પેટ્રોલિયમ અને કુદરતી ગેસ મંત્રાલય તેમજ ભારે ઉદ્યોગ મંત્રાલય અને માર્ગ પરિવહન અને રાજમાર્ગ મંત્રાલય દ્વારા નવી દિલ્હીમાં એક પત્રકાર પરિષદનું આયોજન કરવામાં આવ્યું હતું, જ્યાં ઊર્જા અને ઓટોમોબાઈલ ક્ષેત્રના અગ્રણી નિષ્ણાતોએ E20 ઇથેનોલ-બ્લેન્ડેડ પેટ્રોલ પ્રોગ્રામ પર મીડિયાને સંબોધન કર્યું હતું. એ વાત પર પ્રકાશ પાડવામાં આવ્યો હતો કે ઇથેનોલ બ્લેન્ડિંગ એ એક માપેલી, વૈજ્ઞાનિક રીતે સંચાલિત અને સ્ટેપ-બાય-સ્ટેપ પ્રક્રિયા છે, અને વાહન માલિકોને આશ્વાસન આપવામાં આવ્યું હતું કે E20 ઈંધણ ચિંતાનું કોઈ કારણ નથી.

આ પત્રકાર પરિષદને એન્જિનિયર્સ ઇન્ડિયા લિમિટેડ (EIL) ના પૂર્વ ચેરમેન અને મેનેજિંગ ડિરેક્ટર સુશ્રી વર્તિકા શુક્લા; ટોયોટા કિર્લોસ્કર મોટર (TKM) ના કન્ટ્રી હેડ અને એક્ઝિક્યુટિવ વાઇસ પ્રેસિડેન્ટ શ્રી વિક્રમ ગુલાતી; મારુતિ સુઝુકીના કોર્પોરેટ અફેર્સના સિનિયર એક્ઝિક્યુટિવ ઓફિસર શ્રી રાહુલ ભારતી; હીરો મોટોકોર્પના ચીફ બિઝનેસ ઓફિસર શ્રી આશુતોષ વર્મા; ટીવીએસ મોટર કંપનીના સિનિયર વાઇસ પ્રેસિડેન્ટ શ્રી પ્રસાદ કૃષ્ણન; હ્યુન્ડાઇ મોટર ઇન્ડિયાના એસોસિએટ વાઇસ પ્રેસિડેન્ટ શ્રી પુનીત આનંદ; અને બજાજ ઓટો લિમિટેડના અર્બનાઇટ બિઝનેસના સેલ્સ (નોર્થ એન્ડ ઇસ્ટ) ના સર્કલ હેડ શ્રી મનપ્રીત સિંહ બિન્દ્રાએ સંબોધિત કરી હતી.

ટોયોટા કિર્લોસ્કર મોટરના કન્ટ્રી હેડ અને એક્ઝિક્યુટિવ વાઇસ પ્રેસિડેન્ટ શ્રી વિક્રમ ગુલાતીએ જણાવ્યું હતું કે ઓટોમોટિવ ઉદ્યોગ સૌથી મજબૂત રીતે નિયંત્રિત ક્ષેત્રોમાંનો એક છે, જેમાં વાહનો બજારમાં રજૂ કરતા પહેલા અને પછી સ્વતંત્ર, વૈશ્વિક સ્તરે માન્યતા પ્રાપ્ત એજન્સીઓ દ્વારા સખત પરીક્ષણ અને પ્રમાણપત્રમાંથી પસાર થાય છે. તેમણે ઇથેનોલને ઉચ્ચ કાર્યક્ષમતા ધરાવતું, સ્વચ્છ ઈંધણ ગણાવ્યું હતું, જે 1900ના દાયકાની શરૂઆતથી અને ફોર્મ્યુલા રેસિંગમાં પણ ઉપયોગમાં લેવાય છે. તેમણે ઉમેર્યું હતું કે E20 પર શિફ્ટ થવાનો નિર્ણય જૂના વાહનો પર સખત પરીક્ષણ કર્યા પછી જ લેવામાં આવ્યો હતો, અને સ્પષ્ટ કર્યું હતું કે તાજેતરમાં શરૂ કરાયેલા E85 ડિસ્પેન્સિંગ સ્ટેશનો ખાસ કરીને ફ્લેક્સ-ફ્યુઅલ વાહનો માટે છે, જે ભવિષ્યની નીતિની દિશા દર્શાવે છે.

પરીક્ષણ એજન્સીઓની સ્વતંત્રતા અંગેના પ્રશ્નો પર, શ્રી ગુલાતીએ સ્પષ્ટતા કરી હતી કે પરીક્ષણ પ્રોટોકોલ માત્ર ભારતમાં જ નક્કી કરવામાં આવતા નથી; ભારત UNECE નો પક્ષકાર છે, પરીક્ષણ પ્રક્રિયાઓ આંતરરાષ્ટ્રીય સ્તરે પ્રમાણિત છે, અને પરીક્ષણ એજન્સીઓ માન્યતા પ્રાપ્ત, વૈશ્વિક સ્તરે સુસંગત છે અને નિકાસ કરાયેલા વાહનો માટે પણ પરીક્ષણ કરે છે. તેમણે જણાવ્યું હતું કે આ પ્રોટોકોલ સાથે કોઈ સમજૂતી કરી શકાય નહીં.

