ભારતના ઉપરાષ્ટ્રપતિ શ્રી સી. પી. રાધાકૃષ્ણનને આજે ઉપરાષ્ટ્રપતિ ભવન ખાતે કેન્દ્રીય કૃષિ અને ખેડૂત કલ્યાણ તથા ગ્રામીણ વિકાસ મંત્રી શ્રી શિવરાજ સિંહ ચૌહાણ તેમજ કૃષિ અને ખેડૂત કલ્યાણ અને કાપડ મંત્રાલયના વરિષ્ઠ અધિકારીઓ દ્વારા કપાસ ઉત્પાદકતા મિશન (કપાસ કાંતિ) અંગે માહિતગાર કરવામાં આવ્યા હતા.

આ બ્રીફિંગમાં મિશનના ત્રણ મુખ્ય ઘટકોને આવરી લેવામાં આવ્યા હતા: સંશોધન, ટેક્નોલોજી અને શ્રેષ્ઠ ખેતી પદ્ધતિઓ દ્વારા કપાસની ઉત્પાદકતા વધારવી; 'કસ્તૂરી કોટન' (KASTURI Cotton) પ્રમાણપત્ર અને 'કિસાન કપાસ એપ' જેવી પહેલો દ્વારા શ્રેષ્ઠ ગુણવત્તાવાળા કપાસનો સતત પુરવઠો સુનિશ્ચિત કરવો; અને કાપડ ક્ષેત્રમાં ઇનોવેશન અને સસ્ટેનેબિલિટી (ટકાઉપણું) ને પ્રોત્સાહન આપવા માટે નવી પેઢીના કુદરતી રેસાઓને પ્રોત્સાહિત કરવા.

ભારતના કપાસ ઇકોસિસ્ટમને મજબૂત કરવા માટેના મિશનના સર્વગ્રાહી અભિગમને બિરદાવતા, ઉપરાષ્ટ્રપતિએ ઇનોવેશનને વેગ આપવા અને નવી ટેક્નોલોજીઓને સમયસર અપનાવવાની સુવિધા પૂરી પાડવા માટે સમયબદ્ધ મંજૂરી પ્રણાલીની જરૂરિયાત પર ભાર મૂક્યો હતો. એકર દીઠ કપાસની ઉપજ સુધારવાના મહત્વ પર ભાર મૂકતા, તેમણે ઉત્પાદકતા વધારવા અને અગ્રણી કપાસ ઉત્પાદક દેશો વચ્ચેના અંતરને ઘટાડવા માટે સ્પષ્ટ અને માપી શકાય તેવા લક્ષ્યાંકો નક્કી કરવા આહ્વાન કર્યું હતું.

ઉપરાષ્ટ્રપતિએ રેખાંકિત કર્યું હતું કે ભારતે પોતાની વૈશ્વિક સ્પર્ધાત્મકતા મજબૂત કરવી જ જોઈએ અને ગુણવત્તાયુક્ત કપાસ માટેની વધતી જતી સ્થાનિક તેમજ આંતરરાષ્ટ્રીય માંગને પહોંચી વળવા માટે તૈયાર રહેવું જોઈએ. તેમણે મિશન વિશે વ્યાપક લોકજાગૃતિ લાવવા, બજારને અનુકૂળ વ્યૂહરચના અપનાવવા અને વ્યાપક પ્રસાર માટે ટેલિવિઝન ડોક્યુમેન્ટ્રી દ્વારા સફળ પહેલોને હાઇલાઇટ કરવાના મહત્વ પર પણ ભાર મૂક્યો હતો.

SM/BS/JD