કેન્દ્રીય શ્રમ અને રોજગાર અને યુવા બાબતો અને રમતગમત મંત્રી, ડૉ. મનસુખ માંડવિયા, 14મી જુલાઈ 2026ના રોજ એમ્પ્લોઈઝ સ્ટેટ ઈન્સ્યોરન્સ કોર્પોરેશન (ESIC) હોસ્પિટલ, સનથનગર, તેલંગાણાથી દેશભરમાં સાત એમ્પ્લોઈઝ સ્ટેટ ઈન્સ્યોરન્સ (ESI) હેલ્થકેર પ્રોજેક્ટ્સનું ઉદ્ઘાટન કરશે. કેન્દ્રીય મંત્રી સનથનગર સ્થિત ESIC હોસ્પિટલના નવા આઉટપેશન્ટ ડિપાર્ટમેન્ટ (OPD) બ્લોકનું રૂબરૂ ઉદ્ઘાટન કરશે, અને છ પ્રોજેક્ટ્સ અપગ્રેડેડ 200-બેડવાળી ESIC હોસ્પિટલ, બેલટોલા, આસામ; 100-બેડવાળી ESIC હોસ્પિટલ, શ્રીપેરુમ્બુદુર, તમિલનાડુ; ESIS હોસ્પિટલ, રાજમહેન્દ્રવરમ, આંધ્રપ્રદેશ; ESI ડિસ્પેન્સરી (દવાખાનું) અને શાખા કચેરી, સુરેન્દ્રનગર, ગુજરાત; ESI ડિસ્પેન્સરી અને શાખા કચેરી, ઉદ્યોગ નગર, કોટા; અને ESI ડિસ્પેન્સરી, ભવાની મંડી, રાજસ્થાનનું વર્ચ્યુઅલી ઉદ્ઘાટન કરશે. અંદાજે ₹668 કરોડના મૂલ્યની આ તબીબી સુવિધાઓ દેશભરના આશરે 53 લાખ લાભાર્થીઓની આરોગ્ય સંભાળની જરૂરિયાતોને પૂરી કરશે.

કેન્દ્રીય શ્રમ અને રોજગાર અને સૂક્ષ્મ, લઘુ અને મધ્યમ ઉદ્યોગ રાજ્ય મંત્રી સુશ્રી શોભા કરંદલાજે પણ આ કાર્યક્રમમાં હાજરી આપશે. કાર્યક્રમના ભાગરૂપે, ડૉ. માંડવિયા રાષ્ટ્ર નિર્માણમાં તેમની ભૂમિકાને માન્યતા આપીને, તેલંગાણાના સનથનગર સ્થિત ESIC હોસ્પિટલમાં OPD બ્લોકના વિકાસમાં યોગદાન આપનારા બાંધકામ કામદારોનું સન્માન કરશે. તેઓ કામદારોના કલ્યાણ માટે સરકારની પ્રતિબદ્ધતાને પુનરોચ્ચારતા, ESI લાભાર્થીઓને રોકડ લાભોનું વિતરણ પણ કરશે.

ESIC હોસ્પિટલ, સનથનગર, તેલંગાણા

સનથનગર સ્થિત ESIC મેડિકલ કોલેજ અને હોસ્પિટલ ખાતેનો નવો OPD બ્લોક એક સીમાચિહ્નરૂપ હેલ્થકેર સુવિધા છે જે હૈદરાબાદ, મેડચલ-મલકાજગિરી, સંગારેડ્ડી, રંગારેડ્ડી અને મહબૂબનગર જિલ્લાઓને આવરી લેતા તેલંગાણાના 12,30,183 વીમાકૃત વ્યક્તિઓ અને લાભાર્થીઓને આધુનિક, વ્યાપક આઉટપેશન્ટ સેવાઓ પ્રદાન કરશે.

રૂ. 211.13 કરોડના કુલ ખર્ચે 43,611.04 ચોરસ મીટરના બિલ્ટ-અપ એરિયામાં ફેલાયેલી આ સુવિધામાં જનરલ મેડિસિન, ENT, ડેન્ટિસ્ટ્રી, ઓબ્સ્ટેટ્રિક્સ એન્ડ ગાયનેકોલોજી, ઓપ્થેલ્મોલોજી, ઓર્થોપેડિક્સ, સાયકિયાટ્રી, ડર્મેટોલોજી, પલ્મોનોલોજી, પેડિયાટ્રિક્સ, જનરલ સર્જરી અને આયુષ (AYUSH) માટેના OPD સંકુલ આવેલા છે, આ ઉપરાંત ફિઝિકલ મેડિસિન એન્ડ રિહેબિલિટેશન, રેડિયોલોજી, યોગા, 180 જનરલ બેડ (ત્રણ 60-બેડના વોર્ડમાં), 25 ઇન્ટેન્સિવ કેર યુનિટ (ICU) અને 20 નિયોનેટલ ઇન્ટેન્સિવ કેર યુનિટ (NICU) બેડ, મેડિકલ સ્ટોર્સ અને ક્લિનિકલ લેક્ચર થિયેટરનો સમાવેશ થાય છે.

