امور داخلہ اور امدادِ باہمی کے مرکزی وزیر جناب امت شاہ نے آج احمد آباد، گجرات میں احمد آباد میونسپل کارپوریشن کے 'مشن 5 ملین درخت' کے تحت بڑے پیمانے پر شجرکاری پروگرام کا افتتاح کیا اور مختلف ترقیاتی منصوبوں کا افتتاح اور سنگ بنیاد رکھا۔ اس موقع پر گجرات کے وزیر اعلیٰ جناب بھوپیندر پٹیل اور کئی دیگر معززین بھی موجود تھے۔

مجمع سے خطاب کرتے ہوئے، جناب امت شاہ نے کہا کہ صرف گاندھی نگر لوک سبھا حلقے میں ہی آج شہریوں کی جانب سے ایک کروڑ سے زائد درخت لگائے گئے ہیں۔ اس کے علاوہ پورے احمد آباد شہر میں 50 لاکھ درخت لگائے گئے ہیں۔ انہوں نے کہا کہ اس مہم کا مقصد ماحول کو سرسبز بنانا، صاف ہوا اور خالص پانی کو یقینی بنانا، اور ایک اعلیٰ معیار کی، رہنے کے قابل زمین اور دھرتی کو محفوظ رکھنا ہے۔ جناب شاہ نے کہا کہ 1.25 کروڑ درخت لگانے کی مہم محض ایک نعرے سے بدل کر اب ایک عوامی تحریک کی شکل اختیار کر چکی ہے۔ جناب شاہ نے کہا کہ وزیر اعظم جناب نریندر مودی کی 'ایک پیڑ ماں کے نام' کی اپیل تیزی سے ایک عوامی تحریک بن چکی ہے، اور پورا ملک ان کے 'ترقی کے ساتھ عوام اور کرۂ ارض' کے اصول کو اپنا رہاہے۔

جناب امت شاہ نے کہا کہ سینٹرل آرمڈ پولیس فورس (سی اے پی ایف) نے گذشتہ سات برسوں میں ملک بھر میں سات کروڑ سے زیادہ درخت لگائے ہیں۔ انہوں نے مزید کہا کہ دو دن قبل دہلی میں بڑے پیمانے پر درخت لگانے کی مہم بھی چلائی گئی تھی۔ انہوں نے کہا کہ لگائے گئے درخت ہندوستان کے ماحولیاتی حالات کے مطابق ہیں اور ان میں 100 سال سے زیادہ عرصہ حیات والے درخت بھی شامل ہیں۔ جناب شاہ نے کہا کہ شجرکاری مہم کا مقصد قدرتی طور پر احمد آباد کو ایک سرسبز شہر میں تبدیل کرنا ہے۔ انہوں نے بتایا کہ گاندھی نگر خطہ میں پہلے 12 آکسیجن پارکس تھے، جبکہ آج 61 نئے آکسیجن پارکس کا افتتاح کیا گیا، جس سے گاندھی نگر لوک سبھا حلقہ میں کل تعداد 73 ہوگئی۔ اسی طرح احمد آباد میونسپل کارپوریشن نے ایک ہی دن میں 101 آکسیجن پارکس کا افتتاح کیا۔

مرکزی وزیر داخلہ اور تعاون کے وزیر نے کہا کہ احمد آباد میونسپل کارپوریشن نے ایک سائنسی پہل کے تحت ایک خصوصی موٹر گاڑی سروس متعارف کرائی ہے تاکہ درخت لگانے کے خواہشمند شہریوں کے گھروں تک براہ راست پودے پہنچائے جائیں۔ انہوں نے کہا کہ عوامی شمولیت کے بغیر کوئی بھی مہم کامیاب نہیں ہو سکتی۔ انہوں نے کہا کہ درخت لگانے کی اس مہم سے آنے والے برسوں میں احمد آباد کے درجہ حرارت میں دیگر شہروں کے مقابلے میں کم از کم 5 فیصد کمی آئے گی۔ جناب شاہ نے کہا کہ وزیر اعظم مودی کا نعرہ، "ایک پیڑ ماں کے نام،" ماحولیاتی تحفظ کا واحد راستہ ہے۔ انہوں نے ہر شہری پر زور دیا کہ وہ ایک درخت لگائیں اور آنے والی نسلوں کے لیے اوزون کی تہہ کو محفوظ رکھنے میں مدد کریں۔ انہوں نے یہ بھی کہا کہ سانند، گاندھی نگر، کلول اور احمد آباد شہر نے مل کر گاندھی نگر لوک سبھا حلقہ میں سبز احاطہ میں 11.23 فیصد اضافہ کیا ہے اور اسے 2029 تک 20 فیصد تک بڑھانے کا عزم کیا ہے۔

جناب امت شاہ نے کہا کہ گاندھی نگر لوک سبھا حلقہ میں 20 فیصد گرین کور حاصل کرنا ایک اجتماعی ذمہ داری ہے۔ انہوں نے نوٹ کیا کہ گاندھی نگر میں تمام لوک سبھا حلقوں کے مقابلے میں سب سے زیادہ سولر روف ٹاپ تنصیبات ہیں۔ انہوں نے احمد آباد اور گاندھی نگر کے باشندوں پر زور دیا کہ وہ اس امر کو یقینی بنائیں کہ ایک بھی گھر، اپارٹمنٹ یا چھت شمسی چھتوں کی تنصیب کے بغیر باقی نہ رہے۔ انہوں نے کہا کہ آج 22 ترقیاتی منصوبوں کا افتتاح اور سات منصوبوں کا سنگ بنیاد رکھا گیا۔ جناب شاہ نے مزید کہا کہ 325 نئی اے ایم ٹی ایس اور بی آر ٹی ایس بسیں کاربن کے اخراج کو کم کرنے میں مدد کریں گی اور آج کے افتتاح کے بعد احمد آباد میں ایسی کوئی بسیں نہیں رہیں گی جو آلودگی کا باعث ہوں۔

مرکزی وزیر داخلہ نے کہا کہ گاندھی نگر لوک سبھا حلقے میں اب تک 28,492 کروڑ روپے کے ترقیاتی منصوبے مکمل ہو چکے ہیں۔ ان میں گھاٹ لوڈیا میں 7,030 کروڑ روپے، ویجل پور میں 2,670 کروڑ روپے، سابرمتی میں 2,149 کروڑ روپے، نارن پورہ میں 3,262 کروڑ روپے، سانند میں 2,800 کروڑ روپے، گاندھی نگر نارتھ میں 4,300 کروڑ روپے اور کلول میں 2,003 کروڑ روپے کے منصوبے شامل ہیں۔ احمد آباد شہر اور گاندھی نگر لوک سبھا حلقے کے لوگوں سے اپیل کرتے ہوئے، جناب شاہ نے ان پر زور دیا کہ وہ اپنی ہاؤسنگ سوسائٹیوں کا ایک کونہ بھی درخت کے بغیر نہ چھوڑیں۔ انہوں نے کہا کہ آنے والی نسلوں کے لیے ایک رہنے کے قابل کرہ ارض بنانے کی خاطر درخت لگانا سب کا اجتماعی ہدف ہونا چاہیے۔ انہوں نے شہریوں پر یہ بھی زور دیا کہ وہ اس امر کو یقینی بنائیں کہ ہر گھر میں سولر روف ٹاپ نصب ہو۔

**********

(ش ح –م ف)

U.No:9854