنا اور ایک شفاف، مؤثر اور جواب دہ عوامی انتظامیہ کی تشکیل کے لیے ابھرتی ہوئی ٹیکنالوجیوں اور بہترین طریقۂ کار سے متعلق علم و تجربات کے تبادلے کو آسان بنانا ہے۔

*****

ش ح۔ ش ا ر۔ ول

Uno-9853­