આ ઉદ્ઘાટન તેલંગાણાના વ્યાપક ESI હેલ્થકેર ઇકોસિસ્ટમને વધુ મજબૂત બનાવશે, જે સૌપ્રથમ હૈદરાબાદ અને સિકંદરાબાદના ટ્વીન સિટીમાં તત્કાલીન સંયુક્ત આંધ્રપ્રદેશ અને તેલંગાણા રાજ્યો માટે અમલમાં મૂકવામાં આવ્યું હતું, જેમાં સંસ્થાઓને તારીખ 30.03.1975 થી ESI એક્ટના દાયરામાં લાવવામાં આવી હતી, અને ત્યારબાદના વર્ષોમાં અન્ય ભૌગોલિક વિસ્તારોમાં વિસ્તૃત કરવામાં આવી હતી. આજે, ESIC 2.0 સુધારાઓ હેઠળ, આ યોજના તેલંગાણાના તમામ 33 જિલ્લાઓમાં (9 જૂના જિલ્લાઓમાંથી વિભાજિત) અમલમાં મૂકવામાં આવી છે, જે રાજ્યમાં 19,15,700 વીમાકૃત વ્યક્તિઓ અને 74,32,916 લાભાર્થીઓને તેની સામાજિક સુરક્ષાની છત્રછાયા વિસ્તારી રહી છે.

ESIC હોસ્પિટલ, બેલટોલા, આસામ

બેલટોલામાં આવેલી ESIC હોસ્પિટલ આસામ અને મેઘાલયના 47 જિલ્લાઓ તેમજ ત્રિપુરા, મિઝોરમ, મણિપુર, નાગાલેન્ડ અને અરુણાચલ પ્રદેશના 41 જિલ્લાઓની જરૂરિયાતો પૂરી કરે છે. આ સુવિધા 3.42 લાખ વીમાકૃત વ્યક્તિઓ અને કુલ આશરે 13.27 લાખ લાભાર્થીઓને આવરી લે તેવી અપેક્ષા છે.

ESIC હોસ્પિટલ, શ્રીપેરુમ્બુદુર, તમિલનાડુ

100-બેડવાળી ESIC હોસ્પિટલ શ્રીપેરુમ્બુદુર ખાતે આવેલી છે, જે ભારતના અગ્રણી મેન્યુફેક્ચરિંગ અને ઇલેક્ટ્રોનિક્સ હબ તરીકે ઉભરી આવ્યું છે. હોસ્પિટલમાં OPD, ઇમરજન્સી, લેબર રૂમ, ઓપરેશન થિયેટર, ICU, IPD, એક્સ-રે અને લેબ ફાર્મસી જેવી સુવિધાઓ ઉપલબ્ધ થશે, જેનાથી કાંચીપુરમ અને તિરુવલ્લુર જિલ્લાના 5.5 લાખથી વધુ વીમાકૃત વ્યક્તિઓ માટે તબીબી સુવિધાઓ મેળવવાનું અનુકૂળ બનશે.

ESIS હોસ્પિટલ, રાજમહેન્દ્રવરમ, આંધ્રપ્રદેશ

રાજમહેન્દ્રવરમ ખાતેની ESIS હોસ્પિટલ 131190 વીમાકૃત વ્યક્તિઓ અને કુલ આશરે 252717 લાભાર્થીઓને સેવા આપશે. તેમાં દર્દીઓની ભારે ભીડને સંભાળવા માટે 26 સમર્પિત આઉટપેશન્ટ ડિપાર્ટમેન્ટ રૂમ અને અન્ય મુખ્ય સુવિધાઓની સાથે ત્રણ અત્યાધુનિક મોડ્યુલર ઓપરેશન થિયેટર છે.

ESI ડિસ્પેન્સરી અને શાખા કચેરી, સુરેન્દ્રનગર, ગુજરાત

સુરેન્દ્રનગર જિલ્લામાં ESIC યોજના હેઠળ આશરે 9,192 વીમાકૃત વ્યક્તિઓ આવરી લેવાયેલા છે. ESI ડિસ્પેન્સરી અને શાખા કચેરી આશરે 35,000 લાભાર્થીઓને ESICની તબીબી સંભાળ અને સામાજિક સુરક્ષા લાભો મેળવવા માટે સક્ષમ બનાવશે. આ સંકલિત સુવિધા એક જ છત નીચે પ્રાથમિક આરોગ્ય સંભાળ સેવાઓ, તબીબી પરામર્શ, આવશ્યક દવાઓ અને અન્ય તબીબી લાભો પ્રદાન કરશે.

ESI ડિસ્પેન્સરી અને શાખા કચેરી, ઉદ્યોગ નગર, કોટા, રાજસ્થાન

ESI ડિસ્પેન્સરી અને શાખા કચેરી, કોટા, કોટાના ઔદ્યોગિક પટ્ટામાં અને તેની આસપાસ રહેતા અને કામ કરતા વીમાકૃત કામદારો અને તેમના આશ્રિતોની મોટી વસ્તીની જરૂરિયાતો પૂરી કરશે. આ સુવિધા તેના કાર્યક્ષેત્રમાં 1,500 થી વધુ નોકરીદાતાઓ, અને આશરે 75,000 વીમાકૃત વ્યક્તિઓ અને તેમના 291000 આશ્રિતોને સેવા આપશે.

ESI ડિસ્પેન્સરી, ભવાની મંડી, રાજસ્થાન

આ સુવિધા ભવાની મંડીના ઔદ્યોગિક ક્લસ્ટરના કામદારો માટે સ્થાપવામાં આવી છે, જે રાજસ્થાનના મુખ્ય ટેક્સટાઇલ કેન્દ્રોમાંનું એક છે. આ ESIS ડિસ્પેન્સરીની સ્થાપના આસપાસના વિસ્તારમાં રહેતા આશરે 800 નોકરીદાતાઓ કે જેમાં 27,715 વીમાકૃત વ્યક્તિઓ અને તેમના આશરે 107535 આશ્રિતોનો સમાવેશ થાય છે તેમને આરોગ્ય સંભાળ સેવાઓ પ્રદાન કરશે.

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com