મારુતિ સુઝુકીના કોર્પોરેટ અફેર્સના સિનિયર એક્ઝિક્યુટિવ ઓફિસર શ્રી રાહુલ ભારતીએ ગ્રાહકોને "વિશ્વાસનું નિવેદન" આપતાં જણાવ્યું હતું કે E10 માટે ડિઝાઇન કરાયેલા વાહનોનું તમામ માપદંડો પર E20 ઈંધણ સાથે પરીક્ષણ કરવામાં આવ્યું છે, જેમાં ચિંતાનો કોઈ વિષય જણાયો નથી. તેમણે માહિતી આપી હતી કે નાણાકીય વર્ષ 2025-26 માં મારુતિ સુઝુકી દ્વારા સર્વિસ કરાયેલી 2.84 કરોડ કારમાંથી 1.5 કરોડથી વધુ કાર 3 વર્ષથી વધુ જૂની હતી અને તેથી તે E20-પ્રમાણિત ન હતી, તેમ છતાં ફિલ્ડમાંથી કાટ લાગવા (કોરોઝન), ઘસારો અથવા ઘટકોના આયુષ્યને નુકસાન સંબંધિત E20 સંલગ્ન કોઈ સમસ્યા નોંધાઈ નથી.

માઇલેજ પર, શ્રી ભારતીએ જણાવ્યું હતું કે E20 નું કેલરીફિક મૂલ્ય E10 કરતા આશરે 3 થી 3.5% ઓછું છે, અને માઇલેજ પર તેની અસર આ મર્યાદા સુધી જ મર્યાદિત છે. ઉદાહરણ આપતાં તેમણે કહ્યું કે, પ્રતિ લીટર 20 કિમીની માઇલેજ આપતી કાર માટે આ અસર અંદાજે 0.6 કિમી પ્રતિ લીટર જેટલી થાય છે, જ્યારે ટાયરનું દબાણ, ડ્રાઇવિંગ પેટર્ન, ગિયરનો સાચો ઉપયોગ, એક્સિલરેશન, બ્રેકિંગ અને મેઇન્ટેનન્સ જેવા પરિબળો માઇલેજમાં ઘણો મોટો તફાવત લાવે છે. શુદ્ધ પેટ્રોલની સરખામણીમાં ઇથેનોલના કિસ્સામાં બહેતર એક્સિલરેશન, બહેતર એન્ટી-નોકિંગ અને ખૂબ જ ઓછા પ્રદૂષણ દ્વારા માઇલેજના આ નજીવા નુકસાન કરતાં ઘણો વધુ ફાયદો મળે છે.

તેમણે સ્પષ્ટ કર્યું હતું કે વાહનોને E20 ની સુસંગતતા કરતાં ઘણી વધારે સુરક્ષાના પરિબળો (ફેક્ટર્સ ઓફ સેફ્ટી) સાથે ડિઝાઇન કરવામાં આવ્યા છે, અને બજારમાં કોઈ રેટ્રોફિટમેન્ટ કિટ ઓફર કરવામાં આવી રહી નથી, આવા ઉકેલો હાલમાં માત્ર આર એન્ડ ડી (R&D) પૂરતા જ સીમિત છે.

એન્જિનિયર્સ ઇન્ડિયા લિમિટેડ (EIL) ના પૂર્વ ચેરમેન અને મેનેજિંગ ડિરેક્ટર સુશ્રી વર્તિકા શુક્લાએ જણાવ્યું હતું કે ઇથેનોલ બ્લેન્ડિંગ પ્રોગ્રામ તમામ હિતધારકો સાથે વિચાર-વિમર્શ કરીને તૈયાર કરવામાં આવ્યો હતો અને વૈશ્વિક શ્રેષ્ઠ પદ્ધતિઓને અનુરૂપ ઓટોમોટિવ ઉત્પાદકો દ્વારા વૈજ્ઞાનિક પુરાવા અને વ્યાપક પરીક્ષણો દ્વારા તેને સમર્થન આપવામાં આવ્યું છે. તેમણે નોંધ્યું હતું કે E20 ઈંધણ BIS સ્ટાન્ડર્ડ અને BS-VI ઉત્સર્જન ધોરણોને અનુરૂપ છે અને દેશભરમાં રિટેલ આઉટલેટ્સ પર સમાનરૂપે ઉપલબ્ધ છે. તેમણે ઉમેર્યું હતું કે ઘણા દેશો ઘણા વર્ષોથી ઇથેનોલ બ્લેન્ડનો ઉપયોગ કરી રહ્યા છે.

હીરો મોટોકોર્પના ચીફ બિઝનેસ ઓફિસર શ્રી આશુતોષ વર્માએ જણાવ્યું હતું કે વિશ્વના સૌથી મોટા ટુ-વ્હીલર ઉત્પાદકોમાંના એક તરીકે, કંપનીએ વ્યાપક સર્વિસ ડેટાનું વિશ્લેષણ કર્યું છે અને અગાઉના ઈંધણની સરખામણીમાં E20 પર ચાલતા વાહનોમાં નુકસાનની કોઈ વધુ ઘટનાઓ જોવા મળી નથી.

પેનલે E20 પ્રોગ્રામમાં ઉદ્યોગના સામૂહિક વિશ્વાસ અને ગ્રાહકોના પ્રશ્નોના પારદર્શિતા સાથે ઉકેલ લાવવા માટેની તેમની પ્રતિબદ્ધતાનો પુનરોચ્ચાર કરીને સમાપન કર્યું હતું.

SM/JD